Oʻzbekiston Respublikasi “Davlat bojxona xizmati toʻgʻrisida”gi Qonunining 6-moddasi va Oʻzbekiston Respublikasi Vazirlar Mahkamasining 2014-yil 26-noyabrdagi 322-son “Oʻzbekiston Respublikasining havo boʻshligʻida uchuvchisiz uchish apparatlaridan ruxsatsiz foydalanishning oldini olish chora-tadbirlari toʻgʻrisida”gi qaroriga asosan Oʻzbekiston Respublikasi Davlat bojxona qoʻmitasi qaror qiladi:

1. Oʻzbekiston Respublikasi Davlat bojxona qoʻmitasining 2014-yil 4-iyuldagi 01-02/12-13-son qarori (roʻyxat raqami 2606, 2014-yil 5-avgust) (Oʻzbekiston Respublikasi qonun hujjatlari toʻplami, 2014-y., 32-son, 411-modda) bilan tasdiqlangan Yoʻlovchi bojxona deklaratsiyasini toʻldirish va rasmiylashtirish tartibi toʻgʻrisidagi yoʻriqnomaga ilovaga muvofiq oʻzgartirish va qoʻshimchalar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

1. 5-band “oʻzbek, rus va ingliz tillarida” degan soʻzlardan keyin “A-5 formatida” degan soʻzlar bilan toʻldirilsin.

2. 7-bandning ikkinchi xatboshisidagi “yili” degan soʻz “sanasi” degan soʻz bilan almashtirilsin.

3. Ilovaning 1-bandidagi “Oʻzbekiston Respublikasi hududiga olib kirilishi taqiqlangan tovarlar roʻyxati” quyidagi tahrirdagi “d” kichik band bilan toʻldirilsin:

“d) uchuvchisiz uchish apparatlari.”.

4. Mazkur oʻzgartirish va qoʻshimchalar Oʻzbekiston Respublikasi Davlat statistika qoʻmitasi bilan kelishilgan.