Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi, “Banklar va bank faoliyati toʻgʻrisida”gi va “Aksiyadorlik jamiyatlari va aksiyadorlarning huquqlarini himoya qilish toʻgʻrisida”gi qonunlariga muvofiq Oʻzbekiston Respublikasi Markaziy banki Boshqaruvi qaror qiladi:

1. Oʻzbekiston Respublikasi Markaziy banki Boshqaruvining 2009-yil 15-avgustdagi 23/3-son qarori (roʻyxat raqami 2014, 2009-yil 8-oktabr) (Oʻzbekiston Respublikasi qonun hujjatlari toʻplami, 2009-y., 41-son, 447-modda) bilan tasdiqlangan Banklarni roʻyxatga olish va ular faoliyatini litsenziyalash tartibi toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

1. 17-band quyidagi tahrirda bayon etilsin:

“17. Mazkur harakatlar muassislar tomonidan Oʻzbekiston Respublikasining “Aksiyadorlik jamiyatlari va aksiyadorlarning huquqlarini himoya qilish toʻgʻrisida”, “Qimmatli qogʻozlar bozori toʻgʻrisida”gi qonunlari hamda aksiyadorlik jamiyatlari faoliyatini tartibga soluvchi boshqa qonun hujjatlariga rioya etilgan holda amalga oshiriladi.”.

2. 19-band quyidagi tahrirda bayon etilsin:

“19. Bank ustavida quyidagi maʼlumotlar boʻlishi lozim:

bankning toʻliq va qisqartirilgan nomi hamda uning joylashgan yeri (pochta manzili) va elektron pochta manzili;

bank operatsiyalarining roʻyxati, maqsadi va faoliyat muddati;

ustav kapitalining miqdori, muassislar roʻyxati, ustav kapitalidagi ulushlarning taqsimlanishi;

ustav kapitalini koʻpaytirish yoki kamaytirish tartibi;

chiqarilayotgan aksiyalar turlari va soni, ularning nominal qiymati, har xil turdagi aksiyalarning nisbati;

sof foyda va dividendlarni taqsimlash hamda zararlarni qoplash tartibi;

zaxira fondini va boshqa fondlarni tashkil etish tartibi;

bank aksiyadorlarining huquq va majburiyatlari;

bankning boshqaruv organlari tuzilmasi, ularni tashkil etish tartibi, bank kengashi, taftish komissiyasi va ijroiya organi aʼzolarining soni, vakolatlari hamda vazifalari haqidagi maʼlumotlar;

yillik hisobotlarni tuzish, tekshirish va tasdiqlash tartibi;

bank auditi, shu jumladan, buxgalteriya hisobining xalqaro andozalariga muvofiq belgilangan hisobotlar va auditorlik dasturlarining maqsadlari;

bankni qayta tashkil etish va tugatish tartibi;

bank tomonidan aksiyalarni joylashtirish tartibi va shartlari.

Bank ustavida qonun hujjatlariga zid boʻlmagan boshqa qoidalar ham koʻrsatilishi mumkin.

Bank aksiyadorning yoki har qanday manfaatdor shaxsning talabiga koʻra uch ish kuni ichida bankning ustavi, shu jumladan ustavga kiritilgan oʻzgartish va qoʻshimchalar bilan tanishib chiqish imkoniyatini berishi shart. Bank aksiyadorning talabiga koʻra unga bank ustavining koʻchirma nusxasini berishi shart.”.

3. 32-banddan “mutlaq” degan soʻz chiqarib tashlansin.

4. 33-bandda:

quyidagi mazmundagi ikkinchi xatboshi bilan toʻldirilsin:

“Ovoz beruvchi aksiyalarning egasi boʻlgan aksiyadorlar soni oʻttiz kishidan kam boʻlgan aksiyadorlik jamiyati shaklida tashkil etilgan banklarda kuzatuv kengashi vazifasi bank ustavi bilan aksiyadorlarning umumiy yigʻilishi zimmasiga yuklanishi mumkin.”;

ikkinchi xatboshi uchinchi xatboshi deb hisoblansin;

uchinchi xatboshi quyidagi tahrirda bayon etilsin:

“Aksiyadorlari soni 500 tagacha boʻlgan aksiyadorlik jamiyati shaklidagi banklarning Kengashi tarkibi kamida besh aʼzodan, aksiyadorlari soni 501 tadan 1000 tagacha boʻlgan banklarda kamida yetti aʼzodan va aksiyadorlari soni 1000 tadan ortiq boʻlgan banklarda kamida toʻqqiz aʼzodan iborat boʻlishi lozim.”.

5. 34-band oʻz kuchini yoʻqotgan deb topilsin.

6. 41-band quyidagi tahrirda bayon etilsin:

“41. Banklar va ularning filiallari binolarining muhofazasi taʼminlanganligi hamda muhandis-texnik qoʻriqlash vositalari bilan jihozlanganligi, dasturiy mahsulotlarning tayyorligi yuzasidan xulosa berish Vazirlar Mahkamasining 2014-yil 10-martdagi 56-son qarori bilan tasdiqlangan Binoning Markaziy bank talablariga muvofiqligi, asbob-uskunalar, kassa uzelining tayyorligi va dasturiy-texnik vositalar bilan jihozlanganligi toʻgʻrisida xulosa berish tartibi toʻgʻrisidagi nizomga muvofiq amalga oshiriladi.”.

7. 52-bandning birinchi xatboshisi va 62-banddagi “IVSA” degan soʻz “Fitch Ratings” degan soʻzlar bilan almashtirilsin.

8. 57-bandda:

uchinchi xatboshidagi “IVSA” degan soʻz “Fitch Ratings” degan soʻzlar bilan almashtirilsin;

beshinchi xatboshi “iqtisodiy” degan soʻzdan keyin “va siyosiy” degan soʻzlar bilan toʻldirilsin.

9. 58-banddan oʻn ikkinchi xatboshi chiqarib tashlansin.

10. 109-bandning ikkinchi jumlasi quyidagi tahrirda bayon etilsin:

“Banklar tomonidan chet elda oʻz filiallari, vakolatxonalari va shuʼba banklarini ochish hamda banklarni tashkil etishda qatnashish uchun Markaziy bankning ruxsatnomasini olish Vazirlar Mahkamasining 2014-yil 10-martdagi 56-son qarori bilan tasdiqlangan Bank faoliyati sohasida ruxsat berish tartib-taomillaridan oʻtish tartibi toʻgʻrisidagi nizomga muvofiq amalga oshiriladi.”.

11. 115-banddan “maʼqullash uchun” degan soʻzlar chiqarib tashlansin.