Oʻzbekiston Respublikasi Fuqarolik kodeksiga muvofiq Oʻzbekiston Respublikasi Mudofaa vazirligi va Markaziy banki Boshqaruvi qaror qiladi:

1. Oʻzbekiston Respublikasi Mudofaa vazirligi muddatli harbiy xizmatchilari pul taʼminotining bir qismini Oʻzbekiston Respublikasi aksiyadorlik tijorat Xalq bankida ochilgan omonat hisobvaraqlariga oʻtkazish tartibi toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasi Fuqarolik kodeksiga muvofiq Oʻzbekiston Respublikasi Mudofaa vazirligi muddatli harbiy xizmatchilari pul taʼminotining bir qismini Oʻzbekiston Respublikasi aksiyadorlik tijorat Xalq bankining omonat hisobvaraqlariga oʻtkazish tartibini belgilaydi.

1. Mazkur Nizomda quyidagi tushunchalar qoʻllaniladi:

chaqiriluvchi — harbiy xizmatga chaqirilishi lozim boʻlgan va tuman (shahar) chaqiruv uchastkalarida qayd qilingan shaxs;

harbiy xizmatchi — oddiy askarlar tarkibi lavozimlarida chaqiruv boʻyicha haqiqiy harbiy xizmatni oʻtayotgan shaxs;

harbiy qism — muddatli harbiy xizmatchi chaqiruv boʻyicha haqiqiy harbiy xizmatni oʻtayotgan Mudofaa vazirligi tasarrufidagi boʻlinma (shu jumladan xoʻjalik hisobida boʻlgan muassasa va boʻlinmalar ham);

harbiy xizmatchining pul taʼminoti — harbiy xizmatni oʻtash (xizmat majburiyatlarini bajarish) munosabati bilan qonunchilik hujjatlarida belgilangan normalar va tartib boʻyicha moliyalashtirish manbalaridan qatʼi nazar (respublika budjeti, Moliya vazirligining “Safarbarlik chaqiruvi rezervi mablagʻlari” maxsus hisob raqamidagi mablagʻlar va qonunchilik hujjatlari bilan taqiqlanmagan boshqa manbalar), davlat tomonidan toʻlanadigan pul toʻlovlarining (mukofotlarining) barcha turlari;

omonat hisobvaragʻi — chaqiriluvchilar uchun 12 oy muddatga ochiladigan jamgʻarma omonat hisobvaragʻi;

AT Xalq banki — Oʻzbekiston Respublikasi aksiyadorlik tijorat Xalq banki.

2. Tuman (shahar) mudofaa ishlari boʻlimlari chaqiriluvchiga omonat hisobvaragʻini ochishni tashkil etish maqsadida AT Xalq banki filialining masʼul xodimlariga alohida xona ajratib beradi.

Tuman (shahar) mudofaa ishlari boʻlimlari chaqiriluvchi harbiy qismga joʻnab ketishidan ikki kun oldin unga omonat hisobvaragʻini ochish uchun chaqiruv punktiga yetib kelishini taʼminlaydi.

Chaqiriluvchi bilan AT Xalq banki oʻrtasida tuziladigan bank omonati shartnomalarini rasmiylashtirish va imzolash ishlari AT Xalq banki filiallari tomonidan bevosita chaqiriluvchining chaqiruv joyidagi tegishli mudofaa ishlari boʻlimida tashkillashtiriladi.

Chaqiriluvchi omonat hisobvaragʻini ochish uchun ariza va pasportini taqdim etadi. Omonat hisobvaragʻini ochishda chaqiriluvchidan dastlabki mablagʻ kirim qilinmaydi va AT Xalq banki tomonidan vositachilik haqi undirilmaydi.

3. Omonat daftarchasi AT Xalq banki tomonidan omonat boʻyicha bajarilgan operatsiyalarni omonatchiga yozma ravishda tasdiqlovchi va omonat boʻyicha olingan majburiyatlarni kafolatlovchi hujjat hisoblanadi.

4. Omonat daftarchasi muqovasiga AT Xalq bankining toʻliq nomi va logotipi (firma belgisi), muqovaning ichki tomoniga omonat daftarchasining seriyasi va raqami, daftarchaning ichki tomoni birinchi betida omonat daftarchasining seriyasi va raqami, AT Xalq banki filialining nomi, uning manzili (pochta manzili), omonatchining familiyasi, ismi va otasining ismi, 20 ta belgili shaxsiy hisobvaraq raqami, valyuta turi, omonat turi (nomi, yillik foizi, muddati va boshqa shartlari), nazoratchi, bosh buxgalter va filial rahbarining familiyasi, ismi, otasining ismi, ularning imzosi hamda filial muhri oʻrni uchun joy koʻrsatilishi lozim.

5. Omonat hisobvaragʻi boʻyicha foiz stavkasining miqdori AT Xalq banki tomonidan Oʻzbekiston Respublikasining “Banklar va bank faoliyati toʻgʻrisida”gi Qonuniga muvofiq oʻrnatiladi.

Har yilning 10-yanvariga qadar, shuningdek omonat foiz stavkasining har bir oʻzgarishida AT Xalq banki bu haqda yozma ravishda Oʻzbekiston Respublikasi Mudofaa vazirligini xabardor qiladi.

6. Chaqiriluvchi muddatli harbiy xizmat davomida AT Xalq banki bilan tuzilgan bank omonati shartnomasi va omonat daftarchasini, shuningdek ularning nusxalarini oʻzida saqlashi kerak.

7. Tuman (shahar) mudofaa ishlari boʻlimlari boshliqlari chaqiriluvchilarni xizmat joylariga joʻnatishdan oldin har bir chaqiriluvchiga omonat hisobvaragʻi ochilganligi, AT Xalq banki bilan bank omonati shartnomasi tuzilganligini, ularning nusxalari mavjudligini shaxsan tekshiradi, shuningdek chaqiriluvchilar oʻrtasida pul taʼminotini toʻlash tartibi toʻgʻrisida tushuntirish ishlarini oʻtkazadi.

8. Harbiy xizmatchi rezervga (zaxiraga) boʻshatilgunga qadar omonat hisobvaragʻini yopishi mumkin emas.

Harbiy xizmatchi rezervga (zaxiraga) boʻshatilgandan soʻng uning arizasi asosida omonat hisobvaragʻidagi pul mablagʻi va toʻlanishi lozim boʻlgan foizlar belgilangan tartibda omonat egasi nomiga AT Xalq bankida ochilgan plastik kartochkaga oʻtkaziladi. Bunda plastik kartochkalarni ochish uchun haq undirilmaydi.

Omonat summasini boshqa shaxslarning plastik kartochkalariga, shuningdek omonat egasi tomonidan boshqa banklarda ochilgan plastik kartochkalarga oʻtkazish qatʼiy taqiqlanadi.

9. Harbiy xizmatchiga uning yaqin qarindoshining sogʻligʻi ogʻir ahvolda ekanligi yoki vafot etganligi munosabati bilan qonunchilik hujjatlarida belgilangan tartibda taʼtil berilgan hollarda omonat hisobvaragʻidagi mablagʻ yoki uning bir qismi muddatidan oldin harbiy xizmatchi tomonidan plastik kartochkaga tushirib olinishi mumkin.

10. Harbiy xizmatchi pul taʼminotining omonat hisobvaragʻiga oʻtkaziladigan foizdagi miqdori Oʻzbekiston Respublikasi mudofaa vazirining buyrugʻi bilan belgilanadi.

11. Harbiy xizmatchi harbiy qismga yetib kelgach, belgilangan tartibda harbiy qism qoʻmondonligi nomiga pul taʼminotining bir qismini uning omonat hisobvaragʻiga oʻtkazish va qolgan miqdorini naqd pulda toʻlanishi toʻgʻrisidagi bildirgi taqdim etadi.

12. Harbiy xizmatchi oʻz bildirgisiga bank omonati shartnomasining va omonat daftarchasining nusxalarini ilova qiladi.

13. Harbiy xizmatchilarning bildirgilarini koʻrib chiqish natijalari boʻyicha harbiy xizmatchining lavozimi, familiyasi, ismi va otasining ismi (qisqartirishlarsiz), omonat hisobvaragʻiga oʻtkazilishi lozim boʻlgan pul summasi, omonat hisobvaragʻi ochilgan bank filialining nomi va omonat hisobvaragʻi raqamlari koʻrsatilgan holda harbiy qism komandirining buyrugʻi chiqariladi.

14. Harbiy qism qoʻmondonligi tomonidan harbiy xizmatchilarning pul mablagʻlarini AT Xalq bankidan tashqari boshqa banklarda ochilgan omonat hisobvaraqlariga oʻtkazish taqiqlanadi.

15. Maʼlumotning saqlanishi va maxfiylikni taʼminlash maqsadida harbiy xizmatchilar harbiy xizmatni oʻtayotgan barcha harbiy qismlar fuqaro xodimlarining plastik kartochkalariga xizmat koʻrsatish uchun AT Xalq bankining filiallarida hisob raqamlarini ochadilar.

AT Xalq banki filiallari tomonidan harbiy qismlar fuqaro xodimlariga plastik kartochkalar ochish uchun haq undirilmaydi.

16. Harbiy qism komandirining buyrugʻiga asosan harbiy qismning moliya organi har oyning oʻninchi sanasiga qadar harbiy qism joylashgan yerdagi AT Xalq banki filialiga fuqaro xodimlar ish haqining va harbiy xizmatchilar pul taʼminotining bir qismini toʻlov topshirigʻi bilan oʻtkazib beradi. Toʻlov topshirigʻiga reyestr (AT Xalq banki filiali MFOsi, familiya, ism va otasining ismi (qisqartirishlarsiz), 20 ta xonali shaxsiy hisobvaraq raqami, oʻtkazilishi lozim boʻlgan pul summasi, sana koʻrsatilgan holda) ilova qilinadi.

Harbiy qism tomonidan AT Xalq banki filialiga joʻnatiladigan reyestrda fuqaro xodimlarining ham harbiy xizmatchilarning ham, lavozimlari koʻrsatilmaydi. Fuqaro xodimlar va harbiy xizmatchilarga alohida-alohida reyestr tuzish va taqdim etish qatʼiy taqiqlanadi. Reyestrning har bir sahifasida jami pul summasi koʻrsatiladi, reyestrning har bir sahifasi harbiy qism komandiri va harbiy qism moliya organi boshligʻi tomonidan imzolanadi hamda harbiy qismning muhri bilan tasdiqlanadi.

17. Harbiy qism taqdim etgan reyestrlar asosida AT Xalq banki filiallari uch bank ish kuni mobaynida tegishli pul summalarini reyestrda koʻrsatilgan hisobvaraqlarga oʻtkazilishini taʼminlaydi.

Harbiy qismning moliya organi har oyda reyestr va AT Xalq banki filialining harbiy xizmatchining omonat hisobvaragʻidan koʻchirmasi asosida omonat hisobvaraqlariga oʻtkazilgan pul mablagʻlari haqidagi qaydlarni harbiy xizmatchilarning omonat daftarchalari nusxalariga yozib boradi.

18. Harbiy qism taqdim etgan reyestr bilan AT Xalq banki filiallarining hisobga olish maʼlumotlari oʻrtasida tafovutlar aniqlangan holatlarda oʻtkazilgan pul mablagʻlari AT Xalq banki filiallari tomonidan ikki bank ish kunidan kechiktirmasdan mablagʻlar oʻtkazilishini amalga oshirgan harbiy qismga qaytarib beriladi (familiya, ism va otasining ismi (qisqartirishlarsiz), oʻtkazilishi lozim boʻlgan pul summasi va qaytarib berish sabablarini koʻrsatgan holda).

Harbiy qismning moliya organi AT Xalq banki filiallari tomonidan qaytarib berilgan pul mablagʻlarining toʻliqligi, pul summasining taqdim etilgan reyestrga mos kelishini tekshiradi, aniqlangan kamchiliklar oy tugagunga qadar boʻlgan muddat ichida bartaraf etilgandan soʻng pul summasini harbiy qism joylashgan joydagi AT Xalq bankining filialiga oʻtkazib beradi.

19. Omonat daftarchasi yoki plastik kartochka yoʻqotilganligi uchun ularning egasidan AT Xalq banki tariflariga muvofiq jarima undiriladi.

20. Harbiy xizmatchilarning pul taʼminotini oʻtkazish uchun AT Xalq bankida ochilgan omonat hisobvaraqlarini yuritish Oʻzbekiston Respublikasi banklarida depozit operatsiyalarini amalga oshirish tartibi toʻgʻrisidagi yoʻriqnomaga (roʻyxat raqami 2711, 2015-yil 26-avgust) muvofiq amalga oshiriladi.

21. Bank omonati shartnomalarining oʻz vaqtida tuzilishini tashkillashtirish, bank omonati shartnomalari va omonat daftarchalari nusxalarining mavjudligi uchun javobgarlik tuman (shahar) mudofaa ishlari boʻlimlarining boshliqlari zimmasiga, AT Xalq banki filiallarining hisob raqamlariga mablagʻlarning oʻz vaqtida va toʻliq oʻtkazilishi, mablagʻlarning boshqa banklarga oʻtkazilishiga yoʻl qoʻymaslik uchun javobgarlik harbiy qism qoʻmondonligiga yuklatiladi.

22. Omonat hisobvaraqlarining toʻgʻri yuritilishi, foizlarning toʻliq hisoblanishi va ular boʻyicha operatsiyalarning oʻz vaqtida amalga oshirilishi uchun javobgarlik AT Xalq banki filiallari boshliqlari zimmasiga yuklatiladi.

23. Oʻzbekiston Respublikasi Mudofaa vazirligining AT Xalq bankiga yuboriladigan soʻrovnomasiga muvofiq va AT Xalq banki boshqaruvining ruxsatida belgilangan muddat davomida Oʻzbekiston Respublikasi Mudofaa vazirligi nazorat-taftish boshqarmasi tomonidan AT Xalq banki filiallarida omonat hisobvaraqlari boʻyicha oʻtkazilgan operatsiyalar yuzasidan tekshirish oʻtkazilishi mumkin.

24. Har chorakda bir marta, kelgusi hisobot oyining oʻn beshinchi sanasiga qadar AT Xalq banki filiali va harbiy qism moliya organi tomonidan omonat hisobvaraqlarga kirim qilish uchun oʻtkazilgan mablagʻlar boʻyicha solishtirish amalga oshiriladi va tegishli dalolatnoma tuziladi.

25. Mazkur Nizom Oʻzbekiston Respublikasi Moliya vazirligi va AT Xalq banki bilan kelishilgan.