“Oʻzbekiston Respublikasida maʼmuriy-hududiy tuzilish, toponomik obyektlarga nom berish va ularning nomlarini oʻzgartirish masalalarini hal etish tartibi toʻgʻrisida”gi Oʻzbekiston Respublikasi Qonunining 13-moddasiga muvofiq, Oʻzbekiston Respublikasi Oliy Majlisining Qonunchilik palatasi qaror qiladi:

1. Zarafshon shahrining Oʻzbekiston Respublikasi Vazirlar Mahkamasi tomonidan taqdim etilgan chegarasi ilova qilinayotgan chegara tavsifi va grafik chizmaga muvofiq tasdiqlansin (1, 2-ilova*).

2. Ushbu qaror Oʻzbekiston Respublikasi Oliy Majlisining Senatiga yuborilsin.

3. Ushbu qaror qabul qilingan kundan eʼtiboran kuchga kiradi.

Boshlangʻich 1-nuqta shaharning shimoliy qismida, garajlar shirkatidan shimolroqda va mavjud tuproq yoʻldan janubroqda, ulardan 430 metr masofada joylashgan.

Shaharning loyihadagi chegarasi yoʻnalishi sharq tomonga tuproq yoʻl trassasiga parallel tarzda boshlanib, 2-nuqtagacha davom etadi. 2-nuqta Tomdibuloq tuman markaziga olib boradigan avtomobil yoʻldan sharqroqda, undan 70 metr masofada joylashgan.

Shaharning loyihadagi chegarasi 2-nuqtadan tuproq yoʻl trassasi ustidan oʻtib, oʻz yoʻnalishini sharq tomonga davom ettiradi, LEP-220 kVning ikkita liniyasi trassalarini, ushbu trassalar boʻylab ketgan avtomobil yoʻlini kesib oʻtgan holda 3-nuqtaga boradi.

Shaharning loyihadagi chegarasi 3-nuqtadan shimoli-sharq tomonga 91^o burchak ostida burilib, yangi qabristonning shimoli-gʻarbiy chegarasiga parallel tarzda, undan 150 metr masofada 4-nuqtagacha davom etadi. 4-nuqta kanal irmogʻining janubiy qirgʻogʻi boʻylab joylashgan.

Shaharning loyihadagi chegarasi 4-nuqtadan janubi-sharq tomonga 105^o burchak ostida burilib, kanal irmogʻi trassasiga qatʼiy parallel tarzda 5-nuqtagacha davom etadi.

Shaharning loyihadagi chegarasi 5-nuqtadan janubi-sharq tomonga 145^o burchak ostida burilib, bir necha tuproq yoʻllari kesishgan joygacha kanal irmogʻiga parallel tarzda davom etgan holda 6-nuqtaga boradi.

Shaharning loyihadagi chegarasi 6-nuqtadan oʻz yoʻnalishini 148^o burchak ostida janub tomonga oʻzgartirib, yana kanal irmogʻiga parallel tarzda davom etadi, avtomobil yoʻlini va karyerga olib boradigan temir yoʻl tarmogʻini kesib oʻtadi. Shaharning loyihadagi chegarasi temir yoʻl tarmogʻi kesib oʻtilgach, oʻz yoʻnalishida yana 350 metr davom etadi va shu nuqtadan boshlab 230 metr uzunlikda shaharning hozirgi mavjud chegarasi ustidan oʻtadi, qatʼiy ravishda janub tomonga davom etib, togʻ massivining boshlanishida joylashgan 7-nuqtagacha boradi.

Shaharning loyihadagi chegarasi 7-nuqtadan janubi-gʻarb tomonga 106^o burchak ostida burilib, oʻz yoʻnalishini kanal irmogʻining trassasi boʻylab davom ettirgan holda 8-nuqtaga boradi.

Shaharning loyihadagi chegarasi 8-nuqtadan gʻarb tomonga burilib, oʻz yoʻnalishini shaharning hozirgi mavjud chegarasi ustidan oʻtgan holda Sugralisoy oʻzanida (toʻgʻondan 200 metr masofada) joylashgan 9-nuqtagacha davom ettiradi.

Shaharning loyihadagi chegarasi 9-nuqtadan janub tomonga 89^o burchak ostida burilib, shaharning hozirgi mavjud chegarasi ustidan oʻtgan holda davom etadi, A-379 avtomobil yoʻli trassasini, “Yangi Zarafshon” stansiyasidan Muruntov shahar posyolkasigacha boʻlgan temir yoʻl tarmogʻini kesib oʻtib, 10-nuqtaga boradi.

Shaharning loyihadagi chegarasi 10-nuqtadan gʻarb tomonga toʻgʻri burchak ostida burilib, shaharning hozirgi mavjud chegarasi ustidan oʻtgan holda suv taqsimlovchi uzelning janubiy chegarasi boʻylab 11-nuqtaga boradi.

Shaharning loyihadagi chegarasi 11-nuqtadan shaharning hozirgi mavjud chegarasi boʻyicha toʻgʻri burchak ostida burilib, shimoliy yoʻnalish boʻylab LEP-35 kV trassaga parallel holda (trassadan 50 metr masofada sharq tomonga) 12-nuqtagacha davom etadi.

Shaharning loyihadagi chegarasi 12-nuqtadan shimoli-gʻarb tomonga 117^o burchak ostida burilib, shaharning hozirgi mavjud chegarasi ustidan oʻtgan holda LEP-35 kV trassasiga parallel tarzda 13-nuqtagacha boradi.

Shaharning loyihadagi chegarasi 13-nuqtadan janubi-gʻarb tomonga 146^o burchak ostida burilib, 14-nuqtaga boradi.

Shaharning loyihadagi chegarasi 14-nuqtadan shimoli-gʻarb tomonga “Yangi Zarafshon” turar joy massivining loyihadagi chekka koʻchasi boʻylab 15-nuqtagacha boradi.

Shaharning loyihadagi chegarasi 15-nuqtadan loyihadagi chekka koʻchaga parallel tarzda shimoli-gʻarbiy yoʻnalishda 16-nuqtagacha boradi. “Yangi Zarafshon” temir yoʻl stansiyasidan sharqroqda joylashgan 16-nuqtada shaharning loyihadagi chegarasi yana hozirgi mavjud chegara ustidan oʻtadi.

Shaharning loyihadagi chegarasi 16-nuqtadan oʻz yoʻnalishini gʻarb tomonga 81^o burchak ostida oʻzgartirib, shaharning hozirgi mavjud chegarasi ustidan, temir yoʻldan shimolroqda LEP-220 kV trassasi bilan kesishgunga qadar davom ettirib, 17-nuqtaga boradi.

Shaharning loyihadagi chegarasi 17-nuqtadan shimoli-sharq tomonga 71^o burchak ostida burilgan holda shaharning hozirgi mavjud chegarasi ustidan LEP-220 kV trassasiga parallel tarzda oʻtib, 18-nuqtaga boradi.

Shaharning loyihadagi chegarasi 18-nuqtadan shimoli-gʻarb tomonga 112^o burchak ostida burilgan holda shaharning hozirgi mavjud chegarasi ustidan oʻtib, 19-nuqtaga boradi.

Shaharning loyihadagi chegarasi 19-nuqtadan shimoli-sharq tomonga 122^o burchak ostida burilib, shaharning hozirgi mavjud chegarasining axlatxona hududining yuqorisidagi katta uzunlikdagi uchastkasi ustidan davom etib, 20-nuqtagacha boradi.

Shaharning loyihadagi chegarasi 20-nuqtadan sharq tomonga 140^o burchak ostida burilib, “Potok” oltin izlovchilar arteli chorvachilik kompleksining shimolrogʻidan oʻtib, 21-nuqtaga qadar, A-379 avtomobil yoʻli trassasi bilan kesishish nuqtasigacha boradi.

Shaharning loyihadagi chegarasi 21-nuqtadan oʻz yoʻnalishini sharq tomonga oʻzgartirib, tuproq yoʻl boʻylab boshlangʻich 1-nuqtaga qadar davom ettiradi.