Oʻzbekiston Respublikasi Prezidentining “Keksalarni eʼzozlash yili” Davlat dasturi toʻgʻrisida” 2015-yil 18-fevraldagi PQ-2302-son qarorini ijro etish yuzasidan Vazirlar Mahkamasi qaror qiladi:

1. Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi tomonidan pensiya va ijtimoiy nafaqalar oladigan 2,7 milliondan ortiq pensionyerlar va 237 ming fuqarolar boʻyicha yagona maʼlumotlar bazasini ifodalaydigan, uning vositasida pensiyalar va ijtimoiy nafaqalarni tayinlash, hisob-kitob qilish, qayta hisob-kitob qilish, shuningdek har oyda tayinlash jarayonlarini avtomatlashtirish taʼminlanadigan avtomatlashtirilgan axborot tizimi — “Pensiya” dasturiy majmui joriy etilganligi maʼlumot uchun qabul qilinsin.

2. Oʻzbekiston Respublikasi Moliya vazirligining “Pensiya” dasturiy majmui negizida uni yanada takomillashtirish va funksional kengaytirish yoʻli bilan keksa kishilar uchun pensiyalar va ijtimoiy nafaqalarni tayinlashning eng qulay tizimini nazarda tutuvchi, maʼlumotnomalar va tasdiqlovchi hujjatlarni qogʻoz shaklida olishni istisno etuvchi, shuningdek pensiyalar va nafaqalar toʻlashga mablagʻlarni oʻz vaqtida moliyalashtirishni taʼminlaydigan Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi pensiya taʼminotining yagona idoralararo integratsiyalashtirilgan axborot tizimini (keyingi oʻrinlarda “Nafaqa” yagona axborot tizimi deb ataladi) tashkil etish toʻgʻrisidagi taklifiga rozilik berilsin.

3. 2015 — 2017-yillarda Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi pensiya taʼminotining yagona idoralararo integratsiyalashtirilgan axborot tizimini joriy etish reja-jadvali ilovaga* muvofiq tasdiqlansin.

4. Vazirliklar va idoralar tasdiqlangan 2015 — 2017-yillarda Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi pensiya taʼminotining yagona idoralararo integratsiyalashtirilgan axborot tizimini joriy etish reja-jadvali toʻliq, oʻz vaqtida va sifatli amalga oshirilishini tashkil etsinlar.

5. Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi “Nafaqa” yagona axborot tizimini joriy etish tugallangandan keyin 2018-yil mobaynida “Nafaqa” yagona axborot tizimi faoliyat koʻrsatishini yanada qoʻllab-quvvatlash uchun zarur boʻlgan server asbob-uskunalarini xarid qilish boʻyicha qonun hujjatlarida belgilangan tartibda tender savdolari oʻtkazsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.