Oʻzbekiston Respublikasi Hukumati va Malayziya Hukumati (quyida “Ahdlashuvchi Tomonlar” deb ataladilar),

ikki mamlakat oʻrtasidagi munosabatlarni mustahkamlash maqsadida oʻzaro madaniy va ilmiy hamkorlikni rivojlantirishga va xalqlari oʻrtasidagi hamjihatlikni oshirishga koʻmaklashishga intilib,

quyidagilar haqida ahdlashib oldilar:

Ahdlashuvchi Tomonlar ikki mamlakat oʻrtasidagi madaniy va ilmiy hamkorlikni bir-birlarining suverenitetlarini oʻzaro hurmat qilish, ichki ishlariga aralashmaslik va oʻzaro manfaat asosida Tomonlarning tegishli qonunlari va qoidalariga binoan rivojlantirishga koʻmaklashadilar.

Ahdlashuvchi Tomonlarning oʻzaro kelishuvi mavzusi va uning maqbul boʻlishini hisobga olgan holda, 1-moddada zikr etilgan madaniy va ilmiy hamkorlik, jumladan:

a) radio va televizion dasturlar, filmlar va musiqaviy yozuvlar bilan ayriboshlashni,

b) tijoriy-asosda yoki Ahdlashuvchi Tomonlar oʻrtasidagi oʻzaro bitimlarga muvofiq teatr, opera, balet va raqs guruhlarining, orkestrlar va boshqa badiiy jamoalar va yakka sanʼatkorlarning ijodiy safarlarini,

v) sanʼat sohasida ayriboshlash, badiiy, foto va boshqa koʻrgazmalar tashkil etishni,

g) hayʼatlar ayriboshlash, guruhlar va ayrim mutaxassislar safari orqali ilm-fan, texnologiya va shu kabi sohalardagi yutuqlar va tajribalar bilan almashishni,

d) oliy va maxsus oʻquv yurtlarida oʻqish imkoniyatini yaratish va

e) milliy kutubxonalar, muzeylar, arxivlar va shu kabi boshqa muassasalar oʻrtasidagi aloqalarni ragʻbatlantirishni hamda tarixiy, madaniy va ilmiy qiymatga ega boʻlgan nashr etilgan va etilmagan materiallarni ayriboshlashni, jumladan, yozuvchilar va madaniyat sohasidagi boshqa mutaxassislar bilan almashib turishga koʻmaklashishni,

yo) Ahdlashuvchi Tomonlar tarafidan kelishilishi mumkin boʻlgan boshqa vaziyatlarni qamrab oladi.

Ahdlashuvchi Tomonlar ikki mamlakat oʻrtasida sayohatchilikni rivojlantirishga koʻmaklashadilar.

Ushbu Bitimda zikr etilgan oʻzaro axborotlar va materiallarni ayriboshlash, ayrim shaxslar, guruhlar va hayʼatlar bilan almashish Oʻzbekiston Respublikasi va Malayziyadagi mavjud qonunlar va qoidalarga muvofiq amalga oshiriladi.

Ahdlashuvchi Tomonlar ushbu Bitim qoidalarini amalga oshirish maqsadida diplomatik yoʻllar bilan bir-birlariga hamkorlikning hajmi va mohiyati toʻgʻrisida xabar qiladilar va agar muayyan masalalar yuzasidan savollar chiqib qolsa, hamkorlik maqbulligi va shart-sharoitlari toʻgʻrisida, jumladan diplomatik yoʻllar bilan muzokaralar oʻtkazishga kelishib oldilar.

Ushbu Bitim qoidalari Ahdlashuvchi Tomonlarning oʻz xavfsizliklarini himoya qilish uchun tadbirlar qabul qilish va amalga oshirishdagi huquqlarini chegaralamaydi.

Ahdlashuvchi Tomonlarning har biri ushbu Bitimning istalgan joyiga yoki hamma bandlariga oʻzgartirishlar kiritishni yoki qayta koʻrib chiqishni yozma ravishda talab qilishi mumkin. Ahdlashuvchi Tomonlar oʻzaro kelishgan holda kiritgan har qanday oʻzgartirishlar va qayta koʻrishlar Ahdlashuvchi Tomonlar belgilagan kundan eʼtiboran kuchga kiradi.

Ushbu Bitim har bir Ahdlashuvchi Tomon bu Bitim tasdiqlanishi uchun zarur barcha ichki rasmiy ishlar ado etilgani haqida boshqa Tomondan xabar olgandan keyin kuchga kiradi.

Ushbu Bitim kuchga kirganidan keyin Besh yil davomida amal qiladi. Mazkur muddat, agar Ahdlashuvchi Tomonlardan biri boshqa Tomonni muddat tugashiga kamida olti oy qolgunicha Bitimga amal qilishni toʻxtatish niyati haqida diplomatik yoʻllar orqali yozma ravishda xabar qilmasa, Bitimga amal qilish oʻz-oʻzidan har safar bir yillik muddatga choʻzilaveradi. Ushbu Bitim muddati tugashi yoki unga amal qilishning toʻxtatilishi mazkur Bitim doirasida Ahdlashuvchi Tomonlar imzolagan boshqa protokollar, bitimlar, shartnomalar, eslatma xatlariga doir amaldagi majburiyatlar yoki loyihalar qoidalariga taʼsir etmaydi.

Ushbuga guvohlik berib, oʻz Hukumatlarining tegishli vakolatlariga ega boʻlgan quyidagi shaxslar ushbu Bitimni imzoladilar.

1992-yil 20-iyunda Kuala-Lumpur shahrida olti asl nusxada, har biri ikki nusxadan oʻzbek, malay va ingliz tillarida imzolandi, barcha matnlar bir xil kuchga ega. Talqin qilishda tafovut yuzaga kelgan taqdirda ingliz tilidagi matn ustuvorlik qiladi.