Oʻzbekiston Respublikasi Oliy Kengashi qaror qiladi:

1. Surishtiruv organiga, tergovchi, prokuror huzuriga yoki sudga chaqiriladigan guvohlar, jabrlanuvchilar, ekspertlar, mutaxassislar, tarjimonlar va xolislarga oʻz turar joyidan shu chaqirilgan erga kelish va bu erdan qaytib ketish xarajatlari korxonalar, muassasalar va tashkilotlarning xodimlariga xizmat safariga borish va qaytish xarajatlarini qoplash uchun belgilangan tartibda toʻlanadi.

2. Guvohlar, jabrlanuvchilar, ekspertlar, mutaxassislar, tarjimonlar va xolislar oʻzlarining doimiy yashash joylaridan tashqaridagi surishtiruv organiga, tergovchi, prokuror huzuriga yoki sudga chaqirilganda va ular shu chaqirilgan joyda bir sutkadan ortiq turishlari lozim boʻlganda, ularga turar joy binosini ijaraga olganlik uchun qilingan xarajatlar va sutkalik xarajatlar, shuningdek xizmat safari bilan bogʻliq qoʻshimcha xarajatlar korxonalar, muassasalar va tashkilotlar xodimlarining xizmat safari bilan bogʻliq boʻlgan xarajatlarni qoplash uchun belgilangan tartibda va miqdorda toʻlanadi.

3. Ekspertlar, mutaxassislar bajargan ish soatiga besh soʻmdan oʻn soʻmgacha miqdorda haq toʻlanadi. Alohida hollarda, ekspertizaga malakali mutaxassislar jalb qilingan taqdirda, ekspertiza uchun toʻlanadigan haqning miqdori ekspert va mutaxassisning oʻzi bilan kelishib turib yuqorida koʻrsatilgan normadan oshiqcha belgilanishi mumkin, lekin bu miqdor soatiga oʻn besh soʻmdan ortiq boʻlmasligi kerak.

4. Tarjimonlar yozma tarjimaga har 1000 bosma (qoʻlyozma) belgi uchun oʻn soʻm miqdorda haq oladilar.

Sud majlislarida yoki surishtiruv organlari va dastlabki tergov organlari oʻtkazadigan soʻroqlarda tarjimon sifatida qatnashganlik uchun tarjimonlar soatiga uch soʻmdan haq oladilar.

5. Ekspertlar, mutaxassislar va tarjimonlar bajargan ishlari uchun surishtiruv yoki dastlabki tergov organlarining qaroriga yoxud sudning ajrimiga binoan haq oladilar.

Bu haqning miqdori ekspert, mutaxassis yoki tarjimonni chaqirgan idora tomonidan ularning malakasi va ishning murakkabligi, shuningdek bajarilgan ish uchun sarflangan vaqtni hisobga olib belgilanadi.

6. Ushbu Qonunda koʻrsatilgan barcha pullar chaqiruvchi organ tomonidan: jinoiy ishlar boʻyicha — smeta boʻyicha maxsus ajratiladigan mablagʻlar hisobidan, fuqarolik ishlari boʻyicha esa — taraflar beradigan pullar hisobidan toʻlanadi, taraflar ish yuzasidan qilinadigan xarajatlarni toʻlashdan ozod etilgan hollar bundan mustasnodir. Bunday hollarda pullar smeta boʻyicha ajratiladigan mablagʻlar hisobidan toʻlanadi.

7. Oʻzbekiston Respublikasi Jinoyat-protsessual kodeksining 86-moddasiga muvofiq guvohlar, jabrlanuvchilar, ekspertlar, mutaxassislar, tarjimonlar va xolislarga toʻlanadigan mablagʻlar jinoiy ishlar boʻyicha sud xarajatlariga qoʻshiladi va Oʻzbekiston Respublikasi Jinoyat-protsessual kodeksining 87-moddasida belgilangan tartibda undirib olinadi.

Sud tomonidan undirib olingan sud xarajatlari respublika budjetiga tushadi.

8. Guvohlar, jabrlanuvchilar, ekspertlar, mutaxassislar, tarjimonlar va xolislarga haq ularni chaqirgan organ tomonidan bu shaxslar oʻz vazifalarini bajarib boʻlganlaridan keyin, tegishli pullar ish yuzasidan qilingan xarajatlar tarzida yoki hukm etilganlardan sud xarajatlari tarzida tashqaridan olingan va undirib olingan yoki olinmaganligidan qatʼi nazar darhol toʻlanishi kerak.

9. Surishtiruv organiga, tergovchi, prokuror huzuriga yoki sudga guvohlar, jabrlanuvchilar, ekspertlar, mutaxassislar, tarjimonlar va xolislar sifatida chaqiriladigan harbiy xizmatchilarning xarajatlarini (yoʻlkira haqi, sutkalik haq va kvartira haqi) sud harbiy qismlarning talabiga binoan va harbiy xizmatchilarning pul taʼminoti toʻgʻrisidagi nizomda belgilangan normalar boʻyicha toʻlaydi.

10. Ushbu Qonun xizmat topshirigʻi sifatida oʻz vazifalarini bajaradigan ekspertlar, mutaxassislar va tarjimonlarga taalluqli emas.