Oʻzbekiston Respublikasi Hukumati va Ukraina Hukumati, bundan keyin “Tomonlar” deb ataluvchilar,

oʻz davlatlarining amaldagi qonunchiligi va xalqaro majburiyatlariga rioya etib,

soliqlar sohasidagi huquq buzishlarni aniqlash, oldini olish va bartaraf qilish bilan bogʻliq vazifalarni samarali hal qilishdan oʻzaro manfaatdor ekanliklaridan kelib chiqib,

ushbu maqsadlarda barcha huquqiy va boshqa imkoniyatlardan foydalanilishiga muhim ahamiyat berib,

quyidagilar toʻgʻrisida kelishib oldilar:

1. Tomonlar vakolatli organlarining ularning vakolat doirasiga kiradigan soliqlar sohasida huquq buzishlarni aniqlash, oldini olish va bartaraf qilish boʻyicha samarali kurashni tashkil etish maqsadidagi hamkorligi mazkur Bitimning mavzui hisoblanadi.

2. Mazkur Bitim Tomonlarning fuqarolik va jinoiy ishlar boʻyicha huquqiy yordam koʻrsatish toʻgʻrisidagi xalqaro bitimlardan kelib chiqadigan huquqlari va majburiyatlariga taalluqli boʻlmaydi.

1. Mazkur Bitim maqsadlarida quyidagilar Tomonlarning vakolatli organlari hisoblanadi:

Oʻzbekiston Tomonidan — Oʻzbekiston Respublikasi Davlat soliq qoʻmitasi;

Ukraina Tomonidan — Ukraina Davlat soliq maʼmuriyati.

2. Tomonlarning vakolatli organlarining rasmiy nomlari oʻzgargan holda ular bu toʻgʻrisida bir-birlarini darhol xabardor qiladilar.

Tomonlar mazkur Bitim doirasida hamkorlikning quyidagi shakllaridan foydalanadilar:

milliy soliq qonunchiligi, ularga kiritilgan oʻzgartirishlar va qoʻshimchalar toʻgʻrisidagi axborot, shuningdek soliqlarga doir huquq buzishlarga qarshi kurash, yuridik va (yoki) jismoniy shaxslar tomonidan sodir qilingan soliqlarga doir huquq buzishlar, soliqlarga doir huquq buzishlarga qarshi kurashda qoʻllaniladigan axborot tizimlarini barpo etish va ularning amal qilishi boʻyicha metodik tavsiyanomalar bilan almashib turish;

soliqlar sohasidagi huquq buzishlarni aniqlash, oldini olish va bartaraf qilishga qaratilgan tadbirlarni oʻtkazish masalalari yuzasidan bahamjihat harakat qilish;

jismoniy va yuridik shaxslarni soliqqa tortish bilan bogʻliq hujjatlarning tasdiqlangan nusxalarini belgilangan tartibda taqdim etish;

hamkorlik, vakillar bilan almashish va kadrlarni oʻqitish jarayonida vujudga keladigan masalalar boʻyicha zarur yordam koʻrsatish va bunday faoliyatni muvofiqlashtirib turish, shuningdek soliqlar sohasidagi huquq buzishlarga qarshi kurash muammolari yuzasidan ilmiy-amaliy konferensiyalar va seminarlar oʻtkazish.

Tomonlarning vakolatli organlari mazkur Bitimni bajarish bilan bogʻliq masalalar boʻyicha bevosita bir-birlari bilan muloqot qilib turadilar.

1. Soliqlarga doir huquq buzishlar toʻgʻrisidagi axborot bilan almashib turish quyidagi maʼlumotlarning taqdim qilinishini koʻzda tutadi:

yuridik va (yoki) jismoniy shaxslarning daromadlari, soliq solinadigan baza va ulardan undiriladigan summalar, shuningdek soliqqa doir huquq buzishlarni aniqlash, oldini olish maqsadida amalga oshiriladigan chora-tadbirlar toʻgʻrisidagi;

yuridik va (yoki) jismoniy shaxslar tomonidan davlat va tijorat banklarida hisob raqamlarining ochilishi toʻgʻrisida, shuningdek bunday hisob raqamlaridagi mablagʻlar harakati toʻgʻrisida, agar bunday hisob raqamlarida soliqqa tortishdan yashirilgan summalar mavjud deb hisoblash uchun asos boʻlsa.

2. Mazkur moddaning 1-bandida koʻrsatib oʻtilgan talablar bir Tomonning vakolatli organi tomonidan boshqa Tomonning vakolatli organining soʻrovnomasi asosida axborotni taqdim etish soʻralayotgan Tomonning qonunchiligiga va davlat manfaatlariga zid kelmaydigan boʻlsa, amalga oshiriladi.

Agar Tomonlardan birining vakolatli organi unda mavjud boʻlgan axborot boshqa Tomonning vakolatli organi uchun qiziqarli boʻlishi mumkin deb hisoblasa, unda u bunday axborotni oʻz tashabbusiga koʻra taqdim etishi mumkin.

Tomonlarning vakolatli organlari soʻrovnomalar boʻyicha yuridik va jismoniy shaxslarni soliqqa tortishga doir hujjatlar (schetlar, fakturalar, yukxatlar, shartnomalar, kontraktlar, sertifikatlar, maʼlumotnomalar va boshqalar)ning, shuningdek soliqlarga doir huquq buzishlarga taalluqli masalalarga oid hujjatlarning nusxalarini bir-birlariga taqdim etadilar.

Nusxalar vakolatli shaxsning imzosi va muhri bilan qonunda belgilangan tartibda tasdiqlanadi.

Tomonlarning vakolatli organlari milliy soliq qonunchiliklari, jinoyatlarni tergov qilishning va soliq qonunchiligi sohasidagi maʼmuriy huquqni buzishlarga doir ishlarni yurgizishning huquqiy asoslari toʻgʻrisidagi axborot bilan muntazam negizda almashib turadilar, yangi qabul qilingan meʼyoriy huquqiy hujjatlar, shuningdek amaldagi meʼyoriy huquqiy hujjatlarga kiritilgan oʻzgartirishlar haqida oʻz vaqtida xabardor qiladilar.

Tomonlarning vakolatli organlari soliqlarga doir huquq buzishlarga qarshi kurashni tashkil etishda axborot tizimlarini barpo etish va bunday tizimlarning amal qilishi masalalari boʻyicha tajriba, metodika, dasturiy taʼminot vositalari va ilmiy materiallar bilan almashib turadilar.

Tomonlarning vakolatli organlari kadrlarni oʻzlarining oʻquv yurtlari negizida oʻqitish va qayta tayyorlash, soliqlarga doir huquq buzishlarga qarshi kurashning dolzarb masalalariga doir birgalikdagi ilmiy tadqiqotlar, ilmiy-amaliy konferensiyalar va seminarlar oʻtkazish sohalarida hamkorlik qiladilar.

Mazkur modda doirasidagi hamkorlikni amalga oshirishning aniq shakllari va shu jumladan ularni mablagʻ bilan taʼminlash Tomonlarning vakolatli organlari oʻrtasida tuziladigan tegishli bitimlarga muvofiq belgilanadi.

1. Axborot olish uchun soʻrovnoma yozma shaklda yoki teletayp, faksimil yoki kompyuter aloqasidan foydalanish orqali berilishi kerak.

Kechiktirib boʻlmaydigan hollarda telefon aloqasi orqali berilgan ogʻzaki soʻrovnoma qabul qilinishi mumkin, biroq u yozma shaklda darhol tasdiqlanishi lozim.

Teletayp, faksimil yoki kompyuter aloqasidan foydalanishda, shuningdek ogʻzaki soʻrovnomaning haqiqiyligiga yoki mazmuniga nisbatan shubha tugʻilgan taqdirda soʻralayotgan vakolatli organ tasdiqni yozma shaklda berishni iltimos qilishi mumkin.

2. Axborot olish uchun soʻrovnoma quyidagilarni oʻz ichiga olishi kerak:

soʻrayotgan vakolatli organning nomi;

soʻralayotgan vakolatli organning nomi;

soʻrovnomaning mohiyatini va uning asosini bayon etish, shuningdek soʻrovni bajarish uchun zarur boʻlgan boshqa maʼlumotlar.

1. Soʻrovnoma bir oy ichida qabul qilinadi va bajariladi. Agar soʻrovnomani bajarish uchun zarur boʻlsa, soʻralayotgan vakolatli organ aniqlash tartibida qoʻshimcha axborotni soʻrashi mumkin.

2. Soʻrovnomani bajarishning imkoni boʻlmaganda soʻralayotgan vakolatli organ bu haqda soʻrayotgan vakolatli organni xabardor qiladi.

3. Agar davlatning suverenitetiga yoki xavfsizligiga ziyon yetkaziladigan yoki soʻralayotgan vakolatli organning davlati qonunlariga zid keladigan boʻlsa, soʻrovnomani bajarishdan bosh tortiladi.

Soʻrovnomani bajarishdan bosh tortish sabablari toʻgʻrisida soʻrayotgan vakolatli organ xabardor qilinadi.

Axborot olish uchun soʻrovnoma va unga javob rus tilida tuziladi.

Tomonlarning vakolatli organlari soliqlarga doir huquq buzishlarni aniqlash, ogohlantirish va bartaraf etish bilan bogʻliq masalalar boʻyicha axborotning maxfiyligiga kafolat beradilar.

Ushbu Bitim doirasida olingan axborot ushbu axborotni bergan vakolatli organning yozma roziligisiz uchinchi tomonga berilishi mumkin emas.

Tomonlarning vakolatli organlari ushbu Bitimni oʻz davlatlari hududida bajarilishi bilan bogʻliq xarajatlarni zimmalariga oladilar. Qoʻshimcha xarajatlarni talab etuvchi soʻrovnomalar olingan taqdirda ularni moliyalashtirish toʻgʻrisidagi masala Tomonlarning vakolatli organlari tomonidan oʻzaro ahdlashuv boʻyicha koʻrib chiqiladi.

Tomonlarning vakolatli organlari vakillari zarur hollarda ushbu Bitimni bajarish bilan bogʻliq masalalarni muhokama qilish uchun uchrashuv oʻtkazadilar.

Ushbu Bitim imzolangan kundan boshlab kuchga kiradi va Tomonlardan biri ikkinchi Tomonni Bitimning amal qilishini toʻxtatish niyatida ekanligidan yozma shaklda xabardor qilgan kundan boshlab olti oy oʻtgach amal qilishini toʻxtadi.

Toshkent shahrida 1996-yil 5-dekabrda ikki nusxada, har biri oʻzbek, ukrain va rus tillarida tuzildi, bunda barcha matnlar teng autentikdir.

Ushbu Bitim qoidalarini talqin qilishda kelishmovchiliklar yuzaga kelganda rus tilidagi matn asosiy hisoblanadi.