Oʻzbekiston Respublikasi Prezidentining “Oʻzbekiston Respublikasi qurolli kuchlari harbiy xizmatchilarini uy-joy bilan taʼminlash tartibi toʻgʻrisidagi Nizomni tasdiqlash haqida” 2007-yil 14-sentabrdagi PQ-694-son qarorini ijrosini taʼminlash, shuningdek Oʻzbekiston Respublikasi Favqulodda vaziyatlar vazirligining moddiy-texnika bazasini yanada mustahkamlash maqsadida Vazirlar Mahkamasi qaror qiladi:

1. Oʻzbekiston Respublikasi Favqulodda vaziyatlar vazirligining Toshkent shahar hokimligi tasarrufida boʻlgan Toshkent shahri, Yashnobod tumani, Tuzel-1 massivi manzilida joylashgan poliklinikaning qurilishi tugallanmagan bino va inshootlarini tutash hududi bilan birgalikda (keyingi oʻrinlarda-obyekt) Oʻzbekiston Respublikasi Favqulodda vaziyatlar vazirligiga operativ boshqaruv huquqi asosida bepul berish toʻgʻrisidagi taklifiga rozilik berilsin.

2. Oʻzbekiston Respublikasi Favqulodda vaziyatlar vazirligiga:

ikki hafta muddatda Toshkent shahar hokimligi bilan birgalikda obyektni qabul qilish-topshirish;

Oʻzbekiston Respublikasi Favqulodda vaziyatlar vazirligi xodimlari uchun obyektni turar joy sifatida rekonstruksiya qilish boʻyicha loyiha-smeta hujjatlarini ishlab chiqish, kelishish va belgilangan tartibda tasdiqlashi taʼminlansin.

3. Oʻzbekiston Respublikasi Iqtisodiyot vazirligi va Moliya vazirligi Oʻzbekiston Respublikasining 2016-yilgi va keyingi yillarga moʻljallangan Investitsiya dasturini shakllantirishda Favqulodda vaziyatlar vazirligining har yili Oʻzbekiston Respublikasi Favqulodda vaziyatlar vazirligiga ajratiladigan limitlar doirasida obyektni rekonstruksiya qilish uchun asoslangan hisob-kitoblar boʻyicha tegishli markazlashtirilgan kapital qoʻyilmalarni nazarda tutsinlar.

4. Oʻzbekiston Respublikasi Vazirlar Mahkamasining “Davlat mulkidan samarali foydalanish va Toshkent shahri aholisining uy-joy-kommunal shart-sharoitlarini yanada yaxshilash chora-tadbirlari toʻgʻrisida” 2015-yil 2-martdagi 39-son qarori 2-ilovaning 16-pozitsiyasi oʻz kuchini yoʻqotgan deb hisoblansin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.I. Zakirov zimmasiga yuklansin.