Oʻzbekiston Respublikasi Vazirlar Mahkamasining 2008-yil 13-oktabrdagi 226-son “Oʻzbekiston iqtidorli yoshlarini taqdirlash va moddiy ragʻbatlantirish toʻgʻrisida”gi qaroriga muvofiq, Oʻzbekiston Respublikasi Madaniyat va sport ishlari vazirligi, Xalq taʼlimi vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi qaror qiladi:

1. Ijodkor yoshlar respublika tanlovlarini oʻtkazish tartibi toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasi Vazirlar Mahkamasining 2008-yil 13-oktabrdagi 226-son “Oʻzbekiston iqtidorli yoshlarini taqdirlash va moddiy ragʻbatlantirish toʻgʻrisida”gi qaroriga muvofiq, ijodkor yoshlar respublika tanlovlarini (bundan buyon matnda tanlov deb yuritiladi) oʻtkazish tartibini belgilaydi.

1. Tanlovlar bolalar musiqa va sanʼat maktablari hamda oʻrta maxsus, kasb-hunar taʼlimi muassasalari (respublika ixtisoslashtirilgan musiqa akademik litseylari) va ixtisoslashtirilgan musiqa-badiiy maktab-internatlari oʻquvchilari oʻrtasida oʻtkaziladi.

2. Quyidagilar tanlovlarning asosiy maqsadlari hisoblanadi:

oʻquvchi yoshlarning isteʼdodi va ijodiy qobiliyatini namoyon qilish;

oʻquvchilarda oʻzlari tanlagan ixtisosliklarni chuqur oʻrganishga qiziqishni oshirish;

oʻquvchilarning kelajakdagi kasblarni toʻgʻri tanlashiga koʻmaklashish;

oʻquv-tarbiya jarayonini, oʻqituvchilarning pedagogik mahoratini takomillashtirish, ular tomonidan qobiliyatli oʻquvchilar bilan aniq maqsadga yoʻnaltirilgan yakka tartibdagi ishlarni oʻtkazish.

3. Tanlovlar bosqichlari va turlarini tashkil etish uchun masʼuliyat taʼlim muassasalarining rahbarlari, tegishli ravishda vazirlik va idoralar hamda ularning hududiy boʻlinmalari zimmasiga yuklanadi.

4. Tanlovlarni oʻtkazish muddatlari va joylari tegishli hokimliklar bilan kelishiladi, ular qatnashchilarni turar joy, oziq-ovqat bilan taʼminlashda va boshqa tashkiliy masalalarni hal etishda yordam koʻrsatadi.

5. Bolalar musiqa va sanʼat maktablari oʻquvchilarining musiqa fanlari boʻyicha tanlovlari har uch yilda bir marta quyidagi bosqichlar boʻyicha oʻtkaziladi:

1-bosqich — tuman, shuningdek hududi tumanlarga boʻlinmagan shahar boʻyicha;

2-bosqich — viloyat boʻyicha, shu jumladan Qoraqalpogʻiston Respublikasida va Toshkent shahrida;

3-bosqich — respublika boʻyicha.

6. Taʼlim muassasasi rahbariyati tanlovning respublika bosqichida ishtirok etishlari uchun nomzodlarning quyidagi hujjatlarini Oʻzbekiston Respublikasi Xalq taʼlimi vazirligiga topshiradi:

nomzodning tugʻilganlik haqidagi guvohnomasi nusxasi;

nomzodga taʼlim muassasasi rahbariyati tomonidan berilgan ijodiy tavsifnoma;

9 x 12 sm hajmdagi 4 ta rangli fotosurat;

nomzodning toʻliq ijro dasturi.

7. Hujjatlar respublika bosqichi boshlanishiga oʻn besh kun qolgunga qadar qabul qilinadi. Mazkur muddatdan kechikib topshirilgan hujjatlar qabul qilinmaydi.

8. Tanlovning birinchi bosqichida oʻz taʼlim muassasalaridagi hisobot konsertlarida eng katta eʼtibor qozongan, ikkinchi bosqichda I, II, III oʻrinlarni egallagan, uchinchi — yakunlovchi bosqichda esa, tanlovga tavsiya etilgan har qaysi ixtisoslik boʻyicha faqat I oʻrinni egallagan oʻquvchilar ishtirok etadi.

9. Tanlovning ijro dasturi respublika ixtisoslashtirilgan musiqa va sanʼat akademik litseylarining tegishli soha mutaxassislari tomonidan ishlab chiqiladi hamda Xalq taʼlimi vazirligi tomonidan tanlov oʻtkazilgunga qadar tasdiqlanadi.

10. Tanlovning ijro dasturiga u tasdiqlangandan soʻng, oʻzgartirishlar kiritishga yoʻl qoʻyilmaydi.

11. Tanlov mezonlarining murakkabligiga qoʻyiladigan talablar respublika ixtisoslashtirilgan musiqa va sanʼat akademik litseylari, madaniyat va sanʼat kollejlariga qabul qilinadigan abituriyentlar bilimlari darajasiga muvofiqlashtiriladi.

12. Ishtirokchilar ijro dasturlarini yoddan ijro etadi. Ishtirokchilarning ijrosi 25 ballik tizim boʻyicha baholanadi.

13. Tanlov quyidagi ixtisosliklar (nominatsiyalar) boʻyicha oʻtkaziladi:

fortepiano (1 ta nominatsiya — fortepiano);

torli cholgʻular (3 ta nominatsiya — skripka, alt, violonchel)

damli va zarbli cholgʻular (9 ta nominatsiya — fleyta, goboy, klarnet, fagot, truba, saksofon, trombon, tuba, zarbli cholgʻular);

xalq cholgʻulari (14 ta nominatsiya — nay-qoʻshnay, chang, rubob-prima, qashqar rubobi, afgʻon rubobi, dutor (prima, alt, tenor), dutor-bas, tanbur, doira, gʻijjak, gʻijjak-alt, qobuz bas, bayan-akkordeon, gitara);

akademik xonandalik (2 ta nominatsiya — erkak ovozi, ayol ovozi);

anʼanaviy xonandalik (2 ta nominatsiya — erkak ovozi, ayol ovozi);

anʼanaviy cholgʻu ijrochiligi (12 ta nominatsiya — nay, chanqovuz, chang, qonun, rubob, soz, ud, tanbur (sato), dutor, doira, gʻijjak, qoʻshnay-surnay);

estrada xonandaligi (2 ta nominatsiya — erkak ovozi, ayol ovozi);

estrada cholgʻu ijrochiligi (10 ta nominatsiya — fortepiano, skripka, fleyta, truba, trombon, saksofon, klarnet, gitara, bas-gitara, urma-zarbli cholgʻular);

musiqa nazariyasi (1 ta nominatsiya — musiqa nazariyasi);

ansambllar (6 ta nominatsiya — xalq cholgʻulari ansambli, anʼanaviy sozandalar ansambli, anʼanaviy ashulachilar ansambli, folklor ansambli, estrada vokal cholgʻu ansambli, raqs guruhi);

xoreografiya sanʼati (3 ta nominatsiya — xalq raqsi, zamonaviy raqs, mumtoz raqs);

teatr (tomosha) sanʼati (3 ta nominatsiya — drama teatri aktyorligi, musiqiy drama teatri aktyorligi, qoʻgʻirchoq teatri aktyorligi);

folklor ijrochiligi (2 ta nominatsiya — erkak ovozi, ayol ovozi);

tasviriy sanʼat (4 ta nominatsiya — rang tasvir, grafika, miniatyura, haykaltaroshlik);

amaliy sanʼat (9 ta nominatsiya — naqqoshlik, yogʻoch oʻymakorligi, ganch oʻymakorligi, kashtachilik, zardoʻzlik, kulolchilik, toʻquvchilik, zargarlik, popopchilik).

14. Oʻrta maxsus, kasb-hunar taʼlimi muassasalari (respublika ixtisoslashtirilgan musiqa akademik litseylari) va ixtisoslashtirilgan musiqa-badiiy maktab-internatlari oʻquvchilarining ijodiy tanlovlari musiqa ijrochilari oʻrtasida har ikki yilda bir marta, uch turda oʻtkaziladi.

15. Taʼlim muassasasi rahbariyati respublika tanlovida ishtirok etishlari uchun nomzodlarning quyidagi hujjatlarini tegishliligi boʻyicha Oʻzbekiston Respublikasi Madaniyat va sport ishlari vazirligi yoki Oʻzbekiston Respublikasi Xalq taʼlimi vazirligiga topshiradi:

nomzodning tugʻilganlik haqidagi guvohnomasi yoki pasporti nusxasi;

nomzodga taʼlim muassasasi rahbariyati tomonidan berilgan ijodiy tavsifnoma;

9 x 12 sm hajmdagi 4 ta rangli fotosurat;

3,5 x 4,5 sm hajmdagi 4 ta rangli fotosurat;

nomzodning toʻliq ijro dasturi.

16. Hujjatlar respublika tanlovi boshlanishiga oʻn besh kun qolgunga qadar qabul qilinadi. Mazkur muddatdan kechikib topshirilgan hujjatlar qabul qilinmaydi.

17. Tanlovga saralab olish va yuborish hisobot konsertlari yakunlari boʻyicha amalga oshiriladi.

18. I, II, III oʻrinlarni egallagan oʻquvchilar faqat soʻnggi tur yakunlari boʻyicha aniqlanadi.

19. Tanlovning ijro dasturi madaniyat, sanʼat, musiqa yoʻnalishidagi oliy taʼlim muassasalarining tegishli soha mutaxassislari tomonidan ishlab chiqiladi va tanlov oʻtkazilgunga qadar Oʻzbekiston Respublikasi Madaniyat va sport ishlari vazirligi hamda Oʻzbekiston Respublikasi Xalq taʼlimi vazirligi tomonidan Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi bilan kelishilgan holda tasdiqlanadi.

20. Tanlovning ijro dasturiga u tasdiqlangandan soʻng oʻzgartirishlar kiritishga yoʻl qoʻyilmaydi.

21. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tanlov topshiriqlarining murakkabligiga qoʻyiladigan talablarning oliy taʼlim muassasalariga qabul qilinadigan abituriyentlar bilimlari darajasiga muvofiq boʻlishini taʼminlaydi.

22. Ishtirokchilar ijro dasturlarini yoddan ijro etadi. Ishtirokchilarning ijrosi 25 ballik tizim boʻyicha baholanadi.

23. Tanlov quyidagi ixtisosliklar (nominatsiyalar) boʻyicha oʻtkaziladi:

xalq cholgʻulari (13 ta nominatsiya — nay, qoʻshnay, chang, rubob-prima, qashqar rubobi, afgʻon rubobi, dutor (prima, alt, sekunda, tenor), dutor-bas, doira (nogʻora, ksilofon), gʻijjak, gʻijjak-alt, gʻijjak-bas (gʻijjak-kontrabas), bayan-akkordeon);

damli va zarbli cholgʻular (9 ta nominatsiya — fleyta, goboy, klarnet, fagot, truba, valtorna, trombon, tuba, zarbli cholgʻular);

akademik xonandalik (2 ta nominatsiya — erkak ovozi, ayol ovozi);

torli cholgʻular (4 ta nominatsiya — skripka, alt, violonchel, kontrabas);

fortepiano (1 ta nominatsiya — fortepiano);

anʼanaviy xonandalik (2 ta nominatsiya — erkak ovozi, ayol ovozi);

anʼanaviy cholgʻu ijrochiligi (9 ta nominatsiya — nay, qoʻshnay-surnay, chang, rubob, ud, tanbur (sato), dutor, doira, gʻijjak);

estrada xonandaligi (2 ta nominatsiya — erkak ovozi, ayol ovozi);

estrada cholgʻu ijrochiligi (8 ta nominatsiya — fortepiano, truba, trombon, saksofon, klarnet, gitara, bas-gitara, urma-zarbli cholgʻular);

xoreografiya sanʼati (2 ta nominatsiya — xalq raqsi, mumtoz raqs);

teatr (tomosha) sanʼati (4 ta nominatsiya — drama teatri aktyorligi, musiqiy drama teatri aktyorligi, qoʻgʻirchoq teatri aktyorligi, ommaviy bayramlar rejissorligi);

folklor ijrochiligi (2 ta nominatsiya — erkak ovozi, ayol ovozi).

24. Tanlov oʻrta maxsus, kasb-hunar taʼlimi muassasalari oʻquvchilari oʻrtasida har ikki yilda bir marta oʻtkaziladi.

25. Taʼlim muassasasi rahbariyati tanlovning respublika bosqichida ishtirok etishi uchun nomzodlarning quyidagi hujjatlarini Oʻzbekiston Badiiy akademiyasiga topshiradi:

nomzodning tugʻilganlik haqidagi guvohnomasi yoki pasporti nusxasi;

nomzodga taʼlim muassasasi rahbariyati tomonidan berilgan ijodiy tavsifnoma;

9 x 12 sm hajmdagi 4 ta rangli fotosurat;

3,5 x 4,5 sm hajmdagi 4 ta rangli fotosurat;

nomzodning 5 tagacha ijodiy ishlari namunalaridan iborat fotoalbom.

26. Hujjatlar respublika bosqichi boshlanishiga besh kun qolgunga qadar qabul qilinadi. Mazkur muddatdan kechikib topshirilgan hujjatlar qabul qilinmaydi.

27. Tanlovga saralab olish va yuborish ijodiy ishlarini baholash yakunlari boʻyicha amalga oshiriladi.

28. I, II, III oʻrinlar tanlov yakunlari boʻyicha aniqlanadi.

29. Tanlovning dasturi Kamoliddin Behzod nomidagi Milliy rassomlik va dizayn institutining mutaxassislari tomonidan ishlab chiqiladi va tanlov oʻtkazilgunga qadar Oʻzbekiston Badiiy akademiyasi tomonidan Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi bilan kelishilgan holda tasdiqlanadi.

30. Tanlov dasturiga u tasdiqlangandan soʻng, oʻzgartirishlar kiritishga yoʻl qoʻyilmaydi.

31. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tanlov topshiriqlarining murakkabligiga qoʻyiladigan talablarning oliy taʼlim muassasalariga qabul qilinadigan abituriyentlar bilimlari darajasiga muvofiq boʻlishini taʼminlaydi.

Ishtirokchilarning ijodiy va “Chizmatasvir” fanidan bajargan ishlari tanlovga qoʻyiladi. Ishtirokchilarning ishlari 100 ballik tizim boʻyicha baholanadi.

32. Tanlov quyidagi ixtisosliklar (nominatsiyalar) boʻyicha oʻtkaziladi:

tasviriy sanʼat (13 ta nominatsiya — dastgohli grafika, dastgohli rangtasvir, kino rassomi, kitob grafikasi, mayda plastika, mahobatli rangtasvir, miniatyura sanʼati, tasviriy sanʼat asarlarini taʼmirlash, tasviriy sanʼat va muhandislik grafikasi, teatr bezagi rangtasviri, televideniye rassomi, filmning tasviriy yechimi, haykaltaroshlik);

amaliy sanʼat (12 ta nominatsiya — amaliy sanʼat asarlarini taʼmirlash, badiiy gilam va gobelenlarni loyihalash, badiiy kashtachilik, badiiy kulolchilik, zardoʻzlik, lakli miniatyura, mahobatli bezak sanʼati, meʼmoriy yodgorliklar bezagini taʼmirlash, milliy badiiy toʻqimachilik, naqqoshlik, xattotlik sanʼati, shisha buyumlar usta rassomi);

dizayn (24 ta nominatsiya — amaliy grafika, arxitektura, badiiy liboslarni loyihalash, gazlamalarning badiiy yechimi, yengil sanoat buyumlari konstruksiyasini ishlash, yengil sanoat buyumlari texnologiyasi, zamonaviy liboslar yechimi, keng assortimentdagi kiyimlar modelyer konstruktori, kiyimlar modelyer dizayneri, milliy etnografiya va badiiy liboslar dizayneri, tarixiy liboslar yechimi, tarixiy-teatr liboslari sanʼati, badiiy foto, bino va inshootlar qurilishi, interyerni loyihalash, kompyuter grafikasi, landshaft dizayni, loyihalovchi dizayner, mebellarni loyihalash, meʼmoriy bezak sanʼati, meʼmoriy inshootlar yechimi, reklama, sanoat dizayni, sanoat mahsulotlarini loyihalash va bezatish).

33. Tanlovlarni oʻtkazish boʻyicha butun tadbirlar kompleksini bajarish uchun tegishli vazirlik va idoralar hamda ularning hududiy boʻlinmalari oʻz buyruqlari bilan tashkiliy qoʻmitalar, hakamlar hayʼatlari, apellatsiya komissiyalari va boshqa tuzilmalarni tashkil etadi.

34. Tashkiliy qoʻmitalar tanlovlarga tayyorgarlik koʻrish hamda ularni oʻtkazishda yagona ilmiy-uslubiy yondashuvni taʼminlaydi, hakamlar hayʼatlari, apellatsiya komissiyalari va boshqa tuzilmalar tarkibini shakllantiradi va tasdiqlaydi, sinov topshiriqlarini tayyorlashni tashkil etadi, baholash mezonlarini va yakunlar chiqarish tartibini tasdiqlaydi, qatnashchilarning tanlovlarga kelishi bilan bogʻliq barcha masalalarni hal qiladi.

Bunda apellatsiya komissiyalari hakamlar hayʼatlari tarkibida boʻlmagan kamida uchta yetakchi mutaxassisdan tuziladi.

Hakamlar hayʼatlari gʻoliblarni aniqlaydi va tanlovlar yakunlarini protokol qarori bilan rasmiylashtiradi.

35. Apellatsiya komissiyalari tanlovlar qatnashchilarining shikoyatlari va arizalarini koʻrib chiqadi. Apellatsiya komissiyalariga, zarurat boʻlganda, hakamlar hayʼatlari qarorlarini bekor qilish yoki ularga oʻzgartirishlar kiritish huquqi beriladi.

36. Tanlovlarni oʻtkazish jarayonlari boʻyicha kelib chiqadigan nizolar qonun hujjatlarida belgilangan tartibda hal etiladi.

37. Mazkur Nizom Oʻzbekiston Badiiy akademiyasi bilan kelishilgan.