Oʻzbekiston Respublikasi Hukumati bilan Moldova Respublikasi Hukumati, bundan keyin “Tomonlar” deb ataluvchilar,

ikki tomonlama iqtisodiy va savdo munosabatlarini chuqurlashtirish zaruratidan kelib chiqib va transport sohasidagi hamkorlikni rivojlantirish asoslarini yaratishni istab,

quyidagilar haqida ahdlashib oldilar:

Tomonlar ikkala mamlakat oʻrtasida, shuningdek, tranzit bilan ularning hududlari orqali uchinchi mamlakatga muntazam va nomuntazam ravishda avtobuslar bilan yoʻlovchilar va pritsepli yoki pritsepsiz yuk avtomobillarida yoki yarim pritsepli avtomobillarda yuk tashishni, shuningdek yengil avtomobillarda yakka-yakka yoki guruh boʻlib sayr qilishlarni amalga oshirishni shartlashib oldilar.

Avtobuslarda yoʻlovchilarni muntazam ravishda tashish tashkilot (firma)ning nomi, transport turi, yurish yoʻnalishi, harakat jadvali, tarif, yoʻlovchilarni chiqarish va tushirish joylari, yuk tashishlarni bajarish davri va muntazamligi toʻgʻrisida oldindan Tomonlarning vakolatli organlari oʻrtasidagi kelishuvga koʻra tashkil etiladi.

Ikkala Tomon oʻrtasida yoki tranzit bilan ularning hududlari orqali yoʻlovchilarni avtobuslarda nomuntazam tashishlar, mazkur Bitimning 4-moddasida nazarda tutilgan yuk tashishlar bundan mustasno, tomonlarning vakolatli organlari tomonidan berilayotgan ruxsatnomalar asosida amalga oshiriladi.

Yoʻlovchilarni nomuntazam tashishni amalga oshirish uchun ruxsatnoma berish toʻgʻrisida ariza yuk tashuvchi tomonidan oʻz mamlakatining vakolatli organiga yuboriladi, u oʻz navbatida arizani ikkinchi Tomonning vakolatli organiga joʻnatadi.

Tomonlarning vakolatli organlari oʻz hududlaridan oʻtadigan uchastka uchun ruxsatnoma beradilar.

Berilgan ruxsatnoma u yoqqa va buyoqqa bir marta borib kelish huquqini beradi.

Tomonlar yoʻlovchilarni avtobuslarda nomuntazam tashishni bajarish uchun ruxsatnoma talab etilmaydigan kuyidagi hollarni kelishib oldilar:

1) agar bir xil oʻsha tarkibdagi yoʻlovchilar guruhi avtobus roʻyxatdan oʻtkazilgan Tomon hududida boshlanuvchi va tamom boʻluvchi butun sayr davomida bir xil oʻsha avtobusda tashilsa;

2) agar bir xil oʻsha tarkibdagi yoʻlovchilar guruhi avtobus roʻyxatdan oʻtkazilgan Tomon hududida boshlanadigan va boshqa Tomon hududida tamom boʻladigan butun sayr davomida bir yoʻnalishda tashilsa, bunda avtobus u roʻyxatdan oʻtkazilgan mamlakatga boʻsh holda qaytishi shart.

3) agar avtobus oʻrindiqlari, haydovchining oʻrnini ham qoʻshganda 8 oʻrindan oshib ketmasa.

4) Yoʻlovchilarni nomuntazam tashishni amalga oshirayotgan nosoz avtobusni ruxsatnomaga koʻra boshqa avtobusga almashtirishda.

5) Yengil avtomobillarda sayr qilish uchun.

Mazkur moddada nazarda tutilgan yuk va yoʻlovchi tashishlarni bajarishda avtobus haydovchisi yoʻlovchilarning nomi yozilgan roʻyxatga ega boʻlishi kerak.

Ikkala mamlakat oʻrtasida yoki tranzit bilan ularning hududlari orqali pritsepli yoki ularsiz yoki yarim pritsepli yuk avtomobillarida yuklarni tashish Tomonlarning vakolatli organlari tomonidan berilgan ruxsatnomalar asosida amalga oshiriladi.

Mazkur Bitim bilan nazarda tutilgan yuklarni tashish shakli umum tomonidan qabul qilingan xalqaro namunaga muvofiq boʻlishi kerak boʻlgan yuk xati (nakladnoy) boʻyicha amalga oshiriladi.

Tomonlarning vakolatli organlari yuklarni tashish uchun ruxsatnomalar blankalarini bir-birlariga oʻzaro kelishib olingan miqdorda har yili berib turadilar. Ushbu blanklarda ruxsatnoma bergan vakolatli organning muhri va imzosi boʻlishi kerak.

5-moddada nazarda tutilgan ruxsatnomalar quyidagi yuk va yoʻlovchilar tashishlarni amalga oshirish uchun talab qilinmaydi.

1) koʻchar mulkni joydan-joyga koʻchirganda;

2) vafot etganlar jasadlari moʻmiyolanganda yoki krematsiya qilinganda;

3) yarmarkalar va koʻrgazmalar uchun moʻljallangan eksponatlar;

4) sport va tomosha tadbirlarini oʻtkazish uchun moʻljallangan avtomobillar, mototsikllar, velosipedlar, chorva mollari, shuningdek, mol-mulk va anjomlar;

5) ovoz yozish, kinoga olish, teleeshittirishlar va teatr tomoshalari uchun teatr dekoratsiyalari va rekvizitlar, musiqa asboblari, uskunalar va anjomlar.

6) pochta;

7) shikastlangan avtotransport vositalari.

Mazkur moddaning 3, 4, 5-bandlarida nazarda tutilgan istisnolar, yuk va yoʻlovchilar tashilayotgan avtotransport vositasi roʻyxatdan oʻtkazilgan mamlakatga qaytarilishi kerak boʻlgan hollarda qoʻllansa boʻladi.

Avtotransport vositasining gabariti yoki ogʻirligi yuksiz yoki yuk bilan boshqa mamlakat hududida belgilangan normadan oshib ketsa, yuk va yoʻlovchilar tashuvchi boshqa Tomon vakolatli organlarining maxsus ruxsatnomasini olishi kerak.

Xuddi shu tadbirga boshqa Tomon hududida amalda boʻlgan normalarga muvofiq xavfli deb topilgan yuklar tashilgan hollarda rioya qilinishi kerak.

Mazkur Bitimda nazarda tutilgan xalqaro yuk tashishlar oʻz mamlakatining ichki qonunchiligiga koʻra shunday yuk tashishlarni amalga oshirish ruxsat etilgan yuk va yoʻlovchilar tashuvchilar tomonidangina bajarilishi mumkin.

Mazkur Bitim bilak nazarda tutilgan xalqaro yuk va yoʻlovchilar tashishlarni amalga oshiruvchi avtotransport vositalarida oʻz vatanining milliy roʻyxatga olish nomeri va farqlovchi belgilari boʻlishi kerak.

Tomonlar oʻz vakolatli organlari tomonidan avtotransport vositalariga beriladigan hujjatlarni oʻzaro tan oladilar.

Yuk va yoʻlovchilar tashuvchiga boshqa Tomon hududidagi ichki punkt orasida yoʻlovchilar yoki yuklarni tashishni amalga oshirish uchun, agar bunga boshqa Tomon vakolatli organining maxsus ruxsatnomasi olingan boʻlsa, ruxsat etiladi.

Yuk va yoʻlovchilar tashuvchi boshqa Tomon hududi orqali uchinchi mamlakat hududiga, shuningdek, uchinchi mamlakat hududi orqali boshqa Tomon hududiga tashishlarni, agar uchinchi mamlakat qonunchiligi yoki uchinchi mamlakat bilan tashuvchi mamlakat oʻrtasida tuzilgan bitimlar bunday yuk va yoʻlovchilar tashishlarni bajarish imkoniyatiga yoʻl qoʻysa, amalga oshirishi mumkin.

Avtotransport vositasi haydovchisi milliy yoki xalqaro haydovchilik guvohnomalari va avtotransport vositasiga berilgan milliy roʻyxatdan oʻtkazish hujjatlariga ega boʻlishi kerak.

Milliy yoki xalqaro haydovchilik guvohnomalari yoʻl harakati toʻgʻrisidagi xalqaro Konvensiya tomonidan belgilangan namunaga mos kelishi kerak.

Mazkur Bitim asosida xalqaro yuk va yoʻlovchilar tashishlarni amalga oshirishda yuk tashish bajarilayotgan mamlakat hududida amalda boʻlgan harakat qoidalariga, shuningdek, boshqa barcha qonun va qoidalarga, shu jumladan, soliq qonuni va qoidalariga rioya qilinishi kerak.

Mazkur Bitim asosida xalqaro yuk va yoʻlovchilar tashishlarga Tomonlardan har biri hududida yuk va yoʻlovchilar tashishni bajaruvchi avtotransport vositasi kirish vaqtida ularga yetkazilishi mumkin ziyonlardan fuqarolik masʼuliyatiga nisbatan sugʻurtalab qoʻyiladi.

Mazkur Bitim asosida bajariladigan yuk tashiganlik uchun hisob-kitoblar, agar toʻlovlar haqidagi bitimlarda hisob-kitoblarning boshqacha shakli aytib oʻtilmagan boʻlsa, ikkala mamlakatda erkin muomalada boʻlgan erkin almashtiriladigan valyutada amalga oshiriladi.

Yuk va yoʻlovchilar tashishni bajarishda ikkinchi Tomon hududiga olib kelinadigan quyidagi mahsulot va buyumlar boj yigʻimlaridan, poshlinalar va ruxsatnomalardan oʻzaro ozod qilinadilar:

1) avtotransport vositasining har bir modeli uchun tayyorlovchi zavod tomonidan nazarda tutilgan idishlardagi mavjud yonilgʻi;

2) tashish vaqtida foydalanish uchun zarur boʻlgan miqdordagi moylash materiallari;

3) xalqaro tashish ishlarini bajaruvchi avtotransport vositasini tuzatish uchun moʻljallangan ehtiyot qismlar va asboblar.

Foydalanilmagan ehtiyot qismlar tegishli Tomon hududida belgilangan tartibda qaytarib olib ketilishi, almashtirilgan ehtiyot qismlar esa mamlakatdan olib chiqib ketilishi, topshirilishi yoki roʻyxatdan chiqarilishi kerak.

Chegara, bojxona va sanitariya nazoratiga, shuningdek, mazkur Bitimda alohida aytib oʻtilmagan barcha boshqa masalalarga nisbatan ikkala Tomon qatnashchilari hisoblangan xalqaro Bitimlarning qoidalari qoʻllaniladi, bunday qoidalar boʻlmagan taqdirda esa har bir Tomonning ichki qonunlari va qoidalari qoʻllaniladi.

Ogʻir bemorlarni tashish, yoʻlovchilarni avtobuslarda muntazam ravishda tashish, shuningdek, chorva mollarini va tez buziladigan yuklarni tashishda chegara, bojxona va sanitariya nazorati navbatdan tashqari amalga oshiriladi.

Tomonlardan birining hududida mazkur Bitimning birorta qoidasi buzilishi hollari roʻy berganda avtotransport vositasi roʻyxatdan oʻtkazilgan mamlakatning vakolatli organi boshqa Tomon vakolatli organining iltimosiga koʻra mazkur Bitimning bajarilishini taʼminlash uchun zarur boʻlgan barcha choralar va sanksiyalarni koʻradi. Vakolatli organ koʻrilgan choralar toʻgʻrisida ikkinchi mamlakatning vakolatli organini xabardor qiladi.

Tomonlar oʻzaro aloqada boʻladilar va tajriba almashish yuzasidan vaqti-vaqti bilan maslahatlashib turadilar hamda mazkur Bitimni amalga oshirish bilan bogʻliq boʻlgan bahsli masalalarni hal etish uchun muzokaralar olib boradilar.

Mazkur Bitimning qoidalari Tomonlarning ular tuzgan boshqa xalqaro shartnomalari va bitimlaridan kelib chiqadigan huquq va majburiyatlariga daxl qilmaydi.

Ushbu Bitim ikkala tomonning qonunchilik qoidalariga muvofiq uni maʼqullash uchun zarur boʻlgan barcha yuridik tadbirlar bajarilganligi toʻgʻrisida bir-birlarini xabardor qilgan kundan boshlab kuchga kiradi va besh yil muddat davomida oʻz kuchida qoladi. Tomonlardan biri ikkinchi Tomonni Bitimning amalda boʻlishini toʻxtatish haqidagi oʻz niyatini mazkur Bitim muddati tugashiga qadar 90 kun oldin yozma holda xabar qilmasa, uning muddati shu kundan boshlab oʻz-oʻzidan uzaytirilaveradi.

1995-yil 21-noyabrda, Toshkent shahrida, ikki nusxada, har biri oʻzbek, moldovan va rus tillarida tuzildi. Barcha matnlar bir xil kuchga egadir.

Mazkur Bitim moddalarini talqin qilishda anglashilmovchiliklar paydo boʻlsa rus tilidagi matndan foydalaniladi.