Xalqaro moliya institutlari ishtirokida investitsiya loyihalarini amalga oshirish mexanizmini yanada takomillashtirish maqsadida:

1. Maʼlumot uchun qabul qilinsinki, iqtisodiyotni tarkibiy oʻzgartirish dasturlarini oʻz vaqtida amalga oshirishni taʼminlash, xalqaro moliya institutlari, xorijiy hukumat moliya tashkilotlari hamda donor mamlakatlar mablagʻlarini jalb etgan holda amalga oshiriladigan investitsiya loyihalarini roʻyobga chiqarish tizimini yanada takomillashtirish, ularning samaradorligini oshirish va bajarish muddatlarini qisqartirish boʻyicha quyidagi chora-tadbirlar amalga oshirildi:

loyihalarni amalga oshirish guruhlarini qayta tuzish va ularning shtat birligini oʻzgartirish;

loyihalarni amalga oshiruvchi mavjud guruhlar sonini qisqartirish va optimallash boʻyicha bajarilgan tadbirlarni xalqaro moliya institutlari, xorijiy hukumat moliya tashkilotlari hamda donor mamlakatlar bilan kelishib olish;

loyihalarni amalga oshirish boʻyicha qayta tuzilgan guruhlarni yetarli tajriba va bilimga ega boʻlgan yuqori malakali kadrlar bilan taʼminlash.

2. Oʻzbekiston Respublikasi Prezidentining ayrim qarorlariga ilovaga muvofiq oʻzgartishlar kiritilsin.

3. Mazkur qarorning ijrosini nazorat qilish Oʻzbekiston Respublikasining Bosh vaziri Sh. Mirziyoyev zimmasiga yuklansin.

1. Oʻzbekiston Respublikasi Prezidentining “Jahon banki ishtirokida bajarilayotgan “Fargʻona vodiysida suv resurslarini boshqarish. Faza 1” loyihasini amalga oshirish chora-tadbirlari toʻgʻrisida” 2010-yil 19-yanvardagi PQ-1265-sonli qarorining 7-bandi quyidagi tahrirda bayon etilsin:

“7. Oʻzbekiston Respublikasi Qishloq va suv xoʻjaligi vazirligi loyihani amalga oshirishni boshqarish va muvofiqlashtirish funksiyasini, shtatlar jadvali va har yilgi moliyalashtirish smetalarini Oʻzbekiston Respublikasi Moliya vazirligi bilan albatta kelishgan holda Oʻzbekiston Respublikasi Qishloq va suv xoʻjaligi vazirligi huzuridagi Jahon bankining Loyihalarni amalga oshirish guruhi zimmasiga yuklasin.”.

2. Oʻzbekiston Respublikasi Prezidentining “Osiyo taraqqiyot banki ishtirokida “Mintaqalararo Damxoʻja suv quvurini unga Navoiy va Buxoro viloyatlarining tuman markazlarini tutashtirgan holda modernizatsiyalash. Termiz shahar kanalizatsiya tizimini qayta qurish” loyihasini amalga oshirish chora-tadbirlari toʻgʻrisida” 2010-yil 16-apreldagi PQ-1324-sonli qarorining 7-bandida:

a) ikkinchi xatboshi quyidagi tahrirda bayon etilsin:

“shtatlar jadvali va har yilgi moliyalashtirish smetalarini Oʻzbekiston Respublikasi Moliya vazirligi bilan albatta kelishgan holda loyihani boshqarish funksiyasi “Oʻzkommunxizmat” agentligi huzuridagi Osiyo taraqqiyot bankining Loyihalarni muvofiqlashtirish guruhi zimmasiga yuklansin.”.

b) uchinchi xatboshi chiqarib tashlansin;

v) toʻrtinchi xatboshi uchinchi xatboshi deb hisoblansin.

3. Oʻzbekiston Respublikasi Prezidentining “Osiyo taraqqiyot banki ishtirokida “Qoʻqon va Andijon shaharlarining suv taʼminoti va kanalizatsiya tizimini hamda Fargʻona, Margʻilon shaharlari va Rishton tumani markazining suv taʼminoti tizimini qayta qurish” loyihasini amalga oshirish chora-tadbirlari toʻgʻrisida” 2010-yil 30-iyuldagi PQ-1378-sonli qarorining 7-bandida:

a) uchinchi xatboshi quyidagi tahrirda bayon etilsin:

“shtatlar jadvali va har yilgi moliyalashtirish smetalarini Oʻzbekiston Respublikasi Moliya vazirligi bilan albatta kelishgan holda loyihani boshqarish funksiyasi “Oʻzkommunxizmat” agentligi huzuridagi Osiyo taraqqiyot bankining Loyihalarni muvofiqlashtirish guruhi zimmasiga yuklansin.”;

b) toʻrtinchi xatboshi chiqarib tashlansin.

4. Oʻzbekiston Respublikasi Prezidentining “Islom taraqqiyot banki ishtirokida “Toshkent shahrining kanalizatsiya tizimini takomillashtirish” loyihasini amalga oshirish chora-tadbirlari toʻgʻrisida” 2010-yil 16-dekabrdagi PQ-1443-sonli qarorining 7-bandi oʻz kuchini yoʻqotgan deb hisoblansin.

5. Oʻzbekiston Respublikasi Prezidentining “Xalqaro taraqqiyot uyushmasi ishtirokida “Sirdaryo viloyatining Boyovut, Xovos, Mirzaobod, Sardoba va Oqoltin tumanlari markazlari va qishloq aholi punktlarining suv taʼminotini yaxshilash” loyihasini amalga oshirish chora-tadbirlari toʻgʻrisida” 2011-yil 28-avgustdagi PQ-1610-sonli qarori 6-bandining uchinchi xatboshi quyidagi tahrirda bayon etilsin:

“Jahon bankining Loyihalarni amalga oshirish guruhi shtatlar jadvali va uning faoliyatini har yili moliyalashtirish smetalari Oʻzbekiston Respublikasi Moliya vazirligi bilan kelishib olinishini taʼminlasin.”.

6. Oʻzbekiston Respublikasi Prezidentining “Osiyo taraqqiyot banki ishtirokida “Andijon shahrining kanalizatsiya tarmoqlarini rekonstruksiya qilish va qurish. Jizzax va Xorazm viloyatlari, shuningdek Qoraqalpogʻiston Respublikasining aholi punktlarida suv taʼminotini yaxshilash” loyihasini amalga oshirish chora-tadbirlari toʻgʻrisida” 2012-yil 15-fevraldagi PQ-1707-sonli qarorining 7-bandida:

a) uchinchi xatboshi quyidagi tahrirda bayon etilsin:

“shtatlar jadvali va har yilgi moliyalashtirish smetalarini Oʻzbekiston Respublikasi Moliya vazirligi bilan albatta kelishgan holda loyihani boshqarish funksiyasi “Oʻzkommunxizmat” agentligi huzuridagi Osiyo taraqqiyot bankining Loyihalarni muvofiqlashtirish guruhi zimmasiga yuklansin.”;

b) toʻrtinchi va beshinchi xatboshilar chiqarib tashlansin.

7. Oʻzbekiston Respublikasi Prezidentining “Islom taraqqiyot banki ishtirokida “Oʻzbekiston Respublikasining onkologiya muassasalarini modernizatsiyalash” loyihasini amalga oshirish chora-tadbirlari toʻgʻrisida” 2012-yil 17-sentabrdagi PQ-1821-sonli qarori 5-bandining toʻrtinchi xatboshi quyidagi tahrirda bayon etilsin:

“loyihani boshqarish funksiyasi Oʻzbekiston Respublikasi Sogʻliqni saqlash vazirligi huzuridagi Arab muvofiqlashtirish guruhining loyihalarni amalga oshirish guruhi (LAOG) zimmasiga yuklansin, uning taʼminoti loyihaning texnik-iqtisodiy hisob-kitobida koʻrsatilgan ITB mablagʻlari va Oʻzbekiston Respublikasi qoʻshgan ulush hisobidan amalga oshirilishi nazarda tutilsin.”.

8. Oʻzbekiston Respublikasi Prezidentining “Islom taraqqiyot banki ishtirokida “Xorazm viloyatining Toshsoqa tizimi magistral sugʻorish kanallarini tiklash” loyihasini amalga oshirish chora-tadbirlari toʻgʻrisida” 2012-yil 6-noyabrdagi PQ-1849-sonli qarorining 7-bandi quyidagi tahrirda bayon etilsin:

“7. Oʻzbekiston Respublikasi Qishloq va suv xoʻjaligi vazirligi:

Oʻzbekiston Respublikasi Qishloq va suv xoʻjaligi vazirligi huzuridagi Arab muvofiqlashtirish guruhi zimmasiga loyihani amalga oshirish, muvofiqlashtirish va boshqarish vazifalari yuklatilgan holda, uning zimmasiga loyihani boshqarish funksiyasini yuklasin;

Xorazm viloyati hokimligi bilan birgalikda Loyihani amalga oshirish guruhiga bepul foydalanish uchun Urganch shahrida bino ajratilishini taʼminlasin;

Loyihani amalga oshirish guruhining shtatlar jadvali va har yilgi moliyalashtirish smetalarini Oʻzbekiston Respublikasi Moliya vazirligi bilan kelishib olsin.”.

9. Oʻzbekiston Respublikasi Prezidentining “Xalqaro taraqqiyot uyushmasi (XTU) ishtirokida Buxoro viloyatining Olot va Qorakoʻl tumanlarining ichimlik suv taʼminotini yaxshilash toʻgʻrisida” 2013-yil 15-iyuldagi PQ-2001-sonli qarorining 6-bandi quyidagi tahrirda bayon etilsin:

“6. “Oʻzkommunxizmat” Oʻzbekiston agentligi loyihani boshqarish funksiyasini “Oʻzkommunxizmat” agentligi huzurida faoliyat yuritayotgan Jahon bankining Loyihalarni muvofiqlashtirish guruhi zimmasiga yuklasin.”.

10. Oʻzbekiston Respublikasi Prezidentining “Fransiya Respublikasi Hukumati ishtirokida” Navoiy viloyatining “Navoiy” va “Uchqora” nasos stansiyalarini qayta qurish” loyihasini amalga oshirishni davom ettirish chora-tadbirlari toʻgʻrisida” 2013-yil 23-avgustdagi PQ-2029-sonli qarori 2-bandining uchinchi xatboshi quyidagi tahrirda bayon etilsin:

“loyihani muvofiqlashtirish, amalga oshirish va boshqarish funksiyasi Oʻzbekiston Respublikasi Qishloq va suv xoʻjaligi vazirligi huzuridagi Osiyo taraqqiyot banki (OTB)ning Loyihalarni amalga oshirish guruhi zimmasiga yuklatiladi.”.

11. Oʻzbekiston Respublikasi Prezidentining “Islom taraqqiyot banki ishtirokida “Toshkent shahri koʻchalarini yoritish tizimida energiya tejovchi texnologiyalarni joriy etish” loyihasini amalga oshirish chora-tadbirlari toʻgʻrisida” 2013-yil 28-noyabrdagi PQ-2078-sonli qarorining 5-bandi quyidagi tahrirda bayon etilsin:

“5. Belgilansinki:

“Toshkent shahri koʻchalarini yoritish tizimida energiya tejovchi texnologiyalarni joriy etish” loyihasini amalga oshirish boʻyicha masʼul ijro etuvchi organ Toshkent shahri hokimligi hisoblanadi;

loyihani texnik jihatdan amalga oshirish, moliyaviy mablagʻlardan maqsadli va samarali foydalanish “Toshshaharnur” DUK zimmasiga yuklatiladi.”.

12. Oʻzbekiston Respublikasi Prezidentining “Koreya Respublikasining Iqtisodiy rivojlanish va hamkorlik fondining moliyaviy hamkorligida “Bolalar koʻp tarmoqli tibbiyot markazini tashkil etish” loyihasini amalga oshirish boʻyicha birinchi navbatdagi chora- tadbirlar toʻgʻrisida” 2013-yil 10-dekabrdagi PQ-2082-sonli qarori 7-bandining ikkinchi xatboshidagi “boʻlimi” soʻzi “guruhi” soʻzi bilan almashtirilsin.

13. Oʻzbekiston Respublikasi Prezidentining “Osiyo taraqqiyot banki ishtirokida “Amu-Buxoro irrigatsiya tizimini tiklash” loyihasini amalga oshirish chora-tadbirlari toʻgʻrisida” 2014-yil 28-martdagi PQ-2156-sonli qarorining 7-bandi quyidagi tahrirda bayon etilsin:

“7. Oʻzbekiston Respublikasi Qishloq va suv xoʻjaligi vazirligi:

Oʻzbekiston Respublikasi Qishloq va suv xoʻjaligi vazirligi huzuridagi Osiyo taraqqiyot banki (OTB)ning Loyihalarni amalga oshirish guruhi zimmasiga “Amu-Buxoro irrigatsiya tizimini tiklash” loyihasini amalga oshirish, muvofiqlashtirish va boshqarish funksiyalari yuklatilgan holda, uning faoliyatini tashkillashtirishni;

Buxoro viloyati hokimligi bilan birgalikda Loyihalarni amalga oshirish guruhiga bepul foydalanish uchun Kogon shahrida joy ajratilishini taʼminlasin.

14. Oʻzbekiston Respublikasi Prezidentining “Osiyo taraqqiyot banki ishtirokida “Fargʻona va Margʻilon shaharlarining kanalizatsiya tizimlarini rekonstruksiya qilish” loyihasini amalga oshirish chora- tadbirlari toʻgʻrisida” 2014-yil 18-iyuldagi PQ-2214-sonli qarorining 8-bandi quyidagi tahrirda bayon etilsin:

“8. “Fargʻona va Margʻilon shaharlarining kanalizatsiya tizimlarini rekonstruksiya qilish” loyihasini boshqarish funksiyalari “Oʻzkommunxizmat” Oʻzbekiston agentligi huzuridagi OTBning Loyihalarni muvofiqlashtirish guruhi zimmasiga yuklansin.”.

15. Oʻzbekiston Respublikasi Prezidentining “Osiyo taraqqiyot banki ishtirokida “Qattiq maishiy chiqindilarni boshqarish” loyihasini amalga oshirish chora-tadbirlari toʻgʻrisida” 2014-yil 31-oktabrdagi PQ-2255-sonli qarorining 8-bandidagi “7 kishidan iborat guruh” soʻzlari “loyihani amalga oshiruvchi 5 kishidan iborat guruh” soʻzlari bilan almashtirilsin”.

16. Oʻzbekiston Respublikasi Prezidentining “Oʻzbekiston Respublikasi davlat sanitariya-epidemiologiya nazorati markazlarini laboratoriya uskunalari bilan jihozlash” loyihasini amalga oshirish chora- tadbirlari toʻgʻrisida” 2014-yil 24-dekabrdagi PQ-2276-sonli qarori 5-bandining toʻrtinchi xatboshi quyidagi tahrirda bayon etilsin:

“loyihani boshqarish funksiyasi Oʻzbekiston Respublikasi Sogʻliqni saqlash vazirligi huzuridagi Arab muvofiqlashtirish guruhining Loyihalarni amalga oshirish guruhi (LAOG) zimmasiga yuklansin, uning taʼminoti loyihaning texnik-iqtisodiy hisob-kitobida koʻrsatilgan OTB mablagʻlari va Oʻzbekiston Respublikasining ulushi hisobidan amalga oshirilishi nazarda tutilsin.”.

17. Oʻzbekiston Respublikasi Prezidentining “Respublika ixtisoslashtirilgan ilmiy-amaliy markazlarini qurish va zamonaviy tibbiyot uskunalari bilan jihozlash” loyihasini amalga oshirish chora- tadbirlari toʻgʻrisida” 2015-yil 23-martdagi PQ-2323-sonli qarori 5-bandining toʻrtinchi xatboshi quyidagi tahrirda bayon etilsin:

“loyihani boshqarish funksiyasi Oʻzbekiston Respublikasi Sogʻliqni saqlash vazirligi huzuridagi Arab muvofiqlashtirish guruhining Loyihalarni amalga oshirish guruhi (LAOG) zimmasiga yuklansin, uning taʼminoti loyihaning texnik-iqtisodiy hisob-kitobida koʻrsatilgan mablagʻlar hisobidan amalga oshirilishi nazarda tutilsin.”.

18. Oʻzbekiston Respublikasi Prezidentining “Jahon banki ishtirokida “Janubiy Qoraqalpogʻistonda suv resurslarini boshqarishni yaxshilash” loyihasini amalga oshirish chora-tadbirlari toʻgʻrisida” 2015-yil 24-martdagi PQ-2324-sonli qarori 2-bandining:

a) uchinchi xatboshi quyidagi tahrirda bayon etilsin:

“loyihani boshqarish va muvofiqlashtirish funksiyasi Oʻzbekiston Respublikasi Qishloq va suv xoʻjaligi vazirligi huzuridagi Jahon bankining Loyihalarni amalga oshirish guruhi (LAOG) zimmasiga yuklatiladi.”;

b) beshinchi xatboshi quyidagi tahrirda bayon etilsin:

“Oʻzbekiston Respublikasi Qishloq va suv xoʻjaligi vazirligi Qoraqalpogʻiston Respublikasi Vazirlar Kengashi bilan birgalikda Loyihalarni amalga oshirish guruhiga bepul foydalanish uchun Ellikqalʼa tumanining Boʻston shahrida joy ajratilishini taʼminlasin.”.

19. Oʻzbekiston Respublikasi Prezidentining “Islom taraqqiyot banki ishtirokida “Surxondaryo viloyatida suv resurslarini boshqarishni yaxshilash (Hazorbogʻ-Oqqapchigʻay kanallar tizimini qayta qurish)” loyihasini amalga oshirish chora-tadbirlari toʻgʻrisida” 2015-yil 7-apreldagi PQ-2332-sonli qarorining 5-bandi quyidagi tahrirda bayon etilsin:

“5. Oʻzbekiston Respublikasi Qishloq va suv xoʻjaligi vazirligi:

loyihani amalga oshirishni boshqarish va muvofiqlashtirish funksiyasi, shtat jadvali va har yilgi moliyalashtirish smetalari albatta Oʻzbekiston Respublikasi Moliya vazirligi bilan kelishilgan holda Oʻzbekiston Respublikasi Qishloq va suv xoʻjaligi vazirligi huzuridagi Arab muvofiqlashtirish guruhining Loyihalarni amalga oshirish guruhi (LAOG) zimmasiga yuklasin;

Surxondaryo viloyati hokimligi bilan birgalikda Loyihalarni amalga oshirish guruhiga (LAOG) bepul foydalanish uchun Denov shahrida joy ajratilishini taʼminlasin.”.