Quyida “Tomonlar” deb ataluvchi Oʻzbekiston Respublikasi Hukumati va Turkmaniston Hukumati,

ikkala mamlakat suvereniteti prinsiplari, Birlashgan Millatlar Tashkiloti Nizomiga, 1961-yil 18-apreldagi diplomatik aloqalar haqidagi Vena Konvensiyasi va xalqaro huquqning boshqa normalariga tayangan holda,

har ikkala mamlakat oʻrtasidagi doʻstona munosabatlarni hurmat, tenglik va oʻzaro foyda ruhida rivojlantirishga intilib,

Oʻzbekiston Respublikasining Ashxabod shahridagi va Turkmanistonning Toshkent shahridagi elchixonalari faoliyati bilan bogʻliq masalalarni tartibga solishga oʻzaro intilib,

quyidagilar toʻgʻrisida kelishib oldilar:

Tomonlar umumiy manfaatdorlikdan kelib chiqqan holda Oʻzbekiston Respublikasining Ashxabod shahridagi va Turkmanistonning Toshkent shahridagi elchixonalarining faoliyati bilan bogʻliq masalalarni teng huquqlilik asosida hal qilishga kelishib oldilar.

Tomonlar, bir-birlariga elchixona binolari, elchi qarorgohlari, va boshqa binolar qurish uchun umumiy maydoni 13700 kvadrat metrdan iborat yer maydonini bepul foydalanish uchun berishga kelishib oldilar.

Turkmaniston Hukumati mazkur Bitim orqali Ashxabod shahridagi Goʻroʻgʻli koʻchasida joylashgan 1 200 (bir ming ikki yuz) kvadrat metr yer maydonini va Berzengi posyolkasidagi 12 500 (oʻn ikki ming besh yuz) kvadrat metrdan iborat jami 13 700 (oʻn uch ming yetti yuz) kvadrat metr yer maydonini Oʻzbekiston Respublikasi Hukumatiga beradi.

Yer maydonlari va ular chegarasining aniq joylashgan oʻrni ushbu Bitimning ajralmas qismi hisoblangan reja-sxemasida (1 va 2-ilova*) belgilab qoʻyilgan.

Oʻzbekiston Respublikasi Hukumati Turkmaniston Hukumatiga Toshkent shahri, Chilonzor tumani, Muqimiy koʻchasidagi 9000 (toʻqqiz ming) kvadrat metr yer maydonini beradi.

Yer va uning chegaralarining aniq joylashgan oʻrni mazkur Bitimning ajralmas qismi boʻlgan reja-sxemasida (3-ilova*) belgilab qoʻyilgan Oʻzbekiston Respublikasi Hukumati Toshkent shahrining 1-2 hududiy zonasidagi 4700 kvadrat metr yer maydonini Turkmaniston Hukumatiga beradi.

Mazkur moddada aytib oʻtilgan yer uchastkalarida Turkmaniston Hukumati hisobidan Oʻzbekistonda qurilgan binolar Turkmaniston Hukumatining mulki hisoblanadi.

Mazkur moddada aytib oʻtilgan yer uchastkalarida Oʻzbekiston Hukumati hisobidan Turkmanistonda qurilgan binolar Oʻzbekiston Hukumatining mulki hisoblanadi.

Tomonlar bir-birlariga 99 yil muddatga foydalanish uchun yer maydonlarini berishga oʻzaro kelishib oldilar. Bu yer maydonlari, shuningdek ushbu yer maydonlarida qurilgan bino va inshootlar davlat tomonidan yoki har qanday mahalliy hokimiyat tomonidan joriy qilingan barcha soliq toʻlovlaridan ozod etiladilar, aniq xizmat turlari, yaʼni gaz, elektroenergiya, issiq va sovuq suv taʼminoti, kanalizatsiya, telefon va shunga oʻxshash xizmat turlari uchun toʻlovlar bundan mustasnodir.

Har bir Tomon shaxsiy budjeti mablagʻi hisobidan yoʻl qurilishi, muhandislik aloqa yoʻllarini (elektr va telefon aloqalari, vodoprovod, kanalizatsiya, gaz) oʻtkazishni oʻzlari bergan yer uchastkalarining chegarasiga qadar amalga oshirish, shuningdek ana shu aloqa yoʻllarini shahar tarmoqlariga ulashni bajarishga kelishdilar.

Yuqorida koʻrsatilgan binolarning qurilishi uchun shartnoma imzolanayotganda roʻyxati va hajmi kelishilgan qurilish materiallari va jihozlari har qanday soliq, yigʻim hamda bojxona bojlaridan ozod etiladilar.

Qurilish davrida va bino ishga tushirilganda kommunal xizmatlar Ashxobodda Oʻzbekiston Respublikasi elchixonasi tomonidan va Toshkentda Turkmaniston elchixonasi tomonidan toʻlanadi.

Tomonlar mazkur Bitimning 2-moddasida koʻzda tutilgan yer uchastkalaridan foydalanish huquqlarini qonuniy ravishda rasmiylashtirishni oʻz mamlakatlaridagi qonunchilikka muvofiq amalga oshiradilar va tegishli hujjatlarni beradilar.

Tomonlar elchixonalar xodimlarini diplomatik vakolatxonalar xodimlariga xizmat koʻrsatadigan davolash muassasalarida bepul tibbiy xizmat bilan taʼminlashga kafolat beradilar.

Tomonlar elchixona xodimlarining farzandlariga davlat umumtaʼlim maktablarida, oʻrta va oliy oʻquv yurtlarida bepul taʼlim berishga kafolat beradilar.

Ushbu Bitimning shartlarini bajarishdan kelib chiqadigan barcha nizolarni Tomonlar muzokara oʻtkazish yoʻli bilan hal etadilar.

Tomonlar, ikki tomonning oʻzaro kelishuvi bilan mazkur Bitimga oʻzgartirishlar va qoʻshimchalar kiritishi mumkin. Barcha oʻzgartirish va qoʻshimchalar ushbu Bitimning ajralmas qismi hisoblangan alohida protokollar bilan rasmiylashtiriladi.

Ushbu Bitim imzolangan sanadan eʼtiboran kuchga kiradi va Tomonlardan birontasi mazkur Bitim harakatini toʻxtatish istagini bildirmaguncha amal qiladi va bu Tomon mazkur Bitimning harakatini toʻxtatish taxmin qilingan sanadan 6 oy ilgari uning harakatini toʻxtatish haqidagi istagini diplomatik yoʻllar orqali yozma ravishda boshqa Tomonga xabar qiladi.

Toshkent shahrida 1996-yil 27-noyabrda ikki asl nusxada, har biri oʻzbek, turkman va rus tillarida tuzildi, bunda barcha matnlar bir xil kuchga ega.

Ushbu Bitim qoidalarini talqin qilish maqsadida rus tilidagi matndan foydalaniladi.