Oʻzbekiston Respublikasi Prezidentining 2014-yil 17-noyabrdagi “Oʻzbekiston Respublikasining 2015-yil uchun investitsiya dasturi toʻgʻrisida” PQ-2264-son qarori ijrosini taʼminlash hamda Toshkent viloyatining sanoat salohiyatini yanada oshirish, boʻsh turgan va foydalanilmayotgan davlat mulki obyektlaridan samarali foydalanish, tibbiyotda ishlatishga moʻljallangan mahsulotlarni ishlab chiqarishni yoʻlga qoʻyish hamda yangi ish oʻrinlarini yaratish maqsadida Vazirlar Mahkamasi qaror qiladi:

1. Toshkent viloyati hokimligi, “Oʻzfarmsanoat” DAK va “FAZO-LUXE” masʼuliyati cheklangan jamiyatining Toshkent viloyati, Zangiota tumani, Guliston qishloq fuqarolar yigʻini, Ohangrabo koʻchasi, 21-uy manzilida joylashgan “Yuqumli kasalliklar shifoxonasi” bino va inshootlarini (keyingi oʻrinlarda obyekt deb ataladi) “FAZO-LUXE” masʼuliyati cheklangan jamiyatiga investitsiyaviy va ijtimoiy majburiyatlar qabul qilinishi sharti bilan “nol” xarid qiymati boʻyicha sotish toʻgʻrisidagi taklifiga rozilik berilsin.

2. Belgilab qoʻyilsinki “FAZO-LUXE” masʼuliyati cheklangan jamiyati quyidagi investitsiya va ijtimoiy majburiyatlarni qabul qiladi:

obyektga texnologik asbob-uskunalar va xom ashyo sotib olish hamda qurilish-montaj ishlarini amalga oshirish shaklida 1,5 yil muddatda kamida 1,6 mln AQSH dollari miqdorida investitsiya kiritish;

yiliga kamida 18,0 mln dona tibbiyot mahsulotlari jumladan, tibbiyot paxtasi, doka, bint va boshqa mahsulotlarni ishlab chiqarishni yoʻlga qoʻyish;

kamida 110 ta yangi ish oʻrinlari tashkil etish.

3. Oʻzbekiston Respublikasi xususiylashtirish, monopoliyadan chiqarish va raqobatni rivojlantirish Davlat qoʻmitasi:

Toshkent viloyati hokimligi va “Oʻzfarmsanoat” DAK bilan birgalikda oʻn kun muddatda obyektni “FAZO-LUXE” masʼuliyati cheklangan jamiyatiga mazkur qarorning 2-bandida belgilangan shartlarda oldi-sotdi shartnomasi tuzilishini hamda qabul qilingan investitsiya va ijtimoiy majburiyatlari bajarilishi yuzasidan monitoring yuritilishini;

oldi-sotdi shartnomasi tuzilganidan soʻng belgilangan tartibda “FAZO-LUXE” masʼuliyati cheklangan jamiyatiga obyektga nisbatan mulkiy huquqni tasdiqlovchi davlat orderi (tasarruf etish huquqisiz) berilishi, yaratiladigan yangi ish oʻrinlari investitsiyaviy majburiyatlar bajarilgan deb eʼtirof etilgan paytdan bir yil davomida saqlanishi taʼminlangandan soʻng, belgilangan tartibda obyektni tasarruf etish huquqi berilishini taʼminlasin.

4. Toshkent viloyati hokimligi “Yergeodezkadastr” Davlat qoʻmitasi bilan birgalikda obyektga kadastr hujjatlari rasmiylashtirilishini belgilangan tartibda amalga oshirsin.

5. Vazirlar Mahkamasining “Davlat mulki obyektlaridan kelgusida samarali foydalanish va ularni tasarruf etish boʻyicha qoʻshimcha chora-tadbirlar toʻgʻrisida” 2012-yil 31-maydagi 154-son qarori 2-ilovasining 332-qatori oʻz kuchini yoʻqotgan deb hisoblansin.

6. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.