Oʻzbekiston Respublikasi Vazirlar Mahkamasining “2015 — 2020-yillar davrida Oʻzbekiston Respublikasi aholisining sogʻlom ovqatlanishini taʼminlash Konsepsiyasini va chora-tadbirlar kompleksini tasdiqlash toʻgʻrisida” 2015-yil 29-avgustdagi 251-son qarorini bajarish yuzasidan Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga qoʻshimchalar va oʻzgartish kiritilsin.

2. Oʻzbekiston Respublikasi Sogʻliqni saqlash vazirligi Moliya vazirligi va Oʻzbekiston Respublikasi Markaziy banki bilan birgalikda yodlangan tuzni realizatsiya qilishdan tushgan mablagʻlarning bir qismini Oʻzbekiston Respublikasi Sogʻliqni saqlash vazirligi huzuridagi “Salomatlik-3” loyihasini amalga oshirish Markaziy byurosining (keyingi oʻrinlarda Markaziy byuro deb ataladi) maxsus hisob raqamida jamlash tartibi toʻgʻrisidagi nizomni bir oy muddatda ishlab chiqsin va tasdiqlasin.

3. Oʻzbekiston Respublikasi Sogʻliqni saqlash vazirligi yodlangan tuzning sifati, uni ishlab chiqarish, saqlash, olib kelish va realizatsiya qilishning tizimli monitoringini, shuningdek yod yetishmasligi kasalliklari profilaktikasi boʻyicha tadbirlarning samaradorligini taʼminlasin.

4. Oʻzbekiston Respublikasi Moliya vazirligi mikronutriyentlarni xarid qilish va Markaziy byuroning Oziq-ovqat mahsulotlarini boyitish dasturini amalga oshirish guruhini saqlash uchun nazarda tutilgan Markaziy byuroning maxsus hisob raqamida jamlangan mablagʻlardan samarali foydalanilishi ustidan doimiy nazorat oʻrnatsin.

5. Vazirliklar va idoralar bir oy muddatda oʻzlari qabul qilgan normativ-huquqiy hujjatlarni ushbu qarorga muvofiqlashtirsinlar.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.

1. Vazirlar Mahkamasining “Aholi oʻrtasida mikronutriyent yetishmasligi profilaktikasi toʻgʻrisida”gi Oʻzbekiston Respublikasi Qonunini amalga oshirish chora-tadbirlar haqida” 2010-yil 23-noyabrdagi 260-son qarorida (Oʻzbekiston Respublikasi qonun hujjatlari toʻplami, 2010-y., 47-son, 428-modda):

a) quyidagi mazmundagi 3¹-band qoʻshilsin:

“3¹. Belgilansinki:

tuzni yodlashtirish uchun zarur boʻlgan mikronutriyentlarni dastlabki xarid qilish boyitilgan 1-navli bugʻdoy unini sotishdan tushgan jamlangan mablagʻlar hisobiga amalga oshiriladi;

yodlangan tuz ishlab chiqaruvchi korxonalarga mikronutriyentlarni yetkazib berish oldindan haq toʻlanmasdan amalga oshiriladi, yodlangan tuzni sotishdan tushgan tushumning mikronutriyentlarni xarid qilishni taʼminlash uchun ularning qiymatiga teng boʻlgan bir qismi keyinchalik korxonalar tomonidan Oʻzbekiston Respublikasi Sogʻliqni saqlash vazirligi huzuridagi “Salomatlik-3” loyihasini amalga oshirish Markaziy byurosining maxsus hisob raqamiga oʻtkaziladi”;

b) 7-band oʻz kuchini yoʻqotgan deb hisoblansin.

2. Vazirlar Mahkamasining “Aholi oʻrtasida mikronutriyent yetishmasligi profilaktikasi toʻgʻrisida”gi Oʻzbekiston Respublikasi Qonunini amalga oshirishga doir qoʻshimcha chora-tadbirlar haqida” 2013-yil 14-maydagi 129-son qarorining 4-bandiga (Oʻzbekiston Respublikasi qonun hujjatlari toʻplami, 2013-y., 20-son, 255-modda) “TIF TN kodi 2106 90 980 3” soʻzlaridan keyin “va 2829 90 800 0” soʻzlari qoʻshilsin.