Muddati oʻtkazib yuborilgan debitorlik va kreditorlik qarzlarni qisqartirish va budjetga toʻlovlar intizomini mustahkamlash boʻyicha Respublika komissiyasi ishlarini tashkil etishni taʼminlash maqsadida Vazirlar Mahkamasi qaror qiladi:

1. Muddati oʻtkazib yuborilgan debitorlik va kreditorlik qarzlarni qisqartirish va budjetga toʻlovlar intizomini mustahkamlash boʻyicha Respublika komissiyasi toʻgʻrisidagi nizom ilovaga muvofiq tasdiqlansin.

2. Qoraqalpogʻiston Respublikasi, viloyatlar va Toshkent shahrida muddati oʻtkazib yuborilgan debitorlik va kreditorlik qarzlarni qisqartirish va budjetga toʻlovlar intizomini mustahkamlash boʻyicha mintaqaviy komissiyalar tashkil etilsin.

3. Belgilab qoʻyilsinki:

Qoraqalpogʻiston Respublikasi Vazirlar Kengashi Raisining, viloyatlar va Toshkent shahar hokimlarining iqtisodiyot va ijtimoiy rivojlantirish masalalari boʻyicha oʻrinbosarlari mintaqaviy komissiyalarning raislari hisoblanadi;

mintaqaviy komissiyalar tarkibi Qoraqalpogʻiston Respublikasi Vazirlar Kengashining Raisi, viloyatlar va Toshkent shahar hokimlari bilan kelishgan holda Muddati oʻtkazib yuborilgan debitorlik va kreditorlik qarzlarni qisqartirish va budjetga toʻlovlar intizomini mustahkamlash boʻyicha Respublika komissiyasi tomonidan tasdiqlanadi.

4. Muddati oʻtkazib yuborilgan debitorlik va kreditorlik qarzlarni qisqartirish va budjetga toʻlovlar intizomini mustahkamlash boʻyicha Respublika komissiyasi:

bir oy muddatda Muddatida toʻlanmagan toʻlovlar muddatini kechiktirish va (yoki) ularni boʻlib-boʻlib toʻlash, penya hisoblashni toʻxtatish, shuningdek soliqlar hamda budjetga va davlat maqsadli fondlariga toʻlovlar boʻyicha penyani hisobdan chiqarish toʻgʻrisidagi nizomga mazkur qarordan kelib chiquvchi oʻzgartirishlarni belgilangan tartibda kiritsin;

muddati oʻtkazib yuborilgan debitorlik va kreditorlik qarzlarni qisqartirish va budjetga toʻlovlar intizomini mustahkamlash boʻyicha mintaqaviy komissiya toʻgʻrisidagi nizomni ikki hafta muddatda ishlab chiqsin va tasdiqlasin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

1. Muddati oʻtkazib yuborilgan debitorlik va kreditorlik qarzlarni qisqartirish va budjetga toʻlovlar intizomini mustahkamlash boʻyicha Respublika komissiyasi (keyingi oʻrinlarda Komissiya deb ataladi) Vazirlar Mahkamasining 2004-yil 9-fevraldagi 61-son qaroriga muvofiq tashkil etilgan va oʻz faoliyati toʻgʻrisida Oʻzbekiston Respublikasi Vazirlar Mahkamasiga hisob beradi.

2. Komissiya oʻz faoliyatini toʻlovlar intizomini mustahkamlash, muddati oʻtkazib yuborilgan debitorlik va kreditorlik qarzlarni qisqartirish boʻyicha chora-tadbirlar kompleksini ishlab chiqish va amalga oshirish, xoʻjalik yurituvchi subyektlar oʻrtasidagi toʻlovlar va hisob-kitoblar tizimini takomillashtirish, budjetga hamda davlat maqsadli fondlariga soliqlar va majburiy toʻlovlarning oʻz vaqtida tushishini taʼminlash, budjetga hamda davlat maqsadli fondlariga qarzlarni qisqartirish va ular vujudga kelishining oldini olish, keyinchalik ushbu chora-tadbirlarning bajarilishini nazorat qilish maqsadida amalga oshiradi.

3. Komissiya oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisining qarorlari va boshqa hujjatlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, shuningdek mazkur Nizomga amal qiladi.

4. Komissiyaning oʻz vakolatlari doirasida qabul qilingan qarorlarining vazirliklar, idoralar, mahalliy davlat hokimiyati va boshqaruv organlari, banklar, mulkchilik shakllaridan qatʼi nazar, xoʻjalik yurituvchi subyektlar va ularning birlashmalari, mansabdor shaxslar hamda fuqarolar tomonidan bajarilishi majburiydir.

5. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzurida Qoraqalpogʻiston Respublikasi Vazirlar Kengashi Raisining, viloyatlar va Toshkent shahar hokimlarining iqtisodiyot va ijtimoiy rivojlantirish masalalari boʻyicha oʻrinbosarlari boshchilik qiladigan muddati oʻtkazib yuborilgan debitorlik va kreditorlik qarzlarni qisqartirish va budjetga toʻlovlar intizomini mustahkamlash boʻyicha mintaqaviy komissiyalar tashkil etiladi.

6. Mintaqaviy komissiyalar tarkiblari Qoraqalpogʻiston Respublikasi Vazirlar Kengashining Raisi, viloyatlar va Toshkent shahar hokimlari bilan kelishgan holda Komissiya tomonidan tasdiqlanadi.

7. Quyidagilar Komissiyaning asosiy vazifalari hisoblanadi:

iqtisodiyot tarmoqlari va sektorlarida hisob-kitoblar mexanizmini takomillashtirish hamda barcha xoʻjalik yurituvchi subyektlar hamda bank va moliya muassasalari tomonidan toʻlov intizomi va hisob-kitoblarning oʻz vaqtida oʻtkazilishi, soliqlar va majburiy toʻlovlarning toʻliq toʻlanishi masalalari boʻyicha amaldagi qonun hujjatlari normalariga qatʼiy rioya etilishi ustidan taʼsirchan nazoratni taʼminlash;

xoʻjalik yurituvchi subyektlarning debitorlik va kreditorlik qarzlari holatini tahlil qilish, korxonalar va tashkilotlarning muddati oʻtkazib yuborilgan qarzlari taqqoslanishini muntazam ravishda tashkil etish hamda ularni qisqartirish boʻyicha taʼsirchan chora-tadbirlarni ishlab chiqish va koʻrish;

xoʻjalik yurituvchi subyektlar tomonidan muddati oʻtkazib yuborilgan debitorlik qarzlarning vujudga kelishiga yoʻl qoʻymaslik, aylanma mablagʻlardan oqilona foydalanish, ularning saqlanishini va oʻz vaqtida toʻldirilishini taʼminlash boʻyicha Oʻzbekiston Respublikasi Prezidenti farmonlari va Hukumat qarorlarining bajarilishi ustidan nazoratni amalga oshirish;

amaldagi qonun hujjatlariga muvofiq budjetga va davlat maqsadli fondlariga soliqlar va majburiy toʻlovlarning toʻliq undirilishini taʼminlash;

ayrim xoʻjalik yurituvchi subyektlarning budjetdan va davlat maqsadli fondlaridan qarzlarini qisqartirish boʻyicha takliflar ishlab chiqish va chora-tadbirlar koʻrish.

8. Komissiya quyidagi huquqlarga ega:

vazirliklar, idoralar, banklar, soliq va moliya organlari, xoʻjalik boshqaruvi organlari, korxonalar, mahalliy davlat boshqaruv organlari rahbarlarining debitorlik va kreditorlik qarzlarning holati, soliq va toʻlov intizomi masalalari boʻyicha hisobotlarini eshitish hamda tegishli organlarga hisob-kitoblarni yuritishning belgilangan tartibini, yuqorida koʻrsatib oʻtilgan masalalarni tartibga soluvchi qonun hujjatlarini buzishda aybdor boʻlgan mansabdor shaxslarni javobgarlikka tortish toʻgʻrisida takliflar kiritish;

istisno hollarda, iqtisodiyotning ustuvor tarmoqlari xoʻjalik yurituvchi subyektlarining oʻzaro pullik majburiyatlari boʻyicha qarzlarini toʻlash muddatini kechiktirish va (yoki) ularni boʻlib-boʻlib toʻlash masalasini Oʻzbekiston Respublikasi Vazirlar Mahkamasi tegishli komplekslari rahbarlari bilan kelishgan holda koʻrib chiqish.

xoʻjalik yurituvchi subyektlarga qarzlarni (asosiy summani, penyalarni, jarima sanksiyalarini) toʻlash boʻyicha muddatni kechiktirish va (yoki) boʻlib-boʻlib toʻlash imkonini qonun hujjatlarida belgilangan tartibda berish, penya hisoblashni toʻxtatib turish va toʻxtatish, penyalarni hisobdan chiqarish hamda budjetga va davlat maqsadli fondlariga hamda vazirliklar va idoralarning budjetdan tashqari fondlariga soliqlar va toʻlovlar boʻyicha jarima sanksiyalari belgilash toʻgʻrisida qaror qabul qilish;

Oʻzbekiston Respublikasi Davlat soliq qoʻmitasi taqdimiga koʻra, moliya-xoʻjalik faoliyatini amalga oshirmayotgan va qonun hujjatlarida belgilangan muddatlarda oʻz ustav sarmoyalarini shakllantirmagan tugatilayotgan korxonalarning budjet va davlat maqsadli fondlaridan qarzlarini hisobdan chiqarish toʻgʻrisida qarorlar qabul qilish;

toʻlovga qodir boʻlmagan isteʼmolchilarga va buyurtmachilarga mahsulotlar sotishning, ishlarni bajarish va xizmatlar koʻrsatishning, korxonalar va tashkilotlarning aylanma mablagʻlarining, shu jumladan tayyor mahsulotlar zaxiralariga va tugallanmagan qurilishga jalb etilishi sabablarini va yoʻnalishlarini oʻrganish, ularning oldini olish va qisqartirish boʻyicha taʼsirchan chora-tadbirlar ishlab chiqish va koʻrish;

korxonalar, tashkilotlar, vazirliklar va idoralardagi debitorlik va kreditorlik qarzlarning holatini taqqoslashni tashkil etish, taqqoslashlar asosida mazkur qarzlarni qisqartirish boʻyicha tadbirlar ishlab chiqish;

xoʻjalik yurituvchi subyektlarning debitorlik va kreditorlik qarzlarini, shu jumladan budjetdan va davlat maqsadli fondlaridan qarzlarini eng koʻp miqdorda qisqartirish uchun banklar kreditlari va boshqa manbalar hisobiga oʻzaro hisob-kitoblarning maqsadli sxemalarini amalga oshirish masalalarini koʻrib chiqish;

xoʻjalik yurituvchi subyektlarning muddati oʻtkazib yuborilgan debitorlik va kreditorlik qarzlarini, korxonalar va tashkilotlarning budjetga va davlat maqsadli fondlariga toʻlovlar boʻyicha qarzlarini toʻlashga yoʻnaltiriladigan maqsadli mablagʻlar harakati tartibi va yoʻnalishini tasdiqlash;

davlat va xoʻjalik boshqaruvi organlaridan Komissiyaga yuklangan vazifalarning bajarilishini taʼminlash uchun zarur axborotlarni olish;

moliya, soliq va bojxona organlari, tijorat banklari, vazirliklar va idoralarning faoliyatini Komissiya vakolatiga kiruvchi masalalar yuzasidan, qonun hujjatlarida belgilangan tartibda tekshirishni tashkil etish;

Korxonalar bankrotligi va sanatsiyasi masalalari boʻyicha Hukumat komissiyasiga iqtisodiy nochor korxonalarni sanatsiya qilish yoki ularga nisbatan bankrotlik tartibotini boshlash toʻgʻrisida qarorlar qabul qilish yuzasidan takliflar kiritish;

respublika qonun hujjatlarini takomillashtirish boʻyicha soliq solish va hisob-kitoblar tizimini yaxshilashga yoʻnaltirilgan takliflarni ishlab chiqish va Vazirlar Mahkamasiga kiritish;

mintaqaviy komissiyalar faoliyatini muvofiqlashtirish.

9. Komissiyaning toʻlov intizomini hamda oʻzaro hisob-kitoblar tizimini mustahkamlash, xoʻjalik yurituvchi subyektlarning budjet va davlat maqsadli fondlari bilan hisob-kitob qilish yuzasidan javobgarligini oshirish sohasidagi qonun hujjatlariga rioya etishi shart.

10. Komissiyaning shaxsiy tarkibi Oʻzbekiston Respublikasi Vazirlar Mahkamasining qarori bilan tasdiqlanadi.

11. Komissiyaga hamraislar — Oʻzbekiston Respublikasi Markaziy banki raisi hamda Moliya vaziri boshchilik qiladilar, ular Komissiya ishiga rahbarlik qiladilar, uning majlislarini olib boradilar, Komissiyaning majlislari protokollarini, ish rejalarini va boshqa hujjatlarini tasdiqlaydilar.

12. Komissiya majlislari ish rejasiga muvofiq, biroq yilning har choragida kamida bir marta oʻtkaziladi. Hamraislar navbatdan tashqari majlislar chaqirishlari mumkin.

13. Komissiyaning ish natijalari hamraislar yoki majlisni oʻtkazgan hamrais tomonidan tasdiqlanadigan protokol shaklidagi qarorlar bilan rasmiylashtiriladi.

14. Komissiyaning majlisda uzrli sabablarga koʻra qatnasha olmayotgan aʼzolari majlisga oʻzlarining ovoz berish huquqiga ega boʻlmagan vakolatli vakillarini yuborishlari mumkin.

15. Tezkorlik bilan qaror qabul qilish maqsadida Komissiya hamraislari Komissiya aʼzolari bilan kelishilgan ayrim masalalar boʻyicha qarorlarni soʻrov yoʻli bilan tasdiqlashi mumkin.

16. Komissiya oʻz faoliyati toʻgʻrisida Oʻzbekiston Respublikasi Vazirlar Mahkamasiga hisob beradi.

17. Komissiya faoliyatini tashkil etish uchun Komissiyaning masʼul kotibi boshchilik qiladigan Komissiya kotibiyati tashkil etiladi. U Komissiya kotibi — Markaziy bankning Iqtisodiy tahlil departamenti direktori, Markaziy bank, Moliya vazirligi hamda Davlat soliq qoʻmitasining vakolatli xodimlaridan iborat boʻladi. Kotibiyat tarkibi Komissiya tomonidan tasdiqlanadi.

Komissiyaning masʼul kotibi va kotibi (keyingi oʻrinlarda Komissiya kotiblari deb ataladi) ishlari soliqlar va budjetga majburiy toʻlovlarning oʻz vaqtida tushishi va (yoki) soliqlar hamda budjetga va davlat maqsadli fondlariga toʻlovlar boʻyicha qarzlarni boʻlib-boʻlib toʻlash masalalari hamda muddati oʻtkazib yuborilgan debitorlik va kreditorlik qarzlarni qisqartirish masalalari boʻyicha alohida-alohida amalga oshiriladi.

18. Komissiya kotiblari:

Komissiya ish rejasi ishlab chiqilishini, uning bajarilishi ustidan nazoratni, shuningdek tasdiqlangan ish rejasiga muvofiq Komissiyaning joriy ishlari tashkil etilishini;

Komissiya kotibiyati bilan birgalikda ushbu Nizomga ilovaga muvofiq Komissiya majlislariga materiallarni tayyorlashni;

Komissiya kotibiyati tomonidan vazirliklar, idoralar, mahalliy davlat hokimiyati organlari, banklar, xoʻjalik yurituvchi subyektlar bilan birgalikda Komissiyaning qabul qilingan qarorlari bajarilishi monitoringi muvofiqlashtirilishini, Komissiya hamraislariga tegishli axborotlar va takliflar kiritilishini;

kelib tushgan xat-xabarlarning koʻrib chiqilishini, ularning oʻrganish va ishlab chiqish uchun Komissiya kotibiyati aʼzolariga yuborilishini;

Komissiya aʼzolari va taklif etilgan shaxslarning tegishli materiallarni yuborgan holda majlis oʻtkaziladigan sana, vaqt va joy toʻgʻrisida xabardor qilinishini taʼminlaydi.

19. Komissiya kotibiyati:

navbatdagi davr uchun Komissiyaning ish rejalari loyihalarini tayyorlaydi;

kelib tushgan xat-xabarlarni koʻrib chiqadi, Komissiyada uning oʻz vakolatlari doirasida koʻrib chiqishi uchun takliflar tayyorlaydi va ularni umumlashtirish uchun Komissiya kotibiga beradi;

Komissiyaning navbatdagi majlislari uchun barcha zarur materiallarning oʻz vaqtida tayyorlanishini taʼminlaydi;

Komissiya qarorlariga binoan tashkil etilgan ishchi guruhlar faoliyatini nazorat qiladi;

axborotlar va tahliliy materiallarning, shu jumladan muddati oʻtkazib yuborilgan debitorlik va kreditorlik qarzlarning qisqartirilishi, soliqlar, yigʻimlar va budjetga hamda budjetdan tashqari fondlarga boshqa majburiy toʻlovlarning oʻz vaqtida toʻlanishi monitoringi natijalarini Komissiyaga koʻrib chiqish uchun taqdim etadi;

Komissiyaning qarorlariga muvofiq Komissiyaga koʻrib chiqish uchun boshqa materiallarni taqdim etadi.

20. Komissiya kotiblari oʻz funksiyalarini amalga oshirish uchun vazirliklar, idoralar, yuridik shaxslar birlashmalari, mahalliy davlat hokimiyati organlari, banklar, korxonalar va Komissiya aʼzolaridan Komissiya faoliyatiga tegishli masalalarga oid axborotlarni soʻrash va olish huquqiga ega.

21. Komissiya majlislari uchun materiallar davlat va xoʻjalik boshqaruvi organlari, yuridik shaxslar birlashmalari, korxonalar, shuningdek Komissiyaning ish rejasiga muvofiq ularning tayyorlanishi uchun masʼul boʻlgan shaxslar tomonidan tayyorlanadi hamda Komissiyaning navbatdagi majlisidan kamida oʻn kun oldin, agar boshqa muddatlar belgilanmagan boʻlsa, Komissiya kotibiyatiga kiritiladi.

22. Komissiya kun tartibidagi har bir masala boʻyicha hujjatlarda qaror qabul qilish uchun zarur boʻlgan materiallar (tahliliy maʼlumotnomalar, jadvallar, xulosalar, iltimosnomalar, takliflar va ularga asoslashlar hamda boshqa materiallar) hamda Komissiya qarori loyihasi mavjud boʻlishi kerak.

23. Komissiyaning koʻrib chiqishi uchun moʻljallangan xatlar, iltimosnomalar, takliflar, maʼlumotnomalar va boshqa xat-xabarlarda “Muddati oʻtkazib yuborilgan debitorlik va kreditorlik qarzlarni qisqartirish va budjetga toʻlovlar intizomini mustahkamlash boʻyicha Respublika komissiyasi” soʻzlari koʻrsatilishi shart.

Komissiyada koʻrib chiqish uchun moʻljallangan xat-xabarlar:

muddati oʻtkazib yuborilgan debitorlik va kreditorlik qarzlarni qisqartirish masalalari boʻyicha — Oʻzbekiston Respublikasi Markaziy bankiga;

soliqlar va budjetga majburiy toʻlovlarning oʻz vaqtida tushishi va soliqlar hamda budjetga va davlat maqsadli fondlariga qarzlarni toʻlash muddatini kechiktirish va (yoki) ularni boʻlib-boʻlib toʻlash masalalari boʻyicha — Oʻzbekiston Respublikasi Davlat soliq qoʻmitasiga yuboriladi.

Kelib tushgan xat-xabarlar tegishli ravishda Markaziy bankda va Davlat soliq qoʻmitasida boshqa xat-xabarlardan alohida roʻyxatdan oʻtkaziladi va Markaziy bank raisiga hamda Moliya vaziriga yuboriladi.

Kelib tushgan xat-xabarlar Komissiyaning tegishli hamraisi koʻrib chiqqandan keyin Komissiya hamraisi topshiriqnomasi bilan ijro etuvchilarga yuboriladi.

Xatlar, iltimosnomalar, takliflar va boshqa xat-xabarlar koʻrib chiqish uchun yuborilgan ijro etuvchilar oʻn kun muddatda yoki hamrais topshirigʻida belgilangan muddatlarda oʻz takliflarini Oʻzbekiston Respublikasi Markaziy bankiga va Davlat soliq qoʻmitasiga kiritadilar.

24. Komissiya kotibiyati aʼzolari kelib tushgan xat-xabarlarni koʻrib chiqadilar, Komissiyaning oʻz vakolatlari doirasida koʻrib chiqishi uchun takliflar tayyorlaydilar hamda umumlashtirish uchun ularni Komissiya kotiblariga beradilar.

Ekspertiza paytida kamchiliklar aniqlangan taqdirda hujjatlar puxta ishlab chiqish uchun xat yuboruvchiga qaytariladi.

25. Komissiya kotiblari Komissiya aʼzolari bilan birgalikda takliflarni umumlashtiradilar, Komissiya majlisi protokoli loyihasini tayyorlaydilar va uni kelishish uchun Komissiya aʼzolariga yuboradilar.

26. Komissiya aʼzolari Komissiya protokoli loyihasini belgilangan tartibda kelishib oladilar.

27. Komissiya kotiblari protokol loyihasini Komissiya majlisiga kiritadilar, majlis yakunlariga koʻra uni puxta ishlab chiqadilar va Komissiya hamraislariga (yoki majlisni oʻtkazgan Komissiya hamraisiga) tasdiqlash uchun kiritadilar.

28. Komissiya hamraislari (yoki majlisni oʻtkazgan Komissiya hamraisi) Komissiya majlisi protokolini tasdiqlaydi.

29. Komissiya kotiblari Komissiya majlisining tasdiqlangan protokolini Vazirlar Mahkamasi Axborot-tahlil boshqarmasining Makroiqtisodiy rivojlanish tahlili va strategiyasi boʻlimiga yuboradilar.

30. Vazirlar Mahkamasi Axborot-tahlil boshqarmasining Makroiqtisodiy rivojlanish tahlili va strategiyasi boʻlimi tasdiqlangan protokolni Vazirlar Mahkamasining Umumiy boʻlimida roʻyxatdan oʻtkazadi hamda uning Komissiya aʼzolariga, manfaatdor vazirliklar, idoralar va boshqa tashkilotlarga tarqatilishini taʼminlaydi.

Komissiya qarorlari (protokollari)ning asl nusxalari Oʻzbekiston Respublikasi Vazirlar Mahkamasi Axborot-tahlil boshqarmasining Makroiqtisodiy rivojlanish tahlili va strategiyasi boʻlimida saqlanadi.

Komissiya nomiga kelib tushgan boshqa barcha hujjatlarning asl nusxalari va qabul qilingan qarorlar (protokollar)ning nusxalari Komissiya kotiblarida, tegishli ravishda Oʻzbekiston Respublikasi Davlat soliq qoʻmitasida va Markaziy bankida saqlanadi.