Respublika investitsiya dasturini samarali bajarish, yirik va strategik jihatdan muhim investitsiya loyihalari oʻz vaqtida amalga oshirilishini taʼminlash, vazirliklar va idoralarning investitsiya loyihalarini, eng avvalo xorijiy sarmoyalar ishtirokidagi investitsiya loyihalarini amalga oshirishga doir faoliyatini muvofiqlashtirishni kuchaytirish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi investitsiya dasturiga kiritilgan loyihalarning amalga oshirilishi ustidan davlat monitoringi toʻgʻrisidagi nizom 1-ilovaga muvofiq;

Xorijiy investitsiyalar ishtirokidagi yirik va strategik jihatdan muhim investitsiya loyihalarini amalga oshirish masalalari boʻyicha muvofiqlashtiruvchi kengash 2-ilovaga* muvofiq tarkibda tasdiqlansin.

2. Belgilansinki, Oʻzbekiston Respublikasi investitsiya dasturiga kiritilgan loyihalarning amalga oshirilishi ustidan davlat monitoringi:

vazirliklar va idoralarning tashabbusi boʻlgan investitsiya loyihalari va takliflar yuzasidan Iqtisodiyot vazirligi, Vazirlar Mahkamasining tegishli komplekslari kotibiyatlari bilan birgalikda Vazirlar Mahkamasining Tashqi iqtisodiy aloqalar va xorijiy investitsiyalar departamenti tomonidan, shuningdek, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari hamda xorijiy investitsiyalar ishtirokidagi korxonalarning tashabbusi boʻlgan investitsiya loyihalari va takliflar yuzasidan Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda Vazirlar Mahkamasining Investitsiya dasturlari departamenti tomonidan;

xorijiy investitsiyalar ishtirokidagi yirik va strategik jihatdan muhim investitsiya loyihalarini amalga oshirish yuzasidan — doimiy ishlovchi Muvofiqlashtiruvchi kengash tomonidan taʼminlanadi.

3. Belgilansinki:

bazaviy tuzilmani belgilovchi korxonalarning va iqtisodiyotning boshqa aloqador tarmoqlari va sohalaridagi korxonalarning rivojlanishiga koʻmaklashuvchi ishlab chiqarishlar qurilishi;

respublika Hukumati kafolati ostida xorijiy sarmoya jalb qilingan obyektlar qurilishi;

eksport salohiyatini rivojlantirishga qaratilgan yuqori texnologiyali va ilm-fanni koʻplab talab qiladigan ishlab chiqarishlarning joriy etilishi;

mineral-xomashyo resurslari va qishloq xoʻjaligi xomashyosini chuqur qayta ishlashni, raqobatga bardoshli tayyor mahsulot ishlab chiqarishni taʼminlaydigan texnologiya jihatidan oʻzaro bogʻliq ishlab chiqarishlarning barpo etilishi (shu jumladan, mahalliylashtirish dasturlari doirasida);

ishlab chiqarish infratuzilmasiga va ijtimoiy infratuzilmaga investitsiyalar qoʻyilishi amalga oshirilishi ustidan monitoring Muvofiqlashtiruvchi kengash tomonidan amalga oshiriladigan xorijiy investitsiyalar ishtirokidagi yirik va strategik jihatdan muhim investitsiya loyihalarini tanlashning asosiy mezonlari hisoblanadi.

4. Oʻzbekiston Respublikasi Vazirlar Mahkamasining Investitsiya dasturlari departamenti, Makroiqtisodiyot va statistika vazirligi, Moliya vazirligi, Markaziy banki 2000-yilgi respublika investitsiya dasturini roʻyobga chiqarishda 3-ilovaga* muvofiq xorijiy investitsiyalar ishtirokidagi yirik va strategik jihatdan muhim loyihalar amalga oshirilishi ustidan monitoring olib borsinlar.

5. Muvofiqlashtiruvchi kengashga:

vazirliklar, idoralar, uyushmalar, korporatsiyalar, konsernlar, kompaniyalar, agentliklar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining, investitsiya jarayoni boshqa qatnashchilarining strategik jihatdan muhim va yirik investitsiya loyihalari amalga oshirilishi masalalari boʻyicha hisobotlarini eshitish;

yirik va strategik jihatdan muhim investitsiya loyihalari roʻyxatiga, ularning amalga oshirilishi ustidan keyinchalik monitoring olib borish uchun, Vazirlar Mahkamasi komplekslari taqdimnomalari asosida oʻzgartirish va qoʻshimchalar kiritish huquqi berilsin.

6. Belgilansinki:

Muvofiqlashtiruvchi kengash majlislari zaruriyatga koʻra, biroq ikki oyda kamida bir marta, manfaatdor vazirliklar va idoralarning rahbarlarini taklif etgan holda oʻtkaziladi;

Muvofiqlashtiruvchi kengashning kengash roʻyxatidagi tarkibining uchdan ikki qismidan iborat ovozi bilan qabul qilinadigan va uning rahbari tomonidan tasdiqlanadigan qarorlari yirik va strategik jihatdan muhim investitsiya loyihalarini amalga oshirish doirasida bajarilishi majburiy hisoblanadi.

7. Investitsiya loyihalarining buyurtmachilari boʻlgan vazirliklar va idoralarning, shuningdek, boshqa manfaatdor vazirliklar va idoralarning rahbarlariga davlat monitoringini tashkil etish uchun zarur boʻlgan axborot toʻliq va oʻz vaqtida taqdim etilishi uchun shaxsiy javobgarlik yuklansin.

8. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.

1. Oʻzbekiston Respublikasi investitsiya dasturiga kiritilgan loyihalarning amalga oshirilishi ustidan davlat monitoringi toʻgʻrisidagi nizom “Chet el investitsiyalari toʻgʻrisida”, “Chet ellik investorlar huquqlarining kafolatlari va ularni himoya qilish choralari toʻgʻrisida”gi Oʻzbekiston Respublikasi qonunlariga, Oʻzbekiston Respublikasi Prezidentining “Xorijiy investitsiyalar ishtirokidagi loyihalarni amalga oshirish mexanizmini takomillashtirish chora-tadbirlari toʻgʻrisida” 1998-yil 9-fevraldagi Farmoniga, Vazirlar Mahkamasining “Oʻzbekiston Respublikasi investitsiya dasturini shakllantirish va amalga oshirish boʻyicha meʼyoriy-huquqiy hujjatlarni tasdiqlash toʻgʻrisida” 1999-yil 13-sentabrdagi 420-son qaroriga muvofiq ishlab chiqilgan.

2. Oʻzbekiston Respublikasi investitsiya dasturiga kiritilgan loyihalarning amalga oshirilishi ustidan davlat monitoringi (keyingi oʻrinlarda Monitoring deb ataladi) Oʻzbekiston Respublikasi investitsiya dasturiga kiritilgan investitsiya loyihalarining amalga oshirilishini boshqarish va nazorat qilishning asosiy mexanizmi hisoblanadi.

3. Quyidagilar:

respublika investitsiya dasturiga kiritilgan va, birinchi navbatda, xorijiy investitsiyalarni jalb etish hisobiga amalga oshiriladigan investitsiya loyihalarining oʻz vaqtida va samarali roʻyobga chiqarilishini taʼminlash;

davlat boshqaruvi organlarining, investitsiya jarayoni boshqa qatnashchilarining faoliyatini muvofiqlashtirish, ularning investitsiya loyihalarini amalga oshirish bilan bogʻliq masalalarni oʻz vaqtida hal etish yuzasidan javobgarligini oshirish;

investitsiya loyihalari harakatiga ularni amalga oshirishning barcha bosqichlarida toʻsqinlik qilayotgan omillarni aniqlash va oʻrganish, ularni, shu jumladan, investitsiya loyihalarining amalga oshirilishi bilan bogʻliq boʻlgan turli xil masalalarni koʻrib chiqish muddatlarini oʻzgartirish yoʻli bilan bartaraf etish boʻyicha tezkor chora-tadbirlar koʻrish;

investitsiya loyihalarini tasdiqlangan hajmlar va muddatlarga qatʼiy rioya qilgan holda mablagʻlar bilan uzluksiz taʼminlash;

investitsiya loyihasi boʻyicha xorijiy sheriklar oldida qabul qilingan majburiyatlarning soʻzsiz bajarilishini taʼminlash;

investitsiya iqlimini takomillashtirish boʻyicha takliflar ishlab chiqish;

investitsiya dasturiga kiritilgan loyihalar va takliflar boʻyicha maʼlumotlar bankini shakllantirish monitoringning asosiy vazifalari hisoblanadi.

4. Aniq dasturga va Oʻzbekiston Respublikasi investitsiya dasturining tarkibiy qismi boʻlgan investitsiya takliflarining yigʻma roʻyxatiga kiritilgan investitsiya loyihalari monitoring obyekti hisoblanadi.

5. Oʻzbekiston Respublikasi Vazirlar Mahkamasining investitsiya dasturini tasdiqlash toʻgʻrisidagi qarori chiqqan vaqtdan boshlab bir oy muddatda Vazirlar Mahkamasining Tashqi iqtisodiy aloqalar va xorijiy investitsiyalar departamenti (keyingi oʻrinlarda Departament deb ataladi) vazirliklar va idoralar, korxonalar va buyurtmachi tashkilotlar bilan birgalikda investitsiya loyihalarining aniq dasturiga, shuningdek, investitsiya dasturining tarkibiy qismi boʻlgan ustuvor investitsiya takliflarining yigʻma roʻyxatiga kiritilgan loyihalar boʻyicha maʼlumotlar bankini shakllantiradi.

6. Maʼlumotlar banki:

investitsiya loyihalarining aniq dasturiga kiritilgan investitsiya loyihasi pasporti;

har bir investitsiya loyihasini amalga oshirishning investitsiya loyihalari buyurtmachilari tomonidan Departament bilan kelishilgan holda tasdiqlanadigan reja-jadvallari;

ustuvor investitsiya takliflarining yigʻma roʻyxatiga kiritilgan investitsiya takliflari boʻyicha ishlab chiqiladigan yangidan boshlanayotgan ustuvor investitsiya loyihalarini olgʻa surish chora-tadbirlari dasturi asosida shakllantiriladi.

7. Loyiha pasportida loyiha buyurtmachisi, xorijiy sherik, loyihaning umumiy qiymati va barpo etilayotgan ishlab chiqarishning loyihadagi quvvati, mahsulotni eksport qilish, mablagʻ bilan taʼminlash manbalari va sxemasi boʻyicha prognoz koʻrsatkichlar, loyihaning qoplanish va qarz mablagʻlarni qaytarish muddatlari toʻgʻrisidagi axborotlar, shuningdek, zarurat boʻlganda, xorijiy investitsiyalar ishtirokida tashkil etilayotgan korxona boʻyicha maʼlumotlar boʻladi.

8. Reja-jadvalda yangi tashkil etilayotgan korxonaning texnik-iqtisodiy asoslanishini ishlab chiqish, ekspertizadan oʻtkazish va tasdiqlash, roʻyxatdan oʻtkazish, asosiy kontraktni tuzish va roʻyxatdan oʻtkazish (zarurat boʻlganda), loyiha boʻyicha Vazirlar Mahkamasi qarorini kelishish va qabul qilish, kredit bitimlarini imzolash, loyiha-smeta hujjatlarini ishlab chiqish, kelishish va tasdiqlash, milliy va xorijiy valyutada mablagʻ bilan taʼminlashni boshlash, ishlab chiqarish maydonlarini va infratuzilma obyektlarini qurish, texnologiya asbob-uskunalarini oʻrnatish, korxonaning loyihadagi quvvatga chiqishi boʻyicha aniq muddatlar toʻgʻrisidagi axborotlar boʻladi.

9. Chora-tadbirlar dasturi investitsiyalashdan oldin loyihalarning texnik-iqtisodiy asoslanishini tasdiqlash va mablagʻ bilan taʼminlashning aniq manbalarini belgilashgacha boʻlgan ishlar kompleksini (ularni bajarishning prognoz muddatlarini koʻrsatgan holda) oʻz ichiga oladi.

10. Maʼlumotlar banki yilning har choragida chorak tugagandan keyingi oyning 15-kunidan kechikmay Oʻzbekiston Respublikasi Vazirlar Mahkamasiga:

kapital qoʻyilmalarning oʻzlashtirilishiga doir har chorakdagi majburiy statistika hisoboti boʻyicha — Oʻzbekiston Respublikasi Davlat statistika qoʻmitasi tomonidan;

markazlashtirilgan investitsiyalardan, shu jumladan, Hukumat kafolati ostida jalb etiladigan xorijiy investitsiyalar va kreditlardan foydalanish boʻyicha — Moliya vazirligi, Markaziy bank va tijorat banklari tomonidan (kelishuv boʻyicha);

xorijiy investitsiyalar ishtirokidagi korxonalarni davlat roʻyxatidan oʻtkazish boʻyicha — Adliya vazirligi tomonidan;

xususiylashtirilayotgan korxonalar aksiyalari paketini xorijiy investorlarga sotish, mulkida davlat mulki ulushi boʻlgan xorijiy investitsiyalar ishtirokidagi korxonalar faoliyati, shuningdek, kichik va oʻrta biznes sohasidagi, shu jumladan, jalb etilayotgan xorijiy kredit liniyalari ishtirokidagi, investitsiya loyihalari boʻyicha — Davlat mulki qoʻmitasi tomonidan taqdim etiladigan axborotlar hisobiga toʻldirib boriladi.

11. Maʼlumotlar bankiga investitsiya dasturida nazarda tutilgan kapital qoʻyilmalar hajmlari prognozini belgilangan tartibda aniqlashtirish natijalari boʻyicha tuzatishlar kiritilishi mumkin.

12. Departament Iqtisodiyot vazirligi, Vazirlar Mahkamasi komplekslari kotibiyatlari, viloyatlar va Toshkent shahar hokimliklari bilan birgalikda muntazam ravishda, shu jumladan, joylarga borib, Hukumat qarorlariga, shuningdek, tasdiqlangan reja-jadvallarga muvofiq investitsiya loyihalarini amalga oshirish ishlarining ahvolini oʻrganadi.

Departament mazkur ishni tashkil etish uchun turli vazirliklar va idoralar yoxud xalqaro tashkilotlar va konsultatsiya kompaniyalari mutaxassislarini jalb etishi mumkin.

13. Departament tomonidan monitoring:

investitsiya loyihalari buyurtmachilari bilan kelishib olingan shakl boʻyicha Vazirlar Mahkamasiga har oyda taqdim etiladigan tasdiqlangan reja-jadvallarning bajarilishi toʻgʻrisidagi axborotlarni;

loyihalarning amalga oshirilishi Xorijiy investitsiyalar ishtirokidagi yirik va strategik muhim investitsiya loyihalarini amalga oshirish boʻyicha muvofiqlashtiruvchi kengash tomonidan olib boriladigan monitoring natijalarini;

respublikaning eng muhim obyektlarini foydalanishga topshirish boʻyicha Respublika shtabining har oygi axborotlarini;

Oʻzbekiston Respublikasi Davlat statistika qoʻmitasi tomonidan Oʻzbekiston Respublikasi boʻyicha xorijiy investitsiyalar va kreditlar ishtirokidagi investitsiya loyihalarining roʻyobga chiqarilishi toʻgʻrisida har oyda taqdim etiladigan statistika axborotlari (byulleten)ni;

amaldagi va potensial xorijiy investorlarning ular faoliyatining meʼyoriy-huquqiy bazasini takomillashtirish boʻyicha takliflarini oʻrganish asosida Xorijiy investitsiyalar boʻyicha agentlik tomonidan vaqti-vaqti bilan tayyorlanadigan investitsiya iqlimi toʻgʻrisidagi maʼlumotlarni;

manfaatdor vazirliklar va idoralar tomonidan Departamentga taqdim etiladigan tezkor axborotlarni tahlil qilish va umumlashtirish yoʻli bilan amalga oshiriladi.

14. Xorijiy investitsiyalar ishtirokidagi yirik va strategik muhim investitsiya loyihalarining amalga oshirilishi monitoringi Muvofiqlashtiruvchi kengash tomonidan:

a) tasdiqlangan reja-jadvallar bajarilishini, loyihalarni amalga oshirish yuzasidan zarur ishlar kompleksini olib borishning texnologik izchilligiga rioya etilishini nazorat qilish;

b) texnik-iqtisodiy asoslashlarning asosiy qoidalarini koʻrib chiqish, loyihalarni amalga oshirish mumkinligi yuzasidan umumiy qarorlar qabul qilish;

v) alohida yirik loyihalar, shu jumladan, texnik-iqtisodiy asoslashlar koʻrsatkichlariga nisbatan loyihalarning qimmatlashishi yoki arzonlashishi mumkinligini hisobga olgan holda bazaviy loyihalashtirishni tasdiqlash;

g) markazlashtirilgan manbalar hisobiga ajratiladigan mablagʻlarning oʻz vaqtida moliyalashtirilishini va ulardan samarali foydalanilishini taʼminlash, Hukumat kafolati ostida jalb etiladigan qarz mablagʻlarning oʻz vaqtida qaytarilishi taʼminlanishini nazorat qilish;

d) manfaatdor vazirliklar va buyurtmachi idoralar tomonidan ishlab chiqilgan ehtiyot qismlar va komponentlar ishlab chiqarishni mahalliylashtirish dasturlarini, shuningdek, ishlab chiqarilgan mahsulotlarning tashqi bozorlarga kirib borishi boʻyicha marketing dasturlarini ekspertizadan oʻtkazish;

e) ayrim strategik muhim va yirik loyihalarni davlat tomonidan qoʻllab-quvvatlash chora-tadbirlari, qurilishi amaldagi qonun hujjatlari buzilgan holda amalga oshirilayotgan loyihalarni mablagʻ bilan taʼminlashni toʻxtatib qoʻyish, shuningdek, investitsiya dasturi bajarilishi barbod boʻlishiga yoʻl qoʻyuvchi vazirliklar va idoralar, korxonalar va buyurtmachi tashkilotlarning rahbarlarini javobgarlikka tortish yuzasidan takliflar va tavsiyalar ishlab chiqish;

j) xorijiy investitsiyalar ishtirokidagi yirik va strategik muhim investitsiya loyihalarini oʻz vaqtida roʻyobga chiqarishga koʻmaklashuvchi boshqa zarur masalalarni koʻrib chiqish yoʻli bilan amalga oshiriladi.

15. Departament Iqtisodiyot vazirligi bilan birgalikda oʻtkazilgan tahlil asosida investitsiya dasturining amalga oshirilishi toʻgʻrisida yigʻma axborot tayyorlaydi va uni Vazirlar Mahkamasining navbatdagi majlisida koʻrib chiqish uchun taqdim etadi.

Yigʻma axborot mablagʻ bilan taʼminlash manbalari boʻyicha kapital mablagʻlarning oʻzlashtirilishi yuzasidan umumlashtirilgan maʼlumotlar bilan bir qatorda loyihalar buyurtmachilari boʻlgan vazirliklar va idoralar tomonidan amalga oshirilayotgan investitsiya loyihalari va takliflarni amalga oshirishning quyidagi asosiy bosqichlari:

investitsiyalashdan oldingi tadqiqotlarning oʻtkazilishi, texnik-iqtisodiy asoslashlar va loyiha-smeta hujjatlarining ishlab chiqilishi;

ekspertiza qilish vakolati berilgan organlar tomonidan texnik-iqtisodiy asoslashlar va loyiha-smeta hujjatlarining ekspertiza qilinishi;

mablagʻ bilan taʼminlashning tasdiqlangan sxemalariga muvofiq investitsiya loyihalarining oʻz vaqtida mablagʻ bilan taʼminlanishi;

qurilish-montaj ishlarini bajarish va obyektlarni ishga tushirish muddatlariga va texnologik izchilligiga rioya qilinishi;

Hukumat kafolati ostidagi loyihalarni amalga oshirish uchun jalb qilinadigan kredit mablagʻlaridan foydalanish va ularni qaytarish muddatlari va shartlariga rioya qilinishi;

loyihalar buyurtmachilari tomonidan loyihalarni investitsiya loyihalarining aniq dasturiga kiritish uchun asos hisoblanadigan loyihalarning texnik-iqtisodiy asoslashlarida ifodalangan investitsiyalash shartlariga rioya qilinishi;

investitsiya dasturiga kiritilgan investitsiya loyihalarini amalga oshirishni taʼminlash boʻyicha aniq chora-tadbirlarni asoslagan holda takliflar boʻyicha maʼlumotlardan iborat boʻladi.

16. Investitsiya dasturini amalga oshirishning yigʻma tahlili, shuningdek, qoʻshimcha tahliliy axborot asosida, Departament:

shakllanayotgan yoʻnalishlarni oʻrganib chiqadi, investitsiya loyihalarini amalga oshirishdagi byurokratik toʻsiqlarni aniqlaydi, xorijiy investorlar uchun mavjud imtiyozlar va afzalliklar tizimining samaradorligini tahlil qiladi;

investitsiya faoliyatining meʼyoriy-huquqiy bazasini takomillashtirish yuzasidan takliflar va tavsiyalar ishlab chiqadi;

investitsiya jarayoni samaradorligini oshirish uchun zarur boʻlgan hukumat qarorlarini tayyorlash ishlarini tashkil etadi;

investitsiya dasturini shakllantirish va amalga oshirishning muammoli masalalari boʻyicha vazirliklar, idoralar, tashkilotlar, mahalliy hokimiyat va boshqaruv organlarining hisobotlarini tinglaydi va oʻz vakolatlari doirasida ularga topshiriqlar beradi;

investitsiya dasturini shakllantirish va uning bajarilishini taʼminlash uchun zarur boʻlgan boshqa ishlarni tashkil etadi.

17. Zarur qarorlar qabul qilish uchun har chorakda:

investitsiya dasturiga kiritilgan loyihalarning amalga oshirilishi Vazirlar Mahkamasining tegishli komplekslari majlislarida koʻrib chiqiladi;

monitoring natijalari Vazirlar Mahkamasining iqtisodiy islohotlarning borishi va mamlakatni ijtimoiy-iqtisodiy rivojlantirishning asosiy yakunlariga bagʻishlangan majlislarida tinglanadi.