Qishloq xoʻjaligini mineral oʻgʻitlar, oʻsimliklarni himoya qilishning kimyoviy va biologik vositalari bilan taʼminlash tizimini takomillashtirish, qishloq xoʻjaligi tovar yetishtiruvchilariga agrokimyo xizmati koʻrsatishning yaxlit tuzilmasini tashkil etish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining 2000-yil 27-dekabrdagi F-1313-son farmoyishiga muvofiq tuzilgan Kimyo tarmogʻini tashkil etish va boshqarish, qishloq xoʻjaligini mineral oʻgʻitlar va oʻsimliklarni himoya qilishning kimyoviy vositalari bilan taʼminlash tizimini takomillashtirish boʻyicha maxsus komissiyaning:

“Oʻzagrokimyotaʼminot” davlat-aksiyadorlik jamiyati hamda Oʻsimliklarni himoya qilish va agrokimyoviy tadqiqotlar respublika markazi bazasida, ularni tegishli ravishda “Oʻzkimyosanoat” uyushmasi va Oʻzbekiston Respublikasi Qishloq va suv xoʻjaligi vazirligi tarkibidan chiqargan holda, mustaqil “Oʻzqishloqxoʻjalikkimyo” davlat-aksiyadorlik kompaniyasini tashkil etish toʻgʻrisidagi;

Qoraqalpogʻiston Respublikasi va barcha viloyatlarda faoliyat koʻrsatayotgan “Agrokimyotaʼminot” Qoraqalpogʻiston respublika va viloyatlar birlashmalari hamda oʻsimliklarni himoya qilish va agrokimyoviy tadqiqotlar hududiy markazlari va agrokimyo stansiyalari bazasida hududiy “Qishloqxoʻjalikkimyo” aksiyadorlik birlashmalarini tashkil etish toʻgʻrisidagi;

“Agrokimyotaʼminot” tuman va tumanlararo birlashmalarini, oʻsimliklarni himoya qilish va agrokimyoviy tadqiqotlar tuman markazlarini “Qishloqxoʻjalikkimyo” Qoraqalpogʻiston respublika va viloyatlar aksiyadorlik birlashmalarining filiallariga aylantirish toʻgʻrisidagi taklifiga rozilik berilsin.

2. Belgilab qoʻyilsinki, “Oʻzqishloqxoʻjalikkimyo” davlat-aksiyadorlik kompaniyasi yuridik shaxs hamda “Oʻzagrokimyotaʼminot” davlat-aksiyadorlik birlashmasi va Oʻsimliklarni himoya qilish va agrokimyoviy tadqiqotlar respublika markazining huquqiy vorisi hisoblanadi.

Quyidagilar “Oʻzqishloqxoʻjalikkimyo” davlat-aksiyadorlik kompaniyasining asosiy vazifalari etib belgilansin:

kimyolashtirish va tuproq unumdorligini oshirish, oʻsimliklar kasalliklari, qishloq xoʻjaligi zararkunandalari va begona oʻtlar profilaktikasi va ularga qarshi kurashish boʻyicha yagona texnika siyosatini amalga oshirish;

mineral oʻgʻitlarga, oʻsimliklarni himoya qilishning kimyoviy va biologik vositalariga, qishloq xoʻjaligi ehtiyojlari uchun boshqa kimyoviy mahsulotlarga boʻlgan ehtiyojni aniqlash;

mineral oʻgʻitlar va oʻsimliklarni himoya qilish kimyoviy vositalarining har yilgi hududiy balanslarini ishlab chiqish va ularning bajarilishini nazorat qilish;

respublikada ishlab chiqarish yoʻlga qoʻyilmagan kaliyli oʻgʻitlar va kimyoviy preparatlarni import boʻyicha xarid qilishni tashkil etish.

“Oʻzqishloqxoʻjalikkimyo” davlat-aksiyadorlik kompaniyasining tashkiliy tuzilmasi, uning xodimlarining cheklangan soni 34 kishidan (xizmat koʻrsatuvchi xodimlardan tashqari) iborat boʻlgan ijro etuvchi apparati tuzilmasi, “Qishloqxoʻjalikkimyo” viloyat aksiyadorlik birlashmalarining hamda ularning tuman va tumanlararo filiallari namunaviy tuzilmalari 1, 1a, 1b, 1v va 1g ilovalarga* muvofiq maʼqullansin.

3. “Qishloqxoʻjalikkimyo” Qoraqalpogʻiston respublika va viloyatlar aksiyadorlik birlashmalari hamda filial huquqi bilan ularning tarkibiga kiruvchi tuman va tumanlararo xizmatlar “Oʻzqishloqxoʻjalikkimyo” davlat-aksiyadorlik kompaniyasining asosiy tarkibiy boʻlinmalari etib belgilansin.

Hududiy “Qishloqxoʻjalikkimyo” aksiyadorlik birlashmalari hamda ularning tuman va tumanlararo xizmatlariga quyidagi vazifalar yuklansin:

qishloq xoʻjaligi ishlab chiqaruvchilarini, shu jumladan fermer va dehqon xoʻjaliklarini shartnoma asosida mineral oʻgʻitlar, oʻsimliklarni himoya qilishning kimyoviy va biologik vositalari, tuproq meliorantlari hamda qishloq xoʻjaligi ehtiyojlari uchun boshqa kimyoviy mahsulotlar bilan oʻz vaqtida taʼminlash;

mineral oʻgʻitlar va oʻsimliklarni himoya qilishning kimyoviy vositalaridan maqsadli va samarali foydalanishni, shuningdek ularning saqlanishini taʼminlash chora-tadbirlarini amalga oshirish;

shartnoma shartlarida qishloq xoʻjaligiga agrokimyo xizmati koʻrsatish ishlarini amalga oshirish;

mineral oʻgʻitlar hamda oʻsimliklarni himoya qilishning kimyoviy vositalarini yetkazib beruvchilar va ularning qishloq xoʻjaligidagi isteʼmolchilari oʻrtasidagi iqtisodiy munosabatlar va hisob-kitoblar mexanizmini takomillashtirish;

qishloq xoʻjaligi uchun keltiriladigan mineral oʻgʻitlar, oʻsimliklarni himoya qilishning kimyoviy vositalari, boshqa kimyoviy mahsulotlar sifati ustidan nazoratni tashkil etish.

Hududiy “Qishloqxoʻjalikkimyo” aksiyadorlik birlashmalarining ustav jamgʻarmalari tugatilayotgan “Agrokimyotaʼminot”viloyat birlashmalari hamda Oʻsimliklarni himoya qilish va agrokimyoviy tadqiqotlar markazlari balansida boʻlgan mol-mulklar, shuningdek “Agrokimyotaʼminot” tuman va tumanlararo birlashmalari, oʻsimliklarni himoya qilish va agrokimyoviy tadqiqotlar tuman markazlari mol-mulki qiymati hisobiga shakllantiriladi.

4. Oʻzbekiston Respublikasi Prezidentining 2000-yil 27-dekabrdagi F-1313-son farmoyishi bilan tuzilgan maxsus komissiya (R.Azimov), Oʻzbekiston Respublikasi Davlat mulki qoʻmitasi:

“Oʻzqishloqxoʻjalikkimyo” davlat-aksiyadorlik kompaniyasi bilan birgalikda ikki oy muddatda, belgilangan tartibda hududiy “Qishloqxoʻjalikkimyo” aksiyadorlik birlashmalarini tashkil etishga doir tashkiliy tadbirlarni amalga oshirsinlar, shu bilan birga ularning ustav jamgʻarmasiga kiritiladigan mol-mulklar qiymatini qayta baholab chiqsinlar;

istisno tariqasida, 2001—2003-yillar mobaynida “Oʻzqishloqxoʻjalikkimyo” davlat-aksiyadorlik kompaniyasi tarkibiga kiruvchi aksiyadorlik jamiyatlari aksiyalarining davlat ulushi boʻyicha dividendlarni maqsadli foydalangan holda, kompaniyaning ishlab chiqarish infratuzilmasini rivojlantirishga yoʻnaltirsinlar.

5. “Oʻzqishloqxoʻjalikkimyo” davlat-aksiyadorlik kompaniyasi Oʻzbekiston Respublikasi Qishloq va suv xoʻjaligi vazirligi, Davlat mulki qoʻmitasi bilan birgalikda bir oy muddatda kompaniyaning hamda viloyatlar aksiyadorlik birlashmalarining Ustavlarini ishlab chiqsin va tasdiqlasin, Oʻzbekiston Respublikasi Adliya vazirligi esa ularni belgilangan tartibda roʻyxatdan oʻtkazsin.

6. Belgilab qoʻyilsinki:

“Oʻzqishloqxoʻjalikkimyo” davlat-aksiyadorlik kompaniyasi raisi va uning oʻrinbosarlari lavozimga belgilangan tartibda kompaniya aksiyadorlarining Umumiy yigʻilishi tomonidan tayinlanadi, keyinchalik Oʻzbekiston Respublikasi Vazirlar Mahkamasi tomonidan tasdiqlanadi.

“Oʻzqishloqxoʻjalikkimyo” davlat-aksiyadorlik kompaniyasi raisining ikki nafar oʻrinbosari, shu jumladan bir nafar birinchi oʻrinbosari boʻladi.

“Oʻzqishloqxoʻjalikkimyo” davlat-aksiyadorlik kompaniyasi raisi va uning oʻrinbosarlari maqomi, maishiy taʼminot, tibbiy va transport xizmati koʻrsatish sharoitlari boʻyicha tegishli ravishda vazirning birinchi oʻrinbosariga va vazir oʻrinbosarlariga tenglashtirilsin.

7. Quyidagilar:

Qishloq xoʻjaligi ishlab chiqaruvchilariga yetkazib beriladigan mineral oʻgʻitlar va oʻsimliklarni himoya qilishning kimyoviy vositalari, kimyo mahsulotlariga buyurtmanomalarni shakllantirish, ularni berish va ular uchun hisob-kitob qilish tartibi 2-ilovaga muvofiq;

2001—2003-yillarda qishloq xoʻjaligi korxonalari omborlari bazasida mineral oʻgʻitlarni saqlash va sotish uchun omborlar va ixtisoslashgan doʻkonlar tashkil etish boʻyicha topshiriq 3-ilovaga* muvofiq tasdiqlansin.

8. “Oʻzqishloqxoʻjalikkimyo” davlat-aksiyadorlik kompaniyasi hududiy boʻlinmalari rahbarlarini attestatsiyadan oʻtkazish boʻyicha 4-ilovaga* muvofiq maxsus idoralararo komissiya tuzilsin.

“Oʻzqishloqxoʻjalikkimyo” davlat-aksiyadorlik kompaniyasi hududiy boʻlinmalari rahbarlarini attestatsiyadan oʻtkazish boʻyicha komissiya bir oy muddatda “Oʻzqishloqxoʻjalikkimyo” davlat-aksiyadorlik kompaniyasining Qoraqalpogʻiston Respublikasi va viloyatlardagi boʻlinmalari rahbarlarini attestatsiyadan oʻtkazsin.

9. “Oʻzqishloqxoʻjalikkimyo” davlat-aksiyadorlik kompaniyasi Oʻzbekiston Respublikasi Qishloq va suv xoʻjaligi vazirligi bilan birgalikda bir oy muddatda qishloq xoʻjaligini mineral oʻgʻitlar bilan taʼminlash tizimi moddiy-texnika bazasini, shu jumladan qishloq xoʻjaligi korxonalari omborlarini xatlovdan oʻtkazsin, mineral oʻgʻitlar va kimyolashtirish vositalaridan samarali foydalanish va ularni saqlash tarmoqlarini rivojlantirish boʻyicha tadbirlarni ishlab chiqsin va tasdiqlasin.

10. Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi hamda Moliya vazirligi “Oʻzkimyosanoat” uyushmasi korxonalari tomonidan ishlab chiqariladigan va “Oʻzqishloqxoʻjalikkimyo” davlat-aksiyadorlik kompaniyasi orqali sotiladigan mineral oʻgʻitlar, oʻsimliklarni himoya qilishning kimyoviy vositalariga narx belgilash normalarining, shuningdek agrokimyoviy servis xizmatlariga tariflarning asoslanganligi va ularga rioya etilishi ustidan qatʼiy nazorat oʻrnatsinlar.

11. “Oʻzqishloqxoʻjalikkimyo” davlat-aksiyadorlik kompaniyasi boʻlinmalariga “Oʻzqishloqxoʻjalikmash-xolding” kompaniyasi korxonalari, shu jumladan qoʻshma korxonalar tomonidan ishlab chiqarilayotgan qishloq xoʻjaligi texnikasini Vazirlar Mahkamasining 2000-yil 2-noyabrdagi 424-son qarori bilan tasdiqlangan tartibga muvofiq lizing boʻyicha sotib olish huquqi berilsin.

12. “Oʻzqishloqxoʻjalikkimyo” davlat-aksiyadorlik kompaniyasi boʻlinmalari mulk soligʻini hamda qishloq xoʻjaligi korxonalaridan, shu jumladan fermer xoʻjaliklariga aylantirilayotgan qishloq xoʻjaligi korxonalaridan sotib olinayotgan omborlarning qiymati va yer maydoni boʻyicha hisoblanadigan yer soligʻini toʻlashdan, boʻshaydigan mablagʻlarni ishlab chiqarish infratuzilmasini va omborlarning moddiy-texnika bazasini rivojlantirishga maqsadli yoʻnaltirish sharti bilan, ikki yil muddatga ozod qilinsin.

13. Belgilab qoʻyilsinki, “Oʻzqishloqxoʻjalikkimyo” davlat-aksiyadorlik kompaniyasining chakana savdo tarmoqlari orqali dehqon va fermer xoʻjaliklariga sotiladigan mineral oʻgʻitlar va kimyoviy preparatlar qoʻshilgan qiymat soligʻiga tortilmaydi.

14. Oʻzbekiston Respublikasi Moliya vazirligi “Oʻzqishloqxoʻjalikkimyo” davlat-aksiyadorlik kompaniyasiga aylanma mablagʻlar ajratish boʻyicha bir oy muddatda Vazirlar Mahkamasiga taklif kiritsin.

15. “Oʻzqishloqxoʻjalikkimyo” davlat-aksiyadorlik kompaniyasining ijro etuvchi apparati Toshkent shahar, Amir Temur koʻchasi, 62-uyga joylashtirilsin.

16. Vazirlar Mahkamasining 1996-yil 7-avgustdagi 274-son qarori oʻz kuchini yoʻqotgan deb hisoblansin.

Oʻzbekiston Respublikasi Adliya vazirligi qonun hujjatlariga ushbu qarordan kelib chiqadigan oʻzgartirishlar kiritish toʻgʻrisida bir oy muddatda Vazirlar Mahkamasiga takliflar kiritsin.

Vazirliklar va idoralar bir oy muddatda oʻz normativ hujjatlarini belgilangan tartibda ushbu qarorga muvofiqlashtirsinlar.

17. Mazkur qarorning bajarilishini nazorat qilish Oʻzbekiston Respublikasi Prezidentining Davlat maslahatchisi I.H. Joʻrabekov va Oʻzbekiston Respublikasi Bosh vazirining oʻrinbosari T. Xoltoyev zimmasiga yuklansin.

1. Mazkur Tartib qishloq xoʻjaligi ishlab chiqaruvchilariga, shu jumladan, dehqon va fermer xoʻjaliklariga yetkazib beriladigan mineral oʻgʻitlar va oʻsimliklarni himoya qilishning kimyoviy vositalari, kimyo mahsulotlariga buyurtmanomalarni shakllantirish, ularni berish va ular uchun hisob-kitob qilish tizimini belgilaydi.

2. Qishloq xoʻjaligi ishlab chiqaruvchilari navbatdagi yilga qishloq xoʻjaligi mahsuloti yetishtirish prognozi, tuzilgan kontraktatsiya shartnomalari asosida texnologiya kartalariga muvofiq mineral oʻgʻitlar, oʻsimliklarni himoya qilishning kimyoviy vositalari, boshqa kimyo mahsulotlariga boʻlgan ehtiyojni aniqlaydilar hamda buyurtmanomalarni “Qishloqxoʻjalikkimyo” aksiyadorlik birlashmalarining tuman va tumanlararo filiallariga yuboradilar. Buyurtmanomalarda qishloq xoʻjaligi mahsulotlari turlari, shu jumladan, davlat xaridlari va tijorat shartnomalari — buyurtmalari boʻyicha mahsulot sotilishi ajratib koʻrsatiladi.

3. “Qishloqxoʻjalikkimyo” aksiyadorlik birlashmalarining tuman va tumanlararo filiallari buyurtmanomalarning asoslanganligini tekshiradilar, ularni umumlashtiradilar hamda kimyoviy mahsulotlarga yigʻma buyurtmanomalarni tegishli “Qishloqxoʻjalikkimyo” aksiyadorlik birlashmalariga yuboradilar.

Hududiy “Qishloqxoʻjalikkimyo” aksiyadorlik birlashmalari buyurtmanomalarni Qoraqalpogʻiston Respublikasi va viloyatlar boʻyicha umumlashtiradilar hamda ularni “Oʻzqishloqxoʻjalikkimyo” davlat-aksiyadorlik kompaniyasiga yuboradilar.

4. “Oʻzqishloqxoʻjalikkimyo” davlat-aksiyadorlik kompaniyasi har yili, joriy yilning 1-oktabridan kechikmay, qishloq xoʻjaligi ishlab chiqaruvchilarining buyurtmanomalarini umumlashtirish asosida qishloq xoʻjaligi ishlab chiqarishining kelgusi yilda mineral oʻgʻitlar, oʻsimliklarni himoya qilishning kimyoviy vositalari, boshqa kimyoviy mahsulotlarga boʻlgan ehtiyojining yigʻma prognozini davlat xaridlari boʻyicha hamda tijorat shartnomalari-buyurtmalari boʻyicha alohida shakllantiradi.

5. “Oʻzqishloqxoʻjalikkimyo” davlat-aksiyadorlik kompaniyasi mineral oʻgʻitlar va oʻsimliklarni himoya qilish vositalariga boʻlgan yigʻma ehtiyojni “Oʻzkimyosanoat” uyushmasi bilan kelishib oladi va uni tegishli balanslarni shakllantirish uchun Makroiqtisodiyot va statistika vazirligiga yuboradi.

6. Tasdiqlangan balanslarga muvofiq:

“Oʻzkimyosanoat” uyushmasi kimyo mahsulotlari ishlab chiqarishga buyurtmanomalarni tayyorlovchi zavodlar boʻyicha joylashtiradi va “Oʻzqishloqxoʻjalikkimyo” davlat-aksiyadorlik kompaniyasiga tegishli axborot taqdim etadi.

“Oʻzqishloqxoʻjalikkimyo” davlat-aksiyadorlik kompaniyasi kimyo mahsulotlariga limitlarni tayyorlovchi zavodlar boʻyicha hududiy “Qishloqxoʻjalikkimyo” aksiyadorlik birlashmalariga yetkazadi.

7. Hududiy “Qishloqxoʻjalikkimyo” aksiyadorlik birlashmalari kimyoviy mahsulotlar yetkazib berish yuzasidan tayyorlovchi zavodlar bilan mahsulotni yuklab joʻnatish va olib ketishning majburiy jadvali mavjud boʻlgan shartnomalar tuzadilar.

Oʻsimliklarni himoya qilishning kimyoviy vositalarini va boshqa kimyoviy vositalarni import boʻyicha yetkazib berish yuzasidan kontraktlar markazlashtirilgan tartibda “Oʻzqishloqxoʻjalikkimyo” davlat-aksiyadorlik kompaniyasi tomonidan tuziladi.

8. Hududiy “Qishloqxoʻjalikkimyo” aksiyadorlik birlashmalari kimyoviy mahsulotlarga limitlarni tayyorlovchi zavodlar boʻyicha oʻz tuman va tumanlararo filiallariga yetkazadilar hamda ularga agrokimyo xizmatlari koʻrsatish va mineral oʻgʻitlar hamda boshqa kimyo mahsulotlari yetkazib berish yuzasidan qishloq xoʻjaligi ishlab chiqaruvchilari bilan shartnomalar tuzish vakolatini beradi.

9. Koʻrsatib oʻtilgan hujjatlar olingandan keyin “Qishloqxoʻjalikkimyo” aksiyadorlik birlashmalarining tuman va tumanlararo filiallari ajratilgan limitlar doirasida hududiy “Qishloqxoʻjalikkimyo” aksiyadorlik birlashmalari nomidan davlat xaridlari boʻyicha alohida va tijorat shartnomalari — buyurtmalari boʻyicha alohida tegishli shartnomalar tuzadilar.

10. “Oʻzkimyosanoat” uyushmasining tayyorlovchi zavodlari tomonidan mahsulot “Qishloqxoʻjalikkimyo” aksiyadorlik birlashmasining tuman va tumanlararo filiallariga kalendar oy mobaynida berilayotgan mahsulot qiymatining kamida 15 foizi oldindan toʻlanishi sharti bilan beriladi. Ishlab chiqaruvchilar olgan mablagʻlardan belgilangan tartibda kreditorlik qarzlarni qaytarishda foydalaniladi.

11. Mineral oʻgʻitlar va boshqa kimyo mahsulotlariga buyurtmanomalarni shakllantirish va ularni qishloq xoʻjaligi tovar ishlab chiqaruvchilariga yetkazib berish sxemasi mazkur tartibga 1-ilovada keltirilgan.

12. “Oʻzdonmahsulot” davlat-aksiyadorlik korporatsiyasi, “Oʻzdavpaxtasanoatsotish” uyushmasining davlat ehtiyojlari uchun yetishtiriladigan mahsulot xaridi boʻyicha yigʻma prognozlari asosida “Oʻzqishloqxoʻjalikkimyo” davlat-aksiyadorlik kompaniyasi Oʻzbekiston Respublikasi Moliya vazirligi huzuridagi Davlat ehtiyojlari uchun xarid qilinadigan qishloq xoʻjaligi mahsulotlarining hisob-kitob jamgʻarmasiga alohida rejalashtirilayotgan yil uchun mablagʻlarga boʻlgan ehtiyojning oylar boʻyicha prognozini taqdim etadi.

Mablagʻlarga boʻlgan ehtiyoj prognozi asosida, texnologiya kartalarida nazarda tutilgan normalardan, tuproq boniteti va mineral oʻgʻitlar va oʻsimliklarni himoya qilishning kimyoviy vositalari bilan taʼminlanganlikdan kelib chiqib Jamgʻarma davlat xaridlarini taʼminlash boʻyicha zarur resurslarni hamda ularning manbalarini belgilaydi.

13. Jamgʻarma mineral oʻgʻitlar va oʻsimliklarni himoya qilishning kimyoviy vositalaridan foydalanish davrlarini hisobga olgan holda davlat ehtiyojlari uchun xarid qilinadigan qishloq xoʻjaligi mahsuloti yetishtiruvchilarga avans beradi, ushbu avans qishloq xoʻjaligi ishlab chiqaruvchilariga “Qishloqxoʻjalikkimyo” aksiyadorlik birlashmalari korxonalari bilan hisob-kitob qilish uchun transhlar boʻyicha yuboriladi.

14. Zarurat boʻlganda hududiy “Qishloqxoʻjalikkimyo” aksiyadorlik birlashmalari transhlar boʻyicha olinadigan mablagʻlarni oʻzining tuman va tumanlararo filiallari oʻrtasida ularni aylanma mablagʻlar bilan taʼminlash maqsadida qayta taqsimlaydi.

15. Qoraqalpogʻiston Respublikasi va respublika viloyatlaridagi “Qishloqxoʻjalikkimyo” aksiyadorlik birlashmalari mineral oʻgʻitlar va oʻsimliklarni himoya qilishning kimyoviy vositalarini tayyorlovchi zavodlarga qishloq xoʻjaligi korxonalari tomonidan oʻtkazilgan mablagʻlarni tuzilgan shartnomalarga muvofiq kelgusi oy mobaynida yetkazib beriladigan mahsulot qiymatining kamida 15 foizi miqdorida oldindan haqini toʻlash uchun, shuningdek, “Oʻzqishloqxoʻjalikkimyo” davlat-aksiyadorlik kompaniyasiga import boʻyicha olib kelinadigan mahsulot qiymatini toʻlash uchun yuboradi.

16. Mineral oʻgʻitlar va oʻsimliklarni himoya qilishning kimyoviy vositalari belgilangan tartibda “Qishloqxoʻjalikkimyo” birlashmasining mintaqaviy boʻlimlariga yetkazib beriladi. Bir oyga buyurtma qilingan mineral oʻgʻitlar va oʻsimliklarni himoya qilish vositalari tupik hajmda olinganligi tasdiqlangandan keyin yetkazib berilgan mahsulot qiymatining qolgan 85 foizi yuzasidan tayyorlovchi zavod bilan uzil-kesil hisob-kitob qilinadi.

17. “Qishloqxoʻjalikkimyo” aksiyadorlik birlashmasining tuman va tumanlararo filiallari faqat kamida 15 foiz haqi oldindan toʻlanishi sharti bilan qishloq xoʻjaligi tovar ishlab chiqaruvchilariga agrokimyo xizmatlari koʻrsatadi, shuningdek, tuzilgan shartnomalarda koʻrsatilgan hajmlar va muddatlarda ularga mineral oʻgʻitlar va oʻsimliklarni himoya qilish vositalarini sotadi.

18. Toʻgʻridan-toʻgʻri shartnomalar boʻyicha mineral oʻgʻitlar, oʻsimliklarni himoya qilishning kimyoviy vositalari, kimyo mahsulotlari “Oʻzqishloqxoʻjalikkimyo” davlat-aksiyadorlik kompaniyasining doʻkonlari shoxobchalari yoki bazalari orqali, shuningdek, mahsulot qiymatining kamida 15 foizi oldindan toʻlanishi sharti bilan bevosita tayyorlovchi zavodlar tomonidan sotiladi.

19. Tayyorlovchi zavodlar tomonidan tijorat buyurtmalari boʻyicha sotishga moʻljallangan mineral oʻgʻitlar va oʻsimliklarni himoya qilish vositalari “Oʻzqishloqxoʻjalikkimyo” davlat-aksiyadorlik kompaniyasi boʻlinmalari tomonidan yuklab joʻnatiladigan mahsulot qiymatining kamida 15 foizi oldindan toʻlangan va ilgari olingan mahsulot haqi 100 foiz toʻlangan taqdirdagina yuklab joʻnatiladi.

20. Dehqon va fermer xoʻjaliklariga, davlat ehtiyojlari uchun xarid qilinmaydigan qishloq xoʻjaligi mahsulotlari yetishtirish uchun “Oʻzmevasabzavotuzumsanoat-xolding” xolding kompaniyasi, “Oʻzgoʻshtsutsanoat” uyushmasi tarkibiga kiruvchi xoʻjaliklar va korxonalarga, shuningdek, sanoat isteʼmolchilariga, baliqchilik baliq ovlash korxonalari hamda kichik tadbirkorlik (biznes) subyektlariga mineral oʻgʻitlar qishloq joylarda ochilgan ixtisoslashtirilgan doʻkonlar shoxobchalari, “Oʻzqishloqxoʻjalikkimyo” davlat-aksiyadorlik kompaniyasining bazalari orqali, toʻgʻridan toʻgʻri shartnomalar boʻyicha tayyorlovchi zavodlardan, shu jumladan, fyuchers shartnomalari boʻyicha sotiladi.

21. Qishloq xoʻjaligi ishlab chiqaruvchilariga yetkazib beriladigan mineral oʻgʻitlar va kimyoviy preparatlar uchun oʻzaro hisob-kitoblar mazkur Tartibga 2-ilovaga muvofiq sxema boʻyicha amalga oshiriladi.