Oʻzbekiston Respublikasi Prezidentining 2015-yil 19-fevraldagi PF-4704-sonli “Oʻzbekiston Respublikasi fuqarolari — 1941 — 1945-yillardagi urush va mehnat fronti faxriylarini “Ikkinchi jahon urushidagi Gʻalabaning 70 yilligi” esdalik yubiley medali bilan mukofotlash toʻgʻrisida”gi va 2015-yil 6-martdagi “1941 — 1945-yillardagi urush qatnashchilarini ragʻbatlantirish toʻgʻrisida”gi PF-4708-son farmonlarini, shuningdek, Oʻzbekiston Respublikasi Prezidentining 2015-yil 26-martdagi R-4437-son “Xotira va qadrlash kuni umumxalq bayramiga tayyorgarlik koʻrish va uni oʻtkazish toʻgʻrisida”gi farmoyishini ijro etish maqsadida Vazirlar Mahkamasi qaror qiladi:

1. Quyidagilar:

“Ikkinchi jahon urushidagi Gʻalabaning 70 yilligi” esdalik yubiley medalini topshirish tartibi toʻgʻrisidagi Nizom 1-ilovaga muvofiq;

1941 — 1945-yillardagi urush qatnashchilari va nogironlariga bir martalik pul mukofotini toʻlash tartibi toʻgʻrisidagi Nizom 2-ilovaga muvofiq tasdiqlansin.

2. 6,1 ming dona “Ikkinchi jahon urushidagi Gʻalabaning 70 yilligi” esdalik yubiley medallarini hamda ularning guvohnomalarini tayyorlash buyurtmachisi etib Oʻzbekiston Respublikasi Mudofaa vazirligi belgilansin.

3. Oʻzbekiston Respublikasi Iqtisodiyot vazirligi, Moliya vazirligi va Markaziy bankining “Ikkinchi jahon urushidagi Gʻalabaning 70 yilligi” esdalik yubiley medallarini va ularning guvohnomalarini “Davlat belgisi” davlat ishlab chiqarish birlashmasi, “Fonon” davlat ilmiy-ishlab chiqarish korxonasi va “Sovplastital” AJ bazasida tayyorlash haqidagi taklifiga rozilik berilsin.

4. Oʻzbekiston Respublikasi Mudofaa vazirligi va Moliya vazirligiga Mudofaa vazirligining xarajatlar smetasiga 2015-yil uchun tasdiqlangan davlat budjetidan ajratilgan mablagʻlar doirasida medallar va ularning butlovchi qismlarini ishlab chiqaruvchilarga mablagʻ ajratish boʻyicha tegishli oʻzgarishlar kiritish vazifasi yuklatilsin.

5. “Davlat belgisi” davlat ishlab chiqarish birlashmasi, “Fonon” davlat ilmiy-ishlab chiqarish korxonasi va “Sovplastital” AJ 2015-yil 10-aprelgacha “Ikkinchi jahon urushidagi Gʻalabaning 70 yilligi” esdalik yubiley medallarini va ularning guvohnomalarini tayyorlash ishlarini taʼminlasin.

6. Oʻzbekiston Respublikasi Mudofaa vazirligi, Ichki ishlar vazirligi, Milliy xavfsizlik xizmati, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklariga 2015-yil 15-apreldan 25-aprelgacha quyidagi tadbirlarni amalga oshirish vazifasi yuklansin:

“Ikkinchi jahon urushidagi Gʻalabaning 70 yilligi” esdalik yubiley medallarini Oʻzbekiston Respublikasi Prezidentining nomidan tantanali ravishda topshirish;

Markaziy bank, Moliya vazirligi huzuridagi budjetdan tashqari Pensiya jamgʻarmasi va “Oʻzbekiston pochtasi” AJ bilan birgalikda 1941 — 1945-yillar urushi qatnashchilari va nogironlariga bir martalik pul mukofotlarini toʻlash.

7. Ushbu qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R. S. Azimov zimmasiga yuklansin.

1. Mazkur Nizom Oʻzbekiston Respublikasi Prezidentining 2015-yil 19-fevraldagi PF-4704-son “Oʻzbekiston Respublikasi fuqarolari 1941 — 1945-yillardagi urush va mehnat fronti faxriylarini “Ikkinchi jahon urushidagi Gʻalabaning 70 yilligi” esdalik yubiley medali bilan mukofotlash toʻgʻrisida”gi Farmoniga (keyingi oʼrinlarda — Farmon) asosan “Ikkinchi jahon urushidagi Gʻalabaning 70 yilligi” esdalik yubiley medalini (keyingi oʻrinlarda — yubiley medali) topshirish tartibini belgilaydi.

2. Yubiley medali bilan Oʻzbekiston Respublikasi fuqarolari — “1941 — 1945-yillardagi Ulugʻ Vatan urushida Germaniya ustidan qozonilgan gʻalaba uchun” va “Yaponiya ustidan qozonilgan gʻalaba uchun” medallari bilan, urush yillarida jangovar xizmatlari uchun olingan boshqa orden va medallar bilan mukofotlangan yoki urush qatnashchisi guvohnomasiga yoxud Vatan urushi nogironi guvohnomalariga ega boʻlgan Ikkinchi jahon urushi qatnashchilari va nogironlari, shuningdek, Ikkinchi jahon urushi yillarida fidokorona mehnati uchun mukofotlangan, shu jumladan, “1941 — 1945-yillar Ulugʻ Vatan urushidagi shavkatli mehnati uchun”, “Mehnatdagi jasorati uchun”, “Mehnatda oʻrnak koʻrsatganligi uchun” medallariga yoki 1941 — 1945-yillardagi urush davrida qurolli kuchlarda fuqaro shaxslarni erkin yollash boʻyicha shtat lavozimida boʻlganlik toʻgʻrisidagi guvohnomaga ega boʻlgan mehnat fronti qatnashchilari mukofotlanish huquqiga ega hisoblanadi.

3. Mudofaa vazirligi, Ichki ishlar vazirligi, Oʻzbekiston Respublikasi Milliy xavfsizlik xizmati Mehnat va aholini ijtimoiy himoya qilish vazirligi, Moliya vazirligi huzuridagi budjetdan tashqari Pensiya jamgʻarmasi bilan birgalikda yubiley medali bilan taqdirlanishi lozim boʻlgan urush qatnashchilari va nogironlarining, 1941 — 1945-yillardagi mehnat fronti qatnashchilarining aniq roʻyxatini aniqlab, Oʻzbekiston Respublikasi Vazirlar Mahkamasiga kiritadi.

4. Yubiley medali bilan taqdirlanishi lozim boʻlgan shaxslarning Oʻzbekiston Respublikasi Vazirlar Mahkamasiga taqdim etilgan roʻyxatlari asosida yubiley medali bilan taqdirlanishi lozim boʻlgan shaxslarning yakuniy roʻyxati shakllantiriladi.

5. Yubiley medali bilan taqdirlangan shaxslar roʻyxatiga quyidagilar kiritilmaydi:

Farmon qabul qilinishidan oldin vafot etganlar;

Chet el fuqarolari va fuqaroligi boʻlmagan shaxslar.

Agar yubiley medali bilan taqdirlanishga haqli shaxs Farmon qabul qilingan kuni vafot etgan boʻlsa, medal oila aʼzolariga topshiriladi.

6. “Davlat Belgisi” davlat ishlab chiqarish birlashmasi, “Fonon” ilmiy ishlab chiqarish korxonasi va “Sovplastital” AJ tayyorlangan yubiley medallari va ularning guvohnomalarini belgilangan tartibda Mudofaa vazirligiga topshiradi.

7. Oʻzbekiston Respublikasi Vazirlar Mahkamasining kadrlar boʻlimi:

belgilangan tartibda taqdim etilgan roʻyxatlar boʻyicha yubiley medallari uchun guvohnomalarni toʻldirish uchun Mudofaa vazirligi, Ichki ishlar vazirligi, Milliy xavfsizlik xizmati, Moliya vazirligi huzuridagi budjetdan tashqari Pensiya jamgʻarmasi vakillari orasidan ishchi guruh tuzadi.

mukofotlanishi lozim boʻlgan shaxslarga topshirish uchun Oʻzbekiston Respublikasi Mudofaa vazirligi, Ichki ishlar vazirligi, Milliy xavfsizlik xizmati, Qoraqalpogʻiston Respublikasi Joʻqorgʻi Kengesi, viloyatlar, shaharlar va tumanlar hokimliklariga yubiley medallarini topshiradi.

8. Oʻzbekiston Respublikasi Prezidenti nomidan yubiley medalini topshirish marosimi Oʻzbekiston Respublikasi Mudofaa vaziri, Ichki ishlar vaziri, Milliy xavfsizlik xizmati raisi, Qoraqalpogʻiston Respublikasi Joʻqorgʻi Kengesi raisi, viloyat, shahar va tuman hokimlari, hududlardagi mudofaa boʻlimlari vakillari ishtirokida tantanali ravishda oʻtkaziladi.

1. Mazkur Nizom Oʻzbekiston Respublikasi Prezidentining 2015-yil 6-martdagi PF-4708-son “1941 — 1945-yillar urushi qatnashchilarini ragʻbatlantirish toʻgʻrisida”gi Farmoniga asosan (keyingi oʻrinlarda — Farmon), 1941 — 1945-yillardagi urush qatnashchilari va nogironlariga bir martalik pul mukofotini toʻlash tartibini belgilaydi.

2. Oʻzbekiston Respublikasi Mudofaa vazirligi tomonidan 700 000 (yetti yuz ming) soʻm miqdorida bir martalik pul mukofoti olish huquqiga ega boʻlgan 1941 — 1945-yillardagi urush qatnashchilari va nogironlari roʻyxatlari shakllantiriladi.

3. 700 000 (yetti yuz ming) soʻm miqdoridagi bir martalik pul mukofotlari Oʻzbekiston Respublikasi davlat budjeti hisobidan toʻlanadi.

4. 1941 — 1945-yillardagi urush yillarida faol armiya tarkibiga kirgan harbiy qismlar, shtablar va muassasalarda xizmat qilgan urush qatnashchilari va nogironlari, shuningdek, ularga tenglashtirilgan quyidagi shaxslar bir martalik pul mukofotini olish huquqiga ega:

a) 1941-yil 22-iyundan 1945-yil 9-maygacha boʻlgan davrda (keyingi oʻrinlarda — urush yillari) qiruvchi batalyonlar, vzvodlar va xalqni himoya qilish boʻlinmalari tarkibida sobiq SSSR hududida harbiy harakatlarda qatnashgan shaxslar;

b) urush davrida partizanlar safiga kirgan yoki maxfiy ishlarni olib borganlar;

v) sobiq SSSR Ichki ishlar vazirligi organlari va Davlat xavfsizlik qoʻmitasi organlarining qoʻmondonlik va oddiy askar tarkibidagi shaxslar, urush yillarida faol armiya saflarida yoki jangovar hududlarda xizmat qilganlar;

g) urush davrida yosh polk va yungalar oʻgʻillari sifatida armiyada boʻlganlar;

d) urush davrida jang zonalaridagi temir yoʻl, mudofaa chiziqlari, harbiy-dengiz bazalari va boshqa harbiy obyektlarda ishlaganlar;

e) urush davrida faol armiya tarkibida ishlagan fuqarolik tarkibidan boʻlgan shaxslar;

j) fashistlar lagerlarida boʻlganlar (getto va majburiy saqlash joylari);

z) blokada davrida Leningradda ishlaganlar va “Leningraddagi mudofaa uchun” medali yoki “Blokadali Leningrad aholisi” belgisiga ega boʻlganlar.

5. Quyidagilar bir martalik pul mukofoti bilan taqdirlanadigan shaxslar roʻyxatiga kiritilmaydi:

Farmon qabul qilinishidan oldin vafot etganlar;

Oʻzbekiston Respublikasida vaqtincha yashayotgan chet el fuqarolari va fuqaroligi boʻlmagan shaxslar.

Agar bir martalik pul mukofoti olish huquqiga ega boʻlgan shaxs Farmon qabul qilingan kuni vafot etgan boʻlsa, mukofot uning oilasiga topshiriladi.

6. 1941 — 1945-yillardagi urush qatnashchilari va invalidlari, shuningdek, ular bilan tenglashtirilganlar uchun, Qoraqalpogʻiston Respublikasi, viloyatlar va Toshkent shahridagi pensiya jamgʻarmasi idoralari tomonidan roʻyxatlar tuziladi. Ushbu roʻyxatlar ikki nusxada tayyorlanadi va birinchi nusxasi pochta tizimiga, ikkinchisi esa Pensiya jamgʻarmasi idorasida qoladi. Budjetdan tashqari Pensiya jamgʻarmasining tuman (shahar) boʻlimlari budjetdan tashqari Pensiya jamgʻarmasining Qoraqalpogʻiston Respublikasi, viloyatlar va Toshkent shahridagi boʻlimlari orqali Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining ijro etuvchi apparatiga umumlashtirish uchun taqdirlanganlar soni toʻgʻrisidagi maʼlumotlarni taqdim etadi.

7. Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining ijro etuvchi apparati moliyalashtirishni amalga oshirish uchun hududlar boʻyicha taqdirlanganlar toʻgʻrisidagi maʼlumotlarni belgilangan tartibda Oʻzbekiston Respublikasi Moliya vazirligiga taqdim etadi.

8. Oʻzbekiston Respublikasi Moliya vazirligi, Oʻzbekiston Respublikasi davlat budjeti hisobidan Pensiya jamgʻarmasiga bir martalik pul mukofotlarini toʻlash uchun zarur boʻlgan mablagʻni ajratadi. Mahalliy (shahar) Pensiya jamgʻarmasi boʻlimlari, bir martalik pul mukofotlarini toʻlash uchun mablagʻlarni “Oʻzbekiston pochtasi” AJ pochta tarmoqlarining hisoblariga oʻtkazadilar. Toʻlovlar amalga oshirilgach, pochta tarmoqlari mahalliy (shahar) Pensiya jamgʻarmasi boʻlimlariga toʻlangan mablagʻlar va bir martalik pul mukofotini olganlar soni boʻyicha hisobot taqdim etadi.

9. Oʻzbekiston Respublikasi Moliya vazirligi huzuridagi Pensiya jamgʻarmasining ijro etuvchi apparati, bir martalik pul mukofoti toʻlanganidan soʻng oʻn kun ichida Moliya vazirligiga toʻlovlar haqidagi hisobotni taqdim etadi.

10. Ushbu Nizomning 4-bandida koʻrsatilgan Oʻzbekiston Respublikasi Mudofaa vazirligi, Ichki ishlar vazirligi, Milliy xavfsizlik xizmati organlaridan pensiya oluvchi shaxslarga bir martalik pul mukofoti toʻlash yuqorida koʻrsatilgan vazirliklar va idoralar tomonidan 2015-yilga belgilangan budjet mablagʻlari doirasida amalga oshiriladi.

11. Oʻzbekiston Respublikasi Markaziy banki, bir martalik pul mukofotini toʻlash uchun mahalliy (shahar) pochta tarmoqlari va Mudofaa vazirligi, Ichki ishlar vazirligi, Milliy xavfsizlik xizmati tuzilmalarini naqd pul bilan taʼminlash boʻyicha zarur choralarni koʻradi.