Oʻzbekiston Respublikasi va Ispaniya Qirolligi, ikkiyoqlama soliqqa tortishga yoʻl qoʻymaslik hamda daromad va kapital soliqlarini toʻlashdan bosh tortishni oldini olish toʻgʻrisida Konvensiya tuzish istagida,

quyidagilar toʻgʻrisida kelishib oldilar:

Ushbu Konvensiya Ahdlashuvchi Davlatlarning biri yoki har ikkalasining rezidenti boʻlgan shaxslarga nisbatan qoʻllaniladi.

1. Ushbu Konvensiya bir Ahdlashuvchi Davlat yoki uning maʼmuriy-hududiy yoki siyosiy boʻlinmalari yoxud mahalliy hokimiyat organlari nomidan undiriladigan daromad va kapital soliqlariga nisbatan, ularni undirish uslubidan qatʼi nazar, tatbiq etiladi.

2. Daromad va kapital soligʻiga jami daromaddan, jami kapitaldan yoki daromad yoxud kapitalning bir qismidan undiriladigan barcha soliqlar, shu jumladan koʻchar yoki koʻchmas mulkni tasarrufdan chiqarishdan olingan daromaddan va korxonalar toʻlaydigan maosh yoki mukofot pullaridan, shuningdek kapital qiymatining oʻsishidan olinadigan soliqlar kiradi.

3. Ushbu Konvensiya qoʻllanadigan amaldagi soliqlar, xususan quyidagilardir:

a) Oʻzbekiston Respublikasida:

(i) yuridik shaxslardan olinadigan foyda soligʻi;

(ii) jismoniy shaxslardan olinadigan daromad soligʻi;

(iii) mol-mulk soligʻi;

(keyingi oʻrinlarda “Oʻzbekiston soligʻi” deb yuritiladi);

b) Ispaniyada:

(i) jismoniy shaxslardan olinadigan daromad soligʻi;

(ii) korporativ soliq;

(iii) norezidentlardan olinadigan daromad soligʻi;

(iv) kapitaldan olinadigan soliq;

(v) daromaddan va kapitaldan olinadigan mahalliy soliqlar;

(keyingi oʻrinlarda “Ispaniya soligʻi” deb yuritiladi).

4. Ushbu Konvensiya soliqlarga qoʻshimcha tarzda yoki mavjudlari oʻrniga mazkur Konvensiya imzolangan sanadan soʻng undiriladigan har qanday bir xil yoki mohiyatan oʻxshash soliqlarga nisbatan ham qoʻllaniladi. Ahdlashuvchi Davlatlarning vakolatli organlari ularning soliqqa oid tegishli qonunchiligiga kiritilgan muhim oʻzgartishlar toʻgʻrisida bir-birlarini xabardor qiladilar.

1. Ushbu Konvensiya maqsadlarida, agar matn mazmunida oʻzga maʼno ifodalanmasa:

a) “Oʻzbekiston” atamasi Oʻzbekiston Respublikasini anglatadi va geografik maʼnoda qoʻllanilganda Oʻzbekiston Respublikasi hududini, jumladan hududiy suvlari va havo kengligi doirasida Oʻzbekiston Respublikasi xalqaro huquqqa muvofiq va milliy qonunchilikka asosan oʻzining suveren huquqlari va yurisdiksiyasini, shu jumladan, yer osti boyliklaridan va tabiiy resurslardan foydalanish huquqini amalga oshirishi mumkin boʻlgan hududni anglatadi;

b) “Ispaniya” atamasi Ispaniya Qirolligini anglatadi va geografik maʼnoda qoʻllanilganda xalqaro huquqqa muvofiq hamda oʻz ichki qonunchiligi qoʻllanilishi boʻyicha Ispaniya Qirolligi dengiz tubi, yer osti yoki chegardosh suv va tabiiy resurslarga nisbatan oʻzining suveren huquqlari va yurisdiksiyasini amalga oshiradigan yoki kelajakda amalga oshirishi mumkin boʻlgan Ispaniya Qirolligi hududini, shu jumladan ichki suvlari, havo kengliklari, hududiy dengizi hamda hududiy dengizidan tashqaridagi har qanday hududni anglatadi;

s) “bir Ahdlashuvchi Davlat” va “boshqa Ahdlashuvchi Davlat” atamalari matn mazmuniga qarab, Oʻzbekiston Respublikasi yoki Ispaniya Qirolligini anglatadi;

d) “shaxs” atamasi jismoniy shaxs, kompaniya yoki boshqa har qanday shaxslar birlashmasini anglatadi;

e) “kompaniya” atamasi yuridik shaxs yoki soliqqa tortish maqsadlarida yuridik shaxs sifatida qaraladigan har qanday tashkilotni anglatadi;

f) “korxona” atamasi har qanday tadbirkorlik faoliyatini amalga oshirishga tatbiq qilinadi.

g) “bir Ahdlashuvchi Davlatning korxonasi” va “boshqa Ahdlashuvchi Davlatning korxonasi” atamalari mos ravishda bir Ahdlashuvchi Davlat rezidenti boshqaruvi ostida boʻlgan korxonani va boshqa Ahdlashuvchi Davlat rezidenti boshqaruvi ostida boʻlgan korxonani anglatadi;

h) “xalqaro tashish” atamasi Ahdlashuvchi Davlat korxonasi tomonidan foydalaniladigan dengiz yoki havo kemasida, temir yoʻl yoki avtomobil transportida har qanday tashishni anglatadi, dengiz yoki havo kemasidan, temir yoʻl yoki avtomobil transporti vositalaridan faqat boshqa Ahdlashuvchi Davlatda joylashgan punktlar oʻrtasida foydalanilgan hollar bundan mustasno;

1) “vakolatli organ” atamasi quyidagilarni anglatadi:

(i) Oʻzbekistonda — Oʻzbekiston Respublikasi Davlat soliq qoʻmitasi raisi yoki uning vakolatli vakili;

(ii) Ispaniyada — Moliya va davlat maʼmuriyatlari vaziri yoki uning vakolatli vakili;

2) “milliy shaxs” atamasi quyidagilarni anglatadi:

(i) Ahdlashuvchi Davlat fuqaroligiga ega boʻlgan har qanday jismoniy shaxs;

(ii) Ahdlashuvchi Davlatning amaldagi qonunchiligiga muvofiq oʻz maqomini olgan har qanday yuridik shaxs, shirkat, uyushma;

3) “tadbirkorlik faoliyati” atamasi kasbiy xizmatlarni koʻrsatish va boshqa mustaqil turdagi faoliyatni oʻz ichiga oladi.

2. Konvensiya Ahdlashuvchi Davlat tomonidan istalgan vaqtda qoʻllanilganda, unda belgilanmagan har qanday ibora, agar matndan boshqa maʼno kelib chiqmasa, ushbu Konvensiya tatbiq etiladigan soliqlarga nisbatan shu vaqtda mazkur Davlat qonunchiligiga koʻra ega boʻlgan maʼnoni anglatadi. Atamaning mazkur Davlat soliq qonunchiligiga muvofiq belgilangan maʼnosi ushbu Davlatning boshqa huquq sohalarida shu atama uchun berilgan maʼnodan ustunlik qiladi.

1. Ushbu Konvensiya maqsadlarida “Ahdlashuvchi Davlat rezidenti” atamasi mazkur Davlat qonunchiligi boʻyicha oʻzining yashash joyi, doimiy boʻlish joyi, boshqaruv joyi yoki har qanday boshqa shunga oʻxshash mezonlar asosida soliqqa tortiladigan har qanday shaxsni anglatadi, shuningdek Davlatning oʻzini va har qanday maʼmuriy-hududiy yoki siyosiy boʻlinmasini yoxud mahalliy hokimiyat organini ham oʻz ichiga oladi. Biroq mazkur atama faqat ushbu Ahdlashuvchi Davlatdagi manbalardan yoki kapitaldan daromad olayotgani uchun shu Davlatda soliqqa tortiladigan har qanday shaxsni oʻz ichiga olmaydi.

2. Agarda 1-band qoidalariga muvofiq jismoniy shaxs har ikkala Ahdlashuvchi Davlat rezidenti boʻlsa, uning maqomi quyidagi tarzda belgilanadi:

a) shaxs faqat oʻzi doimiy yashaydigan uy-joyga ega boʻlgan Davlat rezidenti boʻlib hisoblanadi; agar shaxs har ikki Davlatda ham yashash uchun uy-joyga ega boʻlsa, bunday shaxs faqat yaqin shaxsiy hamda iqtisodiy aloqalarga (hayotiy manfaatlar markazi) ega boʻlgan Davlat rezidenti hisoblanadi;

b) agar bunday shaxsning hayotiy manfaatlari markazi boʻlgan Davlatni aniqlash imkoniyati boʻlmasa yoki mazkur Davlatlarning hech birida yashash uchun doimiy uy-joyga ega boʻlmasa, ushbu shaxs odatda oʻzi yashab turgan Davlat rezidenti hisoblanadi;

c) agar shaxs odatda har ikki Davlatda ham yashasa yoki ulardan hech birida yashamasa, u qaysi Davlat milliy shaxsi boʻlsa, shu Davlat rezidenti hisoblanadi;

d) agar shaxs har ikkala Davlat milliy shaxsi boʻlsa, yoki hech birining milliy shaxsi boʻlmasa, Ahdlashuvchi Davlatlarning vakolatli organlari bu masalani oʻzaro kelishuv orqali hal qiladilar.

3. Jismoniy shaxslardan tashqari, agarda shaxs 1-band qoidalariga muvofiq har ikki Ahdlashuvchi Davlat rezidenti boʻlsa, u faqat oʻzining amaldagi boshqaruv organi joylashgan Davlat rezidenti hisoblanadi.

1. Mazkur Konvensiya maqsadlari uchun “doimiy muassasa” atamasi korxona toʻliq yoki qisman tadbirkorlik faoliyatini amalga oshiradigan doimiy faoliyat joyini anglatadi.

2. “Doimiy muassasa” atamasi, xususan quyidagilarni oʻz ichiga oladi:

a) boshqaruv joyi;

b) boʻlinma;

c) ofis;

d) fabrika;

e) ustaxona;

f) shaxta, neft yoki gaz qudugʻi, karyer yoxud tabiiy boyliklar qazib olinadigan har qanday boshqa joy;

3. Qurilish maydonchasi, qurilish, montaj yoki yigʻuv obyekti basharti uning davomiyligi faqatgina oʻn ikki oydan koʻproq davom etsa, doimiy muassasani tashkil etadi.

4. Ushbu moddaning avvalgi qoidalaridan qatʼi nazar, “doimiy muassasa” atamasi quyidagilarni oʻz ichiga olmaydi:

a) qurilmalardan faqatgina shu korxonaga tegishli tovar yoki buyumlarni saqlash, namoyish qilish yoki yetkazib berish maqsadida foydalanish;

b) shu korxonaga tegishli tovar yoki buyumlar zaxirasini faqatgina saqlash, namoyish qilish yoki yetkazib berish maqsadida saqlab turilishi;

c) shu korxonaga tegishli tovar yoki buyumlar zaxirasini faqat boshqa korxona tomonidan qayta ishlanishi maqsadida saqlab turilishi;

d) doimiy faoliyat joyining faqat tovar yoki buyumlar sotib olish yoki ushbu korxona uchun axborot yigʻish maqsadida saqlab turilishi;

e) doimiy faoliyat joyini faqatgina ushbu korxona uchun tayyorgarlik yoki yordamchi tusdagi boshqa faoliyatni amalga oshirish maqsadlarida saqlab turilishi;

f) faqat a) — e) kichik bandlarida nazarda tutilgan faoliyat turlarining har qanday birikuvi uchungina, basharti ana shu faoliyat turlarini birlashtirish natijasida vujudga kelgan bunday doimiy faoliyat joyining jami faoliyati tayyorgarlik yoki yordamchi xususiyatga ega boʻlsa, doimiy faoliyat joyining saqlab turilishi.

5. Ushbu moddaning 1 va 2-bandlari qoidalaridan qatʼi nazar, agar ushbu moddaning 6-bandi qoʻllaniladigan mustaqil maqomli agentdan oʻzga shaxs bir korxona nomidan harakat qilsa va Ahdlashuvchi Davlatda mazkur korxona nomidan shartnomalar tuzish vakolatiga ega boʻlsa va odatda bunday vakolatdan foydalansa, bunday korxona mazkur Davlatda toki bunday shaxsning faoliyati 4-bandda koʻrsatib oʻtilganlar bilan cheklanib qolmasa va agarda ushbu bandning qoidalariga muvofiq doimiy faoliyat joyi orqali amalga oshirilayotgan boʻlsa, doimiy faoliyat joyini doimiy muassasaga oʻzgartirmayotgan boʻlsa ham doimiy muassasaga ega deb qaraladi.

6. Korxona Ahdlashuvchi Davlatda, u shu Davlatdagi tadbirkorlik faoliyatini broker, komissioner yoki har qanday mustaqil maqomli agent orqali amalga oshirganligi uchun, bunday shaxslar basharti oʻzining odatdagi faoliyati doirasida harakat qilsa, doimiy muassasaga ega deb qaralmaydi.

7. Ahdlashuvchi Davlatlardan birining rezidenti boʻlgan kompaniya boshqa Ahdlashuvchi Davlatning rezidenti boʻlgan kompaniyani nazorat qilsa yoki shunday kompaniya tomonidan nazorat qilinsa yoki mazkur boshqa Davlatda tijorat faoliyatini (doimiy muassasa orqali yoki boshqa tarzda) amalga oshirayotgan boʻlsa, bu hol oʻz-oʻzidan bu kompaniyalarning birini boshqasi uchun doimiy muassasaga aylantirib qoʻymaydi.

1. Bir Ahdlashuvchi Davlat rezidentining boshqa Ahdlashuvchi Davlatda joylashgan koʻchmas mulkdan oladigan daromadlari (jumladan qishloq va oʻrmon xoʻjaligidan olinadigan daromadlar) mazkur boshqa Davlatda soliqqa tortilishi mumkin.

2. “Koʻchmas mulk” atamasi koʻrib chiqilayotgan mulk joylashgan Ahdlashuvchi Davlat qonunchiligida belgilangan maʼnoga ega. Atama har qanday holda yer usti mulkiga tegishli boʻlgan umumiy qonunchilik qoidalari bilan huquqi belgilab berilgan koʻchmas mulkka tegishli boʻlgan mulkni, qishloq va oʻrmon xoʻjaligida ishlatiladigan chorva va vositalarni hamda koʻchmas mulk servitut (uzufruktini, minerallar, manbalar va boshqa tabiiy boyliklar qatlamlarini qazib olish uchun yoki qazib olish huquqi uchun kompensatsiya sifatida toʻlanadigan oʻzgaruvchan yoki qayd qilingan toʻlovlarga nisbatan huquqni oʻz ichiga oladi; dengiz, havo kemalari, temir yoʻl va avtomobil transporti vositalari koʻchmas mulk sifatida eʼtirof etilmaydi.

3. 1-band qoidalari koʻchmas mulkdan toʻgʻridan toʻgʻri foydalanish, ijaraga berish yoki boshqa har qanday shaklda foydalanishdan olinadigan daromadga nisbatan qoʻllaniladi.

4. Aksiyalar yoki boshqa huquqlarga ega boʻlish mulk egasiga bevosita yoxud bilvosita koʻchmas mulkdan foydalanish huquqini bersa, bunday foydalanishdan olingan daromad, ijaraga berish yoki bunday huquqlardan har qanday shaklda foydalanish, koʻchmas mulk joylashgan Ahdlashuvchi Davlatda soliqqa tortilishi mumkin.

5. 1, 3 va 4-bandlar qoidalari korxonaning koʻchmas mulkidan olingan daromadiga nisbatan qoʻllaniladi.

1. Bir Ahdlashuvchi Davlat korxonasining foydasi, agar korxona oʻz tadbirkorlik faoliyatini boshqa Ahdlashuvchi Davlatda joylashgan doimiy muassasa orqali amalga oshirmayotgan boʻlsa, faqat ushbu Davlatda soliqqa tortiladi. Agar korxona oʻz faoliyatini yuqorida aytilganidek amalga oshirayotgan boʻlsa, korxonaning foydasi boshqa Davlatda mazkur doimiy muassasa faoliyatiga tegishli boʻlgan qism doirasida soliqqa tortilishi mumkin.

2. 3-band qoidalariga muvofiq, agar bir Ahdlashuvchi Davlat korxonasi boshqa Ahdlashuvchi Davlatda u erda joylashgan doimiy muassasa orqali tadbirkorlik faoliyatini amalga oshirayotgan boʻlsa, har bir Ahdlashuvchi Davlatda ushbu doimiy muassasaga u alohida va mustaqil korxona boʻlgan holda xuddi shunday yoki shunga oʻxshash sharoitlarda, mazkur yoki shunga oʻxshash faoliyat bilan shugʻullangan holda olishi mumkin boʻlgan foyda hisoblab yoziladi.

3. Doimiy muassasa foydasini aniqlashda shu doimiy muassasa faoliyati maqsadlarida sarflangan xarajatlarni, jumladan doimiy muassasa joylashgan Ahdlashuvchi Davlatda yoki undan tashqarida sarflangan boshqaruv va umumiy maʼmuriy xarajatlarni chegirib tashlashga yoʻl qoʻyiladi.

4. Doimiy muassasa tomonidan faqat mazkur korxona uchun tovar yoki buyumlarning xarid qilinishi asosida ushbu doimiy muassasaga biron-bir foyda hisoblab yozilmaydi.

5. Avvalgi bandlar maqsadlarida doimiy muassasaga tegishli boʻlgan foyda, basharti uni oʻzgartirish uchun salmoqli va yetarli sabablar boʻlmasa, har yili bir xil uslubda aniqlanadi.

6. Agar foyda ushbu Konvensiyaning boshqa moddalarida alohida aytib oʻtilgan daromad turlarini qamrab oladigan boʻlsa, ushbu modda qoidalari mazkur moddalarning qoidalariga daxl qilmaydi.

1. Bir Ahdlashuvchi Davlat korxonasining xalqaro tashishlarda dengiz yoki havo kemasi, temir yoʻl yoki avtomobil transporti vositalaridan foydalanishdan olgan foydasi faqat shu Davlatda soliqqa tortiladi.

2. 1-band qoidalari transport vositalarini ekspluatatsiya qilish boʻyicha pulda, qoʻshma faoliyatda yoki xalqaro tashkilotda ishtirok etishdan olingan foydalarga ham qoʻllaniladi.

1. Agar:

a) bir Ahdlashuvchi Davlat korxonasi boshqa Ahdlashuvchi Davlat korxonasining boshqaruvi, nazorati yoxud kapitalida bevosita yoki bilvosita ishtirok etsa, yoki

b) bir xil shaxslar bir Ahdlashuvchi Davlat korxonasining hamda boshqa Ahdlashuvchi Davlat korxonasining boshqaruvi, nazorati yoki kapitalida bevosita yoki bilvosita ishtirok etsa va har qanday holatda ikki korxona oʻrtasidagi ularning tijorat va moliyaviy munosabatlarida mutlaqo mustaqil boʻlgan korxonalar oʻrtasidagidan farqli sharoitlar yaratilsa yoki oʻrnatilsa, ularning birortasiga hisoblanishi mumkin boʻlgan, lekin mavjud sharoitlar tufayli uning hisobiga yozilmagan har qanday foyda ushbu korxona foydasiga qoʻshilishi va tegishli ravishda soliqqa tortilishi mumkin.

2. Agar Ahdlashuvchi Davlat shu Davlatning korxonasi foydasiga boshqa Ahdlashuvchi Davlatda soliqqa tortilgan foydasini, shuningdek soliqlarni qoʻshib hisoblasa va shu tarzda qoʻshilgan foyda birinchi eslatib oʻtilgan Davlat korxonasiga hisoblanishi mumkin boʻlgan foyda boʻlsa, agar ikki korxona oʻrtasidagi oʻrnatilgan munosabatlar mustaqil korxonalar oʻrtasidagi munosabatlardek boʻlsa, unda ushbu boshqa Davlat shu foydadan olinadigan soliq miqdoriga tegishli oʻzgartirish kiritishi lozim. Bunday oʻzgartirishni aniqlashda ushbu Konvensiyaning boshqa qoidalariga eʼtibor berilishi lozim va Ahdlashuvchi Davlatlarning vakolatli organlari zarur boʻlgan taqdirda bir-birlari bilan oʻzaro maslahatlashuvlarni boshlashlari lozim.

1. Bir Ahdlashuvchi Davlat rezidenti boʻlgan kompaniya tomonidan boshqa Ahdlashuvchi Davlat rezidentiga toʻlanadigan dividendlar mazkur boshqa Davlatda soliqqa tortilishi mumkin.

2. Biroq bunday dividendlar ularni toʻlayotgan kompaniya rezident hisoblangan Ahdlashuvchi Davlatda ham mazkur Davlat qonunchiligiga muvofiq soliqqa tortilishi mumkin, ammo basharti dividendlarning haqiqiy egasi boshqa Ahdlashuvchi Davlatning rezidenti boʻlsa, shu tarzda olinadigan soliq miqdori quyidagilardan oshmasligi lozim:

a) agar kompaniya (oddiy shirkatdan tashqari) dividendlarning haqiqiy egasi boʻlsa va dividendlar toʻlayotgan kompaniya kapitalining kamida 25 foiziga egalik qilsa, dividendlar yalpi miqdorining 5 foizidan;

b) boshqa barcha hollarda dividendlar yalpi miqdorining 10 foizidan.

Ushbu band kompaniyaning dividendlar toʻlanadigan foydasini soliqqa tortishga daxl qilmaydi.

3. “Dividendlar” atamasi ushbu moddada qoʻllanilganda, aksiyalardan yoki ulardan foydalanishdan yoxud huquqlardan foydalanishdan, togʻ-kon sanoati aksiyalaridan, taʼsischilar aksiyalaridan yoki foydada ishtirok etish huquqini beruvchi qarz talablari hisoblanmaydigan boshqa huquqlardan olinadigan daromadni, shuningdek foydani taqsimlovchi kompaniya rezident hisoblangan Davlat qonunchiligiga muvofiq aksiyalardan olinadigan daromad uchun belgilangan tartib boʻyicha soliqqa tortiladigan boshqa daromadni anglatadi.

4. Basharti bir Ahdlashuvchi Davlatning rezidenti boʻlgan dividendlarning haqiqiy egasi dividendlarni toʻlayotgan kompaniya rezident hisoblangan boshqa Ahdlashuvchi Davlatda oʻz faoliyatini unda joylashgan doimiy muassasasi orqali amalga oshirsa va dividendlar toʻlanadigan ulush haqiqatda mazkur doimiy muassasa bilan bogʻliq boʻlsa, ushbu moddaning 1 va 2-bandlari qoidalari qoʻllanilmaydi. Bunday hollarda 7-modda qoidalari qoʻllaniladi.

5. Basharti bir Ahdlashuvchi Davlatning rezidenti boʻlgan kompaniya boshqa Ahdlashuvchi Davlatda foyda yoki daromad olayotgan boʻlsa, bunday dividendlar mazkur boshqa Davlat rezidentiga toʻlanish holatlaridan yoki dividend toʻlanadigan ulush mazkur boshqa Ahdlashuvchi Davlatda joylashgan doimiy muassasa bilan haqiqatda bogʻliq boʻlgan hollardan tashqari, mazkur boshqa Ahdlashuvchi Davlat kompaniya toʻlayotgan dividendlarni soliqqa tortmasligi, shuningdek, kompaniyaning taqsimlanmagan foydasini, hatto toʻlanayotgan dividendlar va taqsimlanmagan foyda toʻliq yoki qisman mazkur boshqa Davlatda yuzaga kelgan foyda yoki daromaddan tashkil topgan boʻlsa ham soliqqa tortmasligi mumkin.

1. Bir Ahdlashuvchi Davlatda yuzaga keladigan va boshqa Ahdlashuvchi Davlatning rezidentiga toʻlanadigan foizlar mazkur boshqa Davlatda soliqqa tortilishi mumkin.

2. Biroq Ahdlashuvchi Davlat qonunchiligiga muvofiq mazkur Davlatda yuzaga keladigan bunday foizlar mazkur Ahdlashuvchi Davlatda ham soliqqa tortilishi mumkin, ammo basharti foizlarning haqiqiy egasi boshqa Ahdlashuvchi Davlatning rezidenti boʻlsa, soliq ushbu hollarda foizlar yalpi miqdorining 5 foizidan oshmasligi lozim.

3. 2-band qoidalaridan qatʼi nazar, Ahdlashuvchi Davlatda yuzaga keladigan va boshqa Ahdlashuvchi Davlat rezidentiga toʻlanadigan foizlar faqat mazkur boshqa Davlatda soliqqa tortiladi, agarda oluvchi foizlarning haqiqiy egasi boʻlsa va:

a) Davlat yoki Markaziy bank, maʼmuriy-hududiy yoxud siyosiy boʻlinma yoki mahalliy davlat hokimiyati organi yoxud belgilangan organ boʻlsa;

b) foizlar ular yuzaga kelgan Davlat yoki maʼmuriy-hududiy yoxud siyosiy boʻlinma yoki mahalliy davlat hokimiyati organi yoxud belgilangan organ tomonidan toʻlansa;

c) foizlar mazkur Davlat yoki maʼmuriy-hududiy yoki siyosiy boʻlinma yoxud mahalliy hokimiyat organi yoki jamoat moliya agentiga tegishli boʻlgan yoki ular tomonidan berilgan, taʼminlangan, kafolatlangan yoxud sugʻurtalangan qarz, qarz talabnomasi yoki kreditlarga nisbatan toʻlansa.

4. “Foizlar” atamasi ushbu moddada qoʻllanilganda, ipoteka taʼminotining mavjudligidan qatʼi nazar va qarzdor koʻradigan foydada ishtirok etish huquqidan qatʼi nazar, barcha turdagi qarz talablaridan olinadigan daromad, xususan, hukumat qimmatli qogʻozlaridan olinadigan daromad va obligatsiyalar yoki qarz majburiyatlaridan olinadigan daromad, shu jumladan, ushbu qimmatbaho qogʻozlar, obligatsiyalar va qarz majburiyatlari boʻyicha mukofotlar va yutuqlar, shuningdek, Davlat soliq qonunchiligi boʻyicha berilgan pul qarzlaridan olinadigan daromadga qoʻshilgan barcha boshqa daromadni bildiradi.

Oʻz vaqtida amalga oshirilmagan toʻlovlar uchun jarimalar (neustoyka) ushbu modda maqsadlarida foizlar sifatida qaralmaydi.

5. Basharti bir Ahdlashuvchi Davlatning rezidenti boʻlgan foizlarning haqiqiy egasi foizlar yuzaga keladigan boshqa Ahdlashuvchi Davlatda oʻz faoliyatini unda joylashgan doimiy muassasasi orqali amalga oshirsa va foizlar toʻlanadigan qarz talablari haqiqatda mazkur doimiy muassasa bilan bogʻliq boʻlsa, 1 va 2-bandlar qoidalari qoʻllanilmaydi. Bunday hollarda 7-modda qoidalari qoʻllaniladi.

6. Toʻlovchi Ahdlashuvchi Davlatning rezidenti boʻlsa, foizlar ushbu Davlatda yuzaga kelgan deb hisoblanadi. Biroq foizlarni toʻlovchi shaxs Ahdlashuvchi Davlatning rezidenti boʻlishi yoki boʻlmasligidan qatʼi nazar, Ahdlashuvchi Davlatda doimiy muassasaga ega boʻlib, u bilan bogʻliq holda qarzdorlik boʻyicha toʻlanadigan foizlar yuzaga kelsa va bunday foizlarni toʻlash boʻyicha xarajatlar mazkur doimiy muassasa tomonidan qoplanadigan boʻlsa, bu holda foizlar doimiy muassasa joylashgan Ahdlashuvchi Davlatda yuzaga kelgan deb hisoblanadi.

7. Agar toʻlovchi bilan foizlarga haqiqatda huquqi boʻlgan shaxs oʻrtasidagi yoki ular ikkalasi va har qanday boshqa shaxs oʻrtasidagi alohida munosabatlar oqibatida, qarz talabnomasiga tegishli boʻlgan va ularga nisbatan toʻlanadigan foizlar miqdori bunday munosabatlar mavjud boʻlmagan taqdirda toʻlovchi bilan foizlarga haqiqatda huquqi boʻlgan shaxs oʻrtasida kelishilishi mumkin boʻlgan miqdordan ortiq boʻlsa, ushbu modda qoidalari faqat oxirgi qayd etilgan miqdorga nisbatan qoʻllaniladi. Bu holda, toʻlovning ortiqcha qismi ushbu Konvensiyaning boshqa qoidalarini inobatga olgan holda, har bir Ahdlashuvchi Davlat qonunchiligiga muvofiq soliqqa tortiladi.

1. Ahdlashuvchi Davlatlarning birida yuzaga keladigan va boshqa Ahdlashuvchi Davlatning rezidentiga toʻlanadigan royalti mazkur boshqa Davlatda soliqqa tortilishi mumkin.

2. Biroq Ahdlashuvchi Davlat qonunchiligiga muvofiq mazkur Davlatda yuzaga keladigan bunday royalti mazkur Ahdlashuvchi Davlatda ham soliqqa tortilishi mumkin, ammo basharti royaltining haqiqiy egasi boshqa Ahdlashuvchi Davlatning rezidenti boʻlsa, shu tarzda olinadigan soliq royalti yalpi miqdorining 5 foizidan oshmasligi lozim.

3. “Royalti” atamasi mazkur moddada qoʻllanilganda, har qanday mualliflik huquqidan, shu jumladan radio va televideniye uchun kinofilmlar, filmlar va yozuvlar, har qanday patent, tovar belgisi, chizmalar yoki modellar, sxemalar, maxfiy formulalar yoki jarayonlar yoxud har qanday sanoat, tijorat yoki ilmiy jihozlardan foydalanganlik yoki ulardan foydalanish huquqini berganlik uchun yoxud sanoat, tijorat yoki ilmiy tajribaga taalluqli axborot uchun olingan har qanday toʻlov turini anglatadi.

4. Basharti bir Ahdlashuvchi Davlatning rezidenti boʻlgan royaltining haqiqiy egasi royalti yuzaga keladigan boshqa Ahdlashuvchi Davlatda oʻz faoliyatini unda joylashgan doimiy muassasasi orqali amalga oshirsa va royalti toʻlanadigan huquq yoki mulk haqiqatda mazkur doimiy muassasa bilan bogʻliq boʻlsa, 1 va 2-bandlar qoidalari qoʻllanilmaydi. Bunday hollarda 7-modda qoidalari qoʻllaniladi.

5. Toʻlovchi Ahdlashuvchi Davlatning rezidenti boʻlsa, royalti ushbu Davlatda yuzaga kelgan hisoblanadi. Biroq royalti toʻlovchi shaxs Ahdlashuvchi Davlatning rezidenti boʻlishi yoki boʻlmasligidan qatʼi nazar, Ahdlashuvchi Davlatda doimiy muassasaga ega boʻlib, u bilan bogʻliq holda royalti toʻlash majburiyati yuzaga kelsa va bunday royaltini toʻlash boʻyicha xarajatlar mazkur doimiy muassasa tomonidan qoplanadigan boʻlsa, bu holda royalti doimiy muassasa joylashgan Ahdlashuvchi Davlatda yuzaga kelgan deb hisoblanadi.

6. Agar toʻlovchi bilan royaltiga haqiqatda huquqi boʻlgan shaxs oʻrtasidagi yoki ular ikkalasi va har qanday boshqa shaxs oʻrtasidagi alohida munosabatlar oqibatida, foydalanganlik, foydalanish uchun huquq yoki axborotga tegishli boʻlgan va ular uchun toʻlanadigan royalti miqdori bunday munosabatlar mavjud boʻlmagan taqdirda toʻlovchi bilan royaltiga haqiqatda huquqi boʻlgan shaxs oʻrtasida kelishilishi mumkin boʻlgan miqdordan ortiq boʻlsa, ushbu modda qoidalari faqat oxirgi qayd etilgan miqdorga nisbatan qoʻllaniladi. Bu holda, toʻlovning ortiqcha qismi ushbu Konvensiyaning boshqa qoidalarini inobatga olgan holda, har bir Ahdlashuvchi Davlat qonunchiligiga muvofiq soliqqa tortiladi.

1. Bir Ahdlashuvchi Davlat rezidentining boshqa Ahdlashuvchi Davlatda joylashgan va 6-moddada koʻrsatilgan koʻchmas mulkni tasarrufdan chiqarishdan oladigan daromadlari mazkur boshqa Ahdlashuvchi Davlatda soliqqa tortilishi mumkin.

2. Bir Ahdlashuvchi Davlatning boshqa Ahdlashuvchi Davlatdagi doimiy muassasasi ishiga daxldor boʻlgan mulkning bir qismini tashkil qiluvchi koʻchar mulkni tasarrufdan chiqarishdan olinadigan daromadlar, shuningdek ushbu doimiy muassasani (alohida yoki korxona bilan birgalikda) tasarrufdan chiqarishdan olinadigan daromadlar mazkur boshqa Davlatda soliqqa tortilishi mumkin.

3. Bir Ahdlashuvchi Davlatning korxonasi tomonidan xalqaro yuk tashishlarda foydalaniladigan dengiz yoki havo kemalari, avtomobil yoki temir yoʻl transporti vositalarini tasarrufdan chiqarish yoki ularni ishlatishga taalluqli boʻlgan koʻchar mulkdan olingan daromadlari faqat mazkur Davlatda soliqqa tortilishi mumkin.

4. Ahdlashuvchi Davlat rezidenti tomonidan oʻz qiymatining 50 foizdan ortigʻini boshqa Ahdlashuvchi Davlatda joylashgan koʻchmas mulkdan bevosita yoki bilvosita beradigan aksiyalar yoki qiyosiy foiz stavkalarini tasarrufdan chiqarishdan olinadigan daromadlar mazkur Davlatda soliqqa tortilishi mumkin.

5. Ahdlashuvchi Davlatda joylashgan koʻchmas mulk aksiyalarining yoki undan foydalanish huquqlarining egasiga bevosita va bilvosita tegishli boʻlgan, bunday aksiyalar va huquqlarni tasarrufdan chiqarishdan olinadigan daromadlar mazkur Davlatda soliqqa tortilishi mumkin.

6. Mazkur moddaning 1, 2, 3, 4, va 5-bandlarida sanab oʻtilmagan har qanday boshqa mulkni tasarrufdan chiqarishdan olinadigan daromadlar faqat mulkni tasarrufdan chiqarayotgan shaxs rezident hisoblangan Ahdlashuvchi Davlatda soliqqa tortiladi.

1. 15, 17 va 18-moddalar qoidalarini hisobga olgan holda, basharti yollanib ishlash boshqa Ahdlashuvchi Davlatda amalga oshirilmayotgan boʻlsa, bir Ahdlashuvchi Davlat rezidentining yollanib ishlash boʻyicha oladigan maoshi, ish haqi va shu kabi pul mukofotlari faqat shu Davlatda soliqqa tortilishi mumkin. Agar yollanib ishlash bu tarzda amalga oshirilgan boʻlsa, unda shu munosabat bilan olingan pul mukofotlari mazkur boshqa Davlatda soliqqa tortilishi mumkin.

2. 1-bandning qoidalaridan qatʼi nazar, bir Ahdlashuvchi Davlat rezidentining boshqa Ahdlashuvchi Davlatda yollanib ishlaganligi uchun oladigan ish haqi faqat birinchi aytib oʻtilgan Davlatda soliqqa tortiladi, basharti:

a) haq oluvchi koʻrib chiqilayotgan moliyaviy yilda boshlanadigan yoki yakunlanadigan har qanday oʻn ikki oylik davr ichida jami 183 kundan oshmaydigan muddatda yoki muddatlarda boshqa Davlatda boʻlsa;

b) pul mukofoti boshqa Ahdlashuvchi Davlat rezidenti boʻlmagan yollovchi yoki uning nomidan toʻlansa;

c) yollovchining boshqa Davlatdagi doimiy muassasasi haq toʻlash boʻyicha xarajatlarni qoplamasa.

3. Mazkur moddaning yuqoridagi qoidalaridan qatʼi nazar, Ahdlashuvchi Davlat korxonasining xalqaro tashuvlarda foydalanadigan dengiz yoki havo kemasi bortida yoki temir yoʻl va avtomobil transporti vositalarida yollanib ishlash uchun olinadigan pul mukofotlari mazkur Davlatda soliqqa tortilishi mumkin.

Bir Ahdlashuvchi Davlat rezidenti tomonidan boshqa Ahdlashuvchi Davlat rezidenti hisoblangan kompaniyaning Direktorlar kengashi yoki boshqa shunga oʻxshash organi aʼzosi sifatida olinadigan direktorlar gonorari va shunga oʻxshash boshqa toʻlovlar mazkur boshqa Davlatda soliqqa tortilishi mumkin.

1. 7 va 14-moddalarning qoidalaridan qatʼi nazar, bir Ahdlashuvchi Davlat rezidentining teatr, kino, radio yoki televideniye artisti yoxud musiqachi kabi sanʼat xodimi yoki sportchi sifatida boshqa Ahdlashuvchi Davlatdagi shaxsiy faoliyatidan oladigan daromadi mazkur boshqa Davlatda soliqqa tortilishi mumkin.

2. Basharti sanʼat xodimi yoki sportchining shaxsiy faoliyatidan olinadigan daromad, sanʼat xodimi yoki sportchining oʻziga emas, balki boshqa shaxs hisobiga oʻtkazilsa, bu daromad 7 va 14-moddalarning qoidalaridan qatʼi nazar, sanʼat xodimi yoki sportchi faoliyat koʻrsatayotgan Ahdlashuvchi Davlatda soliqqa tortilishi mumkin.

3. 1 va 2-bandlarning qoidalaridan qatʼi nazar, agar sanʼat xodimi yoki sportchining faoliyati toʻliq yoki deyarli toʻliq holda Davlatlardan birining yoki har ikkalasining jamoat fondlari tomonidan moliyalashtirilsa va madaniy hamkorlik toʻgʻrisidagi bitim doirasida amalga oshirilsa, sanʼat xodimi yoki sportchining daromadi u faoliyat yuritadigan Ahdlashuvchi Davlatda soliqqa tortilmaydi.

18-moddaning 2-bandi qoidalariga muvofiq Ahdlashuvchi Davlatning rezidentiga oldin yollanib ishlaganligi uchun kompensatsiya sifatida toʻlanadigan pensiyalar va boshqa shunga oʻxshash pul mukofotlari faqat mazkur Davlatda soliqqa tortilishi mumkin.

1. a) Ahdlashuvchi Davlat, uning siyosiy, maʼmuriy-hududiy boʻlinmasi yoki mahalliy hokimiyat organi tomonidan jismoniy shaxsga mazkur Ahdlashuvchi Davlatga, siyosiy, maʼmuriy-hududiy boʻlinmasiga yoki mahalliy hokimiyat organiga koʻrsatilgan xizmatlar uchun toʻlanadigan oylik ish haqi, maosh va boshqa shu kabi pul mukofotlari faqat ushbu Davlatda soliqqa tortiladi.

b) Agar xizmatlar boshqa Ahdlashuvchi Davlatda amalga oshirilsa va jismoniy shaxs mazkur Davlatning rezidenti hisoblansa, bunday oylik ish haqi, maosh va shunga oʻxshash boshqa pul mukofotlari faqat mazkur Davlatda soliqqa tortiladi, basharti jismoniy shaxs:

(i) mazkur Davlatning milliy shaxsi boʻlsa;

(ii) faqat ushbu xizmatni amalga oshirish maqsadida mazkur Davlatning rezidentiga aylanmagan boʻlsa.

2. a) 1-bandning qoidalaridan qatʼi nazar, Ahdlashuvchi Davlat, uning maʼmuriy-hududiy, siyosiy boʻlinmasi yoki mahalliy hokimiyat organlari tomonidan yoxud ular tuzgan jamgʻarmalardan mazkur Davlatga, uning maʼmuriy-hududiy, siyosiy boʻlinmalariga yoki mahalliy hokimiyat organlariga koʻrsatilgan xizmatlar uchun toʻlanadigan pensiyalar va shunga oʻxshash pul mukofotlari faqat mazkur Davlatda soliqqa tortiladi.

b) Agar jismoniy shaxs boshqa Ahdlashuvchi Davlatning rezidenti va milliy shaxsi boʻlsa, bunday pensiya faqat mazkur boshqa Ahdlashuvchi Davlatda soliqqa tortiladi.

3. 14, 15, 16 va 17-moddalarning qoidalari Ahdlashuvchi Davlat, uning maʼmuriy-hududiy, siyosiy boʻlinmasi yoki mahalliy hokimiyat organi tomonidan amalga oshiriladigan, tijorat faoliyati bilan bogʻliq boʻlgan xizmat koʻrsatishdan olingan oylik ish haqi, maosh, pensiyalar va boshqa shunga oʻxshash pul mukofotlariga nisbatan qoʻllaniladi.

Ahdlashuvchi Davlatlardan birida faqat oʻqish yoki taʼlim olish maqsadida yashab turgan talaba yoki amaliyotchi boshqa Ahdlashuvchi Davlatning rezidenti hisoblansa yoxud birinchi Ahdlashuvchi Davlatga kelguniga qadar mazkur Davlatning rezidenti hisoblangan boʻlsa, ular tomonidan olinayotgan yashash, oʻqish va taʼlim olish uchun moʻljallangan toʻlovlar, basharti mazkur toʻlovlar shu Davlat hududidan tashqaridagi manbalardan yuzaga kelayotgan boʻlsa, ushbu Davlatda soliqqa tortilmaydi.

1. Basharti shaxs boshqa Ahdlashuvchi Davlatga tashrifidan oldin bevosita bir Ahdlashuvchi Davlatning rezidenti hisoblangan boʻlsa hamda har qanday rasmiy universitet, kolledj, maktab va boshqa shu kabi taʼlim muassasasi taklifi asosida ushbu boshqa Ahdlashuvchi Davlatga ikki yildan oshmagan muddatga faqat ushbu taʼlim muassasasida taʼlim berish va/yoki ilmiy tadqiqot oʻtkazish maqsadida kelsa, bunday taʼlim berish va ilmiy tadqiqot oʻtkazishdan olingan barcha pul mukofotlari mazkur boshqa Davlatda soliqdan ozod qilinadi.

2. 1-bandning qoidalari alohida shaxs yoki shaxslarning manfaatlari uchun amalga oshiriladigan ilmiy tadqiqotdan olingan daromadga tatbiq etilmaydi.

1. Ahdlashuvchi Davlat rezidentining mazkur Konvensiyaning avvalgi moddalarida nazarda tutilmagan daromad turlari, ular qayerda yuzaga kelishidan qatʼi nazar, faqat mazkur Davlatda soliqqa tortiladi.

2. Basharti bir Ahdlashuvchi Davlatning rezidenti boʻlgan daromad oluvchi boshqa Ahdlashuvchi Davlatda joylashgan doimiy muassasasi orqali faoliyat olib borsa hamda daromad toʻlanadigan huquq yoki mulk mazkur muassasa bilan haqiqatda bogʻliq boʻlsa, 6-moddaning 2-bandida belgilangan koʻchmas mulkdan olinadigan daromadlardan boshqa daromadlarga nisbatan 1-bandning qoidalari qoʻllanilmaydi. Bunday holda 7-moddaning qoidalari qoʻllaniladi.

1. Bir Ahdlashuvchi Davlat rezidentiga tegishli boʻlgan hamda boshqa Ahdlashuvchi Davlatda joylashgan, 6-moddada nazarda tutilgan koʻchmas mulk koʻrinishidagi kapital mazkur boshqa Ahdlashuvchi Davlatda soliqqa tortilishi mumkin.

2. Bir Ahdlashuvchi Davlatning korxonasi boshqa Ahdlashuvchi davlatda ega boʻlgan, doimiy muassasaning ishga oid mulkining bir qismini tashkil etadigan koʻchar mulk koʻrinishidagi kapital mazkur boshqa Davlatda soliqqa tortilishi mumkin.

3. Bir Ahdlashuvchi Davlatning korxonasiga tegishli boʻlgan va xalqaro tashishlarda foydalaniladigan dengiz va havo kemalari, avtomobil yoki temir yoʻl transporti vositalari hamda ulardan foydalanishda ishlatiladigan koʻchar mulklar koʻrinishidagi kapital faqat mazkur Davlatda soliqqa tortiladi.

4. Kompaniyada yoki har qanday shaxslar uyushmasida qiymatining 50 foizdan ortigʻi Ahdlashuvchi Davlatda joylashgan koʻchmas mulkdan bevosita yoki bilvosita olinadigan, aksiyalar yoxud boshqa huquqlar koʻrinishidagi yoki Ahdlashuvchi Davlatda joylashgan koʻchmas mulkdan foydalanish huquqini beruvchi aksiya yoxud boshqa huquqlar koʻrinishidagi kapital koʻchmas mulk joylashgan Ahdlashuvchi Davlatda soliqqa tortilishi mumkin.

5. Bir Ahdlashuvchi Davlat rezidenti kapitalining boshqa barcha qismlari faqat shu Davlatda soliqqa tortiladi.

1. Oʻzbekistonda ikkiyoqlama soliqqa tortish qoʻyidagi tartibda bartaraf qilinadi:

Oʻzbekiston rezidenti mazkur Konvensiya qoidalariga muvofiq Ispaniyada soliqqa tortilishi mumkin boʻlgan daromad olsa yoki kapital elementlariga ega boʻlsa, Oʻzbekiston quyidagilarga yoʻl qoʻyishi lozim:

a) ushbu rezident daromad soligʻidan Ispaniyada toʻlangan daromad soligʻiga teng boʻlgan summani chegirib tashlash;

b) ushbu rezidentning mulk soligʻidan Ispaniyada toʻlangan mulk soligʻiga teng boʻlgan summani chegirib tashlash.

Bunday chegirmalar har qanday holatda ham daromad yoki kapital soligʻining daromad yoki kapitalning shunday elementlariga taalluqli chegirma taqdim qilingunga qadar hisoblab chiqiladigan, vaziyatga koʻra Ispaniyada soliqqa tortilishi mumkin boʻlgan qismidan ortiq boʻlmasligi lozim.

2. Ispaniya ichki qonunchiligiga muvofiq, Ispaniyada ikkiyoqlama soliqqa tortish uning ichki qonunchiligi qoidalaridan kelib chiqib yoki quyidagi qoidalarga asosan bartaraf qilinadi:

a) Ispaniya rezidenti mazkur Konvensiya qoidalariga muvofiq Oʻzbekistonda soliqqa tortilishi mumkin boʻlgan daromad olsa yoki kapital elementlariga ega boʻlsa, Ispaniya quyidagilarga yoʻl qoʻyishi lozim:

(i) ushbu rezident daromad soligʻidan Oʻzbekistonda toʻlangan daromad soligʻiga teng boʻlgan summani chegirib tashlash;

(ii) ushbu rezident kapital soligʻidan kapitalning shu kabi elementlaridan toʻlangan kapital soligʻiga teng boʻlgan summani chegirib tashlash;

(iii) koʻrsatib oʻtilgan korporativ soliqdan chegirmalar Ispaniyaning ichki qonunchiligiga muvofiq taqdim etilishi lozim.

Bunday chegirmalar har qanday holatda ham daromad yoki kapital soligʻining daromad yoki kapitalning shunday elementlariga taalluqli chegirma taqdim qilingunga qadar hisoblab chiqiladigan, vaziyatga koʻra Oʻzbekistonda soliqqa tortilishi mumkin boʻlgan qismidan ortiq boʻlmasligi lozim.

b) Konvensiyaning biror bir qoidasiga muvofiq Ispaniya rezidentining daromadi yoki kapitali Ispaniyada soliqqa tortishdan ozod etilsa, Ispaniya bu rezident daromadining yoki kapitalining qolgan qismiga nisbatan soliq qiymatini hisoblab chiqishda soliqdan ozod etilgan daromad yoki kapitalni hisobga olishi mumkin.

1. Bir Ahdlashuvchi Davlat milliy shaxslariga boshqa Ahdlashuvchi Davlatda mazkur boshqa Ahdlashuvchi Davlat milliy shaxslariga bir xil vaziyat uchun qoʻllaniladigan yoki qoʻllanilishi mumkin boʻlgan soliqlar yoxud ular bilan bogʻliq boʻlgan, jumladan, yashash joyiga daxldor boʻlgan majburiyatlarga nisbatan oʻzgacha yoki ogʻirroq har qanday soliqlar va ular bilan bogʻliq boʻlgan majburiyatlar qoʻllanilmaydi. Mazkur qoida 1-modda qoidalaridan qatʼi nazar, Ahdlashuvchi Davlatlardan biri yoki har ikkalasining rezidenti boʻlmagan shaxslarga nisbatan ham qoʻllaniladi.

2. Bir Ahdlashuvchi Davlat korxonasi boshqa Ahdlashuvchi Davlatda ega boʻlgan doimiy muassasasini soliqqa tortish ushbu boshqa Davlatda aynan shunday faoliyatni amalga oshiruvchi korxonalarni soliqqa tortishdan koʻra noqulayroq boʻlmaydi. Ushbu qoida bir Ahdlashuvchi Davlatni boshqa Ahdlashuvchi Davlat rezidentlarini soliqqa tortish boʻyicha oʻz rezidentlariga ularning fuqarolik mavqeyi yoki oilaviy sharoitidan kelib chiqqan holda taqdim qiladigan har qanday shaxsiy imtiyozlar, ozod etish yoki chegirmalar berishga majburiyat yuklaydigan tarzda talqin qilinmasligi lozim.

3. 9-moddaning 1-bandi, 11-moddaning 7-bandi yoki 12-moddaning 6-bandi qoidalari qoʻllaniladigan hollarni istisno etganda, bir Ahdlashuvchi Davlat korxonasining boshqa Ahdlashuvchi Davlat rezidentiga toʻlaydigan foizlari, royaltilari va boshqa toʻlovlari shunday korxonaning soliqqa tortiladigan foydasini aniqlash maqsadida birinchi qayd etilgan Davlat rezidentiga toʻlanganida qoʻllaniladigan bir xil shartlar asosida chegirib tashlanadi. Mutanosib ravishda, bir Ahdlashuvchi Davlat korxonasining boshqa Ahdlashuvchi Davlat rezidentidagi har qanday qarzlari shu korxonaning soliqqa tortiladigan kapitalini aniqlash maqsadida birinchi qayd etilgan Davlat rezidentidagi qarzlar singari bir xil shartlar asosida chegirib tashlanishi lozim.

4. Kapitali toʻliq yoki qisman boshqa Ahdlashuvchi Davlatning bir yoki bir necha rezidentlariga tegishli boʻlgan yoxud ular tomonidan bevosita yoki bilvosita nazorat qilinayotgan Ahdlashuvchi Davlat korxonasiga birinchi qayd etilgan Davlatda mazkur Davlat korxonalariga bir xil vaziyat uchun qoʻllaniladigan yoki qoʻllanilishi mumkin boʻlgan soliqlar yoxud ular bilan bogʻliq boʻlgan majburiyatlarga nisbatan oʻzgacha yoki ogʻirroq har qanday soliqlar va ular bilan bogʻliq boʻlgan majburiyatlar qoʻllanilmaydi.

5. Mazkur modda qoidalari 2-modda qoidalaridan qatʼi nazar, har qanday tur va tavsifdagi soliqlarga nisbatan qoʻllaniladi.

1. Agar shaxs, Ahdlashuvchi Davlatlardan birining yoki har ikkalasining harakatlari mazkur Bitim qoidalariga nomuvofiq soliqqa tortishga olib keladi yoki olib kelishi mumkin, deb hisoblasa, u mazkur Davlatlarning qonunchiligida nazarda tutilgan himoya vositalaridan mustaqil ravishda oʻzi rezident hisoblangan Ahdlashuvchi Davlatning vakolatli organiga yoki agarda uning holati 24-moddaning 1-bandiga mos kelsa, oʻzi milliy shaxs hisoblangan Ahdlashuvchi Davlatning vakolatli organiga ariza bilan murojaat qilishi mumkin. Ariza ushbu Konvensiya qoidalariga zid ravishda soliqqa tortilishga olib keladigan xatti-harakat toʻgʻrisidagi birinchi xabarnoma kunidan eʼtiboran uch yil ichida taqdim etilishi lozim.

2. Agar vakolatli organ eʼtirozni asosli deb topsa va uning oʻzi biror maqbul qarorga kela olmasa, Konvensiyaga nomuvofiq boʻlgan soliqqa tortishga yoʻl qoʻymaslik maqsadida masalani boshqa Ahdlashuvchi Davlatning vakolatli organi bilan oʻzaro kelishuv asosida hal qiladi. Erishilgan kelishuvlar Ahdlashuvchi Davlatlarning ichki qonunchiligidagi har qanday vaqtinchalik cheklovlardan qatʼi nazar, amalga oshirilishi lozim.

3. Ahdlashuvchi Davlatlarning vakolatli organlari mazkur Konvensiyani qoʻllash yoki talqin qilishda yuzaga keladigan har qanday kelishmovchilik va anglashilmovchiliklarni oʻzaro kelishuv asosida hal qilishga harakat qiladilar. Shuningdek, ular mazkur Konvensiyada nazarda tutilmagan hollarda ham ikkiyoqlama soliqqa tortishga yoʻl qoʻymaslik maqsadida bir-birlari bilan maslahatlashuvlar oʻtkazishlari mumkin.

4. Ahdlashuvchi Davlatlarning vakolatli organlari oldingi bandlar maʼnolarini tushunishda kelishuvga erishish maqsadida bir- birlari bilan bevosita aloqa qilishlari mumkin. Agar kelishuvga erishish uchun ogʻzaki fikr almashuvi maqsadga muvofiq boʻlsa, bunday aloqalar Ahdlashuvchi Davlatlarning vakillaridan iborat qoʻshma komissiyalar doirasida amalga oshirilish mumkin.

1. Ahdlashuvchi Davlatlarning vakolatli organlari Ahdlashuvchi Davlatlar nomidan undiriladigan har qanday turdagi va tavsifdagi soliqlarga oid boʻlgan, mazkur Konvensiya qoidalarini bajarish yoki boshqarish yoki ichki qonunchilikni qoʻllashda oldindan ahamiyatli boʻlgan va bunday soliqqa tortish mazkur Konvensiyaga zid boʻlmagan maʼlumotlarni almashadilar. Maʼlumot almashinuvi 1 va 2-moddalar qoidalari bilan cheklanmaydi.

2. Ahdlashuvchi Davlatlarning biridan 1-bandga muvofiq olingan har qanday maʼlumot mazkur Davlatning ichki qonunchiligiga muvofiq olingan maʼlumotning oʻzida qanday maxfiylik nazarda tutilgan boʻlsa, xuddi shunday maxfiy hisoblanadi va faqat mazkur Bitim qoʻllaniladigan, 1-bandda koʻrsatib oʻtilgan soliqlarga daxldor boʻlgan baholash yoki yigʻish, majburiy undirish yoxud sud taʼqibi yoki apellatsiyani koʻrib chiqish hamda koʻrsatib oʻtilganlarning barchasini nazorat qilish bilan shugʻullanadigan organ (jumladan, sudlar va maʼmuriy organlar) va shaxslarga oshkor qilinadi. Bunday shaxslar yoki organlar mazkur maʼlumotdan faqat koʻrsatib oʻtilgan maqsadlarda foydalanishlari lozim. Ular bunday maʼlumotni ochiq sud majlisida yoki sud qarorlarida oshkor qilishlari mumkin.

Yuqorida aytib oʻtilganlardan qatʼi nazar, Ahdlashuvchi Davlatlardan olingan maʼlumot soʻrovnoma joʻnatgan Davlat qonunchiligiga muvofiq bunga yoʻl qoʻyilsa, boshqa maqsadlarda ham foydalanilishi mumkin.

3. Har qanday holatda ham 1 va 2-bandlar qoidalari Ahdlashuvchi Davlatga quyidagi majburiyatlar yuklaydigan tarzda talqin qilinmaydi:

a) u yoki bu Ahdlashuvchi Davlatning qonunchiligi yoki maʼmuriy amaliyotiga zid boʻlgan maʼmuriy tadbirlar oʻtkazish;

b) u yoki bu Ahdlashuvchi Davlat qonunchiligiga muvofiq yoki odatdagi boshqaruvi davomida olinishi mumkin boʻlmagan maʼlumotni taqdim etish;

c) savdo, tadbirkorlik, sanoat, tijorat yoki kasb sirini yoxud savdo jarayonini yoxud oshkor etilishi davlat siyosatiga (ordre public) zid boʻlgan maʼlumotni taqdim etish.

4. Agar bir Ahdlashuvchi Davlat tomonidan ushbu moddaga muvofiq maʼlumot soʻralgan boʻlsa, boshqa Ahdlashuvchi Davlat bunday maʼlumot oʻz soliq maqsadlari uchun zarur boʻlmasa ham, soʻralgan maʼlumotni olish uchun axborot toʻplash boʻyicha oʻz tadbirlaridan foydalanishi lozim. Yuqorida nazarda tutilgan majburiyat 3-band qoidalari bilan cheklangan, biroq har qanday holatda ham, bunday cheklovlar ichki manfaatlar mavjud emasligi sababli maʼlumot taqdim etishni rad qilish uchun Ahdlashuvchi Davlatga ijozat beradigan tarzda talqin qilinmasligi lozim.

5. Har qanday holatda ham, 3-band qoidalari maʼlumot bankka, boshqa moliyaviy muassasaga, nominal egalik qiluvchiga yoxud ishonch bildiruvchiga yoki agentga yoxud ishonchnoma asosida faoliyat yurituvchi shaxsga tegishli yoki shaxsning mulkiy huquqlariga taalluqli boʻlganligi sababli uni taqdim etishni rad qilish uchun Ahdlashuvchi Davlatga ijozat beradigan tarzda talqin qilinmaydi.

Ushbu Konvensiya qoidalarining hech biri diplomatik agentlar yoki konsullik xizmatchilariga xalqaro huquqning umumeʼtirof etilgan meʼyorlari yoki maxsus bitimlarning qoidalariga muvofiq berilgan soliq imtiyozlariga daxl qilmaydi.

1. Har bir Ahdlashuvchi Davlat ushbu Konvensiya kuchga kirishi uchun zarur boʻlgan davlat ichki protseduralarini bajarganligi toʻgʻrisida bir-birini diplomatik kanallar orqali xabardor qiladi.

2. Ushbu Konvensiya birinchi bandda koʻrsatilgan soʻngi xabarnoma olingan boshlab uch oylik muddat oʻtgach kuchga kiradi va uning qoidalari quyidagilarga nisbatan amal qiladi:

a) ushbu Konvensiya kuchga kirgan yoki undan keyingi sanadan norezidentlar uchun toʻlanadigan yoki hisoblanadigan mablagʻ manbalaridan undiriladigan soliqlarga nisbatan;

b) har bir soliq yili uchun mazkur Konvensiya kuchga kirgan sanadan yoki undan keyingi sanadan boshlab olinadigan boshqa soliqlarga nisbatan;

c) boshqa barcha holatlarda mazkur Konvensiya kuchga kirgan sanadan yoki undan keyingi sanadan.

Mazkur Konvensiya Ahdlashuvchi Davlatlardan biri tomonidan uning amal qilishi tugatilgunga qadar amal qiladi.

Har bir Ahdlashuvchi Davlat Konvensiya kuchga kiradigan yildan besh yil oʻtib, har qanday taqvim yilining tugashidan kamida olti oy oldin diplomatik kanallar orqali Bitimning amal qilishini tugatish toʻgʻrisida xabarnoma berish yoʻli bilan Konvensiyaning amal qilishini tugatishi mumkin.

Bunday holda Konvensiyaning amal qilishi quyidagilarga nisbatan tugatiladi:

a) norezidentlar uchun toʻlanadigan yoki hisoblanadigan mablagʻ manbalaridan undiriladigan soliqlarga nisbatan ushbu taqvim yil yakunlanganidan soʻng;

b) har bir soliq yili uchun undiriladigan soliqlarga nisbatan mazkur taqvim yil yakunlanganidan boshlab;

c) boshqa holatlarda ushbu taqvim yili yakunlanganidan soʻng.

Tegishli tartibda vakolat berilgan quyida imzo chekuvchilar shunga guvohlik berib, ushbu Konvensiyani imzoladilar.

Madrid shahrida 2013-yil 8-iyulda ikki nusxada, har biri oʻzbek, ispan va ingliz tillarida tuzildi, bunda barcha matnlar bir xil kuchga ega.

Oʻzbekiston Respublikasi bilan Ispaniya Qirolligi oʻrtasida ikkiyoqlama soliqqa tortishga yoʻl qoʻymaslik hamda daromad va kapital soliqlarini toʻlashdan bosh tortishning oldini olish toʻgʻrisidagi Konvensiyani imzolash chogʻida quyida imzo chekuvchilar quyidagi qoidalar Konvensiyaning ajralmas qismi ekanligi toʻgʻrisida ahdlashib oldilar.

1. Imtiyozga ega boʻlish huquqi

a) Konvensiya Ahdlashuvchi Davlatga soliqdan bosh tortishni bartaraf qilish uchun ichki qonunchiligini qoʻllashda zid boʻladigan tarzda talqin qilinmasligi lozim.

b) Ahdlashuvchi Davlatlar ularning qonunchiligini (shu jumladan, soliq bitimlari) suiisteʼmol qilishga nisbatan ichki tartib va qoidalari shu kabi suiisteʼmol qilishlar tartibiga nisbatan qoʻllanishi mumkinligini bayon qiladilar.

c) Konvensiya Ahdlashuvchi Davlatlarga chet el korxonalarini nazorat qilish uchun ichki qoidalarini qoʻllashni taʼqiqlamaydi.

d) Basharti dividend toʻlanadigan aksiyalar yoki boshqa huquqlarni, foiz toʻlanadigan qarz majburiyatlarini, royalti toʻlanadigan huquqlarni yuzaga keltirish yoki taqsimlash bilan bogʻliq boʻlgan har qanday shaxsning asosiy maqsadi yoki asosiy maqsadlaridan biri 10, 11 va 12-moddalardan foyda olish boʻlsa, mazkur moddalarning qoidalari qoʻllanilmaydi.

2. “Kapital” atamasi Oʻzbekiston holatida “mulk” atamasini anglatishi tushuniladi.

3. Qoʻshimchalar. 10 modda

Konvensiyaning 10-moddasi 2-bandining a) kichik bandi qoidalaridan qatʼi nazar, Ispaniya korporativ soliqqa oid qonunchiligi va unga kelgusidagi toʻldirishlariga muvofiq, tashkilot Ispaniya rezidenti hisoblanar ekan, u Oʻzbekiston rezidenti boʻlgan kompaniyadan olgan dividendlariga nisbatan korporativ soliqqa tortilmaydi va ushbu kichik bandda nazarda tutilgan foiz stavkasi nolga qadar kamaytiriladi.

4. Qoʻshimchalar. 11 modda 3 bandi s) kichik bandi Ispaniya “jamoat moliya agenti” quyidagilarni oʻz ichiga oladi deb hisoblaydi:

— ISO: Instituto de Credito Ofisial (Kredit uyushmasi Instituti);

— SESSE Compania Espanola de Seguros de Credito a la Exportacion (Eksport ssudasi boʻyicha Ispaniya Sugʻurta kompaniyasi);

— COFIDES: Compania Espanola de Financiacion del Desarrollo (Rivojlanishni moliyalashtirish boʻyicha Ispaniya kompaniyasi).

Tegishli tartibda vakolat berilgan quyida imzo chekuvchilar shunga guvohlik berib, mazkur Protokolni imzoladilar.

Madrid shahrida 2013-yil 8-iyulda ikki nusxada, har biri oʻzbek, ispan va ingliz tillarida tuzildi, bunda barcha matnlar bir xil kuchga ega.