“Oʻzbekenergo” davlat-aksiyadorlik kompaniyasining issiqlik elektr stansiyalarini barqaror moliyaviy holatda saqlash, respublika isteʼmolchilarining elektr energiyasiga boʻlgan ehtiyojini taʼminlash, yetkazib berilgan tabiiy gaz uchun oʻzaro hisob-kitoblarni tartibga solish maqsadida Vazirlar Mahkamasi qaror qiladi:

1. Oʻzbekiston Respublikasi Vazirlar Mahkamasining “Tabiiy gaz isteʼmolchilari va gaz bilan taʼminlovchi tashkilotlar oʻrtasidagi oʻzaro hisob-kitoblar tartibi toʻgʻrisidagi nizomga oʻzgartirishlar kiritish toʻgʻrisida” 2013-yil 25-dekabrdagi 340-son qaroriga muvofiq Vazirlar Mahkamasining 2004-yil 5-fevraldagi 57-son qaroriga 5-ilovaga kiritilgan “Oʻzbekenergo” DAK korxonalariga nisbatan shartnomaviy hajmlardan ortiqcha olingan tabiiy gaz qiymatiga oshiriladigan koeffitsent qoʻllash bekor qilinganligi maʼlumot uchun qabul qilinsin.

2. “Oʻzbekenergo” DAK, “Oʻzbekneftgaz” MXK, Oʻzbekiston Respublikasi Moliya vazirligi va Iqtisodiyot vazirligining 2012-2013-yillar uchun shartnomaviy hajmlardan ortiqcha yetkazib berilgan tabiiy gaz qiymatiga 2 koeffitsentdan foydalangan holda “Oʻzbekenergo” DAK issiqlik elektr stansiyalariga ilgari qoʻllanilgan oshirilgan toʻlovlarni hisobga olmasdan oʻzaro hisob-kitoblarni qayta hisoblab chiqish toʻgʻrisidagi taklifi maʼqullansin.

3. “Oʻzbekenergo” DAK va “Oʻzbekneftgaz” MXK ushbu qarorga muvofiq buxgalteriya hisobi va hisobotiga belgilangan tartibda tegishli oʻzgartirishlar kiritsin.

4. Vazirlar Mahkamasining 2014-yil 24-iyundagi 169-son qarori (Oʻzbekiston Respublikasi QT, 2014-y., 6-son, 65-modda) bilan tasdiqlangan Iqtisodiyot tarmoqlarida gazdan foydalanish qoidalarining 60-bandi quyidagi tahrirda bayon qilinsin:

“60. Isteʼmolchi (Vazirlar Mahkamasining 2004-yil 5-fevraldagi 57-son qaroriga 5-ilovaga kiritilgan “Oʻzbekenergo” DAK korxonalaridan tashqari) tomonidan gaz yetkazib berishga tuzilgan shartnomada belgilanganidan koʻp hajmda va gaz taʼminoti tashkiloti bilan oldindan kelishilmasdan gaz olingan taqdirda isteʼmolchidan shartnomadagi hajmlardan ortiqcha olingan gaz qiymatiga nisbatan 2 koeffitsiyent bilan oshirilgan toʻlov undiriladi.

Bunda isteʼmolchilarga oshirilgan koeffitsent ularning gaz tarmoqlariga ulangan aholi va Vazirlar Mahkamasining 2004-yil 5-fevraldagi 57-son qaroriga 5-ilovaga kiritilgan “Oʻzbekenergo” DAK korxonalari tomonidan isteʼmol qilingan tabiiy gaz hajmini hisobga olmasdan qoʻllaniladi”.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari I.Gʻ.Ibragimov zimmasiga yuklansin.