“Giyohvandlik vositalari va psixotrop moddalar to‘g‘risida”gi O‘zbekiston Respublikasi Qonunini amalga oshirish maqsadida Vazirlar Mahkamasi qaror qiladi:

1. Giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyatni litsenziyalash to‘g‘risidagi Nizom 1-ilovaga muvofiq tasdiqlansin.

Giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyatni litsenziyalash to‘g‘risidagi Nizom 2001-yil 1-fevraldan boshlab amalga kiritilsin.

2. Quyidagilar:

giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyatni (tarkibida giyohvandlik moddasi bo‘lgan o‘simliklarni o‘stirishdan tashqari) litsenziyalash bo‘yicha O‘zbekiston Respublikasi Sog‘liqni saqlash vazirligi;

tarkibida giyohvandlik moddasi bo‘lgan o‘simliklarni o‘stirish bilan bog‘liq faoliyatni litsenziyalash bo‘yicha O‘zbekiston Respublikasi Ichki ishlar vazirligi maxsus vakolatli organlar etib belgilansin.

3. Belgilansinki:

giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyat bilan shug‘ullanish huquqini beruvchi litsenziya O‘zbekiston Respublikasi Giyohvandlik moddalarini nazorat qilish Davlat komissiyasi bilan kelishilgan holda yuqorida ko‘rsatib o‘tilgan vakolatli organlar tomonidan tashkil etiladigan litsenziya komissiyalarining qarorlari asosida beriladi;

giyohvandlik vositalari va psixotrop moddalarning muomalada bo‘lishi bilan bog‘liq faoliyat ilgari berilgan litsenziyalarga muvofiq faqat 2001-yil 1-iyulgacha amalga oshirilishi mumkin.

4. Belgilansinki, prekursorlarni olib kirish, olib chiqish va tranzit qilish 2001-yil 1-martdan boshlab faqat O‘zbekiston Respublikasi Sog‘liqni saqlash vazirligi tomonidan beriladigan litsenziyalar asosida amalga oshiriladi.

5. O‘zbekiston Respublikasi Sog‘liqni saqlash vazirligi, Ichki ishlar vazirligi:

bir hafta muddatda O‘zbekiston Respublikasi Giyohvandlik moddalarini nazorat qilish Davlat komissiyasi bilan kelishgan holda Giyohvandlik vositalari, psixotrop moddalar va prekursorlarning muomalada bo‘lishi, shuningdek tarkibida giyohvandlik moddasi bo‘lgan o‘simliklarni o‘stirish bilan bog‘liq faoliyat bilan shug‘ullanish huquqiga litsenziya berish to‘g‘risidagi masalalarni ko‘rib chiqish bo‘yicha litsenziya komissiyalarining shaxsiy tarkibini va ular to‘g‘risidagi nizomni tasdiqlasinlar;

2001-yil 1-iyulgacha mazkur qaror talablariga muvofiq Giyohvandlik vositalari, psixotrop moddalar va prekursorlarning muomalada bo‘lishi, shuningdek tarkibida giyohvandlik moddasi bo‘lgan o‘simliklarni o‘stirish bilan bog‘liq faoliyat bilan shug‘ullanish huquqi uchun yuridik shaxslarga litsenziyalar qayta ro‘yxatdan o‘tkazilishi va berilishini ta’minlasinlar.

7. Mazkur qarorning bajarilishini nazorat qilish O‘zbekiston Respublikasining Bosh vaziri O‘.T.Sultonov zimmasiga yuklansin.

1. Mazkur Nizom “Giyohvandlik vositalari, psixotrop moddalar to‘g‘risida”, “Faoliyatning ayrim turlarini litsenziyalash to‘g‘risida”, “Dorivor vositalar va farmatsevtika faoliyati to‘g‘risida”, “Fuqarolarning sog‘lig‘ini muhofaza qilish to‘g‘risida”gi O‘zbekiston Respublikasi qonunlariga muvofiq ishlab chiqilgan va giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyat bilan shug‘ullanish uchun litsenziyalar berish tartibini belgilaydi.

2. Quyidagilar:

giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyat, tarkibida giyohvandlik moddasi bo‘lgan o‘simliklar o‘stirish bundan istisno, bilan shug‘ullanish huquqini beruvchi litsenziya O‘zbekiston Respublikasi Sog‘liqni saqlash vazirligi (keyingi o‘rinlarda matnda litsenziyalovchi organ deb ataladi) tomonidan;

tarkibida giyohvandlik moddasi bo‘lgan o‘simliklar o‘stirish bilan bog‘liq faoliyat bilan shug‘ullanish huquqini beruvchi litsenziya O‘zbekiston Respublikasi Ichki ishlar vazirligi (keyingi o‘rinlarda matnda litsenziyalovchi organ deb ataladi) tomonidan beriladi.

Litsenziya O‘zbekiston Respublikasi Giyohvandlik moddalarini nazorat qilish Davlat komissiyasi bilan kelishilgan holda litsenziyalovchi organ tomonidan tashkil etiladigan litsenziya komissiyasining qarori asosida beriladi. Litsenziya komissiyasi tarkibiga milliy axborot-tahlil markazining vakili majburiy tartibda kiritiladi.

Litsenziya komissiyasi to‘g‘risidagi nizom, uning huquq va majburiyatlari O‘zbekiston Respublikasi Giyohvandlik moddalarini nazorat qilish Davlat komissiyasi bilan kelishgan holda litsenziyalovchi organ tomonidan tasdiqlanadi.

3. Giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyat bilan shug‘ullanish huquqini beruvchi litsenziya “Davlat belgisi” korxonasida suv qog‘oz belgilari qo‘yilgan holda tayyorlangan maxsus blankada rasmiylashtiriladi. Litsenziyalar blankalari qat’iy hisobda turadigan hujjat hisoblanadi, hisobga olish seriyasiga, tartib raqamiga, qalbakilashtirishdan himoya qilinganlik darajasiga ega bo‘ladi va maxsus namuna bo‘yicha tayyorlanadi.

4. Giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyat faqat yuridik shaxslar tomonidan amalga oshiriladi va quyidagilarni o‘z ichiga oladi:

giyohvandlik vositalari, psixotrop moddalar va prekursorlarni saqlash;

giyohvandlik vositalari, psixotrop moddalar va prekursorlarni sotish (berish, taqsimlash);

giyohvandlik vositalari, psixotrop moddalar va prekursorlarni tashish;

yangi giyohvandlik vositalari va psixotrop moddalarni ishlab chiqish;

giyohvandlik vositalari, psixotrop moddalar va prekursorlarni ishlab chiqarish (tayyorlash);

giyohvandlik vositalari, psixotrop moddalar va prekursorlardan ishlab chiqarish ehtiyojlari uchun, shu jumladan tibbiyot va veterinariyada foydalanish;

giyohvandlik vositalari, psixotrop moddalar va prekursorlardan ilmiy va o‘quv maqsadlarida foydalanish;

giyohvandlik vositalari, psixotrop moddalar va prekursorlarni yo‘q qilish;

giyohvandlik moddalariga ega bo‘lgan o‘simliklarni o‘stirish.

Giyohvandlik vositalari, psixotrop moddalar va prekursorlardan ichki ishlar, Milliy xavfsizlik xizmati va bojxona organlarining ekspertiza va tezkor-qidiruv faoliyatida foydalanish litsenziyasiz amalga oshiriladi.

5. Giyohvandlik vositalari, psixotrop moddalar va prekursorlarning muomalada bo‘lishi bilan bog‘liq bir necha xil faoliyatni amalga oshirish huquqiga litsenziya berilganda litsenziyada ushbu faoliyatning har qaysi turi aniq ko‘rsatilishi kerak.

6. Litsenziya egasi yuridik shaxs qayta tashkil etilganda, uning nomi va joylashgan o‘rni (pochta manzili) o‘zgargan taqdirda litsenziya egasi yoki uning huquqiy vorisi qayta ro‘yxatdan o‘tgandan keyin bir hafta muddatda litsenziyalovchi organga, ko‘rsatilgan ma’lumotlarni tasdiqlovchi tegishli hujjatlarni ilova qilgan holda, litsenziyani qayta rasmiylashtirish to‘g‘risida ariza berishi shart.

Hujjatlar litsenziyalovchi organga litsenziya egasi tomonidan bevosita yoxud pochta aloqasi vositalari orqali, ularning topshirilgani to‘g‘risida bildirishnoma olgan holda, yetkazib beriladi.

Litsenziya qayta rasmiylashtirilgunga qadar litsenziat unda ko‘rsatilgan faoliyatni amalga oshirishga haqli emas.

Litsenziyani qayta rasmiylashtirishda litsenziyalovchi organ litsenziyalar reyestriga tegishli o‘zgartirishlar kiritadi. Litsenziyani qayta rasmiylashtirish litsenziyani qayta rasmiylashtirish to‘g‘risidagi tegishli hujjatlar ilova qilingan ariza litsenziyalovchi organ tomonidan olingan kundan boshlab besh kun mobaynida amalga oshiriladi.

7. Giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyat bilan shug‘ullanish huquqini beruvchi litsenziya 5 yil muddatga beriladi. Litsenziya 5 yildan kam muddatga faqat litsenziya oluvchining arizasiga binoan berilishi mumkin. Litsenziyalarni yoki ular bo‘yicha huquqlarni boshqa shaxslarga berish taqiqlanadi.

8. Litsenziyaning amal qilish muddati tugagach u litsenziya egasining arizasiga binoan uzaytirilishi mumkin. Litsenziyaning amal qilish muddatini uzaytirish to‘g‘risidagi ariza litsenziyalovchi organga litsenziyaning amal qilish muddati tugashidan kechi bilan 2 oy oldin berilishi kerak. Litsenziyaning amal qilish muddatini uzaytirish litsenziya olish uchun nazarda tutilgan tartibda litsenziya komissiyasi tomonidan amalga oshiriladi.

9. Hujjatlarni taqdim etish va litsenziyalarni berish ilova qilinayotgan sxema bo‘yicha amalga oshiriladi.

10. Litsenziya olish uchun litsenziyalovchi organga quyidagi hujjatlar taqdim etiladi:

litsenziya berish to‘g‘risidagi ariza, unda quyidagilar ko‘rsatiladi: yuridik shaxsning nomi va tashkiliy-huquqiy shakli, uning joylashgan o‘rni (pochta manzili), bank muassasasining nomi va bank muassasasidagi hisob-kitob varaqasining tartib raqami; litsenziyalanayotgan faoliyatning yuridik shaxs tomonidan amalga oshirilishi mo‘ljallanayotgan turi va faoliyatning ko‘rsatilgan turi amalga oshiriladigan muddat;

yuridik shaxsning ro‘yxatdan o‘tkazilganligi to‘g‘risidagi guvohnomaning notarial tasdiqlangan nusxasi;

litsenziya berish to‘g‘risidagi arizani ko‘rib chiqish uchun yig‘im to‘langanini tasdiqlovchi hujjat;

ichki ishlar hududiy organining binoning giyohvandlik vositalari, psixotrop moddalar va prekursorlarni saqlash bo‘yicha texnik talablarga muvofiqligi to‘g‘risidagi xulosasi;

ichki ishlar hududiy organining giyohvandlik vositalari, psixotrop moddalar va prekursorlarni tashishga ruxsatnomasi (giyohvandlik vositalari, psixotrop moddalar va prekursorlarni tashish va tranzit tarzida tashish bilan bog‘liq faoliyatni amalga oshirishda);

sanitariya-epidemiologiya stansiyasining binolarning yoki shart-sharoitlarning litsenziyalash maqsadi va vazifalariga muvofiqligi to‘g‘risidagi xulosasi;

Davlat tabiatni muhofaza qilish qo‘mitasi hududiy organining xulosasi (prekursorlar ishlab chiqarish bilan bog‘liq faoliyat amalga oshirilganda);

binolardan foydalanishning qonuniyligini tasdiqlovchi hujjatlar (dalolatnomaning, ijaraga olish shartnomasi va shu kabilarning notarial tasdiqlangan nusxalari);

er uchastkalaridan foydalanishning qonuniyligini tasdiqlovchi hujjatlar, shuningdek Sog‘liqni saqlash vazirligining xulosasi (giyohvandlik moddalariga ega bo‘lgan o‘simliklarni o‘stirish bilan bog‘liq faoliyatni amalga oshirishda);

O‘zbekiston Respublikasi Sog‘liqni saqlash vazirligi Dori-darmonlar va tibbiyot texnikasi sifatini nazorat qilish bosh boshqarmasining giyohvandlik vositalari, psixotrop moddalarni ishlab chiqarish sharoitlarining belgilangan standartlarga muvofiqligi to‘g‘risidagi xulosasi (giyohvandlik vositalari, psixotrop moddalar ishlab chiqarish bilan bog‘liq faoliyatni amalga oshirishda);

O‘zbekiston Respublikasi Qishloq va suv xo‘jaligi vazirligi Veterinariya davlat bosh boshqarmasining xulosasi (giyohvandlik vositalari, psixotrop moddalar va prekursorlardan veterinariyada foydalanilganda);

giyohvandlik vositalari, psixotrop moddalarning muomalada bo‘lishi (saqlash, berish, sotish, tayyorlash, foydalanish, yo‘q qilish) sohasidagi mas’ul xodim uchun oliy farmatsevtika ma’lumoti to‘g‘risidagi diplomning notarial tasdiqlangan nusxasi hamda uni lavozimga tayinlash to‘g‘risidagi buyruq nusxasi;

muassasada surunkali ruhiy kasalliklar, giyohvandlik, zaharvandlik, alkogolizmga duchor bo‘lgan dispanser hisobida turuvchi xodimlarning, shuningdek qasddan qilingan jinoyat uchun sud hukmini o‘tamagan yoki sudlanganligi olib tashlanmagan xodimlarning yo‘qligi to‘g‘risidagi, tegishli tibbiyot muassasalari va mahalliy huquqni muhofaza qilish organlari ma’lumotnomalari albatta ilova qilingan holdagi ma’lumotlar.

Litsenziya olishga talabgordan ushbu Nizomda nazarda tutilmagan hujjatlarni taqdim etishni talab qilishga yo‘l qo‘yilmaydi.

Litsenziya olish uchun talabgor tomonidan taqdim etilgan barcha hujjatlar litsenziyalovchi organ tomonidan ro‘yxat bo‘yicha qabul qilinadi va ro‘yxatdan o‘tkaziladi.

11. Litsenziyalovchi organ litsenziya olishga talabgorning arizasi barcha zarur hujjatlar bilan olingan kundan boshlab o‘ttiz kundan oshmagan muddatda litsenziya komissiyasi qarori asosida litsenziya berish yoki bermaslik to‘g‘risida qaror qabul qiladi. Litsenziyalovchi organ litsenziya talabgorini qabul qilingan qaror to‘g‘risida tegishli qaror qabul qilingandan keyin uch kun mobaynida xabardor qiladi.

12. O‘zbekiston Respublikasi Vazirlar Mahkamasi huzuridagi Giyohvandlik moddalarini nazorat qilish milliy axborot-tahlil markazi litsenziyalovchi organlar so‘rovlariga binoan ularga uch kun muddatda, giyohvandlik vositalari, psixotrop moddalar va prekursorlarning qonuniy va noqonuniy muomalada bo‘lishiga doir o‘zida mavjud bo‘lgan ma’lumotlar banki asosida litsenziya talabgorlari to‘g‘risida axborot taqdim etadi.

13. Litsenziya berish to‘g‘risidagi qaror qabul qilinganligi haqidagi bildirishnoma yozma shaklda, bank hisob raqami rekvizitlarini va davlat bojini to‘lash muddati ko‘rsatilgan holda, litsenziya talabgorlariga jo‘natiladi (topshiriladi).

Litsenziya berish rad etilganligi to‘g‘risidagi bildirishnoma yozma shaklda, rad etish sabablari va litsenziya talabgori mazkur sabablarni bartaraf etib hujjatlarni qayta ko‘rib chiqish uchun taqdim etishi mumkin bo‘lgan muddat ko‘rsatilgan holda litsenziya talabgoriga jo‘natiladi (topshiriladi).

Litsenziya talabgori litsenziya komissiyasi qayd qilgan kamchiliklarni bartaraf etib hujjatlarni qayta ko‘rib chiqish uchun taqdim etishi mumkin bo‘lgan muddat talabgor qaytarilgan hujjatlarni olgan kundan boshlab 3 oydan oshmasligi kerak. Bunda litsenziyalovchi organ tomonidan hujjatlarni qayta ko‘rib chiqish litsenziya talabgorining arizasi barcha zarur hujjatlar bilan olingan kundan boshlab ko‘pi bilan o‘n kun mobaynida amalga oshiriladi. Litsenziya talabgorining arizasini qayta ko‘rib chiqish uchun yig‘im undirilmaydi. Litsenziya berishni rad etish to‘g‘risida xabarnomada ko‘rsatib o‘tilgan muddat tugagandan so‘ng berilgan ariza yangidan berilgan ariza hisoblanadi.

14. Quyidagilar litsenziya berishni rad etish uchun asos bo‘ladi:

yuridik shaxs tomonidan zarur darajada rasmiylashtirilmagan hujjatlar taqdim etilganligi;

giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyatning xavfsizligini ta’minlash uchun sharoitlar yo‘qligi;

surunkali ruhiy kasalliklar, giyohvandlik, zaharvandlik, alkogolizm tufayli dispanser hisobida turuvchi va xizmat vazifasi taqozosiga ko‘ra giyohvandlik vositalari, psixotrop moddalar bilan ishlashga aloqador xodimlar mavjudligi;

qasddan sodir etgan jinoyati uchun sud hukmini o‘tamagan yoki sudlanganligi olib tashlanmagan va xizmat vazifasi taqozosiga ko‘ra giyohvandlik vositalari va psixotrop moddalar bilan ishlashga aloqador xodimlar mavjudligi;

litsenziya olishga talabgor tomonidan taqdim etilgan hujjatlarda ishonchsiz yoki chalkash ma’lumotlar mavjudligi;

litsenziya olishga talabgorning litsenziya talablari va shartlariga muvofiq kelmasligi.

Boshqa asoslar bo‘yicha, shu jumladan litsenziya berish maqsadga muvofiq emas degan bahonalar bo‘yicha litsenziya berishni rad etishga yo‘l qo‘yilmaydi.

Litsenziya olishga talabgor litsenziya komissiyasining litsenziya berishni rad etish, shuningdek litsenziyalovchi organ mansabdor shaxsining harakati (harakatsizligi) ustidan qonunda belgilangan tartibda arz qilishga haqlidir.

15. Giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyat kengaytirilgan hollarda yuridik shaxs qo‘shimcha ruxsatnoma olish uchun litsenziyalovchi organga yozma holda murojaat qilishi shart, bunda unga mazkur Nizomning 10-bandida ko‘rsatib o‘tilgan hujjatlar hamda ilgari berilgan litsenziyaning asli ilova qilinadi.

Litsenziyalovchi organ taqdim etilgan hujjatlarni ko‘rib chiqish amaldagisining o‘rniga giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyat turlari ro‘yxati ko‘rsatilgan yangi litsenziya beradi, bu haqda litsenziya bitimi o‘zgarganligi to‘g‘risida protokol tuziladi va litsenziyalar reyestriga tegishli ma’lumot kiritib qo‘yiladi.

16. Litsenziya bitimi litsenziyalovchi organ hamda litsenziatning o‘zaro huquqlari va majburiyatlarini belgilovchi hujjat hisoblanadi va quyidagilarni o‘z ichiga oladi:

bitimni tasdiqlagan shaxslarning familiyasi, ismi, otasining ismi, lavozimi;

tomonlarning rekvizitlari;

giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyatni amalga oshirish uchun litsenziya berilayotgan faoliyat aniq turining nomi;

litsenziatga qo‘yiladigan litsenziya talablari va shartlari;

litsenziyaning amal qilish muddati;

ko‘rsatib o‘tilgan tur bo‘yicha giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyat amalga oshiriladigan manzil;

litsenziya bitimi talablari va shartlarini buzganlik uchun tomonlarning javobgarligi;

litsenziya bitimi talablari va shartlari litsenziat tomonidan bajarilishini litsenziyalovchi organ tomonidan nazorat qilish tartibi;

boshqa muhim shartlar.

Litsenziya bitimi ikki nusxada bir nusxasi litsenziat uchun va bir nusxasi litsenziyalovchi organ uchun tuziladi.

17. Litsenziya litsenziya olishga talabgor tomonidan davlat boji to‘langanligini tasdiqlovchi hujjat taqdim etilganda va litsenziya bitimi imzolangandan so‘ng beriladi.

18. Giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyat amalga oshirilganda litsenziat quyidagilarga majburdir:

qonun hujjatlariga rioya qilish;

maxsus bilimlar va tegishli malakaga ega bo‘lish;

litsenziyalanadigan aniq faoliyat turini amalga oshirishning maxsus shartlarini, shu jumladan tegishli moddiy-texnika bazasidan, asbob-uskunalardan, boshqa xil texnik vositalardan foydalanish sharoitlarini yaratish.

19. Litsenziat quyidagilarni amalga oshiradi:

O‘zbekiston Respublikasi tomonidan qabul qilingan xalqaro majburiyatlarni hisobga olgan holda “Giyohvandlik vositalari, psixotrop moddalar to‘g‘risida”gi O‘zbekiston Respublikasi Qonuniga va BMTning tegishli konvensiyalarida nazarda tutilgan talablarga muvofiq giyohvandlik vositalari, psixotrop moddalar va prekursorlarni olib kelish, olib ketish va tranzit qilish;

O‘zbekiston Respublikasi Sog‘liqni saqlash vazirligi bilan kelishilgan ishlab chiqarishning texnologiya reglamentlariga ko‘ra belgilangan kvotalar doirasida RD O‘z-19-01-96 (Dorivor vositalar ishlab chiqarishni va ularning sifatini nazorat qilishni tashkil etish qoidalari) talablariga muvofiq giyohvandlik vositalari, psixotrop moddalar ishlab chiqarish;

litsenziyada va litsenziya bitimida ko‘rsatilganga muvofiq, shuningdek litsenziya bitimida ko‘rsatilgan manzil bo‘yicha faoliyat ko‘rsatish;

giyohvandlik vositalari, psixotrop moddalar va prekursorlarni saqlash va ularning xavfsizligini ta’minlash;

O‘zbekiston Respublikasi Sog‘liqni saqlash vazirligida belgilangan tartibda ro‘yxatdan o‘tkazilgan va vakolatli organ tomonidan berilgan ularning sifatini tasdiqlovchi hujjatga ega bo‘lgan giyohvandlik vositalari, psixotrop moddalarni sotish.

20. Litsenziat tomonidan litsenziya talablari va shartlariga rioya etilishini nazorat qilish qonun hujjatlari bilan belgilangan tartibda litsenziyalovchi organ tomonidan amalga oshiriladi.

Litsenziya talablari va shartlariga rioya etilishini nazorat qilishni amalga oshirishda litsenziyalovchi organ o‘z vakolati doirasida quyidagi huquqlarga ega:

litsenziat tomonidan litsenziya talablari va shartlariga rioya qilinishini belgilangan tartibda rejali tekshiruvlardan o‘tkazish;

litsenziat tomonidan litsenziya talablari va shartlari buzilganligini tasdiqlovchi hollar mavjud bo‘lgan taqdirda litsenziatning bu talab va shartlarga rioya qilishi yuzasidan belgilangan tartibda rejadan tashqari tekshiruvlar o‘tkazish;

litsenziya talablari va shartlariga rioya qilinishi ustidan tekshiruvlar o‘tkazilayotganda paydo bo‘ladigan masalalar bo‘yicha zarur ma’lumotlarni litsenziatdan so‘rash va olish;

tekshirishlar natijalari asosida litsenziat tomonidan litsenziya shartlari va talablarining aniq buzilishlarini ko‘rsatgan holda dalolatnomalar (ma’lumotnomalar) tuzish;

litsenziatni aniqlangan buzilishlarni bartaraf etishga majbur qiluvchi qarorlar chiqarish, bunday buzilishlarni bartaraf etish muddatlarini belgilash;

litsenziyaning amal qilishini to‘xtatib turish yoxud to‘xtatish.

21. Litsenziyaning amal qilishi quyidagi hollarda to‘xtatib turiladi:

litsenziya egasi tomonidan litsenziya bitimida nazarda tutilgan litsenziya talablari va shartlari buzilishlari aniqlanganda;

litsenziya egasi tomonidan litsenziyalovchi organning uni aniqlangan buzilishlarni bartaraf etishga majbur qiluvchi qarori bajarilmaganda;

litsenziya qayta rasmiylashtirilayotgan muddatda yuridik shaxs o‘zgarganda.

Litsenziyalovchi organ litsenziyaning amal qilishini to‘xtatib turishga olib kelgan holatlarni litsenziat tomonidan bartaraf etish muddatini belgilashi shart. Ko‘rsatib o‘tilgan muddat olti oydan oshib ketishi mumkin emas.

Litsenziyaning amal qilishini to‘xtatib turishga olib kelgan holatlar litsenziya egasi tomonidan bartaraf etilgan taqdirda litsenziyalovchi organ ko‘rsatib o‘tilgan holatlar bartaraf etilganligi to‘g‘risida tasdiqnoma olingan kundan boshlab o‘n kun muddatda uning litsenziyasi amal qilishini tiklash to‘g‘risida qaror qabul qilishi shart.

22. Litsenziyaning amal qilishi quyidagi hollarda to‘xtatiladi:

litsenziat litsenziyaning amal qilishini to‘xtatish to‘g‘risida murojaat qilganda;

yuridik shaxs tugatilganda tugatilgan vaqtdan boshlab yoki qayta tashkil etish natijasida uning faoliyati to‘xtatilganda qayta tashkil etilgan vaqtdan boshlab, uni o‘zgartirish bundan mustasnodir;

litsenziat tomonidan litsenziya bitimida nazarda tutilgan litsenziya talablari va shartlari muntazam ravishda yoki bir marta qo‘pol buzilganda;

litsenziyalovchi organ belgilagan muddatda litsenziyaning amal qilishi to‘xtatib qo‘yilishiga olib kelgan holatlar litsenziat tomonidan bartaraf etilmaganda;

litsenziyalovchi organning litsenziya berish to‘g‘risidagi qarorining noqonuniy ekanligi aniqlanganda;

litsenziyaning amal qilish muddati to‘xtatilganda.

Litsenziyaning amal qilishi, shuningdek sud qarori bilan ham to‘xtatilishi mumkin.

Litsenziyaning amal qilishi to‘xtatish to‘g‘risida qaror qabul qilingan sanadan boshlab to‘xtatiladi.

23. Litsenziyalovchi organ tomonidan litsenziya quyidagi hollarda bekor qilinadi:

agar litsenziyaga talabgor litsenziya berish to‘g‘risida qaror qabul qilinganligi haqida bildirishnoma yuborilgan (topshirilgan) vaqtdan boshlab uch oy mobaynida litsenziyalovchi organga litsenziyani berish uchun davlat boji to‘langanligini tasdiqlovchi hujjatni taqdim etmagan yoxud litsenziya bitimini imzolamagan bo‘lsa;

litsenziya egasi litsenziyani bekor qilish to‘g‘risida ariza bilan murojaat qilganda;

litsenziyaning qalbaki hujjatlardan foydalangan holda olinganligi holati aniqlanganda.

Litsenziya shuningdek sud qarori bilan ham bekor qilinishi mumkin.

Bekor qilish to‘g‘risidagi qaror litsenziya berilgan sanadan boshlab kuchga kiradi.

24. Litsenziyaga talabgorning arizasini ko‘rib chiqish uchun quyidagi miqdorlarda yig‘im undiriladi:

litsenziya berish yoki uning amal qilish muddatini uzaytirish to‘g‘risidagi masala bo‘yicha eng kam ish haqining besh baravari miqdorida;

litsenziyani qayta rasmiylashtirish to‘g‘risidagi masala bo‘yicha eng kam ish haqining ikki yarim baravari miqdorida.

25. Litsenziyalarga talabgorning arizasini ko‘rib chiqish uchun yig‘imdan tushgan pul mablag‘lari litsenziyalovchi organning hisob raqamiga o‘tkaziladi.

26. Litsenziyaga talabgor bergan arizasidan voz kechgan taqdirda to‘langan yig‘im qaytarilmaydi.

27. Giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyatga litsenziya berish uchun davlat boji eng kam ish haqining besh baravari miqdorida belgilanadi.

28. Davlat boji respublika budjetiga o‘tkaziladi.

29. Litsenziyalovchi organ giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyatning har bir turiga litsenziyalar reyestrini alohida yuritadi.

Litsenziyalarning reyestrining har birida quyidagilar ko‘rsatilishi kerak:

litsenziatlar to‘g‘risidagi asosiy ma’lumotlar;

litsenziyalarning berilgan sanasi va tartib raqami;

litsenziyalarning amal qilish muddati;

litsenziyalarni qayta rasmiylashtirish asosi va sanasi, amal qilish muddatini uzaytirish, to‘xtatib turish va tiklash;

litsenziyalarning amal qilishini to‘xtatib qo‘yishning asosi va sanasi;

litsenziyalarni bekor qilish asosi va sanasi;

mazkur Nizomda belgilangan boshqa ma’lumotlar.

Giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyatga litsenziyalar reyestridagi mavjud ma’lumotlar pul to‘lash asosida, faqat litsenziya komissiyasining ruxsatnomasi bilan beriladi.

Davlat hokimiyati va boshqaruv organlariga litsenziya reyestridagi ma’lumotlar bepul beriladi.

30. Litsenziya reyestridan ma’lumotlar eng kam ish haqining yarmi miqdorida litsenziyalovchi organning hisob raqamiga o‘tkazilgan yig‘im to‘langanligi haqidagi to‘lov hujjati taqdim etilgandan so‘ng aniq litsenziya oluvchi to‘g‘risida ko‘chirmalar holida beriladi.

31. Faoliyat litsenziyada ko‘rsatilgan muddatdan oldin to‘xtatilgan taqdirda berilgan litsenziya litsenziat tomonidan litsenziya komissiyasiga qaytariladi. Qolgan muddat uchun to‘langan summa qaytarilmaydi.

32. Litsenziya komissiyasining qarori va harakati ustidan O‘zbekiston Respublikasining qonun hujjatlarida belgilangan tartibda shikoyat qilinishi mumkin.