Davlat tasarrufidan chiqarish va xususiylashtirishdan tushadigan mablagʻlardan foydalanish samaradorligini oshirish maqsadida Vazirlar Mahkamasi qaror qiladi:

1. Belgilab qoʻyilsinki:

davlat tasarrufidan chiqarish va xususiylashtirishdan tushadigan mablagʻlarni, shu jumladan sotib olinadigan davlat aktivlari haqini boʻlib-boʻlib toʻlashni nazarda tutuvchi shartnomalar boʻyicha tushadigan mablagʻlarni taqsimlash Oʻzbekiston Respublikasi Davlat mulki qoʻmitasi tomonidan har oyda, qonun hujjatlarida belgilangan nisbatlarda amalga oshiriladi;

xususiylashtirilayotgan korxonalar ixtiyorida qoldiriladigan mablagʻlarni oʻtkazish ushbu korxonalar tomonidan maxsus depozit hisob raqamining bank rekvizitlari koʻrsatilgan holda taqdim etilgan yozma soʻrovlar asosida amalga oshiriladi. Korxona tomonidan soʻrov sotilayotgan davlat aktivlari uchun yakuniy hisob-kitoblar qilingan vaqtdan boshlab bir oy oʻtgungacha taqdim etilmagan taqdirda koʻrsatib oʻtilgan mablagʻlar davlat budjetiga oʻtkaziladi.

2. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

1. Vazirlar Mahkamasining 1998-yil 22-avgustdagi 362-son qarori bilan tasdiqlangan Davlat mulkini davlat tasarrufidan chiqarish, xususiylashtirishdan tushgan mablagʻlarni hisobga olish, taqsimlash va ulardan foydalanishni nazorat qilish tartibida:

a) 3-band quyidagi tahrirda bayon qilinsin:

“3. Davlat tasarrufidan chiqarish va xususiylashtirishdan tushadigan mablagʻlarni, shu jumladan sotib olinayotgan davlat aktivlari haqini boʻlib-boʻlib toʻlashni nazarda tutuvchi shartnomalar boʻyicha tushadigan mablagʻlarni taqsimlash Oʻzbekiston Respublikasi Davlat mulki qoʻmitasi tomonidan har oyda quyidagi nisbatda amalga oshiriladi:

40 foizi — budjet defitsitini qoplash manbai sifatida davlat budjetiga;

15 foizi — Xususiy tadbirkorlik va kichik biznesni qoʻllab-quvvatlash fondiga (“Biznes-fondiga);

15 foizi — ijtimoiy-iqtisodiy rivojlantirish loyihalarini mablagʻ bilan taʼminlash, bozor infratuzilmasi tashkilotlarini shakllantirish uchun Qoraqalpogʻiston Respublikasi Vazirlar Kengashiga, viloyatlar va Toshkent shahar xokimliklariga;

3 foizi — Oʻzbekiston Respublikasi Davlat mulki qoʻmitasining Xususiylashtirish, investitsiya va bozor tuzilmalarini yaratish va rivojlantirish davlat dasturini amalga oshirish boʻyicha xarajatlariga;

2 foizi — idora qilish va boshqaruv funksiyalarini amalga oshirish bilan bogʻliq xarajatlarni qoplash uchun Oʻzbekiston Respublikasi Davlat mulki qoʻmitasi hisob raqamiga oʻtkaziladi;

25 foizi — mablagʻlardan faqat texnika bilan qayta jihozlash, ishlab chiqarishni zamonaviylashtirishda maqsadli foydalanish uchun xususiylashtirilayotgan korxonalarning yoki mol-mulkning xususiylashtirilayotgan qismi balansida boʻlgan davlat korxonalari ixtiyorida qoldiriladi. Korxonalar mulkiy komplekslar tarzida toʻliq sotilganda, shuningdek ular boʻyicha davlat ulushini saqlash nazarda tutilmagan korxonalarning ustav fondlaridagi davlat aktivlarini sotishda koʻrsatib oʻtilgan mablagʻlar davlat budjetiga oʻtkaziladi”.

b) 4-band quyidagi tahrirda bayon qilinsin:

“4. Davlat tasarrufidan chiqarish va xususiylashtirishdan xorijiy valyutada tushadigan mablagʻlar Oʻzbekiston Respublikasi Davlat mulki qoʻmitasining Oʻzbekiston Respublikasi Markaziy bankidagi maxsus valyuta hisob raqamiga oʻtkaziladi, keyinchalik ular belgilangan tartibda toʻliq hajmda Markaziy bankka majburiy ravishda sotiladi. Milliy valyutada olingan tushumni taqsimlash ushbu Tartibning 3-bandiga muvofiq amalga oshiriladi”;

v) VI boʻlimga quyidagi mazmundagi 28-1-band qoʻshilsin:

“28-1. Xususiylashtirilayotgan korxonalar yoki mol-mulkning xususiylashtirilayotgan qismi balansida boʻlgan davlat korxonalari ixtiyorida qoldiriladigan mablagʻlarni oʻtkazish ushbu korxonalar tomonidan taqdim etilgan maxsus depozit hisob raqamining bank rekvizitlari koʻrsatilgan holdagi soʻrovnoma — xatlar asosida amalga oshiriladi. Sotilgan davlat aktivlari uchun yakuniy hisob-kitoblar qilingan vaqtdan boshlab bir oy oʻtgungacha korxonalar tomonidan soʻrovnoma-xat taqdim etilmagan taqdirda koʻrsatib oʻtilgan mablagʻlar davlat budjetiga oʻtkaziladi”.

2. Vazirlar Mahkamasining “Oʻzbekiston Respublikasi Vazirlar Mahkamasining 1998-yil 18-noyabrdagi 477-son va 1998-yil 17-dekabrdagi 525-son qarorlarini bajarish yuzasidan javobgarlikni kuchaytirish chora-tadbirlari toʻgʻrisida” 1999-yil 20-maydagi 258-son qarorining 10-bandi oʻz kuchini yoʻqotgan deb hisoblansin.

3. Oʻzbekiston Respublikasi Vazirlar Mahkamasining “2001-2002-yillarda xorijiy investorlarni jalb etgan holda korxonalarni davlat tasarrufidan chiqarish va xususiylashtirish boʻyicha kelgusidagi chora-tadbirlar toʻgʻrisida” 2001-yil 9-martdagi 119-son qarori (Oʻzbekiston Respublikasi QT, 2001-y., 3-son, 17-modda) 2-bandining uchinchi va toʻrtinchi xatboshidagi “keyinchalik xarajatlarni obyektlarni (aksiyalarni) sotish tushumlaridan qoplagan holda” soʻzlari chiqarib tashlansin.