Oʻzbekiston Respublikasi Hukumati bilan Litva Respublikasi Hukumati, bundan keyin “Tomonlar” deb ataluvchilar,

jinoyatchilikning, ayniqsa, uning uyushgan shakldagi rivojlanish miqyosi va yoʻnalishlaridan tashvishlanayotganliklarini bildirib,

fuqarolarning hayoti, huquqi va qonuniy manfaatlariga, jamiyat hamda davlatning manfaatlariga qilingan jinoiy xurujlardan ishonchli ximoyaga boʻlgan intilishdan kelib chiqib,

jinoyatchilikka qarshi kurashda xalqaro hamkorlikka muhim ahamiyat berib,

jinoyatchilikni oldini olish va jinoiy odil sudlovni amalga oshirish sohasida xalqaro konvensiyalar hamda Birlashgan Millatlar Tashkilotining qarorlarini inobatga olib,

Oʻzbekiston Respublikasi va Litva Respublikasi oʻrtasida fuqarolik, oilaviy va jinoiy ishlar boʻyicha huquqiy yordam va huquqiy munosabatlar toʻgʻrisida 1997-yil 20-fevralda imzolangan Shartnoma qoidalariga amal qilib,

quyidagilar toʻgʻrisida ahdlashib oldilar:

1. Tomonlar oʻz davlatlarining qonunlari va xalqaro majburiyatlariga amal qilib, oʻzlarining markaziy vakolatli muassasalari orqali ularning vakolatlari doirasida ushbu Bitimning qoidalariga muvofiq jinoyatchilikka qarshi kurashda hamkorlik qiladilar.

2. Ushbu Bitim jinoiy ishlarda huquqiy yordam koʻrsatish va ushlab berish boʻyicha masalalariga daxl qilmaydi.

3. Ushbu Bitim maqsadlarida quyidagilar markaziy vakolatli organlar hisoblanadilar:

Oʻzbekiston Respublikasidan — Ichki ishlar vazirligi, Bosh prokuratura, Milliy xavfsizlik xizmati, Davlat chegaralarini himoya qiluvchi qoʻmitasi, Adliya vazirligi, Davlat bojxona qoʻmitasi, Davlat soliq qoʻmitasi, Tashqi ishlar vazirligi;

Litva Respublikasidan — Ichki ishlar vazirligi, Bosh prokuratura, Moliya vazirligi, Tashqi ishlar vazirligi.

4. Tomonlarning har biri, oʻzlarining markaziy vakolatli muassasalari roʻyxatidagi oʻzgarishlar toʻgʻrisida boshqa Tomonni oʻz vaqtida xabardor qiladilar.

5. Markaziy vakolatli muassasalar ushbu Bitimni bajarish maqsadida bir-birlari bilan bevosita bogʻlanadilar.

1. Quyidagi huquqqa zid keladigan faoliyatlar ikkala Tomon davlatlarining manfaatlariga daxl qilsa, Tomonlar quyidagilarga qarshi kurashda hamkorlik qiladilar:

1.1. millatlararo uyushgan jinoyatchilik;

1.2. xalqaro terrorchilik;

1.3. oʻq otar qurollar, qurol-yarogʻ, portlovchi moslamalar, portlovchi va zaharli moddalar, shuningdek radioaktiv materiallarning noqonuniy aylanishi;

1.4. giyohvandlik vositalar va psixotrop moddalar, shuningdek prekursorlar (matnda bundan keyin — giyohvandlik moddalarining noqonuniy aylanishi;

1.5. iqtisod sohasidagi jinoyatchiliklar;

1.6. kontrabanda;

1.7. noqonuniy moliya operatsiyalari va jinoiy faoliyat oqibatida olingan foydalarni qonuniylashtirish;

1.8. pul belgilari, qimmatbaho qogʻozlar, kredit varaqchalari, rasmiy hujjatlarni qalbakilashtirish, shuningdek ularni noqonuniy tarqatish va foydalanish;

1.9. madaniy va tarixiy boyliklarga boʻlgan jinoiy tajovuzlar, xususan ularni noqonuniy olib kirish hamda olib chiqish;

1.10. avtotransport vositalarida qilinadigan noqonuniy operatsiyalar;

1.11. fohishabozlikdan foydalanish va odamlar savdosi;

1.12. noqonuniy migratsiya, shaxslarning Tomonlar davlatlari hududida noqonuniy boʻlishlari bilan davlat chegarasi orqali noqonuniy harakatlanishlari;

1.13. ekologik jinoyatlar.

2. Tomonlar, shuningdek quyidagi sohalarda hamkorlik qiladilar:

2.1. yoʻl harakati xavfsizligi va yongʻin xavfsizligini taʼminlash;

2.2. havo va temir yoʻl transportida xavfsizlikni taʼminlash;

2.3. kadrlarni tayyorlash, ilmiy va axborot aloqalarini rivojlantirish.

3. Tomonlar oʻzaro qiziqish uygʻotadigan boshqa yoʻnalishlar boʻyicha ham hamkorlik qilishlari mumkin.

1. Tomonlar quyidagi shakllarda hamkorlik qiladilar:

1.1. jinoyatlarning oldini olish, aniqlash, fosh etish va qidirishga, shuningdek ushbu Bitimning 2-moddasiga muvofiq boshqa vazifalarni hal qilishga koʻmaklashishi mumkin boʻlgan axborotni almashish;

1.2. shaxslar, tashkilotlar, muassasalar va korxonalar faoliyatlarini oʻrganish, tegishli hisoblar boʻyicha shaxslar, predmetlar hamda hujjatlarni tekshirish orqali ushbu Bitimning 2-moddasida koʻzda tutilgan jinoyatlarning faktlarini qidirishda koʻmak koʻrsatish;

1.3. ish tajribasini almashish, xususan stajirovka, maslahatlashuv va seminarlar oʻtkazish yoʻllari orqali.

2. Hamkorlikning hajmi va konkret shakllari talab hamda shart-sharoitlarning oʻzgarishini, shuningdek boshqa mavjud holatlarni hisobga olgan holda, markaziy vakolatli muassasalarning ahdlashuviga koʻra belgilanadi. Tomonlar ushbu Bitimni bajarish maqsadlarida bir-birlariga bepul yordam koʻrsatishlari mumkin.

1. Tomonlar ushbu Bitimning 2-moddasida tilga olingan jinoyatlarning oldini olish uchun huquqni muhofaza qiluvchi choralar samaradorligini oshirish maqsadida oʻzlarining huquqiy hamda maʼmuriy tizimlariga muvofiq bir-birlari bilan yaqindan hamkorlik qiladilar.

2. Ushbu Bitimni bajarish va hamkorlikni chuqurlashtirish maqsadlarida Tomonlarning markaziy vakolatli muassasalari oʻz vakolatlari doirasida bevosita aloqalar oʻrnatishlari va oʻz faoliyatlarining alohida yoʻnalishlari boʻyicha hamkorlik toʻgʻrisida qoʻshimcha shartnomaviy hujjatlarni imzolashlari mumkin.

3. Tomonlar fan va texnika sohasida jinoyatchilikka qarshi kurash, maxsus bilimlarni almashish manfaatlarida tadqiqotlar dasturlarini rejalashtirish va amalga oshirishda bir-birlariga koʻmaklashadilar, shu maqsadlarda tegishli hollarda, hamkorlikni rivojlantirish va oʻzaro manfaat uygʻotadigan muammolarni muhokama qilish uchun xalqaro konferensiya va seminarlardan foydalanadilar.

4. Tomonlar kadrlar tayyorlash sohasida oʻzaro manfaatli asosda hamkorlik qilishga shartlashib oldilar.

Ushbu Bitimning 3-modda 1-qismi 1.1.-bandida koʻzda tutilgan axborotni almashish ushbu Bitimning 2-moddasi 1-qismida koʻzda tutilgan konkret jinoyatlarga daxl qiladi, xususan:

1) bir Tomon davlati hududida jinoiy guruhlar tarafidan tayyorlanayotgan yoki sodir etilgan jinoyatlar, agar bunday guruhlarning tarkibiga boshqa Tomon davlatining fuqarolari kirsa yoki bunday jinoyatlar boshqa tarzda bu davlatning manfaatlariga daxl qilsa;

2) giyohvandlik moddalarining noqonuniy yurgizilishini tashkil etgan jinoyatlar, agar ular boshqa Tomon davlatidan bir Tomon davlatiga kelsa, jumladan uchinchi davlatdan tranzit tarzida, shuningdek ularning bir Tomon davlatidagi noqonuniy tayyorlanishi yoxud savdosiga boshqa Tomon davlatining fuqarolari aloqador boʻlsa;

3) jinoiy faoliyatdan olingan foydalarni qonuniylashtirish bilan bogʻliq jinoyatlar, agar shu maqsadlarda jismoniy va/yoki yuridik shaxslarning bir Tomon davlatining hududida boshqa Tomon davlatining fuqarolari tarafidan foydalanilsa.

Tomonlar, shuningdek quyidagilar toʻgʻrisidagi axborotni almashadilar:

1) uyushgan guruhlar tarafidan jinoyatlarni sodir etish usullari, ularning tarkibi, tuzilishi, faoliyat sohasi va jinoiy aloqalari toʻgʻrisida;

2) giyohvandlik moddalarini yashirishning yangi usullari va ularni oshkor qilish metodlari, ularni noqonuniy tashishning yangi yoʻnalishlari hamda kanallari, noqonuniy yurgizilishga kelib tushayotgan giyohvandlik moddalarning yangi turlari, ularning xususiyati va tayyorlash texnologiyasi;

3) terrorchilik faoliyatining shakl va metodlari, fosh qilingan terrorchilik guruhlarining tuzilishi va tarkibi, ular tomonidan foydalanadigan texnika vositalari, tayyorlanayotgan hamda amalga oshirilgan terrorchilik xurujlari va ularga aloqador shaxslar, agar koʻrsatilgan faoliyat boshqa Tomon davlatining manfaatlariga daxl qilsa;

4) jinoiy faoliyatdan olingan daromadlarni qonuniylashtirish usullari, bunday turdagi faoliyatda shubhalanilayotgan tashkilot, muassasa va korxonalar;

5) ushbu Bitimning 2-moddasida koʻzda tutilgan jinoyatlarni sodir etganlikda shubhalanilayotgan, boshqa Tomon davlati hududida doimiy yashaydigan yoki vaqtincha boʻlib turgan Tomonlar davlatlarining fuqarolari;

6) bir Tomon davlatining jinoiy qonunchiligini boshqa Tomon davlati fuqarolari tarafidan buzilganligi toʻgʻrisida roʻyxatga olingan faktlar.

1. Ushbu Bitimning 3-moddasida koʻzda tutilgan axborotni berish va boshqa xatti-harakatlar Tomonlar davlatlarining markaziy vakolatli muassasalari tarafidan yozma soʻrovlarga muvofiq amalga oshiriladi.

2. Ushbu madadning 1-qismida koʻzda tutilgan soʻrovda quyidagilar aks ettirilishi lozim:

2.1. yuborilayotgan soʻrov boʻyicha ishning mohiyati, mazkur ish boʻyicha ishlayotgan yoki unga aloqador shaxs yoxud shaxslar, talab etilayotgan axborot toʻgʻrisida faktlar, predmetlar va hujjatlar toʻgʻrisida imkon qadar toʻla maʼlumot;

2.2. qoʻllanish sababi va bajarilishi talab etilayotgan konkret protseduraning batafsil tavsifi;

2.3. zarur boʻlganda soʻrovning bajarilishi kutilayotgan muddatlar.

3. Zarur boʻlganda, soʻrovga tegishli ravishda uning bajarilishini yengillashtiradigan hujjatlar yoki ulardan koʻchirmalarning tasdiqlangan nusxalari ilova qilinadi.

4. Soʻrov va unga qilinadigan ilovalar ushbu Bitimning 11-moddasidagi talablarga muvofiq rasmiylashtiriladi, tegishli mansabdor shaxs tarafidan imzolanadi va gerbli muhr bilan tasdiqlanadi.

5. Ushbu Bitimning 3-modda 1-qismi 1.1.-bandida koʻzda tutilgan axborot boshqa Tomon uchun qiziqarli degan asoslar boʻlsa, Tomonlar davlatlarining markaziy vakolatli muassasalari oʻz xohishlariga koʻra bir-birlariga yuborishlari mumkin.

b. Soʻrovni bajarish imkon qadar qisqa muddatlarda amalga oshirilishi lozim. Zarur boʻlganda Tomonlar davlatlarining markaziy vakolatli muassasalari soʻrovning bajarilishini yengillashtiruvchi qoʻshimcha maʼlumotlarni soʻrab olish huquqiga ega.

1. Agar soʻrovni bajarish inson huquqlarining buzilishiga olib kelsa, davlat suvereniteti yoki xavfsizligiga zarar yetkazsa yoxud soʻralayotgan Tomonning qonunchiligi yoki xalqaro majburiyatlariga zid kelsa, uning bajarilishi toʻlaligicha yoki qisman rad etilishi mumkin.

2. Soʻrovni bajarishni rad etish toʻgʻrisida qaror qabul qilingan holda, Tomonlar davlatlarining markaziy vakolatli muassasalar bu toʻgʻrida rad etilishining sababini koʻrsatgan holda, bir-birlarini xabardor qiladilar.

1. Tomonlarning markaziy vakolatli muassasalari bir-birlaridan oladigan axborotning, agar bu axborot yopiq xaraktyerga ega boʻlsa yoki yuborayotgan Tomon uning oshkor qilinishini lozim topmasa, maxfiyligini taʼminlaydilar. Teng darajada bu texnik vositalar, uskunalar va materiallarga ham daxldor. Axborotning maxfiylik darajasi uni yuborgan Tomon orqali belgilanadi.

2. Zarur hollarda, ushbu Bitim doirasida olingan axborot, texnik vositalar, uskunalar va materiallarning uchinchi tomonga berilishida ularni yetkazib bergan markaziy vakolatli muassasalarning yozma roziligi talab qilinadi.

3. Tomonlar tarafidan olingan jismoniy shaxslar toʻgʻrisidagi maʼlumotlar ushbu Bitimda belgilangan maqsadlardagina foydalanilishi mumkin.

Etkazib beradigan Tomon bunday maʼlumotlarning ishonchliligini, shuningdek zarur boʻlganda, tegishli oʻzgartish va toʻldirishlarning oʻz vaqtida yetkazib berilishini taʼminlaydi. Jismoniy shaxslar toʻgʻrisida axborotning qabul qilinishi, roʻyxatga olinishi, saqlanishi, foydalanilishi va yoʻq qilinishi Tomonlar davlatlarining qonunchiliklariga muvofiq amalga oshiriladi. Ushbu Bitim amal qilishdan toʻxtagan holda, ilgari olingan barcha axborot yoʻq qilinishi lozim.

4. Tomonlar davlatlarining qonunchiliklariga muvofiq manfaatdor shaxsga uning yozma soʻroviga koʻra unga aloqador mavjud maʼlumotlar toʻgʻrisida axborot berilishi mumkin.

5. Barcha hollarda, maʼlumotlardan begona shaxslarning foydalanishi, ularni ogohlantirishsiz oʻzgartirilishi, yoʻq qilinishi yoki oshkor qilinishi Tomonlar tarafidan samarali muhofaza qilinadi.

1. Ushbu Bitimni bajarish boʻyicha xarajatlarni Tomonlar bajarishlari zarur boʻlgan oʻz majburiyatlari doirasida mustaqil ravishda qoplaydilar.

2. Zarur holda, Tomonlar ushbu Bitimdan kelib chiqadigan xatti-harakatlarni bajarish uchun birgalikdagi xarajatlarni qoplaydilar. Ular har bir alohida hollarda oʻzaro maqbul ahdlashuvlar orqali rasmiylashtiriladi. Birgalikdagi xarajatlar boʻyicha Tomonlarning majburiyatlari mana shu ahdlashuvlar bilan boshqariladi.

3. Tomonlar zarur holda, oʻzaro ahdlashuviga koʻra ushbu Bitimning 2-moddasida soʻz boradigan jinoyatlarning oldini olish boʻyicha konkret vazifalarni hal qilish uchun zarur boʻlgan uskuna va materiallar orqali bir-birlariga bepul yordam berishlari mumkin.

Tomonlar ushbu Bitim doirasida hamkorlik qilishda rus tiliga tarjima qilingan ilovalar bilan oʻzlarining davlat tillaridan foydalanadilar.

1. Zarur holda, ushbu Bitim qoidalarini hayotga tatbiq qilish maqsadida Tomonlar ularning vakolatli vakillaridan tashkil topgan Qoʻshma komissiya tuzishlari mumkin.

2. Qoʻshma komissiya navbat bilan Vilnyus va Toshkentda qancha zarur boʻlsa, shuncha tez-tez oʻzaro qiziqish uygʻotadigan masalalarni koʻrib chiqish hamda oʻzaro maqbul qarorlarni qabul qilish uchun yigʻiladi. Qoʻshma komissiya qarorlarni tayyorlash uchun, shuningdek boshqa faoliyat uchun Tomonlar davlatlarining markaziy vakolatli muassasalarning vakillaridan tashkil topgan ishchi guruhni tuzishlari mumkin.

1. Ushbu Bitim Tomonlarning ular ishtirok etgan boshqa xalqaro shartnomalar boʻyicha majburiyatlariga daxl qilmaydi.

2. Tomonlarning roziligiga koʻra ushbu Bitimga oʻzgartish va qoʻshimchalar kiritilishi mumkin. Ular ushbu Bitimning 14-moddasidagi qoidalarga muvofiq kuchga kiradigan alohida bayonnomalar orqali rasmiylashtiriladi.

1. Ushbu Bitim Tomonlar uning kuchga kirishi uchun zarur boʻlgan davlat ichki protseduralarini bajarganliklari toʻgʻrisida oxirgi yozma xabarnoma olingan sanadan boshlab kuchga kiradi.

2. Ushbu Bitim Tomonlardan birontasi uning amal qilishini toʻxtatish niyati toʻgʻrisida boshqa Tomonni yozma ravishda xabardor qilmaguniga qadar kuchini saqlab qoladi. Bu holda ushbu Bitim boshqa Tomondan bunday xabarnoma olingan sanadan boshlab olti oy oʻtgach, amal qilishdan toʻxtaydi.

Toshkent shahrida 2002-yil 18-fevralda ikki nusxada, har biri oʻzbek, litva va rus tillarida tuzildi, bunda barcha matnlar bir xil kuchga ega.

Ushbu Bitim qoidalarini talqin qilish maqsadida rus tilidagi matndan foydalaniladi.