“Oʻzbekiston Respublikasi fuqaroligi toʻgʻrisida”gi Oʻzbekiston Respublikasi Qonuniga, Oʻzbekiston Respublikasi Prezidentining “Oʻzbekiston Respublikasida pasport tizimini takomillashtirish toʻgʻrisida” 1999-yil 26-fevraldagi PF-2240-son Farmoniga muvofiq, shuningdek qonun hujjatlarida belgilangan pasport tizimi, roʻyxatdan oʻtkazish rejimi va respublika hududida yashash qoidalarini mustahkamlash maqsadida Vazirlar Mahkamasi qaror qiladi:

1. Belgilansinki, Oʻzbekiston Respublikasi fuqaroligidan chiqqan yoki uni yoʻqotgan holda doimiy yashash uchun respublika tashqarisiga chiqib ketgan shaxslar tomonidan doimiy yashash uchun respublikaga qaytish xohishi bildirilgan taqdirda, ular qonun hujjatlarida belgilangan tartibda Oʻzbekiston Respublikasi fuqaroligini olish tartibotidan oʻtishlari shart.

2. Belgilab qoʻyilsinki:

Oʻzbekiston Respublikasi fuqarolari — pasport, tugʻilganlik toʻgʻrisidagi guvohnoma, harbiy xizmatchilar — shaxsiy guvohnoma asosida;

respublika hududida doimiy yashovchi xorijiy fuqarolar, shu jumladan MDH qatnashchilari boʻlgan davlatlar fuqarolari va fuqaroligi boʻlmagan shaxslar — qonun hujjatlarida belgilangan tartibda berilgan yashash uchun ruxsatnoma asosida Oʻzbekiston Respublikasi hududida yashash uchun doimiy roʻyxatdan oʻtish huquqiga egadirlar.

Doimiy roʻyxatdan oʻtkazilganlik toʻgʻrisidagi belgi faqat Oʻzbekiston Respublikasi fuqarolari pasportiga yoki xorijiy fuqarolarga, shu jumladan MDH qatnashchilari boʻlgan davlatlar fuqarolariga, fuqaroligi boʻlmagan shaxslarga respublika ichki ishlar organlari tomonidan berilgan pasportning oʻrnini bosuvchi hujjatlarga qoʻyiladi.

3. Oʻzbekiston Respublikasi Ichki ishlar vazirligi va uning joylardagi organlariga, Qoraqalpogʻiston Respublikasi Vazirlar Kengashi, viloyatlar, shaharlar va tumanlar hokimliklariga pasport tizimi, roʻyxatdan oʻtkazish tartibi va Oʻzbekiston Respublikasi hududida yashashning belgilangan qoidalariga qatʼiy rioya qilinishi uchun masʼuliyat yuklansin.

4. Oʻzbekiston Respublikasi Adliya vazirligi Ichki ishlar vazirligi, boshqa manfaatdor vazirliklar, idoralar va joylardagi hokimiyat organlari bilan birgalikda amaldagi qonun hujjatlariga mazkur qarordan kelib chiquvchi oʻzgartirish va qoʻshimchalar kiritish toʻgʻrisida bir oy muddatda Vazirlar Mahkamasiga takliflar taqdim etsin, bunda Oʻzbekiston Respublikasida doimiy yashash xohishini bildirgan xorijiy fuqarolarni, shu jumladan MDH qatnashchilari boʻlgan davlatlar fuqarolarini, fuqaroligi boʻlmagan shaxslarni doimiy roʻyxatdan oʻtkazish tartibini takomillashtirish masalalariga alohida eʼtibor bersin.

5. Mazkur qarorning bajarilishini nazorat qilish Oʻzbekiston Respublikasi Prokuraturasiga, Qoraqalpogʻiston Respublikasi Vazirlar Kengashi Raisi, viloyatlar, shaharlar va tumanlar hokimlari zimmasiga yuklansin.