Oʻzbekiston Respublikasi Hukumati va Turkiya Jumhuriyati Hukumati,

har ikki mamlakat oʻrtasida mavjud doʻstona munosabatlarni eʼtiborga olib,

Terrorizmni tugatish toʻgʻrisida 1977-yil Yevropa Konvensiyasiga, shuningdek terroristik xatti-harakatlarni tergov qilish va jazolashga oid xalqaro hamkorlik toʻgʻrisida 1982-yil 15-yanvarda Yevropa Kengashining Vazirlar qoʻmitasi tomonidan qabul qilingan va Yevropa Kengashining aʼzo davlatlarga yoʻllagan tavsiyanomalarga murojaat etib,

shuningdek, narkotik vositalari va psixotrop moddalarning gʻayriqonuniy muomalasiga qarshi kurash haqida 1988-yil BMT Konvensiyasi, narkotik vositalari haqida 1961-yil Yagona Konvensiyasi va psixotrop moddalari toʻgʻrisida 1971-yil Konvensiyasini inobatga olib,

terrorizmga qarshi kurash toʻgʻrisida Yevropada xavfsizlik va xamkorlik Kengashining Vena Yakunlovchi hujjatlaridagi qoidalardan kelib chiqib,

demokratiya qadriyatlari va inson huquqlarini rad etadigan terrorizmning davom etayotganligi haqida oʻzlarining chuqur tashvishlarini izhor etib,

terrorizm bilan qurol-yarogʻ va narkotiklarni gʻayriqonuniy tarqatish oʻrtasida yaqin aloqalarning mavjudligini eʼtiborga olib,

narkotik vositalari va psixotrop moddalarini gʻayriqonuniy tarqatishga, shuningdek terrorizmga qarshi kurashda har ikki Tomon oʻrtasida mavjud hamkorlikni yanada rivojlantirish hamda huquqni muhofaza etuvchi organlari oʻrtasida hamkorlikni, aloqa vositalarini mustahkamlash istagida,

bunday hamkorlikning har ikki Tomon uchun jamoat xavfsizligi sohasida oʻzaro foydali ekanligini anglagan holda,

quyidagilar haqida kelishib oldilar:

1) Ahdlashuvchi Tomonlar oʻz hududlarida terroristik aktlarni hamda xavfsizlikka, boshqa Tomon fuqarolariga qarshi qaratilgan faoliyatlarni rejalashtirish, uyushtirish, amalga oshirishning oldini olish maqsadida samarali chora-tadbirlar koʻradilar. Ahdlashuchi Tomonlar narkotik vositalari va psixotrop moddalarini, shuningdek ularning tarqatilishiga qarshi Konvensiya ilovasining 1 va 2-jadvallarida sanab oʻtilganlarni noqonuniy tayyorlashda ishlatiladigan moddalarni gʻayriqonuniy tarqatish harakatlarini oldini olish, tergov qilish va taʼqib etishda kelgusida birga hamkorlik qilishni va bir-biriga koʻmaklashishni oʻz zimmalariga oladilar.

2) Ahdlashuvchi Tomonlar ushbu Bitimni qoʻllashda masʼul boʻladigan vakolatli idoralar haqida diplomatik vositalar orqali bir-birlarini habardor qiladilar.

Mazkur idoralar tomonidan tayinlanadigan mutaxassislardan tashkil boʻladigan oʻzbek-turk qoʻmitasi bir yil davomida kamida bir marta yoki zarurat tugʻilganda, Tomonlardan birining iltimosiga binoan har qanday vaqtda navbati bilan Toshkentda yoki Anqarada uchrashib turadilar.

Qoʻshma qoʻmita terrorizmga qarshi kurashda oʻz faoliyatini quyidagi sohalarda muvofiqlashtirish uchun masʼuldir:

a) turli xil terroristik tashkilotlarning faoliyatlari va uslublari haqida maʼlumotlar bilan almashish hamda terroristik tahdidlar, ayniqsa ikki davlat manfaatlariga xavf soluvchi tahdidlarga nisbatan boʻlgan maʼlumotlarni doimiy ravishda yangilab turish;

b) terroristlar tomonidan qoʻllaniladigan yangi terroristik uslublarga qarshi jamoat transport vositalari, tayyoragohlarni qoʻriqlash uchun koʻrilgan xavfsizlik choralarini uygʻunlashtirish va kuchaytirish maqsadida maʼlumotlar va tajriba almashish.

Jinoyatchilikka qarshi kurashda hamkorlik, ayniqsa Ahdlashuvchi Tomonlarning manfaatlariga bevosita taʼsir koʻrsatadigan maʼlumotlarni yangilash va ular bilan almashishga qaratiladi.

a) Hamkorlik asosan quyidagi sohalardagi kurashni qamrab oladi:

qurol-yarogʻ va narkotiklar (shu jumladan, ularning tarkibiy qismlari), portlovchi moddalar, naqliyot vositalari hamda sanʼat asarlarini gʻayriqonuniy tarqatish;

qurolli bosqinchilik;

banknotlar, hujjatlar va qimmatli qogʻozlarni qalbakilashtirish;

b) narkotiklar (jumladan, narkotik vositalari, psixotrop moddalari hamda ularni tayyorlashda ishlatiladigan moddalar)ni gʻayriqonuniy tarqatishga qarshi kurashda maʼlumotlar bilan almashish va hamkorlik qilish, shuningdek har ikki davlatda narkotiklar bilan bogʻliq suiisteʼmollar va ularga qarshi kurash uslublarini ham qamrab oladi.

Hamkorlik soʻnggi milliy qonunlar haqida maʼlumotlar ayirboshlashni, xalqaro konferensiyalar yoki uchrashuvlarni, shuningdek Bitimda qayd etilgan sohalarda ikki mamlakatning vakolatli idoralari oʻrtasida tezkor harakatlarning rivojlanishini ham qamrab oladi.

1. Ushbu Bitimda qayd etilgan sohalardagi hamkorlik har ikki davlatning oʻz qonunlari, shuningdek jinoiy ishlar boʻyicha oʻzaro yordam koʻrsatish va jinoiy taʼqibda boʻlgan shaxslarni topshirish toʻgʻrisida Yevropa Konvensiyasiga muvofiq amalga oshiriladi. Bunday xamkorlik Interpol qoidalari va amaliyotiga binoan tatbiq ztiladi.

2. Narkotik vositalarini tarqatishga qarshi kurash sohasida hamkorlik, shuningdek narkotik vositalari haqida 1961-yil Yagona Konvensiyasi, psixotrop moddalari haqida 1971-yil Konvensiyasi hamda narkotik vositalari va psixotrop moddalarini gʻayriqonuniy tarqatishga qarshi 1988-yil BMT Konvensiyasi qoidalariga ham muvofiq, har ikki Tomon ularni tasdiqlaganda, amalga oshiriladi.

Bitim qamrab oladigan sohalardagi hamkorlik doirasida ikki davlatning vakolatli idoralari oʻrtasida mutaxassislar bilan almashilishi mumkin. Ahdlashuvchi Tomonlardan har biri boshqa Tomon hududidagi oʻz diplomatik yoki konsullik vakolatxonalari qoshida aloqa ofitserlarini tayinlashi mumkin.

1. Narkotik vositalari va psixotrop moddalarni gʻayriqonuniy tarqatishga qarshi kurash sohasidagi hamkorlikni yaxshilash maqsadida, zarur hollarda, Ahdlashuvchi Tomonlar maslahatlashuvlar uchun oʻzaro vakolatli idoralarining mansabdor shaxslarini taklif etishlari mumkin.

2. Zarur hollarda Ahdlashuchi Tomonlar boshqa Tomon idoralari vakillarini gʻayriqonuniy tarqatish boʻyicha alohida ishlarning tergov qilinishida koʻmaklashish uchun taklif etadilar.

1. Ahdlashuvchi Tomonlarning vakolatli idoralari soʻrov boʻyicha yoki usiz narkotik vositalari va psixotrop moddalarini gʻayriqonuniy tarqatish hollari toʻgʻrisida hamda shu kabi jinoyatga bevosita yoki bilvosita aloqadorlarning shaxsini, narkotiklarning tarqatilish uslublarini aniqlash va ularni ushlash toʻgʻrisida darhol batafsil maʼlumotlar bilan almashadilar.

2. Bitimda nazarda tutilgan maʼlumotlar bilan almashish unga ilova etilgan hujjat namunasi asosida ingliz tilida amalga oshiriladi. Hujjat namunasi toʻliq va atroflicha maʼlumotlarni oʻz ichiga olishi lozim.

3. Tergov harakatlari hujjatlarining nusxalari ingliz tilida boʻlishi lozim. Zarur hollarda esa turk va oʻzbek tilidagi matnlar ham qabul qilinishi mumkin.

4. Ushbu Bitim maqsadlariga binoan almashiladigan ogʻzaki yoki yozma maʼlumot va hujjatlar ularni taqdim etayotgan Ahdlashuvchi Tomonning talabiga binoan mahfiy saqlanishi lozim.

5. Ushbu Bitim qoidalariga koʻra almashiladigan maʼlumot va hujjatlarni oluvchi Tomon boshqa Tomonning vakolatli organi roziligi bilangina va ushbu Bitimga muvofiq ulardan ilmiy yoki boshqa maqsadlarda foydalanishi mumkin.

6. Zarur hollarda yordam toʻgʻrisida iltimosnoma yozma tarzda taqdim etilmasa, u keyinchalik yozma ravishda tasdiqlanishi lozim.

Ahdlashuvchi Tomonlar terrorizmga hamda narkotik vositalari va psixotrop moddalarini gʻayriqonuniy tarqatishga qarshi kurashda samarali hamkorlikni taʼminlash uchun oʻzlarining vakolatli organlari oʻrtasida telefon, teleks va bogʻlanishning boshqa vositalari boʻyicha toʻgʻridan toʻgʻrialoqa oʻrnatadilar.

Ahdlashuvchi Tomonlar oʻz hududlarida qoʻlga kiritilgan narkotik vositalari va psixotrop moddalarining namunalarini ularning manbai, shuningdek kimyoviy tarkibi hamda fizik xossalarini aniqlashi mumkin boʻlgan oʻzlarining xalqaro meʼyorlarga ega milliy va vakolatli laboratoriyalari ixtiyoriga taqdim etadilar. Shu tartibda olingan maʼlumot va xulosalar soʻrovga muvofiq oʻzaro almashiladi.

Ushbu Bitimning tatbiq etilishiga oid tartib-qoidalar har ikki Tomonning vakolatli doiralari tomonidan birgalikda ishlab chiqiladi.

Bitim 1993-yil 5-aprelda Toshkent shahrida oʻzbek va turk tillarida, ikki nusxada tayyorlandi.

Ushbu Bitim bir yil davomida amalda boʻladi va Ahdlashuvchi Tomonlardan biri Bitimning amalda boʻlish muddati tugashidan uch oy ilgari uni toʻxtatish niyati haqida yozma ravishda boshqa Tomonni xabardor qilmagunga qadar uning amal qilishi xuddi shunday muddatga oʻz-oʻzidan uzayaveradi.

Ushbu Bitim Ratifikatsiya yorliqlari bilan almashilgan paytdan boshlab oʻttiz kun oʻtgach kuchga kiradi.