“Mahsulot taqsimotiga oid bitimlar to‘g‘risida”gi Qonunning 17-moddasiga muvofiq va mahsulot taqsimotiga oid bitimlar doirasida xorijiy investordan mol-mulkning O‘zbekiston Respublikasiga o‘tkazishning yagona tartibini belgilash maqsadida Vazirlar Mahkamasi qaror qiladi:

1. Ma’lumot uchun quyidagilar qabul qilinsin, ya’ni O‘zbekiston Respublikasining qonun hujjatlariga hamda konlarni aniqlash, qidirish, neft va gaz xomashyosini qazib olishga nisbatan mahsulot taqsimotiga oid bitimlar (keyingi o‘rinlarda MTB deb yuritiladi) shartlariga muvofiq:

investor tomonidan yangi yaratilgan yoki sotib olingan, MTB bo‘yicha ishlarni bajarish uchun foydalaniladigan mol-mulk, agar MTBda boshqacha qoida nazarda tutilgan bo‘lmasa, investorning mulki hisoblanadi;

xorijiy investor MTBning amal qilish muddati davomida MTBni amalga oshirish bo‘yicha vakolatli organning ruxsatisiz MTB doirasida yangi yaratilgan yoki sotib olingan mol-mulkni O‘zbekiston Respublikasidan tashqariga olib chiqish, sotish, ayirboshlash yoki boshqa yo‘l bilan begonalashtirishga haqli emas;

MTB doirasida yangi yaratilgan yoki sotib olingan mol-mulkka egalik huquqi xorijiy investordan ko‘rsatilgan mol-mulk qiymati to‘liq qoplangan kundan boshlab yoki MTB bekor qilingan kundan boshlab yoxud yoxud taraflar tomonidan kelishilgan boshqa kundan e’tiboran MTBda nazarda tutilgan shartlar va tartibda O‘zbekiston Respublikasiga ixtiyoriga o‘tadi;

MTBning amal qilish muddati davomida xorijiy investorga ushbu MTB bo‘yicha ishlarni bajarish uchun bunday mol-mulkdan bepul asosda (tekinga) foydalanish mutlaq huquqi beriladi hamda xorijiy investor uning foydalanishidagi mol-mulkni saqlashga doir chiqimlar hamda uning tasodifan nobud bo‘lishi yoki tasodifan buzilishi ehtimoli xavfini o‘z zimmasiga oladi;

xorijiy investor MTB bilan belgilangan tartibda MTB bo‘yicha ishlarni davom ettirish uchun yakuniy balans egasi (foyda oluvchi) tomonidan unga berilgan mol-mulkni modernizatsiya va rekonstruksiya qilishga haqli.

2. Shunday tartib belgilansinki, unga ko‘ra:

investor tomonidan MTB doirasida yangi yaratilgan yoki sotib olingan mol-mulk (MTB bilan beriladigan mol-mulk) MTB tugatilganda, shu jumladan undan foydalanishning asoslangan zarurati bo‘lmagan hollarda va boshqa sabablarga ko‘ra, xorijiy investor yoki MTBni amalga oshirish bo‘yicha vakolatli organ tashabbusiga ko‘ra, beriladigan mol-mulkning qiymati to‘liq qoplangan taqdirda O‘zbekiston Respublikasi Vazirlar Mahkamasining qarori asosida yakuniy foyda oluvchiga (benefitsiarga) o‘tkaziladi;

MTB bilan beriladigan mol-mulkning yakuniy foyda oluvchisini aniqlash yoki belgilangan tartibda tegishli mahalliy ijro etuvchi hokimiyat organlariga keyingi amalga oshirish uchun berish to‘g‘risidagi qarorlar MTBni amalga oshirish bo‘yicha vakolatli organning investor bilan birgalikda taqdim etilgan MTB bilan beriladigan mol-mulk va unga oid barcha zarur hujjatlar va ma’lumotlar ro‘yxati asosida tayyorlangan O‘zbekiston Respublikasi Davlat aktivlarini boshqarish agentligining taklifiga binoan O‘zbekiston Respublikasi Vazirlar Mahkamasi tomonidan qabul qilinadi;

bojxona to‘lovlaridan ozod qilingan holda, MTB doirasida olib kirilayotgan mol-mulkdan u xorijiy investordan yakuniy foyda oluvchi timsolida O‘zbekiston Respublikasining mulkiga berilgan taqdirda, bojxona to‘lovlari undirilmaydi;

yakuniy foyda oluvchi MTB doirasida yangi yaratilgan yoki sotib olingan mol-mulkning bir qismi bo‘yicha mulk solig‘ini to‘lashdan xorijiy investorga ushbu mol-mulkdan MTB bo‘yicha ishlarni davom ettirish uchun foydalanishga mutlaq huquq berilgan muddatga ozod qilinadi. Bunda, MTBning amal qilish muddati davomida xorijiy investorda ushbu mol-mulk joylashgan yer uchastkalari uchun yer solig‘ini to‘lash majburiyati saqlanib qoladi.

3. Mahsulot taqsimotiga oid bitimlar doirasida sotib olingan yoki yangi yaratilgan mol-mulkni xorijiy investor tomonidan o‘tkazish (berish) tartibi to‘g‘risidagi Nizom ilovaga muvofiq tasdiqlansin.

4. MTBni amalga oshirish bo‘yicha vakolatli organlar va O‘zbekiston Respublikasi Davlat aktivlarini boshqarish agentligi tomonidan MTB doirasida yangi yaratilgan yoki sotib olingan mol-mulkni qabul qilish va topshirish tartibotlarini amalga oshirishda tasdiqlangan Nizom normalariga qat’iy rioya etilsin.

5. Mazkur qarorning ijrosini nazorat qilish O‘zbekiston Respublikasi Bosh vazirining birinchi o‘rinbosari R.S.Azimov va O‘zbekiston Respublikasi Bosh vazirining o‘rinbosari G.I. Ibragimov zimmasiga yuklansin.

1. Mazkur Nizom xorijiy investor (keyingi o‘rinlarda investor deb yuritiladi) tomonidan konlarni aniqlash, qidirish, neft va gaz xomashyosini qazib olishga nisbatan mahsulot taqsimotiga oid bitimlar doirasida u tomonidan MTB bo‘yicha ishlarni bajarish uchun foydalaniladigan yoki foydalanilgan yangi yaratilgan yoki sotib olingan mol-mulkka egalik huquqining O‘zbekiston Respublikasiga o‘tishi va amalda O‘zbekiston Respublikasiga o‘tishi tartibini belgilaydi.

2. MTB bilan mol-mulkga egalik huquqi investordan davlatga ko‘rsatilgan mol-mulkning qiymati to‘liq qoplangan kundan boshlab yoki bitim bekor qilingan kundan boshlab yoxud taraflar tomonidan kelishilgan boshqa kundan e’tiboran MTBda nazarda tutilgan shartlar va tartibda o‘tadi;

3. Investor MTBning amal qilish muddati davomida MTBni amalga oshirish bo‘yicha vakolatli organning ruxsatisiz MTB doirasida yangi yaratilgan yoki sotib olingan mol-mulkni O‘zbekiston Respublikasidan tashqariga olib chiqish, sotish, ayirboshlash yoki boshqa yo‘l bilan begonalashtirishga haqli emas.

4. Investor MTB doirasida yangi yaratilgan yoki sotib olingan mol-mulkni O‘zbekiston Respublikasiga MTB amal qilish muddatining tugash sanasiga holat bo‘yicha, shu jumladan uning amal qilish muddati tugagan, fors-major holatlari yuzaga kelgan, investor tomonidan MTB shartlarini jiddiy ravishda buzilishi holatlari bo‘yicha, shu jumladan, MTB bekor qilish sanasida investorning qoplanmagan harajatlarni qoplash huquqini yo‘qotish holatlarida MTB bekor qilinishining barcha holatlarida o‘tkazishi shart.

5. Investor tomonidan MTB doirasida yangi yaratilgan yoki sotib olingan mol-mulk (MTB bilan beriladigan mol-mulk) MTB bekor qilinishining barcha holatlarida, shu jumladan undan foydalanishning asoslangan zarurati bo‘lmagan hollarda va boshqa sabablarga ko‘ra, xorijiy investor yoki MTBni amalga oshirish bo‘yicha vakolatli organ tashabbusiga ko‘ra, beriladigan mol-mulkning qiymati to‘liq qoplangan taqdirda O‘zbekiston Respublikasi Vazirlar Mahkamasining qarori asosida yakuniy foyda oluvchiga o‘tkaziladi.

6. Mazkur Nizomda quyidagi asosiy tushunchalar foydalaniladi:

kontraktdan (shartnomadan) tashqari maydon — tegishli ishlab chiqish dasturlarida va (yoki) yillik ishchi dasturlarda nazarda tutilgan yer qa’ridan foydalanish bilan bog‘liq bo‘lmagan (baholash, qidirish, konlarini ishlab chiqish, neft va gaz xomashyosini ajratish va qazib olish va boshqalar) neft va gaz operatsiyalarini yuritishni ta’minlash uchun investor yoki operatorga muddatli (vaqtincha) foydalanish uchun ajratilgan, shu jumladan, neft va gaz xomashyosini tayyorlash, yuklash va tashish obyektlarini joylashtirish maqsadlari hamda ma’muriy ehtiyojlar uchun shartnoma (kontrakt) maydonidan tashqarida joylashgan bir yoki bir nechta yer uchastkalari;

qoplanadigan xarajatlar — investor va (yoki) operatorning MTB bo‘yicha ishlarni bajarish davomida sarflagan, MTB shartlariga muvofiq investorga qoplanishi shart bo‘lgan O‘zbekiston Respublikasi qonunchiligiga ko‘ra asoslangan va hujjatlar bilan tasdiqlangan ruxsat etilgan xarajatlarni anglatadi;

MTB mol-mulki — investor va (yoki) operator tomonidan neft va gaz operatsiyalarini o‘tkazish maqsadlarida yangi yaratilgan yoki sotib olingan, ular tomonidan nazorat qilinadigan va ekspluatatsiya qilinadigan (foydalaniladigan) hamda kontrakt maydoni chegarasida yoki kontraktdan tashqari maydonda joylashgan mol-mulk, shuningdek marketing kompaniyasi tomonidan sotish uchun harajatlar tarkibiga kiritilgan qazib olingan (ishlab chiqarilgan) mahsulotlarni birgalikda sotish maqsadida sotib olingan, mol-mulk, qazib olingan (ishlab chiqarilgan) mahsulot bundan mustasno;

investor — konlarni aniqlash, qidirish va neft va gaz xomashyosini qazib olishga o‘zining, qarzga olingan yoki jalb qilingan mablag‘larini (mulk va/yoki mulkiy huquqlarni) investitsiya qiluvchi MTB tarafi, shuningdek, bunday tarafning huquqiy vorislari va ruxsat etilgan sessionariylari. Mazkur Nizomga nisbatan “investor” tushunchasining ta’rifi shuningdek MTB bo‘yicha ishlarni bajarish uchun operator, agar MTB shartlari bilan birgalikda sotish nazarda tutilgan bo‘lsa, investor tomonidan qazib olingan (ishlab chiqarilgan) mahsulotlarni sotish maqsadlarida yaratilgan marketing kompaniyasi ham tushunilishi mumkin;

kontrakt maydoni — qidirish va qazib olish, shu jumladan, O‘zbekiston Respublikasi hududidagi yer qa’ri uchastkalari, tavsifi va fazoviy chegaralari MTB bilan belgilangan yer yuzasi bilan chegaralangan (MTB amal qilish muddati davomida har qanday vaqtda yer yuzasidan burg‘ulash yo‘li bilan texnik jihatdan erishish mumkin bo‘lgan har qanday chuqurlikgacha) hududlarni anglatadi.

kompensatsiya mahsuloti — MTB doirasida neft va gaz operatsiyalarini amalga oshirish bilan bog‘liq xarajatlarni qoplash uchun MTB bilan o‘rnatilgan tartibda investorning mol-mulkiga o‘tkaziladigan ishlab chiqarilgan (qazib olinayotgan) mahsulotning bir qismi;

yakuniy foyda oluvchi — O‘zbekiston Respublikasi Vazirlar Mahkamasining qarori bilan vakolat berilgan davlat organi yoki davlat nomidan MTB mol-mulkini qabul qiluvchi boshqa tashkilot;

neft va gaz operatsiyalari — MTBda belgilangan kontrakt maydoni va kontraktdan tashqari maydonga nisbatan konlarni qidirish, qo‘shimcha qidirish, baholash, loyihalash, o‘zlashtirish va ularni ishlab chiqish, kontrakt maydonida neft va gaz xom ashyosini ajratib olish, qazib olish, barqarorlashtirish, tayyorlash (shu jumladan, tabiiy gazni tayyorlash), qo‘zg‘atish, quyish, yig‘ish, saqlash, yuklash, jo‘natish, yetkazib berish nuqtasigacha (punktigacha) tashish (shu jumladan magistral quvur liniyasidan foydalanish bilan), kontrakt maydoni bilan bog‘liq vaqtinchalik konservatsiyalash operatsiyalari bilan bog‘liq har qanday faoliyat, shuningdek ushbu operatsiyalar bilan bevosita bog‘liq bo‘lgan va MTB doirasida va bajarish maqsadlarida amalga oshiriladigan boshqa faoliyat;

qoplanmaydigan xarajatlar — investorning MTBda belgilangan kompensatsiya mahsulotlari hisobiga qoplanishi shart bo‘lmagan xarajatlarini anglatadi;

boshqaruv qo‘mitasi — MTBni amalga oshirish jarayonida taraflarning o‘zaro hamkorligini ta’minlash maqsadida investor va vakolatli organ tomonidan taraflarning har biridan teng vakillik asosida maxsus tuzilgan yuqori boshqaruv organi;

vakolatli organ — davlat boshqaruv organi yoki davlat korxonasi yoxud ustav fondida ellik bir foizdan kam bo‘lmagan miqdorda davlat ulushiga ega O‘zbekiston Respublikasining qonun hujjatlarida O‘zbekiston Respublikasi nomidan MTBni amalga oshirish bo‘yicha vakolatli organ sifatida belgilangan korxona.

7. Mazkur Nizom maqsadlari uchun MTB bilan o‘tkaziladigan mol-mulk quyidagilarga bo‘linadi:

investor tomonidan ishlab chiqarish maqsadli barcha obyektlar tegishli bo‘lgan yangi yaratilgan mol-mulk, asosiy vositalarga tegishli bo‘lgan, nazorat qilinadigan va ekspluatatsiya qilinadigan (foydalaniladigan) va kontrakt maydoni yoki kontraktdan tashqari maydon chegarasida joylashgan ko‘chmas mulk, shu jumladan binolar, inshootlar, GQIZ, GDTQ, KKS, quduqlar, quvurlar va boshqa obyektlar (keyingi o‘rinlarda sanoat ahamiyatli obyektlar deb yuritiladi);

ko‘char mulk (transport vositalari, orgtexnika, inventar va boshqalar), nomoddiy aktivlar (dasturiy mahsulotlar va boshqalar) va sanoat obyektlaridan tashqari (bundan buyon matnda boshqa mulk deb yuritiladi) boshqa mol-mulkni o‘z ichiga olgan sotib olingan mol-mulk.

8. Mazkur Nizomning amal qilishi MTB doirasida uzatiladigan investor tomonidan MTB bo‘yicha ishlarni olib borish davomida olingan geologik ma’lumotlarga tatbiq etilmaydi.

9. MTB mol-mulkini o‘tkazish jarayonini boshlash investor yoki vakolatli organ tomonidan amalga oshiriladi:

a) MTB bilan belgilangan MTBni tugatish oqibatlarini hisobga olgan holda MTB tugatilgan sanada, shu jumladan investor tomonidan MTB tugatilgan sanaga qoplanmagan xarajatlarni qoplash huquqidan mahrum bo‘lgan hollarda;

b) o‘tkaziladigan mol-mulkning qiymati qoplangan hollarda boshqaruv qo‘mitasining qaroriga muvofiq MTB va mazkur Nizom bilan nazarda tutilgan shartlar va tartibda MTB taraflari tomonidan kelishilgan boshqa kunda.

10. Sanoat ahamiyatli obyektlarni investordan O‘zbekiston Respublikasiga o‘tkazish bunday obyektlar qonun hujjatlarida va mazkur Nizom bilan belgilangan tartibda foydalanishga (ekspluatatsiyaga) topshirilgandan keyingina amalga oshirilishi mumkin, vakolatli organ tomonidan boshlangan, shuningdek mazkur Nizomning 9-bandi “a” kichik bandi bilan nazarda tutilgan hollar bundan mustasno.

11. Investor tomonidan O‘zbekiston Respublikasiga MTB mol-mulkini o‘tkazish jarayoni boshlangan taqdirda, investor vakolatli organga mol-mulkni o‘tkazish zaruratini asoslash hamda tegishli ma’lumotlar va hujjatlarni taqdim etish bilan xabarnoma, shuningdek mazkur Nizomning 1-ilovasiga muvofiq shakl bo‘yicha jadvalni yuboradi. Bunda, har bir bunday murojaat bo‘yicha yuborilgan xabarnomaga muvofiq barcha o‘tkazilishi rejalashtirilgan MTB mol-mulkining boshlang‘ich qiymati kamida 2 mlrd. so‘mni tashkil etishi kerak.

Xorijiy investor tomonidan mahsulot taqsimotiga oid bitimlar doirasida yangidan yaratilgan yoki sotib olingan mol-mulkni yakuniy foyda oluvchi timsolida O‘zbekiston Respublikasiga o‘tkazish mazkur Nizomning 2-ilovasiga muvofiq sxema bo‘yicha amalga oshiriladi.

12. Investor tomonidan O‘zbekiston Respublikasiga o‘tkazilayotgan MTB mol-mulki bo‘yicha berilgan ma’lumotlar va hujjatlar investordan tegishli barcha ma’lumotlar va hujjatlar bilan birgalikda uning mol-mulkni O‘zbekiston Respublikasiga o‘tkazish niyati to‘g‘risidagi xabarnomani olgan kundan boshlab uch oydan ortiq bo‘lmagan muddatda vakolatli organ tomonidan ko‘rib chiqilishi kerak.

13. Vakolatli organ tomonidan investordan O‘zbekiston Respublikasiga MTB mol-mulkini o‘tkazish jarayoni boshlangan taqdirda, investor vakolatli organning murojaatiga ko‘ra uch oydan ortiq bo‘lmagan muddat davomida tegishli ma’lumotlar va hujjatlarni, shuningdek ushbu Nizomning 1-ilovasiga muvofiq shakldagi jadvalni tayyorlaydi va vakolatli organga topshiradi.

14. Vakolatli organ investor tomonidan o‘tkazilayotgan MTB mol-mulki bo‘yicha taqdim etilgan ma’lumotlar va hujjatlarni ko‘rib chiqish davomida investorga, davlat va xo‘jalik boshqaruvi organlariga, mahalliy davlat hokimiyati organlariga, xo‘jalik yurituvchi subyektlariga o‘tkazilayotgan MTB mol-mulki to‘g‘risida qo‘shimcha ma’lumotlar va hujjatlarni taqdim etish hamda dastlabki hujjatlarni o‘rganish (ko‘rib chiqish) uchun so‘rovlar yuborishga haqli.

15. Vakolatli organning MTB mol-mulkini investor tomonidan o‘tkazish maqsadga muvofiqligini aniqlash bo‘yicha vakolatiga quyidagilar kiradi:

o‘tkazilayotgan MTB mol-mulki ro‘yxatini investor tomonidan taqdim etilgan ma’lumotlar va hujjatlarning muvofiqligiga, shuningdek, birlamchi hujjatlarni o‘rganish (ko‘rib chiqish)ni hisobga olgan holda, o‘tkazilayotgan MTB mol-mulkini sotib olish uchun xarajatlarning qoplangan (qoplanadigan) xarajatlarga tegishliligiga ko‘rib chiqish;

O‘zbekiston Respublikasi qonun hujjatlariga muvofiq o‘tkaziladigan MTB mol-mulkining jismoniy va ma’naviy eskirish darajasini, shuningdek, boshqaruv qo‘mitasi tomonidan tasdiqlangan jismoniy va ma’naviy eskirishlarni aniqlash metodotikasi yordamida aniqlash.

16. Vakolatli organ investor tomonidan o‘tkazilayotgan MTB mol-mulki bo‘yicha taqdim etilgan ma’lumotlar va hujjatlarni o‘rganish va ko‘rib chiqish va birlamchi hujjatlarni o‘rganish (ko‘rib chiqish) natijalari bo‘yicha quyidagi mumkin bo‘lgan (ehtimolli) takliflarni hisobga olgan holda boshqaruv qo‘mitasining kun tartibiga kiritish uchun o‘z takliflarini tayyorlaydi va investorga yuboradi:

a) MTB mol-mulkini O‘zbekiston Respublikasiga o‘tkazish butun ro‘yxat bo‘yicha maqsadga muvofiqdir;

b) MTB mol-mulkini O‘zbekiston Respublikasiga o‘tkazilishi faqat qisman maqsadga muvofiqdir;

v) MTB mol-mulkini (mulkning bir qismini) o‘tkazish maqsadga muvofiq emas va MTBning bunday mol-mulki (mulkning bir qismi) investor tomonidan kelgusida foydalanilishi kerak;

g) MTB mol-mulkini (mulkning bir qismini) o‘tkazish maqsadga muvofiq emas va bunday MTB mol-mulkini (mulkning bir qismi) investor tomonidan utilizatsiya qilinishi kerak.

17. Vakolatli organ boshqaruv qo‘mitasi tomonidan ko‘rib chiqilish uchun o‘tkazilayotgan MTB mol-mulkiga nisbatan takliflarni tayyorlashda O‘zbekiston Respublikasi qonunchiligiga va iqtisodiy jihatdan maqsadga muvofiqligiga, shu jumladan quyidagi qoidalarga amal qiladi:

a) agar o‘tkazilayotgan MTB mol-mulki ma’naviy eskirgan bo‘lsa yoki texnik shartlar bilan nazarda tutilgan muddatdan kamroq muddat davomida ekspluatatsiya qilingan, lekin ekspluatatsiya qilishga (foydalanishga) yaroqli bo‘lsa, uni O‘zbekiston Respublikasiga o‘tkazishning maqsadga muvofiqligi to‘g‘risida tavsiyanoma chiqariladi yohud investor tomonidan bunday mol-mulkdan keyingi foydalanish to‘g‘risida tavsiyanoma chiqariladi;

b) agar o‘tkazilayotgan mol-mulk jismonan eskirgan bo‘lsa va uni ta’mirlash iqtisodiy jihatdan maqsadga muvofiq bo‘lmasa, shuningdek, agar investor tomonidan MTB bo‘yicha ishlarni o‘tkazishda texnologiyalarni buzganligi va (yoki) O‘zbekiston Respublikasi qonunchiligini buzganligi sababli uskuna yaroqsiz holga kelgan bo‘lsa va ta’mirlanishi mumkin bo‘lmasa, bunday mol-mulkni investor hisobidan utilizatsiya qilinishi to‘g‘risida taklif chiqariladi. Investor tomonidan MTB mol-mulkini utilizatsiya qilish/tugatishdan daromad olingan taqdirda, ushbu daromad investorning boshqa daromadlariga tegishli bo‘ladi va qoplanadigan xarajatlarni tegishli miqdorga kamaytiradi. Investorda qoplanadigan xarajatlar bo‘lmagan taqdirda, investor tomonidan mol-mulkni utilizatsiya qilish/tugatishdan olingan daromadning butun summasi respublika budjeti daromadlariga yo‘naltirilishi lozim;

v) o‘tkazilishi rejalashtirilgan mol-mulk tarkibida texnik shartlar bilan nazarda tutilgan muddatdan kamroq muddatda foydalanishda bo‘lgan mol-mulk mavjud bo‘lganda, bunday mol-mulkni O‘zbekiston Respublikasiga o‘tkazishning maqsadga muvofiqligi yoki bunday mol-mulkdan investor tomonidan keyingi foydalanilishi to‘g‘risida tavsiyanoma chiqariladi;

g) o‘tkazilishi rejalashtirilgan mol-mulk tarkibida investor tomonidan ortiqcha miqdorda sotib olingan mol-mulk mavjud bo‘lganda, investor tomonidan bunday mol-mulkdan joriy budjetdan shunga o‘xshash tovarlarni (mol-mulkni) sotib olishni tegishli ravishda chiqarib tashlagan holda keyingi foydalanilishi to‘g‘risida yoki ushbu mol-mulk qiymatini qoplanmagan xarajatlar tarkibiga kiritish to‘g‘risida tavsiyanoma chiqariladi;

d) o‘tkazilishi rejalashtirilgan mol-mulk tarkibida investor tomonidan qasddan huquqbuzarlik sodir etilishi natijasida foydalanishga yaroqsiz mol-mulk aniqlangan taqdirda, bunday mol-mulk O‘zbekiston Respublikasiga o‘tkazilmasligi to‘g‘risida tavsiyanoma chiqariladi, investorning bunday mol-mulkka nisbatan qilgan xarajatlari qoplanmaydigan xarajatlar tarkibiga kiritiladi.

18. Boshqaruv qo‘mitasi tomonidan tasdiqlangan O‘zbekiston Respublikasiga o‘tkaziladigan mol-mulki ro‘yxati vakolatli organ tomonidan O‘zbekiston Respublikasi Davlat aktivlarini boshqarish agentligiga sanoat ahamiyatli obyektlari va boshqa mol-mulkni ko‘rsatgan holda ushbu mol-mulk to‘g‘risidagi barcha zarur hujjatlar va ma’lumotlarni bilan ulardan keyingi foydalanish bo‘yicha takliflarni tayyorlash uchun yuborilishiga asos bo‘ladi.

19. Investor boshqaruv qo‘mitasi tomonidan qaror qabul qilingan paytdan boshlab bunday mol-mulkni qabul qilish va yakuniy foyda oluvchiga topshirish dalolatnomasi rasmiylashtirilgunga qadar MTB mol-mulkining saqlanlaganligi uchun javobgar bo‘ladi.

20. O‘zbekiston Respublikasi Davlat aktivlarini boshqarish agentligi vakolatli organdan o‘tkaziladigan MBT mol-mulki ro‘yxati va bunday mol-mulk to‘g‘risidagi barcha zarur hujjatlarni hamda ma’lumotlarni olgandan keyin zarur hollarda investorga, davlat va xo‘jalik boshqaruvi organlariga, mahalliy davlat hokimiyati organlariga, xo‘jalik yurituvchi subyektlarga berilgan o‘tkazilayotgan MTB mol-mulkiga nisbatan qo‘shimcha ma’lumotlar va hujjatlarni taqdim etish to‘g‘risida talablarni, shuningdek, yakuniy foyda oluvchi sifatida bunday mol-mulkni olish uchun ularning ehtiyojlarini yuborishga haqli.

21. Vakolatli organ tomonidan yuborilgan barcha hujjatlarni ko‘rib chiqish natijalari bo‘yicha O‘zbekiston Respublikasi Davlat aktivlarini boshqarish agentligi vakolatli organdan hujjatlar olingan kundan boshlab 30 kundan kechiktirmay sanoat ahamiyatli obyektlarga va boshqa mol-mulkka nisbatan yakuniy foyda oluvchilari to‘g‘risida qaror qabul qilish uchun O‘zbekiston Respublikasi Vazirlar Mahkamasiga takliflar yuboradi.

22. Yakuniy foyda oluvchi, sanoat ahamiyatli obyektlarini unga o‘tkazish shartlari, shu jumladan ulardan foydalanish maqsadlari O‘zbekiston Respublikasi Davlat aktivlarini boshqarish agentligi va vakolatli organning taklifiga binoan O‘zbekiston Respublikasi Vazirlar Mahkamasining qarori bilan belgilanadi.

O‘zbekiston Respublikasi Vazirlar Mahkamasining qarori asosida sanoat ahamiyatli obyektlarni investordan yakuniy foyda oluvchiga o‘tkazish bir tomondan yakuniy foyda oluvchining, ikkinchi tomondan investorning vakolatli vakillari tomonidan imzolanadigan qabul qilish-topshirish dalolatnomasi bilan rasmiylashtiriladi hamda investor va foyda oluvchi, O‘zbekiston Respublikasi Davlat aktivlarini boshqarish agentligi va vakolatli organ uchun bittadan nusxada to‘rtta bir xil nusxada rasmiylashtiriladi.

23. MTB doirasida yangi yaratilgan yoki sotib olingan mol-mulkka egalik huquqi yakuniy foyda oluvchiga o‘tgandan keyin bunday mol-mulkka nisbatan xarajatlar qoplangan taqdirda, zarur hollarda investorga MTB doirasida faoliyatni amalga oshirishi uchun MTBning amal qilish muddati davomida bunday mol-mulkdan tekinga foydalanishning mutlaq huquqi beriladi, va investor uning foydalanishida bo‘lgan mol-mulkni saqlashga doir chiqimlarni hamda uning tasodifan nobud bo‘lishi yoki tasodifan buzilishi ehtimoli xavfini o‘z zimmasiga oladi. Bunda, investor MTB bilan belgilangan tartibda yakuniy foyda oluvchi tomonidan unga berilgan mol-mulkni modernizatsiya va rekonstrutsiya qilishga haqli. Investorning bunday ishlarni o‘tkazish uchun sarflagan xarajatlari qoplanishi mumkin bo‘lgan xarajatlarga kiradi.

24. O‘zbekiston Respublikasi Vazirlar Mahkamasining qarori bilan sanoat ahamiyatli obyektlarga taalluqli bo‘lmagan boshqa MTB mol-mulki kelgusida amalga oshirish uchun belgilangan tartibda quyidagilarga o‘tkaziladi:

a) O‘zbekiston Respublikasi Davlat budjetidan moliyalashtiriladigan tashkilotlarga — tekinga (bepul asosda);

b) xo‘jalik yurituvchi subyektlarga — mazkur xo‘jalik yurituvchi subyektlarning ustav fondidagi davlat ulushini belgilangan tartibda ko‘paytirish hisobiga;

v) mahalliy ijro etuvchi hokimiyat organlariga.

Boshqa mol-mulk ushbu bandda ko‘rsatilgan yuridik shaxslarga o‘tkazilgan taqdirda, bunday mol-mulkka egalik huquqini o‘tkazish bir tomondan yakuniy foyda oluvchining, ikkinchi tomondan investorning vakolatli vakillari tomonidan imzolanadigan qabul qilish-topshirish dalolatnomasi bilan rasmiylashtiriladi hamda investor va foyda oluvchi, O‘zbekiston Respublikasi Davlat aktivlarini boshqarish agentligi va vakolatli organ uchun bittadan nusxada to‘rtta bir xil nusxada rasmiylashtiriladi.

25. MTB mol-mulkini o‘tkazish bilan bog‘liq nizolar va kelishmovchiliklar MTB va O‘zbekiston Respublikasi qonun hujjatlariga muvofiq hal qilinadi.

4. “Uskunalar va inventarlarning holati” ustuniga quyidagi baholar qo‘yiladi: “A’lo”, “Yaxshi”, “Qoniqarli”, “Ishga yaroqsiz”. Bunda, vakolatli organ o‘tkazilishi rejalashtirilgan barcha mol-mulkni inventarizatsiya qilish huquqini o‘zida saqlab qoladi.

5. 16-ustunda, agar uskuna to‘liq eskirgan va hisobdan chiqarilgan bo‘lsa, hisobdan chiqarishni o‘tkazish sanasi ko‘rsatiladi.