Vazirlar Mahkamasining 2002-yil 24-yanvardagi 30-son qarori bilan tasdiqlangan “Qariyalarni qadrlash yili” davlat dasturining 3.9-bandini bajarish hamda o‘zgalar parvarishiga muhtoj yolg‘iz keksalar, pensionerlar va nogironligi bo‘lgan shaxslarning uyiga borib ijtimoiy xizmat ko‘rsatish bilan to‘liq qamrab olinishini ta’minlash maqsadida Vazirlar Mahkamasi qaror qiladi:

1. O‘zbekiston Respublikasi Bandlik va mehnat munosabatlari vazirligiga Aholi bandligiga ko‘maklashish markazlari orqali ushbu markazlarda ro‘yxatga olingan ishsiz fuqarolarni haq to‘lanadigan jamoat ishlarini tashkil etish yo‘li bilan o‘zgalar parvarishiga muhtoj yolg‘iz keksalar, pensionerlar va nogironligi bo‘lgan shaxslarning uyiga borib ijtimoiy yordam ko‘rsatishga jalb etish topshirilsin.

2. Belgilab qo‘yilsinki, o‘zgalar parvarishiga muhtoj yolg‘iz keksalar, pensionerlar va nogironligi bo‘lgan shaxslarning uyiga borib ijtimoiy xizmat ko‘rsatishga aholi bandligiga ko‘maklashish markazlari orqali jalb etiladigan ishsiz fuqarolarga ish haqi to‘lash (shu jumladan ijtimoiy sug‘urtaga ajratmalar) bilan bog‘liq xarajatlarni mablag‘ bilan ta’minlash Ish bilan ta’minlashga ko‘maklashish davlat jamg‘armasi mablag‘lari hisobidan amalga oshiriladi.

3. O‘zbekiston Respublikasi Mehnat va aholini ijtimoiy muhofaza qilish vazirligi hamda Moliya vazirligi ishsiz fuqarolarni yolg‘iz keksalar, pensionerlar va nogironlarning uyiga borib ijtimoiy xizmat ko‘rsatishga jalb etish tartibini bir oy muddatda ishlab chiqsinlar va tasdiqlasinlar, unda bir nafar xodim hisobiga xizmat ko‘rsatish normativlarini belgilash, jalb etiladigan ishsiz fuqarolarni ularning muayyan kontingentga xizmat ko‘rsatishga yaroqliligi va xohishini hisobga olgan holda komission yo‘l bilan tanlash, ushbu ishlarni tashkil etish bilan bog‘liq xarajatlarni Ish bilan ta’minlashga ko‘maklashish jamg‘armasi mablag‘lari hisobidan qoplash tartibi, shuningdek ijtimoiy xizmat ko‘rsatishning to‘liqligi va sifatini samarali nazorat qilish mexanizmi nazarda tutilsin.

4. Vazirlar Mahkamasining “Haq to‘lanadigan jamoat ishlarini tashkil qilish to‘g‘risidagi nizomni tasdiqlash haqida” 1999-yil 19-iyuldagi 353-son qaroriga (O‘zbekiston Respublikasi QT, 1999-y., 7-son, 40-modda) ilovaga muvofiq qo‘shimchalar kiritilsin.

5. Vazirlar Mahkamasining “O‘zgalar parvarishiga muhtoj bo‘lgan yolg‘iz fuqarolarga ijtimoiy yordam ko‘rsatishda fuqarolarning o‘zini o‘zi boshqarish organlari rolini oshirish to‘g‘risida” 2000-yil 29-iyuldagi 288-son qarori o‘z kuchini yo‘qotgan deb hisoblansin.

6. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.S. Azimov zimmasiga yuklansin.

Vazirlar Mahkamasining “Haq to‘lanadigan jamoat ishlarini tashkil etish to‘g‘risidagi nizomni tasdiqlash haqida” 1999-yil 19-iyuldagi 353-son qarori (O‘zbekiston Respublikasi QT, 1999-y., 7-son, 40-modda) bilan tasdiqlangan Nizomda:

— V qism quyidagi 26-band bilan to‘ldirilsin:

“26. O‘zgalar parvarishiga muhtoj yolg‘iz keksalar, pensionerlar va nogironlarning uyiga borib ijtimoiy xizmat ko‘rsatish bo‘yicha haq to‘lanadigan jamoat ishlariga jalb etilgan, mehnat bo‘limlarida ro‘yxatga olingan ishsiz fuqarolarga ish haqi to‘lash xarajatlari to‘liq Ish bilan ta’minlashga ko‘maklashish davlat jamg‘armasi mablag‘lari hisobidan amalga oshiriladi”;

— 26-band 27-band deb hisoblansin;

— “Haq to‘lanadigan jamoat ishlarining namunaviy ro‘yxati”dagi (Nizomga 2-ilova) “Ish mazmuni”ning 4-bandi “va o‘zgalar parvarishiga muhtoj yolg‘iz keksalar, pensionerlar va nogironlarning uyiga borib ijtimoiy xizmat ko‘rsatish ishlari” so‘zlari bilan to‘ldirilsin.