O‘zbekiston Respublikasi Hukumati va Koreya Respublikasi Hukumati (keyingi o‘rinlarda “Tomonlar” deb ataluvchilar),

ikki mamlakat o‘rtasida turizm sohasidagi hamkorlikni rivojlantirish va mustahkamlashni istab,

ikki mamlakatning iqtisodiy, ijtimoiy va madaniy rivojlanishida turizmning muhim ahamiyatga ega ekanligini e’tiborga olib,

turizm sohasidagi hamkorlikni rivojlantirishning ikki mamlakat xalqlari o‘rtasida do‘stona munosabatlarni mustahkamlashdagi ahamiyatini hisobga olgan holda,

quyidagilar to‘g‘risida kelishib oldilar:

1. Tomonlar turizm orqali tenglik va o‘zaro manfaat asosida ikki mamlakatning iqtisodiyoti, madaniyati, tabiatining diqqatga sazovor joylari, tarixiy yodgorliklari va milliy an’analari borasida o‘z xalqlari o‘rtasidagi hamjihatlikni qo‘llab-quvvatlash uchun turizm sohasidagi hamkorlikning rivojlanishiga yordam ko‘rsatadilar.

2. Tomonlar sayyohlar almashinuvini oshirish maqsadida o‘z mamlakatlarining turizm sohasidagi muassasa va tashkilotlari, shu jumladan turizm sohasidagi davlat organlari, sayyohlik agentliklari va turizm bilan bog‘liq boshqa tashkilotlar o‘rtasida hamkorlik va do‘stona munosabatlarni ham qo‘llab-quvvatlaydilar.

3. Mazkur Bitim doirasidagi barcha tadbirlar Tomonlarning milliy qonunchiligiga va ikki davlat ishtirokchilari bo‘lgan xalqaro shartnomalarga muvofiq amalga oshiriladi.

Tomonlar turizm sohasiga investitsiyalar kiritish, mehmonxonalar va boshqa sayyohlik infratuzilmasi obyektlarini yaratish, mehmonxona boshqaruvi va tibbiy turizm, kulinar turizm, madaniy turizm, tabiat turizmi, barqaror turizm kabi va Tomonlar o‘rtasida kelishilgan turizmga taalluqli har qanday boshqa sohalarda ikki tomonlama hamkorlikni kengaytirishni qo‘llab-quvvatlaydilar.

Tomonlar turizm bilan bog‘liq tajriba, statistika, materiallar va tadqiqotlar to‘g‘risida ma’lumotlar bilan almashishga yordam ko‘rsatadilar.

Har bir Tomon boshqa Tomon vakillarining o‘z hududida o‘tkaziladigan xalqaro turistik ko‘rgazmalar, seminarlar va konferensiyalarda ishtirok etishiga, shuningdek xalqaro turistik tashkilotlar tomonidan o‘tkaziladigan tadbirlarda birgalikda ishtirok etishiga yordam ko‘rsatadi va ularni rag‘batlantiradi.

Tomonlar xalqaro turizm sohasida ikki tomonlama hamkorlikni, shu jumladan turizm bo‘yicha xalqaro tashkilotlarda ishtirok etish va hamkorlik qilishni rivojlantiradilar.

Tomonlar turizmning turli sohalarida mutaxassislar tayyorlashda ma’lumot va tajriba almashishni qo‘llab-quvvatlaydilar, shuningdek turizm yo‘nalishidagi talabalar va ekspertlar almashinuviga va turizm sohasidagi kadrlarning qobiliyati va malakasini oshirishga qaratilgan seminarlarni tashkil etishga yordam ko‘rsatadilar.

Tomonlar boshqa mamlakatlardan sayyohlarni jalb qilish uchun ikki davlatning turizm sohasidagi vakolatli organlari o‘rtasida hamkorlikni qo‘llab-quvvatlaydilar.

1. Mazkur Bitimni amalga oshirishni yengillashtirish hamda Tomonlar, ikki mamlakatning turizm sohasidagi vakolatli organlari va boshqa tegishli tashkilotlari o‘rtasida fikr almashish maqsadida Tomonlar vakolatli organlar va tegishli davlat tashkilotlarining teng sondagi vakillaridan iborat Qo‘shma qo‘mita (keyingi o‘rinlarda “Qo‘mita”) tuzishlari mumkin.

2. Qo‘mita Tomonlar o‘rtasida o‘zaro kelishilgan muddatlarda vaqti-vaqti bilan majlislar o‘tkazadi.

3. Qo‘mita Tomonlarning tegishli milliy qonunchiligiga muvofiq o‘zining ish tartibini belgilaydi.

4. Tomonlar Qo‘mita majlislarida ishtirok etish uchun turizm sohasidagi davlat organlari va xususiy tashkilotlar vakillarini taklif etish yuzasidan o‘zaro kelishib olishlari mumkin.

Har bir Tomon boshqa Tomondan maxfiy sifatida olingan ma’lumotlarning xavfsizligini ta’minlaydi va bunday ma’lumotlarni ushbu boshqa Tomonning yozma roziligisiz uchinchi tomonga taqdim etmaydi.

Tomonlar mazkur Bitimni amalga oshirish uchun quyidagi organlarni mas’ul etib belgilaydilar:

O‘zbek tomonidan — O‘zbekiston Respublikasi Tashqi iqtisodiy aloqalar, investitsiyalar va savdo vazirligi;

Koreys tomonidan — Koreya Respublikasi Madaniyat, sport va turizm vazirligi.

Mazkur Bitimni talqin qilish yoki amalga oshirishda yuzaga keladigan har qanday nizolar maslahatlashuvlar va muzokaralar vositasida hal etiladi.

Mazkur Bitimga Tomonlarning o‘zaro kelishuvi asosida o‘zgartish va qo‘shimchalar kiritilishi mumkin. Har qanday shunday tuzatishlar mazkur Bitimning 14-moddasida nazarda tutilgan tartibda kuchga kirib, mazkur Bitimning ajralmas qismi hisoblanuvchi protokollar bilan rasmiylashtiriladi.

Mazkur Bitim ikki mamlakatning ular ishtirokchisi bo‘lgan xalqaro shartnomalardan kelib chiquvchi huquq va majburiyatlariga daxl qilmaydi.

1. Tomonlar mazkur Bitimning kuchga kirishi uchun zarur bo‘lgan davlat ichki protseduralarining bajarilgani to‘g‘risida bir-birlarini yozma shaklda diplomatik kanallar orqali xabardor qiladilar. Mazkur Bitim oxirgi xabarnoma sanasidan boshlab kuchga kiradi va Tomonlardan biri o‘zining mazkur Bitimning amal qilishini to‘xtatish maqsadi to‘g‘risida boshqa Tomonni yozma shaklda xabardor qilguniga qadar o‘z kuchida qoladi. Mazkur Bitimning amal qilishi shunday xabarnoma sanasidan boshlab to‘qson (90) kundan keyin tugatiladi.

2. Mazkur Bitim kuchga kirgan sanadan boshlab 1995-yil 16-fevralda imzolangan O‘zbekiston Respublikasi Hukumati va Koreya Respublikasi Hukumati o‘rtasida sayyohlik sohasida hamkorlik qilish to‘g‘risida O‘zaro tushunish Memorandumining amal qilishi tugatiladi.

3. Agar Tomonlar o‘rtasida boshqacha tarzda kelishilgan bo‘lmasa, mazkur Bitim amal qilishining tugatilishi amaldagi qo‘shma tadbirlarning haqiqiyligi yoki davom etishiga ta’sir ko‘rsatmaydi.

Barchasini tasdiqlagan holda, quyida imzo chekuvchilar o‘zlarining tegishli hukumatlari tomonidan belgilangan tartibda berilgan vakolatlari doirasida mazkur Bitimni imzoladilar.

Seul shahrida 2012-yil 20-sentabrda har biri o‘zbek, koreys va ingliz tillarida bo‘lgan ikki nusxada tuzildi, bunda barcha matnlar bir xil kuchga ega.

Mazkur Bitim qoidalarini talqin qilishda ixtiloflar yuzaga kelganda ingliz tilidagi matn ustuvor hisoblanadi.