Oʻzbekiston Respublikasi Hukumati va Rossiya Federatsiyasi Hukumati (bundan keyingi oʻrinlarda Tomonlar deyiladi) amaldagi qonunlarga va oʻz davlatlarining xalqaro majburiyatlariga rioya etib,

soliqlar sohasidagi jinoyatlar va huquqbuzishlarni aniqlash, oldini olish va bartaraf qilish bilan bogʻliq vazifalarni samarali hal qilishdan oʻzaro manfaatdor ekanliklaridan kelib chiqib,

ushbu maqsadlarda barcha huquqiy va boshqa imkoniyatlardan foydalanilishiga muhim ahamiyat berib,

quyidagilar toʻgʻrisida kelishib oldilar:

1. Tomonlarning vakolatli organlarining ularning vakolat doirasiga kiradigan soliqlar sohasidagi jinoyatlar va huquqbuzishlarni aniqlash, oldini olish va bartaraf qilish boʻyicha samarali kurashni tashkil etish maqsadidagi hamkorligi mazkur Bitimning mavzui hisoblanadi.

2. Mazkur Bitim fuqarolik va jinoiy ishlar boʻyicha huquqiy yordam koʻrsatish toʻgʻrisidagi amaldagi xalqaro bitimlarga taalluqli boʻlmaydi.

1. Mazkur Bitim maqsadlarida quyidagi idoralar Tomonlarning vakolatli organlari hisoblanadilar:

Oʻzbekiston Tomonidan — Oʻzbekiston Respublikasining Davlat soliq qoʻmitasi.

Rossiya Tomonidan — Rossiya Federatsiyasining Soliq politsiyasi departamenti.

2. Tomonlarning vakolatli organlarining rasmiy nomlari oʻzgargani holda ular bu toʻgʻrisida bir-birlariga darhol xabar qiladilar.

Tomonlar mazkur Bitim doirasida hamkorlikning quyidagi shakllaridan foydalanadilar:

yuridik va jismoniy shaxslar tomonidan sodir qilingan soliqlarga doir jinoyatlar va huquqbuzishlar toʻgʻrisidagi axborot bilan almashib turish;

soliqlar sohasidagi jinoyatlar va huquqbuzishlarni aniqlash, oldini olish va bartaraf qilishga qaratilgan tadbirlarni oʻtkazish masalalari yuzasidan bahamjihat harakat qilish;

jismoniy va yuridik shaxslarni soliqqa tortish bilan bogʻlik hujjatlarning tasdiqlangan nusxalarini belgilangan tartibda taqdim etish;

milliy soliq tizimlari, soliq qonunlariga kiritilgan oʻzgartishlar va qoʻshimchalar toʻgʻrisidagi axborot, shuningdek soliqlarga doir jinoyatlar va huquqbuzishlarga qarshi kurash boʻyicha uslubiy tavsiyanomalar bilan almashib turish;

soliqlarga doir jinoyatlar va huquqbuzishlarga qarshi kurashda qoʻllaniladigan axborot tizimlarini barpo etish va ularning amal qilishiga doir tajribalarni almashib turish;

hamkorlik jarayonida vujudga keladigan masalalar boʻyicha zarur yordam koʻrsatish va bunday faoliyatni muvofiqlashtirib turish, shu jumladan ishchi guruhlarini tuzish, vakillar, ekspertlar bilan almashinish va kadrlarni oʻqitish;

soliqlar sohasidagi jinoyatlar va huquqbuzishlarga qarshi kurash muammolari yuzasidan ilmiy-amaliy konferensiyalar va seminarlar oʻtkazish.

Tomonlarning vakolatli organlari mazkur Bitimni bajarish bilan bogʻliq masalalar boʻyicha bevosita bir-birlari bilan muloqot qilib turadilar.

1. Soliqlarga doir jinoyatlar va huquqbuzishlar toʻgʻrisidagi axborot bilan almashib turish quyidagi maʼlumotlarning taqdim qilinishini koʻzda tutadi:

yuridik va jismoniy shaxslarning daromadlarini soliqqa tortishdan yashirishi toʻgʻrisida, bunda soliq qonunlarini buzuvchilar qoʻllangan usullar ham koʻrsatiladi;

yuridik va jismoniy shaxslar tomonidan davlat va tijorat banklarida hisob raqamlarining ochilishi toʻgʻrisida, shuningdek bunday hisob raqamlaridagi mablagʻlar harakati toʻgʻrisida, mabodo bunday hisob raqamlarida soliqqa tortishdan yashirilgan summalar mavjud deb hisoblash uchun asos boʻlganida shunday qilinadi;

soliq qonunlarini buzgan yuridik va jismoniy shaxslarning daromadlari, soliqqa tortiladigan bazaning miqdorlari va undiriladigan soliq summalari toʻgʻrisida, shuningdek soliqlar sohasidagi jinoyatlar va huquqbuzishlarni aniqlash, oldini olish va bartaraf etishga doir choralar toʻgʻrisida maʼlumotlar.

2. Mazkur moddaning 1-bandida koʻrsatib oʻtilgan axborotlar bir Tomonning vakolatli organi tomonidan boshqa Tomonning vakolatli organining soʻrovnomasi asosida axborotni taqdim etish soʻrovnoma talab qilinayotgan Tomonning qonunlariga va manfaatlariga zid kelmaydigan boʻlsa amalga oshiriladi.

Mabodo Tomonlardan birining vakolatli organi unda mavjud boʻlgan axborot boshqa Tomonning vakolatli organi uchun qiziqarli boʻlishi mumkin deb hisoblasa, unda u bunday axborotni oʻz tashabbusiga koʻra ham taqdim etishi mumkin.

Tomonlarning vakolatli organlarining soliqlar sohasidagi jinoyatlar va huquqbuzishlarni aniqlash, oldini olish va bartaraf etishga doir tadbirlarni oʻtkazishdagi bunday jinoyatlar yoki huquqbuzishlarni amalga oshirgan yoki ularni amalga oshirganlikda shubhalanayotgan shaxslarga nisbatan bahamjihat harakati birgalikdagi rejalashtirishni, kuchlar va vositalardan foydalanishni, bunday tadbirlarning borishi va ular natijalari haqidagi axborotlar bilan almashishni oʻz ichiga oladi.

Tomonlarning vakolatli organlari soʻrovnomalar boʻyicha yuridik va jismoniy shaxslarni soliqqa tortishga doir hujjatlar (schetlar, fakturalar, yukxatlar, shartnomalar, bitimlar, sertifikatlar, maʼlumotnomalar va boshqalar)ning, shuningdek soliqlarga doir jinoyatlar va huquqbuzishlarga taalluqli masalalarga oid hujjatlarning nusxalarini bir-birlariga taqdim etadilar. Nusxalar soʻrovnoma talab qilinayotgan vakolatli organning vakil qilingan shaxsining imzosi va organning muhri bilan tasdiqlanadi.

Tomonlarning vakolatli organlari milliy soliq tizimlari, jinoyatlarni tergov qilishning va soliq qonunlari sohasidagi maʼmuriy huquqni buzishlarga doir ishlarni yurgizishning huquqiy asoslari toʻgʻrisidagi axborotlar bilan muntazam negizda almashib turadilar, bir-birlarini soliq qonunlaridagi oʻzgartirishlar toʻgʻrisida yangi meʼyoriy hujjatlar qabul qilinganidan yoki amaldagi meʼyoriy hujjatlarga oʻzgartishlar kiritilganidan soʻng bir oylik muddat ichida xabardor qiladilar.

Tomonlarning vakolatli organlari soliqlarga doir jinoyatlar va huquqbuzishlarga qarshi kurashni tashkil etishda axborot tizimlarini barpo etish va bunday tizimlarning amal qilishi masalalari boʻyicha tajriba, uslubiyot va ilmiy materiallar bilan almashib turadilar, ularning hujjatxona (arxiv)larida va maʼlumotlar banklarida mavjud boʻlgan axborotlarni mazkur Bitimga muvofiq bir-birlariga haq olmasdan taqdim etadilar.

Tomonlarning vakolatli organlari kadrlarni oʻzlarining oʻquv yurtlari negizida oʻqitish va qayta tayyorlash, soliqlarga doir jinoyatlar va huquqbuzishlarga qarshi kurashning dolzarb masalalariga doir birgalikdagi ilmiy tadqiqotlarni oʻtkazish sohalarida hamkorlik qiladilar, shuningdek ekspertlar bilan almashib turadilar.

Mazkur modda doirasidagi hamkorlikni amalga oshirishning aniq shakllari va shu jumladan ularni mablagʻ bilan taʼminlash Tomonlarning vakolatli organlari oʻrtasida tuziladigan tegishli bitimlarga muvofiq belgilanadi.

1. Axborotni olish uchun soʻrovnoma yozma shaklda yoki teletayp, faksimile yoki kompyuter aloqasidan foydalanish vositasida berilishi lozim.

Zudlik bilan bajarilishi talab qilinadigan hollarda telefon aloqasi vositasida beriladigan ogʻzaki soʻrovnomadan foydalanilishi mumkin, lekin u darhol yozma shaklda tasdiqlab qoʻyilishi lozim.

Teletayp, faksimile yoki kompyuter aloqasidan foydalanilganida, shuningdek ogʻzaki soʻrovnomaning haqiqiyligi yoki mazmuni jihatidan shubha paydo boʻlganida soʻrovnomaga javob berishi kerak boʻlgan vakolatli organ bunday soʻrovnomaning yozma shaklda tasdiqlangan holda berilishini talab qilishi mumkin.

2. Axborotni olish uchun soʻrovnomaning mazmuni quyidagilardan iborat boʻladi:

soʻrovnoma yuborayotgan vakolatli organning nomi;

soʻrovnomaga javob berishi kerak boʻlgan vakolatli organning nomi;

soʻrovnoma mohiyatining bayoni va uni soʻrash uchun asos, shuningdek uni ijro etish uchun zarur boshqa maʼlumotlar.

Jinoiy ishlar boʻyicha axborotni olish uchun soʻrovnomada bulardan tashqari yana quyidagilar koʻrsatiladi:

faktik holatlar bayoni;

jinoyat xususiyati;

keltirilgan zarar miqdori.

1. Soʻrovnoma zudlik bilan bajariladi. Soʻrovnomaga javob berishi kerak boʻlgan vakolatli organ soʻrovnomani ijro etish uchun zarur boʻlganida aniqlash tartibida qoʻshimcha axborotlarni talab qilishi mumkin.

2. Soʻrovnomani bajarish imkoniyati boʻlmagan hollarda soʻrovnomaga javob berishi kerak boʻlgan vakolatli organ soʻrovnomani yuborgan vakolatli organga bu haqda zudlik bilan xabar qiladi.

Soʻrovnomaning bajarilishi davlatning mustaqilligiga yoki xavfsizligiga zarar yetkazishi mumkin boʻlsa yoxud soʻrovnomaga javob berishi kerak boʻlgan vakolatli organ tobe boʻlgan davlatning qonunlariga zid boʻlsa, soʻrovnomani ijro etish rad qilinadi.

Soʻrovnomani ijro etishni rad qilish sabablari toʻgʻrisida soʻrovnomani yuborgan vakolatli organ xabardor qilinadi.

Soʻrovnomaga javob berishi kerak boʻlgan vakolatli organ soʻrovnomani yuborgan vakolatli organning ishonchli vakillariga oʻz davlati hududida soʻrovnomaning ijro qilinishida ishtirok etishiga ruxsat berishi mumkin, shuningdek mabodo oʻz davlatining qonunlariga zid kelmaydigan boʻlsa, ularning ishlashi uchun zarur shart-sharoitlarning yaratilishini taʼminlaydi.

Axborotni olish uchun soʻrovnoma va unga javob Tomonlarning vakolatli organlari oʻrtasida kelishilgan tilda yoziladi.

Tomonlarning vakolatli organlari soliqlar sohasidagi jinoyatlar va huquqbuzishlarni aniqlash, oldini olish va bartaraf etish bilan bogʻliq masalalarga tegishli boʻlgan axborotning maxfiy tutilishiga kafolat beradilar.

Mazkur Bitim doirasida olingan axborot bunday axborotni taqdim etgan vakolatli organning yozma shakldagi roziligisiz uchinchi tomonga berilishi mumkin emas.

Tomonlarning vakolatli organlari mazkur Bitimning oʻz davlatlari hududida ijro etilishi bilan bogʻliq xarajatlarni sarflaydilar. Qoʻshimcha xarajatlarning sarflanishini talab qiladigan soʻrovnomalar olingan hollarda ularni mablagʻ bilan taʼminlash haqidagi masala Tomonlarning vakolatli organlari tomonidan oʻzaro kelishuvga binoan koʻrib chiqiladi.

Tomonlarning vakolatli organlari, mabodo ular oʻrtasida boshqacha tartib haqida kelishib olinmagan boʻlsa, soʻrovnomaning ijro etilishida talab qilinishi mumkin boʻlgan tarjimonlarning xizmatiga haq toʻlash uchun sarflagan xarajatlarini qoplaydilar.

Oldindan rejalashtirilgan uchrashuvlarda, mabodo boshqacha yozma ravishdagi shartlashish mavjud boʻlmasa, qabul qilayotgan vakolatli organ oʻzga vakolatli organ delegatsiyasining oʻz davlati hududida qabul qilinishini taʼminlaydi va qabul qilish bilan bogʻliq xarajatlarni toʻlaydi, delegatsiyani yuborayotgan vakolatli organ esa delegatsiyaning safarga borib kelishi bilan bogʻliq yoʻl xarajatlarini oʻz zimmasiga oladi.

Navbatdan tashqari uchrashuvlar oʻtkazilishida bunday uchrashuv oʻtkazilishi uchun tashabbuskor boʻlgan vakolatli organ barcha xarajatlarni oʻz zimmasiga oladi.

Tomonlarning vakolatli organlarining vakillari zarurat paydo boʻlganida mazkur Bitimning bajarilishi bilan bogʻliq masalalarni muhokama qilish uchun uchrashuvlar oʻtkazadi.

Mazkur Bitim u imzolangan kundan boshlab kuchga kiradi va Tomonlardan biri boshqa Tomondan uning mazkur Bitim taʼsirini toʻxtatmoqchi ekanligi haqida diplomatik yoʻllar orqali yuborgan yozma xabarnomasini olgan kunidan keyin olti oylik muddat oʻtguniga qadar amal qiladi.

Toshkent shahrida 1995-yil 25-aprelda, har biri oʻzbek va rus tillarida boʻlgan ikki nusxada imzolandi, bunda har ikkala matn ham bir xildagi kuchga ega.