Quyida “Ahdlashuvchi Tomonlar” deb yuritiluvchi, Oʻzbekiston Respublikasi Hukumati va Vyetnam Sotsialistik Respublikasi Hukumati,

har ikkala davlatning oʻzaro manfaatdorligi uchun ular oʻrtasida uzoq muddat asosida yanada kengroq iqtisodiy hamkorlikka koʻmaklashishni istagan holda,

bir Ahdlashuvchi Tomon davlati investorlarining investitsiyalari uchun boshqa Ahdlashuvchi Tomon davlati hududida manfaatli sharoitlar yaratish va ularni saqlash maqsadida investitsiyalarni ragʻbatlantirish va himoyalash zaruratini eʼtirof etgan holda,

investitsiyalarning barqaror asosi iqtisodiy manbalardan foydalanishning yuksak samaradorligi va ishlab chiqarish kuchlarini rivojlantirishni taʼminlashiga kelishgan holda,

quyidagilar xususida ahdlashdilar:

Mazkur Bitim maqsadlari uchun:

1. “Investor” atamasi quyidagilarga tatbiq etiladi va ularni oʻz ichiga oladi:

(I) Ahdlashuvchi Tomonlarning davlatlari;

(II) Ahdlashuvchi Tomonlar davlatlarining yuridik shaxslari;

(III) Ahdlashuvchi Tomonlarning fuqarolari, fuqarolar birlashmalari;

(IV) Ahdlashuvchi Tomonlar davlatlarining doimiy ravishda chet elda yashovchi fuqarolari.

2. “Investitsiyalar” atamasi mulkiy boyliklarning istalgan koʻrinishi va ularga boʻlgan huquqlarni, shuningdek mualliflik huquqi, patentlar, foydali modellar, sanoat andozalari va modellari, savdo belgilari, firmaviy nomlar, ishlab chiqarish va tijorat sirlari, texnologiyalar, “gud vil” va “nou-xau” singari intellektual mulk, savdo va sanoat mulkiga boʻlgan huquqlarni anglatadi.

3. Investitsiyalar Ahdlashuvchi Tomonlar davlatlari hududida quyidagi yoʻllar bilan amalga oshiriladi:

I) toʻlaligicha investorlarga yoki ulardagi ishtirok ulushi asosida investorlarga tegishli boʻlgan xoʻjalik jamiyatlari va shirkatlari, banklar, sugʻurta tashkilotlari va boshqa korxonalarni barpo etish;

II) mol-mulklar, aksiyalar va boshqa qimmatbaho qogʻozlarni sotib olish;

III) mulkiy huquqlarni, shu jumladan ijara huquqi hamda yer va tabiiy resurslardan foydalanish huquqini sotib olish;

IV) investitsiyalangan joydagi Ahdlashuvchi Tomon davlati hududida amalda boʻlgan qonunchilikka xilof boʻlmagan investitsiyalarni amalga oshirish boʻyicha boshqa faoliyat.

Dastlab yoki takroriy ravishda boyliklar kiritilgan shaklning hech qanday oʻzgarishi ularning investitsiyalar sifatidagi kvalifikatsiyasining oʻzgarishiga olib kelmaydi.

4. “Yuridik shaxslar” atamasi oʻz maqomini Ahdlashuvchi Tomonlardan birining davlati qonunchiligiga koʻra olgan va boshqa Ahdlashuvchi Tomonning davlati hududida investitsiyalarni amalga oshirayotgan yuridik shaxslarni bildiradi.

5. “Fuqarolar” atamasi Ahdlashuvchi Tomon davlatining qonunchiligiga muvofiq fuqarolikka va huquqlarga ega boʻlgan, hamda doimiy ravishda uning hududida yoki chet elda istiqomat qiluvchi va boshqa Ahdlashuvchi Tomon hududida investitsiyalarni amalga oshiruvchi shaxslarni anglatadi.

6. “Daromadlar” atamasi mazkur moddada, 2, 3-bandlarda taʼriflangan foyda, foizlar, dividendlar, royalti, litsenzion va komission ragʻbatlantirishlar, texnik yordam uchun toʻlovlar, texnik xizmat koʻrsatish va ragʻbatlantirishning boshqa shakllari koʻrinishidagi investitsiyalar natijasida olingan summalarni, ammo nafaqat ularni anglatadi.

7. “Hudud” atamasi Ahdlashuvchi Tomon davlatining ana shu Ahdlashuvchi Tomon davlati xalqaro huquq va milliy qonunchilikka muvofiq oʻz suvereniteti, suveren huquqlari va yurisdiksiyasini amalga oshiradigan (shu jumladan orollar, dengiz tubi va hududiy suvlarni ham oʻz ichiga oluvchi) tegishli hududini anglatadi.

Mazkur Bitim, u qonuniy kuchga kirishidan avval yoki undan soʻng amalga oshirilganligidan qatʼi nazar, bir Ahdlashuvchi Tomon davlatining hududida uning qonunchiligiga muvofiq boshqa Ahdlashuvchi Tomon davlatining investorlari amalga oshirgan investitsiyalarga nisbatan qoʻllanadi.

1. Har bir Ahdlashuvchi Tomon oʻz davlatining qonunchiligida berilgan huquqlarga muvofiq oʻz davlati hududida boshqa Ahdlashuvchi Tomon davlati investorlarining investitsiyalariga ruxsat beradi va ularni ragʻbatlantiradi, shuningdek ularning toʻliq huquqiy himoyasini kafolatlaydi.

2. Har bir Ahdlashuvchi Tomon oʻz davlatining qonunchiligi doirasida oʻz davlati hududida oʻzaro investitsiyalarning turli xil shakllarini qoʻllab-quvvatlaydi va boshqa Ahdlashuvchi Tomon davlati investorlarining investitsiyalarini himoyalash vositasida iqtisodiy hamkorlikni taʼminlaydi.

3. Ahdlashuvchi Tomonlar davlatlari hududida Ahdlashuvchi Tomonlarning bevosita investitsiyalar va koʻptomonli iqtisodiy loyihalarni amalga oshirishda Ahdlashuvchi Tomonlar ularning davlatlari investorlari tomonidan investitsiyalangan korxonalarga koʻmaklashish zaruratidan kelib chiqadilar.

4. Agar Ahdlashuvchi Tomon ushbu Bitim doirasida oʻz davlati hududida investitsiyalarga ruxsat bergan boʻlsa, ana shu Ahdlashuvchi Tomon oʻz davlatining qonunchiligiga muvofiq boshqa Ahdlashuvchi Tomon davlatining investorlariga bunday investitsiyalar bilan bogʻliq boʻlgan tegishli ruxsatnomalar beradi.

1. Har bir Ahdlashuvchi Tomon oʻz davlati hududida boshqa Ahdlashuvchi Tomon davlati investorlarining investitsiyalari va daromadlari uchun istalgan uchinchi davlat investorlarining investitsiyalari va daromadlari uchun yaratib berilgan qulay rejimdan kam boʻlmagan adolatli va teng huquqli rejim yaratadi.

2. Har bir Ahdlashuvchi Tomon boshqa Ahdlashuvchi Tomon davlatining investorlari amalga oshiradigan investitsiyalariga nisbatan uning milliy qonunchiligi va mazkur Bitimdan kelib chiquvchi har qanday majburiyatlarga rioya qiladi.

3. Ushbu Bitimning eng yuqori qulaylik prinsiplariga oid qoidalari bir Ahdlashuvchi Tomonni boshqa Ahdlashuvchi Tomon davlatining investorlariga quyidagilardan kelib chiquvchi preferensiyalar yoki yengilliklarning imtiyozli rejimini tatbiq qilishga majburlovchi vosita sifatida talqin qilinmasligi lozim:

I) mavjud boʻlgan yoki kelgusida boʻlajak bojxona, valyuta va toʻlov uyushmalari, erkin savdo va yagona tarif, umumiy bozor zonalari yoki Ahdlashuvchi Tomonlardan biri ishtirokchisi boʻlgan yoki ishtirokchisi boʻlishi mumkin boʻlgan mintaqaviy iqtisodiy integratsiya toʻgʻrisidagi Bitimning istalgan boshqa shakllari;

II) ikki tomonlama soliq solishga yoʻl quymaslik toʻgʻrisidagi bitimlar yoki soliq solish masalalari boʻyicha boshqa xalqaro bitimlar.

1. Davlati hududida boshqa Ahdlashuvchi Tomon davlati investorlarining investitsiyalari amalga oshirilgan Ahdlashuvchi Tomon oʻsha investorlar tomonidan tegishli soliqlar va yigʻimlar toʻlangandan soʻng ana shu investitsiyalar bilan bogʻliq boʻlgan toʻlovlarning, ammo nafaqat ularning, xususan quyidagilarning toʻsqinliklarsiz oʻtkazilishini taʼminlaydi:

I) mazkur Bitimning 1-moddasi, 6-bandida taʼriflangan foizlar, dividendlar, foyda va boshqa joriy daromadlar;

II) har ikkala Ahdlashuvchi Tomon investitsiya sifatida tan olgan zayomlarning puli toʻlanadigan summalar;

III) investitsiyalarni boshqarish bilan bogʻliq boʻlgan xarajatlarni qoplovchi summalar;

IV) litsenzion tushumlar va ushbu Bitimning 1-moddasi, 2-bandida koʻzda tutilgan huquqlardan kelib chiquvchi boshqa toʻlovlar;

V) boshqa Ahdlashuvchi Tomon hududida amalga oshiriladigan investitsiyalarni taʼminlash yoki rivojlantirish, shuningdek bunday investitsiyalarning menejmenti uchun zarur boʻlgan sarmoyalar summasi va qoʻshimcha summalar;

VI) investitsiyalarni musodara qilish, qisman yoki butunlay tugatish, shu jumladan sarmoyalarning oʻsishidan kelgan tushumlar;

VII) bir Ahdlashuvchi Tomon fuqarolarining boshqa Ahdlashuvchi Tomon davlati hududida amalga oshirilgan investitsiyalar munosabati bilan oladigan ish haqi;

VIII) mazkur Bitimning moddalariga muvofiq beriladigan tovon toʻlovlari va ushbu Bitim doirasidagi har qanday investitsion nizolar bilan bogʻliq boʻlgan boshqa toʻlovlar.

2. Toʻlovlar ortiqcha kechiktirishsiz, toʻlovlar amalga oshirilayotgan kundagi valyuta kursi boʻyicha va hududida investitsiyalar amalga oshirilgan Ahdlashuvchi Tomon davlatining qonunchiligida koʻzda tutilgan tartibotlarga muvofiq erkin muomaladagi valyutada oʻtkaziladi.

3. Mazkur moddaning qoidalari, 1-2-bandlaridan qatʼi nazar, Ahdlashuvchi Tomon adolatli, huquqiy jihatdan kamsitmaslik shartlari asosida oʻz davlati qonunchiligini koʻllagan holda, quyidagilarga taalluqli boʻlgan toʻlovlarni oʻtkazishni taqiqlashi mumkin:

I) bankrotlik, toʻlovlarga qurbi yetmagan yoki kreditorlar huquqini himoya qilish hollarida;

II) emissiya, savdo yoki qimmatdor qogʻozlar bilan operatsiyalar;

III) jinoiy harakatlar va maʼmuriy jinoyatlar;

IV) sudda koʻrib chiqish tartibi yoki uning qarorlari bilan nomuvofiqlik yuzaga kelganda.

4. Daromadlar hamda ushbu moddada qayd etilgan va bir Ahdlashuvchi Tomon davlati investorlari boshqa Ahdlashuvchi Tomonning davlati hududida amalga oshirgan investitsiyalari natijasida investitsiyalangan joydagi manbalardan olingan istalgan valyutadagi boshqa summalar qayta investitsiya qilinishi yoki boshqa Ahdlashuvchi Tomon davlati hududida, uning qonunchiligiga muvofiq oʻzga maqsadlar uchun sarflanishi mumkin.

5. Ahdlashuvchi Tomonlar davlatlarining valyutalarini va boshqa davlatlarning valyutalarini, toʻlov hujjatlarini, qimmatdor qogʻozlarini olib kelish va olib ketish investitsiyalar amalga oshirilgan joydagi Ahdlashuvchi Tomon davlatining valyutani tartibga solish toʻgʻrisidagi qonunchiligi asosida tartibga solib boriladi.

1. Ahdlashuvchi Tomonlar boshqa Ahdlashuvchi Tomon davlatining investorlariga qarashli boʻlgan investitsiyalarga nisbatan musodara qilish, natsionalizatsiya qilish yoki mohiyati shunga oʻxshash boshqa tadbirlarni, yoxud natijasi shunday oqibatlarga olib keluvchi bevosita yoki bilvosita xatti-harakatlarni qoʻllamaydilar, agar ular koʻyidagilar bilan bogʻliq boʻlmasa:

I) jamoatchilik manfaatlari yoʻlida qonuniy tartibda qoʻllaniladigan choralar;

II) huquqiy jihatdan kamsitmaydigan tarzdagi yoki boshqa Ahdlashuvchi Tomonning harakat-tadbirlariga javoban qabul qilingan choralar.

2. Ushbu moddaning 1 - I, II-bandlarida qayd etilgan holatlar oqibatida investitsiyalarni musodara qilayotgan Ahdlashuvchi Tomon boshqa Ahdlashuvchi Tomon davlatining investorlarini adolatli va foydali tovon toʻlovlari bilan taʼminlaydi. Bunday toʻlovlar investitsiyalarni musodara qilish yoki musodara qilish xususidagi qaror barchaga ovoza qilingan vaqtda (bundan avval qanday hol yuz berganligiga bogʻliq ravishda) belgilangan bozor narxiga muvofiq boʻladi va investitsiyalar musodara qilingan kundan boshlab “Libor” stavkasi boʻyicha investitsiyalar qiymatining foizlarini qamrab oladi hamda erkin ravishda istalgan joyga oʻtkaziladi. Tovon toʻlovlari erkin muomaladagi valyutada belgilanadi hamda investorga joylashgan manzili va yashash joyidan qatʼi nazar, hech qanday kechikishsiz oʻz vaqtida toʻlanadi. “Ortiqcha kechikishsiz” pul oʻtkazish — ana shu pul bilan rasmiy tadbirlarni amalga oshirish uchun meʼyor talabidagi vaqtni taqozo etuvchi pul hisoblanadi. Bu davr boʻyicha hisob buyurtma berilgan kundan boshlanadi va u uch oydan oshmasligi lozim.

3. Ahdlashuvchi Tomonlardan birining davlati investorlariga boshqa Ahdlashuvchi Tomonning davlati hududida sodir boʻlgan urush yoki qurolli toʻqnashuv, inqilob, favqulodda holat, davlat toʻntarishi, fuqarolik tartibsizliklari yoki shunga oʻxshash boshqa voqealar oqibatida yetkazilgan zararlarni qoplash uchun ushbu Bitimning 4-moddasi, 1, 2, 3-bandlariga muvofiq tovon toʻlovi, restitutsiya, ziyonni qoplash yoki boshqa talofat qiymati toʻlovlari toʻlanadi.

4. Bir Ahdlashuvchi Tomon davlatining investorlari boshqa Ahdlashuvchi Tomonning davlati hududida ana shu Ahdlashuvchi Tomonning davlat organlari, yoki mansabdor shaxslarining investitsiyalar amalga oshirilgan joydagi davlat qonunchiligiga xilof boʻlgan xatti-harakati tufayli, shuningdek birinchi Ahdlashuvchi Tomon investorlariga yoki investitsiyalangan korxonalarga nisbatan bunday organlar yoki mansabdor shaxslar tomonidan qonunchilikda belgilangan majburiyatlarni zarur darajada bajarmaslik oqibatida oʻz investitsiyalariga yetkazilgan zararlar, shu jumladan boy berilgan foyda uchun tegishli tovon toʻlovlari olish huquqiga ega.

1. Agar Ahdlashuvchi Tomonlardan biri yoxud uning vakolatli institutlari oʻz investorlarining boshqa Ahdlashuvchi Tomonning davlati hududida amalga oshirilgan investitsiyalariga nisbatan tijorat xavfidan biror-bir kafolat bergan boʻlsa, va ana shu kafolatga koʻra toʻlovlarni amalga oshirgan boʻlsa, boshqa Ahdlashuvchi Tomon subrogatsiya prinsiplari asosida, mazkur investorlarning bunday tarzda sugʻurtalangan investitsiyalari bilan bogʻliq boʻlgan majburiyatlarini izohlagan holda, bu investorlarning huquq va talablari butunlay birinchi Ahdlashuvchi Tomonga yoki uning vakolatli institutlariga oʻtishini tan olishi lozim.

2. Agar investor Ahdlashuvchi Tomon yoki uning vakolatli instituti tomonidan vakil etib tayinlanmagan boʻlsa, mazkur moddaning 1-bandida taʼriflangan subrogatsiya holatida talabnoma bilan chiqishga haqli emas.

3. Boshqa Ahdlashuvchi Tomon davlatining investori bilan boʻlgan nizoda tomon hisoblanuvchi Ahdlashuvchi Tomon, nizoni hal etish yoki unga oid qarorni bajarilishining butun jarayoni mobaynida himoya sifatida oʻz immuniteti yoki keyingi Ahdlashuvchi Tomonga yoki uning institutlariga kafolatlar berilishi koʻzda tutilmagan, va koʻrilgan zarar va talofatlarni toʻlaligicha yoki qisman qoplovchi sugʻurta kontraktlari boʻyicha investor oladigan tovon toʻlovlariga asoslanishi mumkin emas.

Har bir Ahdlashuvchi Tomon boshqa Ahdlashuvchi Tomonga mazkur Bitimni talqin qilish yoki qoʻllash bilan bogʻliq boʻlgan har qanday sababga koʻra konsultatsiyalar oʻtkazishni taklif etishi mumkin. Boshqa Ahdlashuvchi Tomon esa bunday taklifga xayrixoh munosabatda boʻladi va konsultatsiyalar uchun zaruriy imkoniyatlar yaratadi.

1. Mazkur Bitim qoidalarini talqin qilish va qoʻllash xususida Ahdlashuvchi Tomonlar oʻrtasidagi nizolar diplomatik vositalar orqali hal etiladi.

2. Agar Ahdlashuvchi Tomonlar nizo paydo boʻlgan vaqtdan boshlab olti oy mobaynida murosaga kelolmasalar, Ahdlashuvchi Tomonlardan birining talabiga koʻra, nizo, koʻrib chiqish uchun uch aʼzodan iborat tarkibdagi arbitraj Sudiga topshiriladi. Ahdlashuvchi Tomonlarning har biri bittadan arbitr tayinlaydi. Tayinlangan arbitrlar saylaydigan Rais esa uchinchi davlat fuqarosi boʻlib, u har ikkala Ahdlashuvchi Tomon bilan ham diplomatik munosabatda boʻladi.

3. Agar Ahdlashuvchi Tomonlardan biri arbitr tayinlamasa va ikki oy muddat mobaynida ikkinchi Ahdlashuvchi Tomonning arbitr tayinlash toʻgʻrisidagi taklifiga rozi boʻlmasa, ikkinchi Ahdlashuvchi Tomon zaruriy tayinlov xususida Xalqaro Sud Prezidentiga murojaat qilishi mumkin.

4. Har ikkala arbitr tayinlangan kundan boshlab ikki oy muddat mobaynida Rais saylashda murosaga kelolmagan holda, istalgan Ahdlashuvchi Tomon zaruriy tayinlov xususida Xalqaro Sud Prezidentiga murojaat qilishi mumkin.

5. Ushbu moddaning 3 va 4-bandlarida qayd etilgan hollarda Xalqaro Sud Prezidenti belgilangan vazifalarni bajarolmasa yoki, basharti u Ahdlashuvchi Tomonlardan birining fuqarosi boʻlsa, tayinlov Prezidentning oʻrinbosari tomonidan amalga oshirildi, bordi-yu u ham tegishli vazifalarni bajarolmasa yoki Ahdlashuvchi Tomonlardan birining fuqarosi boʻlsa, Rais Ahdlashuvchi Tomonlardan hech qaysisining fuqarosi boʻlmagan, Xalqaro Sudning eng yuqori lavozimli sudyasi tomonidan tayinlanadi.

6. Sud qonunga hurmat asosida qaror qabul qiladi. Qaror qabul qilishdan avval Sud oʻz ishining istalgan bosqichida Ahdlashuvchi Tomonlarga nizoni doʻstona tarzda hal etishni taklif etishi mumkin. Agar Ahdlashuvchi Tomonlar shunday qarorga kelsalar, bundan avvalgi qoidalar unga toʻsiq boʻlolmaydi.

7. Ahdlashuvchi Tomonlar oʻrtasidagi qarorlarni buzmagan holda, Sud oʻz tartib-qoidalarini belgilaydi. Sud koʻpchilik ovoz bilan qaror qabul qiladi.

8. Ahdlashuvchi Tomonlarning har biri oʻz sud aʼzolari uchun sarflangan xarajatlarni, shuningdek arbitraj tadbiridagi oʻz ulushiga muvofiq xarajatlarni toʻlaydi. Rais uchun sarflanadigan va boshqa xarajatlarni Ahdlashuvchi Tomonlar teng tarzda toʻlaydilar. Biroq, Sud oʻz qarorida Ahdlashuvchi Tomonlardan biri uchun koʻproq xarajat toʻlovlari belgilashi mumkin. Bunday qaror esa har ikkala Ahdlashuvchi Tomon uchun majburiydir.

9. Sud qarorlari Ahdlashuvchi Tomonlarning har ikkalasi uchun ham tugal va majburiy hisoblanadi.

1. Bir Ahdlashuvchi Tomon va boshqa Ahdlashuvchi Tomonning istalgan investori oʻrtasida quyidagilarga taalluqli nizo yuzaga kelgan holda:

a) shu Ahdlashuvchi Tomonning boshqa Ahdlashuvchi Tomon investori oldida uning investitsiyalari masalasiga nisbatan yuzaga kelgan majburiyatlari;

b) mazkur Bitimda belgilangan yoki shu investorning investitsiyalari boʻyicha undan kelib chiquvchi biror-bir huquqlarning buzilishi; nizolar imkon qadar oʻzaro konsultatsiyalar va muzokaralar yoʻli bilan hal etiladi.

2. Nizolashuvchi Tomonlar yozma tarzda talabnoma taqdim etgandan soʻng olti oy mobaynida oʻzaro kelishuvga erishilmasa, Tomonlardan birining talabiga koʻra bunday nizo koʻrib chiqish uchun:

a) investitsiyalar amalga oshirilayotgan joydagi Ahdlashuvchi Tomonlar davlatlarining sudiga, ularning vakolatlariga muvofiq;

b) Vashingtonda 1965-yil 18-martda tuzilgan “Davlatlar va boshqa davlatlarning fuqarolari oʻrtasidagi investitsion nizolarni hal etuvchi Konvensiya”ning tegishli qoidalarini eʼtiborga olgan holda, investitsion nizolarni hal etuvchi Xalqaro markazga (koʻyida “Markaz” deb yuritiladi);

v) Birlashgan Millatlar Tashkilotining Xalqaro savdo huquqi boʻyicha amaldagi arbitraj reglamentiga muvofiq “ad hoc” Xalqaro arbitraj sudiga topshirilishi mumkin.

Agar bir Ahdlashuvchi Tomon davlatining qonunchiligidagi qoidalar yoki hozirda mavjud boʻlgan amaldagi xalqaro qonunchilik bilan bogʻliq boʻlgan yoki Ahdlashuvchi Tomonlar oʻrtasida qoʻshimcha tarzida ushbu Bitimni toʻldirish uchun kiritilgan majburiyatlar umumiy va maxsus qoidalardan iborat boʻlsa, mazkur Bitimga koʻra bir Ahdlashuvchi Tomon investorlari uchun yaratiladigan rejimdan koʻra yanada yaxshiroq rejim yaratish huquqini beradi, bunday qoidalar oʻzining afzalliklari bilan ushbu Bitimdan koʻra ustun hisoblanadi.

1. Agar ushbu Bitimda oʻzga holatlar koʻzda tutilmagan boʻlsa, mazkur Bitimga muvofiq barcha investitsiyalar ular amalga oshirilgan Ahdlashuvchi Tomon hududida amalda joriy boʻlgan qonunchilik bilan tartibga solib boriladi.

2. Mazkur Bitimning 1-bandi qoidalaridan qatʼi nazar, hech narsa zimmasiga oluvchi Tomonni uning xavfsizligi bilan bogʻliq hayotiy masalalarni himoyalashga qaratilgan yoki favqulodda vaziyat holatlarida uning qonunchiligiga muvofiq va huquqiy jihatdan kamsitmagan holda amalga oshirilgan choralar qoʻllashda cheklamaydi.

Ahdlashuvchi Tomonlarning kelishuviga binoan ushbu Bitimga oʻzgartirishlar va qoʻshimchalar kiritilishi mumkin.

1. Ahdlashuvchi Tomonlar mazkur Bitimning qonuniy kuchga kirganligi xususida har bir Ahdlashuvchi Tomon davlatining milliy qonunchiligida koʻzda tutilgan huquqiy tartibotlarning bajarilganligi toʻgʻrisida nota almashadilar.

Soʻnggi nota olingan kun ushbu Bitim qonuniy kuchga kirgan sana hisoblanadi.

2. Mazkur Bitim oʻn yil mobaynida amalda joriy boʻladi. Agar Ahdlashuvchi Tomonlardan biri boshqa Ahdlashuvchi Tomonni belgilangan muddat tugashidan oʻn ikki oy avval oʻzining ushbu Bitimni harakatdan toʻxtatish xususidagi qaroridan ogoh qilmasa, Bitimning amalda joriy boʻlish muddati avtomatik tarzda navbatdagi besh yillik davrlarga uzaytirilib boradi.

3. Mazkur Bitim bekor qilingan taqdirda 1 — 11-moddalarda qayd etilgan qoidalar ushbu Bitim harakatdan toʻxtatilgunga qadar amalga oshirilgan investitsiyalarga nisbatan keyingi oʻn yil mobaynida oʻz kuchini saqlab qoladi.

Ushbu Bitim Xanoy shahrida 1996-yil 28-martda, ikki asl nusxada tuzilgan, ularning har biri nusxa oʻzbek, vyetnam va rus tillarida boʻlib, barcha matnlar bir xil kuchga egadir.

Mazkur Bitimni talqin etishda rus tilidagi matndan foydalaniladi.