Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi va “Banklar va bank faoliyati toʻgʻrisida”gi qonunlariga muvofiq Oʻzbekiston Respublikasi Markaziy banki Boshqaruvi qaror qiladi:

1. Oʻzbekiston Respublikasi Markaziy banki Boshqaruvining 2007-yil 15-sentabrdagi 24/6-son qarori (roʻyxat raqami 1727, 2007-yil 12-oktabr) (Oʻzbekiston Respublikasi qonun hujjatlari toʻplami, 2007-y., 41-42-son, 425-modda) bilan tasdiqlangan Aholining keng qatlami, shu jumladan yosh oilalar uchun uy-joy qurilishini va rekonstruksiya qilishni moliyalashtirish va kreditlash tartibi toʻgʻrisida nizomga ilovaga muvofiq oʻzgartirish va qoʻshimchalar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

1. 1-bandning ikkinchi xatboshisi “Bunda” degan soʻzdan keyin “, agar qonun hujjatlarida boshqacha qoida belgilanmagan boʻlsa,” degan soʻzlar bilan toʻldirilsin.

2. 5-bandning ikkinchi xatboshisi “kredit tarixini hisobga olib” degan soʻzlardan keyin “(qonun hujjatlarida belgilangan hollar bundan mustasno)” degan soʻzlar bilan toʻldirilsin.

3. 7-banddagi “12 oydan” degan soʻzlar “18 oydan” degan soʻzlar bilan almashtirilsin.

4. 10-bandda:

“g” kichik banddan “, obyektning roʻyxat kartochkasi” degan soʻzlar chiqarib tashlansin;

“i” kichik band quyidagi tahrirda bayon etilsin:

“i) pudrat qurilish tashkilotining kreditga layoqatlilik darajasini aniqlash uchun uning oxirgi hisobot sanasiga boʻlgan moliyaviy hisobotlari (1, 2, 4 va 5-sonli shakllar);”.

5. 13-bandda:

birinchi xatboshidagi “20 bank” degan soʻzlar “3 bank” degan soʻzlar bilan almashtirilsin;

ikkinchi xatboshi quyidagi tahrirda bayon etilsin:

“Bankning kredit qoʻmitasi tomonidan kredit berishni rad etish toʻgʻrisida qaror qabul qilingan taqdirda, bank tomonidan qaror qabul qilingan kundan keyingi bank ish kunidan kechiktirilmagan muddatda qarz oluvchiga, kredit berishning rad etilishi sabablari koʻrsatilgan yozma xulosa joʻnatiladi.”.

6. 14-bandning oltinchi xatboshisi quyidagi tahrirda bayon etilsin:

“pudrat qurilish tashkiloti tomonidan qurilayotgan yoki rekonstruksiya qilinayotgan koʻp kvartirali uydagi kvartiralarning kelajakda sotilishidan tushadigan mablagʻlar garovi.”.

7. 17-bandning ikkinchi — beshinchi xatboshilari quyidagi tahrirda bayon etilsin:

“qurilish materiallarini xarid qilish uchun;

qurilish montaj ishlarini bajarish jadvallariga muvofiq yordamchi pudrat tashkilotlariga bajariladigan va bajarilgan ishlar, avtotransport xizmatlari va mexanizm xizmatlari uchun toʻlovlarni amalga oshirish uchun;

toʻgʻridan-toʻgʻri ishlab chiqarish xarajatlari (yoqilgʻi-moylash materiallari, tabiiy gaz, elektroenergiya, suv va boshqalar) uchun;

kreditlanayotgan qurilish obyektida band boʻlgan xodimlarga ish haqi toʻlash bilan bogʻliq xarajatlar uchun.”.

8. 31-bandning ikkinchi xatboshisi quyidagi tahrirda bayon etilsin:

“Koʻp kvartirali uy qiymatining 5 foizi miqdoridagi qismi davlat qabul qilish hayʼati dalolatnomasi rasmiylashtirilgan sanadan shartnomada qayd etilgan pudrat qurilish tashkilotining kafolatli muddati tamom boʻlgunga qadar, biroq moliyaviy yil tugashidan kechikmay 22626-sonli “Korxona va tashkilotlarning maqsadli mablagʻlari” maxsus moliyalashtirish depozit hisobvaragʻida saqlab turiladi va qolgan ortiqcha mablagʻlar belgilangan tartibda bank tomonidan memorial order bilan pudrat qurilish tashkilotining asosiy hisobvaragʻiga oʻtkazib beriladi.”.