Oʻtkazilgan tekshirishlar natijasida dori-darmon vositalari va tibbiyot buyumlarini xarid qilish va sotishda koʻplab qonunni buzish, davolash muassasalarida keyinchalik qayta sotish maqsadida kamomadga yoʻl qoʻyish va oʻgʻirlash, dorixona muassasalarida dori-darmonlarga narxlarni asossiz ravishda oshirish hollari, shuningdek isteʼmolchilarning huquqlarini himoya qilish toʻgʻrisidagi qonun hujjatlari buzilishining koʻplab turlari aniqlandi.

Salbiy koʻrinishlarga barham berish, respublika aholisini ijtimoiy himoya qilishni taʼminlash va dori-darmon vositalari va tibbiyot buyumlarini sotishni tartibga solish maqsadida Vazirlar Mahkamasi qaror qiladi:

1. 1999-yil 1-fevraldan boshlab sogʻliqni saqlash davolash muassasalarida va chakana dorixona tarmogʻida dori-darmon vositalari va tibbiyot buyumlariga (Oʻzbekiston Respublikasi Markaziy banki litsenziyalariga ega boʻlgan korxonalar tomonidan import boʻyicha olib kelinadigan dori-darmon vositalari va tibbiyot buyumlaridan tashqari) narx belgilashning yagona tartibi joriy qilinsin.

Bunda dori-darmon vositalari va tibbiyot buyumlari (Oʻzbekiston Respublikasi Markaziy banki litsenziyalariga ega boʻlgan korxonalar tomonidan import boʻyicha olib kelinadigan dori-darmon vositalari va tibbiyot buyumlaridan tashqari), yetkazib berishda qatnashuvchi vositachilar sonidan qatʼi nazar, ulgurji savdo uchun 20 foizdan ortiq boʻlmagan, chakana savdo uchun 25 foizdan ortiq boʻlmagan miqdorlardagi cheklangan savdo ustamalari qoʻllanilgan holda shartnomaviy narxlar boʻyicha ulgurji va chakana savdo tarmogʻi orqali sotilishi belgilansin.

2. Oʻzbekiston Respublikasi Moliya vazirligi Sogʻliqni saqlash vazirligi bilan birgalikda ikki hafta muddatda:

amaldagi qonun hujjatlariga muvofiq aholiga bepul tibbiy yordam koʻrsatayotgan turgʻun davolash muassasalari uchun dori-darmon vositalari va tibbiyot buyumlari xarid qilish toʻgʻrisidagi nizomni;

aholiga bepul tibbiy yordam koʻrsatayotgan turgʻun davolash muassasalariga dori-darmon vositalari va tibbiyot buyumlari xarid qilish bilan bogʻliq xarajatlarni budjetdan qoplash tartibini;

dori-darmon vositalari va tibbiyot buyumlari sotishda ulgurji va chakana tashkilotlar tomonidan savdo ustamalarining qoʻllanilishi tartibini;

turgʻun davolash muassasalarida budjet mablagʻlari hisobiga sotib olinadigan dori-darmon vositalari va tibbiyot buyumlarini berish, hisobga olish va ulardan foydalanish ustidan nazorat qilish tartibini ishlab chiqsin va tasdiqlasin. Bunda kasalxonalarda davolanayotgan shaxslar maxsus daftarlarga ular uchun amalda sarflangan dori-darmon preparatlari uchun imzo chekishi tartibi joriy etilsin;

dori-darmon vositalari va tibbiyot buyumlari xarid qilish yuzasidan tenderlar oʻtkazish tartibini ishlab chiqsin va tasdiqlasin.

3. Oʻzbekiston Respublikasi Sogʻliqni saqlash vazirligi huzurida Nazorat inspeksiyasi tashkil etilayotganligi maʼlumot uchun qabul qilinsin. Unga dori-darmon vositalari va tibbiyot buyumlari xarid qilinishi, sotilishi va davolash muassasalarini ular bilan taʼminlash, shuningdek, ularni sotishda cheklangan savdo ustamalari qoʻllanilishi ustidan nazorat qilish vazifalari yuklangan.

4. Belgilab qoʻyilsinki:

Oʻzbekiston Respublikasi Sogʻliqni saqlash vazirligi tomonidan tasdiqlanadigan roʻyxat boʻyicha shoshilinch tibbiy yordam koʻrsatish uchun dori-darmon vositalarini xarid qilish, shuningdek, davlat ehtiyojlari uchun dori-darmon vositalarini import qilish ochiq tender savdolarida amalga oshiriladi;

narkoz uchun vaksinalar, zardoblar, preparatlar hamda narkotik moddalarni xarid qilish yopiq tender savdolarida amalga oshiriladi;

dori-darmon vositalari va tibbiyot buyumlarini respublika ishlab chiqaruvchilaridan xarid qilish, qoidaga koʻra, davolash muassasalari tomonidan toʻgʻridan toʻgʻrishartnomalar boʻyicha amalga oshiriladi.

5. Pul-kredit siyosati boʻyicha respublika komissiyasi Oʻzbekiston Respublikasi Tashqi iqtisodiy aloqalar vazirligi, Makroiqtisodiyot va statistika vazirligi, Moliya vazirligi bilan birgalikda Respublika valyuta birjasida va birjadan tashqari valyuta bozorida sotib olinadigan markazlashtirilgan valyuta resurslari hisobiga import boʻyicha tayyor dori-darmon vositalari, shuningdek, faqat Oʻzbekiston Respublikasi Sogʻliqni saqlash vazirligi tomonidan belgilangan asosiy dori-darmonlar roʻyxatiga kiruvchi dori-darmonlarni ishlab chiqarish uchun xomashyo va materiallar xarid qilish tartibini belgilasin.

6. Oʻzbekiston Respublikasi Vazirlar Mahkamasining 1997-yil 2-dekabrdagi 532-son qarori bilan nazarda tutilgan bemorlar toifalariga imtiyozli retseptlar boʻyicha dori-darmon vositalari va tibbiyot buyumlarini berishning amaldagi tartibi saqlab qolinsin.

Oʻzbekiston Respublikasi Sogʻliqni saqlash vazirligi Moliya vazirligi bilan kelishilgan holda ikki hafta muddatda kasalliklarning turlariga koʻra imtiyozli retseptlar boʻyicha sotiladigan dori-darmon vositalari va tibbiyot buyumlarini berish roʻyxati va normativlarni belgilasin.

7. Oʻzbekiston Respublikasi Adliya vazirligi dori-darmon vositalari va tibbiyot buyumlarini sotish sohasida qonunni buzganlik uchun maʼmuriy va jinoiy javobgarlik choralarini kuchaytirish haqidagi taklifni bir oy muddatda belgilangan tartibda kiritsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari H.S.Karomatov va B.S.Hamidov zimmasiga yuklansin.