O‘zbekiston Respublikasi Prezidentining “Keksalarni e’zozlash yili” Davlat dasturi to‘g‘risida” 2015-yil 18-fevraldagi PQ–2302-son qarorini bajarish yuzasidan hamda keksalarning hayot sifatini yanada yaxshilash, ularga ijtimoiy xizmat ko‘rsatishning yangi shakllari va usullarini tashkil etish maqsadida Vazirlar Mahkamasi qaror qiladi:

1. Keksalarni sog‘lomlashtirish va ularning bo‘sh vaqtlarini mazmunli tashkil etish bo‘yicha nodavlat pansionati to‘g‘risidagi nizom ilovaga muvofiq tasdiqlansin.

2. Belgilab qo‘yilsinki, keksalarni sog‘lomlashtirish va ularning bo‘sh vaqtlarini mazmunli tashkil etish bo‘yicha nodavlat pansionatlari o‘z faoliyatini belgilangan tartibda O‘zbekiston Respublikasi Sog‘liqni saqlash vazirligi tomonidan beriladigan litsenziyaga muvofiq amalga oshiradigan tibbiy-ijtimoiy tashkilotlar hisoblanadi.

3. O‘zbekiston Respublikasi Sog‘liqni saqlash vazirligi:

keksalarni sog‘lomlashtirish va ularning bo‘sh vaqtlarini mazmunli tashkil etish bo‘yicha nodavlat pansionatlari tomonidan ko‘rsatiladigan xizmatlarning namunaviy ro‘yxatini o‘n kun muddatda tasdiqlasin;

tadbirkorlik subyektlari o‘rtasida katta avlod kishilariga xizmat ko‘rsatishning yangi shakllari va usullarini joriy etishda ularning rolini kuchaytirish bo‘yicha keng tushuntirish ishlarini tashkil etsin;

tibbiy faoliyatni amalga oshirishda keksalarni sog‘lomlashtirish va ularning bo‘sh vaqtlarini mazmunli tashkil etish bo‘yicha nodavlat pansionatlari tomonidan litsenziya talablari va shartlariga rioya etilishi yuzasidan nazoratni ta’minlasin, o‘zlariga yuklangan funksiyalarni amalga oshirishda ularga har tomonlama ko‘maklashish chora-tadbirlarini ko‘rsin.

4. O‘zbekiston Respublikasining Xususiylashtirish, monopoliyadan chiqarish va raqobatni rivojlantirish davlat qo‘mitasi Mehnat va aholini ijtimoiy muhofaza qilish vazirligi bilan birgalikda keksalarni sog‘lomlashtirish va ularning bo‘sh vaqtlarini mazmunli tashkil etish bo‘yicha xizmatlar ko‘rsatadigan nodavlat pansionatlarini tashkil qilish maqsadida tadbirkorlik subyektlariga “nol” sotib olish qiymati bo‘yicha berish uchun bo‘sh turgan nodavlat ko‘chmas mulk obyektlari ro‘yxatini O‘zbekiston Respublikasi Vazirlar Mahkamasiga kiritsin.

5. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari keksalarni sog‘lomlashtirish va ularning bo‘sh vaqtlarini mazmunli tashkil etish bo‘yicha tijorat asosida qulayligi oshirilgan nodavlat pansionatlarini tashkil qilishda tadbirkorlik subyektlariga ko‘maklashsinlar.

6. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov va O‘zbekiston Respublikasi Bosh vazirining o‘rinbosari A.I. Ikramov zimmasiga yuklansin.

1. Ushbu Nizom O‘zbekiston Respublikasi Prezidentining “Keksalarni e’zozlash yili” Davlat dasturi to‘g‘risida” 2015-yil 18-fevraldagi PQ–2302-son qaroriga muvofiq hamda keksalarni sog‘lomlashtirish, ularning dam olishlarini va bo‘sh vaqtlarini mazmunli tashkil etish uchun shart-sharoitlar yaratish yo‘li bilan keksalarning hayot sifati yanada yaxshilanishini ta’minlash maqsadida ishlab chiqilgan.

2. Keksalarni sog‘lomlashtirish va ularning bo‘sh vaqtlarini mazmunli tashkil etish bo‘yicha nodavlat pansionati (keyingi o‘rinlarda pansionat deb ataladi) umumiy ravishda belgilangan pensiya yoshiga yetgan shaxslarni sog‘lomlashtirish, tibbiy parvarish va reabilitatsiya qilish, shuningdek ularning pansionatda qulay sharoitda bo‘lishi va dam olishi bo‘yicha xizmatlar ko‘rsatishga mo‘ljallangan nodavlat tibbiy-ijtimoiy tashkilot hisoblanadi.

Pansionatda ko‘rsatiladigan xizmatlar ro‘yxati keksalarni sog‘lomlashtirish va ularning bo‘sh vaqtlarini mazmunli tashkil etish bo‘yicha nodavlat pansionati tomonidan ko‘rsatiladigan, O‘zbekiston Respublikasi Sog‘liqni saqlash vazirligi tomonidan tasdiqlangan xizmatlarning namunaviy ro‘yxatiga muvofiq belgilanadi.

3. Pansionat O‘zbekiston Respublikasi qonunchiligiga muvofiq tijorat tashkiloti sifatida tashkil etiladi va faoliyat ko‘rsatadi, o‘zining ustaviga, mustaqil balansiga, O‘zbekiston Respublikasi tijorat banklarida hisob raqamiga, o‘z nomi ko‘rsatilgan muhrga, shtampga, blankalarga ega bo‘ladi.

4. Pansionat o‘z faoliyatida O‘zbekiston Respublikasi Konstitutsiyasiga va qonunlariga, O‘zbekiston Respublikasi Oliy Majlisi palatalari qarorlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlariga, boshqa qonunchilik hujjatlariga, ushbu Nizomga hamda o‘z ustaviga amal qiladi.

5. Pansionat ta’sischining qaroriga ko‘ra tashkil etiladi va qonunchilikda belgilangan tartibda davlat ro‘yxatidan o‘tkaziladi.

6. Pansionat ta’sis hujjatlariga muvofiq o‘z faoliyatini amalga oshiradi va xizmatlar ko‘rsatadi. Pansionat faoliyati belgilangan tartibda O‘zbekiston Respublikasi Sog‘liqni saqlash vazirligi tomonidan majburiy litsenziyalanadi.

7. Jismoniy va yuridik shaxslar, shu jumladan nodavlat notijorat tashkilotlari pansionatning ta’sis etuvchilari bo‘lishi mumkin.

8. Pansionatning tashkiliy tuzilmasi ta’sischi tomonidan mustaqil ravishda tasdiqlanadi.

9. Pansionat buxgalteriya va statistik hisob va hisobotlarni yuritadi, ko‘rsatiladigan xizmatlarga O‘zbekiston Respublikasi qonunchiligida nazarda tutilgan tartibda tariflarni belgilaydi.

10. Quyidagilar Pansionat faoliyatining asosiy yo‘nalishlari hisoblanadi:

keksalar uchun pansionatda bo‘lishning qulay maishiy sharoitlarini yaratish;

keksalarning sifatli tibbiy-ijtimoiy yordam olishiga ko‘maklashadigan sharoitlar yaratish;

keksalarning yosh xususiyatlarini hisobga olgan holda madaniy-ommaviy hamda jismoniy tarbiya tadbirlari, ekskursiyalar tashkil etish, ijodkorlikni namoyon qilish uchun sharoitlar yaratish yo‘li bilan ularning dam olishini va bo‘sh vaqtlarini mazmunli tashkil etish;

pansionatda bo‘luvchilarning yosh xususiyatlarini va ehtiyojlarini hisobga olgan holda sifatli ovqatlanishini tashkil etish;

zarurat bo‘lganda dastlabki tibbiy yordam ko‘rsatish va hamroh bilan birga yaqin atrofdagi tibbiyot muassasasiga yuborishni tashkil etish;

fizioterapiya, reabilitatsiya, psixologiya va sog‘liqni tiklash tadbirlarini qo‘llagan holda keksalarni jismoniy quvvatni tiklashga va psixologik holatni yaxshilashga yo‘naltirilgan holda sog‘lomlashtirish.

11. Pansionatni tashkil etishda majburiy tartibda quyidagilar mavjud bo‘lishi zarur:

bir yoki ikki nafar kishiga mo‘ljallangan, zarur shart-sharoitlarga, mebellarga, sanitariya tarmoqlariga, pansionat xodimini shoshilinch chaqirish tizimiga va shu kabilarga ega bo‘lgan yotoqxonalar;

isitish, issiq va sovuq suv, kanalizatsiya, yoritish hamda shamollatishni ta’minlaydigan muhandislik kommunikatsiyalari;

keksalar va nogironlarning xavfsiz harakatlanishi uchun binoning tegishli qismlarida tutqichlar, panduslar, ikki va undan ko‘p qavatli binolarda lift, boshqa yordamchi vositalar (yurish uchun moslama va aravachalar);

dam olish xonalari (kutubxona, hordiq chiqarish xonasi, sport zali, kichik kinozal, artterapiya o‘tkazish uchun ijodiy xonalar, psixolog xonasi);

sanitariya normalariga muvofiq jihozlangan oshxona;

keksalarning hayoti, sog‘lig‘i va ularning buyumlari saqlanishi xavfsizligini ta’minlash chora-tadbirlari;

obodonlashtirilgan atrof-muhit.

12. Keksalarni pansionatga qabul qilish pansionat ma’muriyati va umumiy ravishda belgilangan pensiya yoshiga yetgan keksa shaxs o‘rtasida tuzilgan pansionatda xizmatlar ko‘rsatish yuzasidan shartnoma asosida amalga oshiriladi.

Shartnomada quyidagilar majburiy tartibda ko‘rsatiladi:

pansionatda bo‘lish davri;

pansionatda ko‘rsatiladigan xizmatlari qiymati;

pansionatda ko‘rsatiladigan asosiy xizmatlar, shuningdek u erdagi joylashish va ovqatlanish shart-sharoitlari;

shartnoma tomonlarining kelishuvi bo‘yicha boshqa shart-sharoitlar.

Zarurat bo‘lganda, shartnomada keksa shaxsni pansionatga va yashash joyiga transportda yetkazish shartlari ko‘rsatilgan bo‘lishi mumkin.

13. Pansionatga kelayotgan keksalar shartnomada ko‘rsatilgan muddatlarda qabul qilinadi va undan chiqariladi.

14. Keksa shaxs pansionatga joylashish uchun quyidagilarni taqdim etadi:

pasporti yoki uning o‘rnini bosadigan hujjat;

yashash joyidagi tibbiyot muassasasi tomonidan berilgan sog‘lig‘ining holati to‘g‘risidagi tibbiy ma’lumotnoma;

pansionatda bo‘lish haqi to‘langanligi to‘g‘risidagi kvitansiya yoki tasdiqlangan to‘lov topshiriqnomasi — agar to‘lov yuridik shaxs tomonidan amalga oshirilgan bo‘lsa.

15. Quyidagilar pansionatga qabul qilmaslik uchun sabablar hisoblanadi:

sil kasalligi va kasallikning faol bosqichi;

teri va sochlarning yuqumli kasalliklari;

o‘tkir yuqumli kasalliklar;

xavfli va xavfsiz o‘sma kasalliklar va xavfli o‘sma jarayonining takrorlanishi;

ruhiy kasalliklar.

16. Pansionatga qabul qilingan kunda tibbiy ko‘rik o‘tkaziladi, uning natijasi bo‘yicha, shuningdek tibbiy ma’lumotnomada ko‘rsatilgan tekshiruvlar bo‘yicha asosiy sog‘lomlashtirish tadbirlari, shuningdek ovqatlanish ratsioni (parhez taomlar stoli) belgilanadi.

17. Pansionatda har bir keksa shaxsga tibbiy xodim biriktiriladi, u davolovchi shifokor ko‘rsatmalariga muvofiq tibbiy xizmat ko‘rsatilishini ta’minlaydi.

18. Pansionatga kelgan keksalar quyidagilar bilan ta’minlanadi:

zarur mebellar bilan jihozlangan, uzoq muddat dam olish uchun qulay sharoitlar yaratilgan bir yoki ikki o‘rinli xonalarga joylashtirish;

sifatli tibbiy-ijtimoiy xizmatlar ko‘rsatish;

gerontologik xususiyatlarni va mavjud kasalliklarni inobatga olib to‘rt yoki besh martalik ovqatlanish;

sog‘lomlashtirish tadbirlari, shuningdek reabilitatsiyaning zarur texnik vositalari;

madaniy-ommaviy tadbirlar o‘tkazish.

19. Pansionat quyidagi huquqlarga ega:

pansionatga kelganlarning yashashi va ularga xizmat ko‘rsatish haqlarini mustaqil ravishda belgilash;

jismoniy va yuridik shaxslar bilan xizmat ko‘rsatish shartnomalari tuzish, qonunchilikka muvofiq moliya-xo‘jalik faoliyatini amalga oshirish;

keksalardan belgilangan tartibga va yashash qoidalariga rioya etishlarini talab qilish.

Pansionat tadbirkorlik faoliyati subyekti uchun qonunchilikda belgilangan boshqa huquqlarga ham ega bo‘ladi.

20. Pansionat quyidagilarga majbur:

sifatli sog‘lomlashtirish, tibbiy-ijtimoiy xizmatlar ko‘rsatish, pansionatda qulay dam olish uchun zarur shart-sharoitlar yaratish;

keksalarning so‘rovlariga hurmat va e’tibor bilan yondashish;

zarurat bo‘lganda (tibbiy ko‘rsatmalarga ko‘ra) keksa kishini tibbiy- statsionar muassasaga olib borishni ta’minlash;

xodimlarga nisbatan mehnat qonunchiligiga amal qilish.

21. Keksalar quyidagi huquqlarga ega:

pansionat ma’muriyati va xodimlari tomonidan o‘zlariga nisbatan hurmat va e’tibor bilan munosabatda bo‘lishni talab qilish;

shartnomada ko‘rsatilgan xizmatlarni, shu jumladan sog‘lomlashtirishni sifatli va to‘liq hajmda olish, qulay joylashish, ovqatlanish, madaniy-ko‘ngilochar va boshqa tadbirlarda qatnashish;

bo‘sh o‘rinlar mavjud bo‘lganda, to‘lov sharti bilan pansionatda dam olish muddatini uzaytirish.

22. Keksalar quyidagilarga majbur:

pansionatning ichki tartib-qoidalariga, u erda bo‘lishning belgilangan rejimiga rioya etish;

tibbiy xodimlarning ko‘rsatmalariga amal qilish;

agar shartnomadagi muddat belgilangan tartibda uzaytirilmagan bo‘lsa — shartnomaning amal qilish muddati tugagan kunda pansionatdan jo‘nab ketish.

23. Pansionatda sifatli va to‘laqonli xizmatlar ko‘rsatilishi yuzasidan mas’uliyat uning ma’muriyatiga va boshqa mansabdor shaxslariga yuklanadi.

24. Pansionat faoliyatini nazorat qilish qonunchilikda belgilangan tartibda amalga oshiriladi.