Vazirlar Mahkamasi qayd etadiki, Oʻzbekiston Respublikasi Prezidentining 2003-yil 28-avgustdagi F-1832-son Farmoyishiga muvofiq tuzilgan maxsus guruh tomonidan “Oʻzkommunxizmat” agentligining “Boshkommungaz” korxonasi faoliyatida jiddiy kamchiliklar aniqlangan. Gaz taʼminoti tizimida bozor munosabatlari juda sekinlik bilan joriy etilmoqda, qatʼiy toʻlov intizomi mavjud emas. Tabiiy gazning isrof boʻlishiga va oʻgʻirlanishiga yoʻl qoʻyilmoqda, gaz tarmoqlariga ruxsatsiz ulanib olishning koʻpdan-koʻp hollari mavjud.

Hisob-kitob-toʻlov intizomiga rioya etilmasligi, sotilgan tabiiy gaz uchun oʻz vaqtida haq toʻlanishi ustidan nazoratning sustligi oqibatida debitorlik va kreditorlik qarzlari miqdori yuqoriligicha qolmoqda. Uy-joy fondini gazni hisobga olish priborlari bilan jihozlash ishlari qoloqlik bilan olib borilmoqda.

“Oʻzkommunxizmat” agentligi tomonidan nazorat oʻrnatilmaganligi tufayli “Boshkommungaz” korxonasining hududiy boʻlinmalari huzurida oʻzboshimchalik bilan ortiqcha boʻgʻin — “Oʻztexgaz” shuʼba korxonasi va “Texgaz” hududiy shuʼba boshqarmalari tashkil etilgan, ularga gaz tarmoqlaridan foydalanish, ularni taʼmirlash va qurish funksiyalari berilgan. Bu boshqaruv xodimlari sonining asossiz koʻpayib ketishiga olib keldi.

Tabiiy gaz sotishning bozor mexanizmlarini joriy etish, respublika gaz taʼminoti tizimini boshqarish tuzilmasini takomillashtirish, hisob-kitob-toʻlov intizomini yanada mustahkamlash maqsadida Vazirlar Mahkamasi qaror qiladi:

1. “Boshkommungaz” korxonasi va uning “Oʻztexgaz” shuʼba korxonasi tugatilsin.

2. “Boshkommungaz” korxonasining “Gaztaʼminot” hududiy shuʼba korxonalari, “Texgaz” shuʼba boshqarmalari va ularning tegishli tuman va shahar filiallari yuridik shaxs huquqiga hamda tuman (shahar) filiallariga ega boʻlgan hududiy gaz taʼminoti korxonalariga (“Qoraqalpoqgaz”, “Andijongaz”, “Buxorogaz”, “Jizzaxgaz”, “Qashqadaryogaz”, “Navoiygaz”, “Namangangaz”, “Samarqandgaz”, “Surxondaryogaz”, “Sirdaryogaz”, Toshkentviloyatgaz”, “Fargʻonagaz”, “Xorazmgaz” va “Toshkentshahargaz”) aylantirilsin (keyingi oʻrinlarda hududiy gaz taʼminoti korxonalari deb ataladi).

Belgilab qoʻyilsinki, koʻrsatib oʻtilgan hududiy gaz taʼminoti korxonalari “Oʻzkommunxizmat” agentligiga hisobot beradi.

Gaz taʼminoti tizimini boshqarish tuzilmasini takomillashtirish natijasida boshqaruv xodimlari soni 864 nafarga qisqarishi maʼlumot uchun qabul qilinsin.

3. Quyidagilar tashkil etilayotgan hududiy gaz taʼminoti korxonalarining asosiy vazifalari etib belgilansin:

gaz tarmoqlari va uskunalaridan foydalanish va ularga xizmat koʻrsatishni taʼminlash;

“Oʻztransgaz” aksiyadorlik kompaniyasi bilan tabiiy gaz yetkazib berish yuzasidan shartnomalar tuzish, isteʼmolchilarni tabiiy va suyultirilgan gaz bilan taʼminlash, sotilayotgan gaz hajmlarining qatʼiy hisobini olib borish;

gaz tarmoqlarini joriy taʼmirlash, shuningdek tasdiqlangan aniq roʻyxatlarga muvofiq ularni mukammal taʼmirlash;

sotilgan tabiiy gaz uchun oʻz vaqtida oldindan haq toʻlash hamda mablagʻlar yigʻib olish ishlarini tashkil etish;

qonun hujjatlarida belgilangan muddatlarda obyektlarni gaz quvurlari tarmoqlariga ulash uchun texnik shartlarni berish va ulash;

tasdiqlangan dasturlarga muvofiq isteʼmolchilarga gazni hisobga olish priborlarini oʻrnatish, ularni hisobga olish va ulardan foydalanilishini nazorat qilish;

gaz tarmoqlari va uskunalaridan xavf-xatarsiz foydalanish qoidalari normativ talablariga rioya etish.

4. Yetkazib berilayotgan tabiiy gaz uchun hisob-kitob qilish tizimini takomillashtirish va oʻz vaqtida haq toʻlanishi uchun javobgarlikni kuchaytirish maqsadida hududiy gaz taʼminoti korxonalari apparati tuzilmasida sotilgan tabiiy gaz uchun isteʼmolchilardan mablagʻlar yigʻilishini nazorat qilish tumanlararo inspeksiyalari tashkil etilsin.

Quyidagilar tashkil etilayotgan inspeksiyalarning asosiy vazifalari etib belgilansin:

sotilgan tabiiy gaz uchun aholidan va isteʼmolchilarning boshqa toifalaridan mablagʻ toʻplanishining toʻliqligi taʼminlanishini nazorat qilish;

amaldagi gaz tarmoqlariga ruxsatsiz ulanib olish hollarini aniqlash va qonun hujjatlariga muvofiq ularning oldini olish chora-tadbirlarini koʻrish;

haqini toʻlamagan va ruxsatsiz ulanib olgan isteʼmolchilarni gaz tarmoqlaridan uzib qoʻyish toʻgʻrisida tuman (shahar) gaz taʼminoti tashkilotlariga yozma koʻrsatmalar berish.

Belgilab qoʻyilsinki, ushbu yozma koʻrsatmalarni bajarmaganligi uchun aybdor shaxslar qonun hujjatlariga muvofiq javobgarlikka tortilishi kerak.

5. Quyidagilar:

hududiy gaz taʼminoti korxonalari boshqaruv apparatining namunaviy tuzilmasi, mintaqalarning toifalaridan kelib chiqqan holda ular xodimlarining umumiy cheklangan soni 1 va 1a-ilovalarga muvofiq;

hududiy gaz taʼminoti korxonalari tuman va shahar filiallari boshqaruv apparatining namunaviy tuzilmasi 2-ilovaga muvofiq;

hududiy gaz taʼminoti korxonasi toʻgʻrisidagi Namunaviy nizom 3-ilovaga muvofiq tasdiqlansin.

6. “Oʻzkommunxizmat” agentligi markaziy apparati tuzilmasida:

xodimlari soni 11 nafar boʻlgan Aholi va korxonalarni gaz bilan taʼminlash bosh boshqarmasi;

xodimlari soni 9 nafar boʻlgan Gaz taʼminoti boʻyicha nazorat-taftish boshqarmasi tashkil etilsin.

7. Quyidagilar:

hududiy gaz taʼminoti korxonalari tarkibida tashkil etiladigan inspeksiyalar faoliyatini;

sotilgan gaz uchun aholidan va ulgurji isteʼmolchilardan mablagʻlar toʻliq yigʻilishini;

hududiy gaz taʼminoti korxonalari tomonidan “Oʻztransgaz” aksiyadorlik kompaniyasi bilan oʻz vaqtida hisob-kitob qilinishini;

gaz tarmoqlariga ruxsatsiz ulanib olishga yoʻl qoʻyilmasligini doimiy nazorat qilishni taʼminlash Gaz taʼminoti boʻyicha nazorat-taftish boshqarmasining asosiy vazifalari etib belgilansin.

8. Belgilab qoʻyilsinki:

2003-yil 1-noyabrdan boshlab, aholidan tashqari, isteʼmolchilarning barcha toifalari uchun hududiy gaz taʼminoti korxonalari tomonidan yetkazib beriladigan tabiiy gaz uchun bir oylik isteʼmol hajmining 15 foizi haqini majburiy ravishda oldindan toʻlash joriy etiladi;

isteʼmol qilishning hisob-kitob qilinadigan davri boshlangungacha haqni oldindan toʻlamagan yoki yakuniy hisob-kitobni shartnomalarda belgilangan muddatlarda oʻz vaqtida amalga oshirmagan ulgurji tabiiy gaz isteʼmolchilariga tabiiy gaz yetkazib berish toʻxtatiladi;

2004-yil 1-yanvardan boshlab kichik va xususiy biznes korxonalariga tabiiy gaz yetkazib berish isteʼmol qilish limiti belgilanmasdan, toʻgʻridan-toʻgʻri tuziladigan shartnomalar asosida amalga oshiriladi.

9. Belgilansinki:

tashkil etilayotgan hududiy gaz taʼminoti korxonalari, shuningdek ularning filiallari va inspeksiyalar tugatilayotgan tegishli tuzilmalarning tuzilgan shartnomalari va majburiyatlari boʻyicha huquqiy vorislari hisoblanadi hamda xoʻjalik faoliyatidan olinadigan daromadlar hisobiga mablagʻ bilan taʼminlanadi;

tugatilayotgan “Boshkommungaz” korxonasining asosiy vositalari “Oʻzkommunxizmat” agentligi balansiga tekin beriladi va daromad (foyda) soligʻi solish obyekti hisoblanmaydi.

10. “Oʻzkommunxizmat” agentligi, Oʻzbekiston Respublikasi Davlat mulki qoʻmitasi:

mazkur qarorning 1 va 2-bandlarida koʻrsatilgan korxonalarning belgilangan tartibda tugatilishini va qayta tashkil etilishini, shuningdek ularning majburiyatlari va talablari masalalari hal qilinishini bir oy muddatda taʼminlasinlar;

sotilgan tabiiy gaz uchun isteʼmolchilardan mablagʻlar yigʻilishini nazorat qilish boʻyicha yangi tashkil etilayotgan inspeksiyalarni tanlov asosida malakali mutaxassislar bilan toʻldirsinlar, shuningdek ularning majburiy yozma koʻrsatmalari quyi tuzilmalar tomonidan soʻzsiz bajarilishini taʼminlash toʻgʻrisidagi nizomni tasdiqlasinlar;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda, sotilgan tabiiy gaz uchun isteʼmolchilardan mablagʻlar yigʻilishini nazorat qilish boʻyicha yangi tashkil etilgan inspeksiyalarning sotilgan tabiiy gaz hajmlariga muvofiq mablagʻlarni yigʻishda mahalliy oʻzini oʻzi boshqarish organlari bilan oʻzaro hamkorlik qilishini taʼminlasinlar;

Tabiiy gaz isteʼmolchilariga hamda gaz tarmoqlarini rivojlantirish va suyultirilgan gaz bilan taʼminlash yuzasidan foydalanish korxonalariga xizmatlar koʻrsatuvchi tuzilmalarni bosqichma-bosqich davlat tasarrufidan chiqarish va xususiylashtirish dasturi loyihasini ikki oy muddatda Vazirlar Mahkamasiga kiritsinlar.

11. Iqtisodiyot vazirligi, “Oʻzkommunxizmat” agentligi manfaatdor vazirliklar va idoralar bilan birgalikda bir oy muddatda 2005-yilgacha boʻlgan davrda gaz hisoblagichlar uchun bir marta foydalaniladigan plombalarni olib kelish, shu yerning oʻzida tayyorlash va hamma joyda, birinchi navbatda Toshkent shahrida oʻrnatish boʻyicha tadbirlarni ishlab chiqsinlar.

12. “Oʻzkommunxizmat” agentligi:

2004-2005-yillarda hamma joyda tuman (shahar) gaz xoʻjaliklarining boʻlinish chegaralarida, shuningdek shaharlarning turar joy mavzelaridagi gaz tarmoqlarining kirish joylarida gazni hisobga olish priborlari oʻrnatsin, ularni texnik xizmat koʻrsatish shartlari boʻyicha ulgurji isteʼmolchilar gaz tarmoqlarining kirish joylaridagi gaz hisoblagichlarga tenglashtirsin.

2004-yil 1-yanvargacha gaz quvurlari va isteʼmolchilarni toʻliq xatlovdan oʻtkazsin, uning natijalari boʻyicha gazdan noqonuniy foydalanish hollarining oldi olinishini taʼminlasin, shuningdek Oʻzbekiston Respublikasi Iqtisodiyot vazirligi, Moliya vazirligi, “Oʻzbekneftgaz” milliy xolding kompaniyasi bilan birgalikda gaz tarmoqlarini tiklash va taʼmirlashning aniq dasturini ishlab chiqsin.

13. “Oʻzbekneftgaz” milliy xolding kompaniyasi:

“Oʻzkommunxizmat” agentligi bilan birgalikda Hududiy gaz taʼminoti korxonalari balansidagi gaz uzatish tarmoqlariga texnik xizmat koʻrsatish, ularning texnik holatini tekshirish va ularni taʼmirlash toʻgʻrisidagi nizomni bir oy muddatda ishlab chiqsin va tasdiqlasin, mazkur ishlarni amalga oshirish uchun maxsus korxona ajratsin;

Oʻzbekiston Respublikasi Moliya vazirligi, “Oʻzkommunxizmat” agentligi, “Oʻzdavneftgazinspeksiya” bilan birgalikda 2003-yil 1-dekabrgacha boʻlgan muddatda Tabiiy gazni uzatish va taqsimlashda texnologik isrofgarchiliklarni hisoblab chiqish metodikasini, shuningdek plombani buzganlik va gazni hisobga olish priborlari koʻrsatkichlarini oʻzgartirganlik hamda tabiiy gazdan foydalanish sohasidagi boshqa buzilishlar uchun isteʼmolchilarga va gaz taʼminoti korxonalari xodimlariga nisbatan javobgarlikni belgilash va kuchaytirish yuzasidan takliflarni ishlab chiqsin va Vazirlar Mahkamasiga kiritsin;

14. Oʻzbekiston Respublikasi Moliya vazirligi har yili davlat budjetini ishlab chiqish va tasdiqlashda ulgurji isteʼmolchilar va aholi uchun tabiiy gazga tariflardagi farqlarni bosqichma-bosqich, izchil qisqartirib borishni nazarda tutsin.

15. “Oʻzkommunxizmat” agentligi Oʻzbekiston Respublikasi Moliya vazirligi va Oʻzbekiston Respublikasi Tashqi iqtisodiy faoliyat milliy banki bilan birgalikda bir oy muddatda “Boshkommungaz” korxonasiga Hukumat qarorlariga muvofiq berilgan xorijiy kreditlar va Moliya vazirligining kreditlari yuzasidan uning qarz majburiyatlari boʻyicha kredit hujjatlariga tegishli oʻzgartirish va qoʻshimchalarni belgilangan tartibda rasmiylashtirsin.

Oʻzbekiston Respublikasi Moliya vazirligi koʻrsatib oʻtilgan oʻzgartirishlarni hisobga olgan holda, belgilangan tartibda Hukumat kafolatiga tegishli qoʻshimchalar bersin.

16. Oʻzbekiston Respublikasi Adliya vazirligi, “Oʻzbekneftgaz” milliy xolding kompaniyasi, “Oʻzkommunxizmat” agentligi, “Oʻztransgaz” aksiyadorlik kompaniyasi bir oy muddatda:

Oʻzbekiston Respublikasi Moliya vazirligi, Monopoliyadan chiqarish va raqobatni rivojlantirish davlat qoʻmitasi hamda “Oʻzdavneftgazinspeksiya” inspeksiyasi bilan birgalikda Vazirlar Mahkamasining 2000-yil 10-yanvardagi 8-son qarori bilan tasdiqlangan Oʻzbekiston Respublikasi isteʼmolchilariga gaz yetkazib berish qoidalariga, shuningdek Vazirlar Mahkamasining 1999-yil 21-sentabrdagi 439-son qaroriga 4 va 5-ilovalarga muvofiq tabiiy gaz uchun haq toʻlashning imtiyozli shartlari belgilangan tabiiy gaz isteʼmolchilari roʻyxatlariga oʻzgartirish va qoʻshimchalar yuzasidan Vazirlar Mahkamasiga takliflar kiritsinlar;

manfaatdor vazirliklar va idoralar bilan birgalikda amaldagi qonun hujjatlariga mazkur qarordan kelib chiquvchi oʻzgartirish va qoʻshimchalar toʻgʻrisida Vazirlar Mahkamasiga takliflar kiritsinlar.

17. Oʻzbekiston Respublikasi Hukumatining 5-ilovaga muvofiq ayrim qarorlariga oʻzgartirish va qoʻshimchalar kiritilsin.

18. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari K.N. Toʻlaganov zimmasiga yuklansin.

1. Hududiy gaz taʼminoti shuʼba korxonasi (keyingi oʻrinlarda matnda – gaz taʼminoti korxonasi deb yuritiladi) yuridik shaxs hisoblanadi va oʻz faoliyatida “Oʻzkommunxizmat” agentligiga hisob beradi.

“Oʻzkommunxizmat” agentligi kommunal gaz bilan taʼminlash tizimini loyihalashtirish, qurish va undan foydalanish sohasida yagona texnik siyosatni shakllantiradi va olib boradi, gaz taʼminoti korxonalari faoliyatiga, kadrlar tayyorlash va qayta tayyorlashga rahbarlik qiladi va ular faoliyatini muvofiqlashtiradi.

2. Gaz taʼminoti korxonasi oʻz faoliyatida Oʻzbekiston Respublikasi qonunlariga, Oʻzbekiston Respublikasi Prezidentining farmonlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, “Oʻzkommunxizmat” agentligi bosh direktorining buyruqlariga, mazkur Nizomga hamda boshqa qonun hujjatlariga amal qiladi.

3. Gaz taʼminoti korxonasi Oʻzbekiston Respublikasining Davlat gerbi tasviri tushirilgan va oʻz nomi yozilgan muhrga, bank muassasalarida hisob raqamiga ega boʻladi.

4. Quyidagilar gaz taʼminoti korxonasining vazifalari hisoblanadi:

gaz tarmoqlari va asbob-uskunalaridan foydalanilishini va ularga xizmat koʻrsatilishini taʼminlash;

“Oʻztransgaz” aksiyadorlik kompaniyasi bilan tabiiy gaz yetkazib berishga shartnomalar tuzish, isteʼmolchilarni tabiiy va suyultirilgan gaz bilan taʼminlash, sotilayotgan gaz hajmining qatʼiy hisobini yuritish;

gaz tarmoqlarini joriy taʼmirlash, shuningdek tasdiqlangan aniq roʻyxatlarga muvofiq mukammal taʼmirlash;

sotilgan tabiiy gaz uchun oʻz vaqtida oldindan haq toʻlash va mablagʻlarni yigʻish ishlarini tashkil etish;

texnik shartlar berish va qonun hujjatlarida belgilangan muddatlarda obyektlarni gaz quvuri tarmoqlariga ulash;

tasdiqlangan dasturlarga muvofiq isteʼmolchilarga gazni hisobga olish priborlari oʻrnatish, ulardan foydalanishni hisobga olish va nazorat qilish;

gaz tarmoqlari va asbob-uskunalaridan xavfsiz foydalanish qoidalarining normativ talablariga rioya qilish;

tuman (shahar) filiallariga metodik va amaliy yordam koʻrsatish.

5. Oʻziga yuklangan vazifalarga muvofiq gaz taʼminoti korxonasi quyidagi funksiyalarni amalga oshiradi:

ilgʻor texnikani, energiyani tejovchi yuqori samarali texnologiyalarni ishlab chiqarishga joriy etish asosida viloyat gaz xoʻjaligining rivojlanishini taʼminlaydi;

aholiga xizmat koʻrsatish boʻyicha xizmatlarning yangi turlari va shakllarini joriy etish va kengaytirish chora-tadbirlarini koʻradi;

tuman (shahar) filiallari tomonidan gazni hisobga olish priborlari oʻrnatilishini nazorat qiladi;

gazlashtirish va gazni hisobga olish priborlari oʻrnatish dasturlari bajarilishining monitoringini yuritadi;

gaz tarmoqlari va asbob-uskunalari profilaktikasi, ularning joriy va mukammal taʼmirlanishi yuzasidan korxonalar, tashkilotlar va aholiga pullik xizmatlar koʻrsatadi;

sotilgan tabiiy gaz uchun isteʼmolchilardan mablagʻ yigʻish ustidan nazorat qilish boʻyicha gaz taʼminoti korxonasi tarkibida tashkil etilgan inspeksiyalarning (keyingi oʻrinlarda matnda – inspeksiya deb yuritiladi) kuchi bilan sotilgan gaz uchun mablagʻ yigʻilishi va isteʼmolchilar oʻrtasida qatʼiy toʻlov intizomi taʼminlanishi ustidan nazorat qiladi.

6. Gaz taʼminoti korxonasi quyidagi huquqlarga egadir:

oʻz vakolatiga kiruvchi masalalarni hal etish uchun zarur boʻlgan tegishli materiallar taqdim etilishini tuman (shahar) filiallaridan belgilangan tartibda talab qilish;

oʻz vakolatlari doirasida gaz taʼminoti tizimi mutaxassislarini oʻqitish, tayyorlash va qayta tayyorlashni hamda kadrlar malakasini oshirishni tashkil etish;

gaz tarmoqlaridan xavfsiz foydalanish qoidalari buzilganligi uchun aybdor shaxslarni tegishli javobgarlikka tortish toʻgʻrisida tavsiyanoma berish;

qonun hujjatlarida nazarda tutilgan boshqa huquqlarga egadir.

7. Gaz taʼminoti korxonasi oʻz zimmasiga yuklangan vazifalar hamda Oʻzbekiston Respublikasi qonun hujjatlariga muvofiq oʻz vakolati doirasida qabul qilingan qarorlar oʻz vaqtida va sifatli bajarilishi uchun javob beradi va quyidagilarga majburdir:

tarmoqlarda va gaz taqsimlash punktlarida tabiiy gazning belgilangan normalaridan ortiqcha nobud boʻlishiga yoʻl qoʻymaslik;

korxonalar, tashkilotlar va aholining gaz asbob-uskunalarini har yili profilaktik ishlardan oʻtkazish;

abonentlarning tabiiy gazdan foydalanish uchun tegishli ruxsatnomalarsiz gaz tarmoqlariga ulanishiga yoʻl qoʻymaslik;

gaz taqsimlash punktlari, gaz tarmoqlari va asbob-uskunalarini muntazam ravishda profilaktika qilish va joriy taʼmirlash.

8. Gaz taʼminoti korxonasiga tegishli ravishda Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlarining taqdimnomasi boʻyicha “Oʻzkommunxizmat” agentligi bosh direktorining qarori bilan lavozimga tayinlanadigan direktor rahbarlik qiladi.

9. Direktor:

Gaz taʼminoti korxonasi faoliyati tashkil etilishi uchun shaxsan javob beradi;

Gaz taʼminoti korxonasi nomidan ishonchnomasiz ish koʻradi, tegishli hududdagi davlat hokimiyati va boshqaruv organlarida, tashkilotlar va korxonalarda korxona manfaatlarini ifodalaydi;

boʻlimlar va xizmatlarning boshliqlarini, gaz taʼminoti korxonasining boshqa xodimlarini lavozimga tayinlaydi va lavozimdan ozod etadi;

qonun hujjatlariga muvofiq boshqa vakolatlarni amalga oshiradi.

10. Gaz taʼminoti korxonalari xizmat koʻrsatiladigan isteʼmolchilarning sonidan va boshqaruv xodimlari sonidan kelib chiqib quyidagi uch toifadan iborat guruhlarga ajratiladi:

isteʼmolchilar soni 250 mingdan ortiq boʻlsa — 1-toifa — boshqaruv xodimlari soni 39—43 nafar;

isteʼmolchilar soni 200 mingdan 250 mingtagacha boʻlsa — 2-toifa — boshqaruv xodimlari soni 35 nafar;

isteʼmolchilar soni 200 mingtagacha boʻlsa — 3-toifa — boshqaruv xodimlari soni 24—28 nafar.

Boshqaruv xodimlari sonini koʻpaytirish ularning toifalariga muvofiq isteʼmolchilar soni oʻsishiga qarab amalga oshiriladi.

11. Gaz taʼminoti korxonalari apparati tuzilmasida sotilgan gaz uchun isteʼmolchilardan mablagʻ yigʻish ustidan nazorat qilish inspeksiyasi tashkil etiladi.

12. Quyidagilar inspeksiyaning asosiy vazifalari hisoblanadi:

sotilgan tabiiy gaz uchun aholidan va isteʼmolchilarning boshqa toifalaridan mablagʻ toʻliq yigʻilishini taʼminlash ustidan nazorat qilish;

ishlab turgan gaz tarmoqlariga ijozat berilmagan ulanishlarni aniqlash va qonun hujjatlariga muvofiq ularga barham berish chora-tadbirlarini koʻrish;

gaz haqini toʻlamaganlar va gaz tarmoqlariga ijozat berilmagan holda ulangan isteʼmolchilar gaz tarmoqlaridan uzib qoʻyilishi toʻgʻrisida koʻrsatmalar berish.

13. Inspeksiya oʻziga yuklangan vazifalarga muvofiq quyidagi funksiyalarni amalga oshiradi:

har oyda sotilgan tabiiy gaz uchun isteʼmolchilarning muddati oʻtkazib yuborilgan qarzlari toʻgʻrisidagi axborotni, ashaddiy qarzdorlar roʻyxatini va boshqa mavjud materiallarni oʻrganib chiqish asosida tekshirish va reydlar tashkil etish rejalarini ishlab chiqadi;

soliq va huquqni muhofaza qilish organlarining vakillari bilan birgalikda gazni hisobga olish priborlari plombalarining butligini, uning koʻrsatkichlari toʻlov hujjatlariga muvofiqligini, oʻtkazilgan xatlov va hisobga oʻtkazilgan toʻlovning toʻgʻriligini tekshiradi, zarurat boʻlganda qarzni toʻlash toʻgʻrisida koʻrsatma beradi;

aholi oʻrtasida tabiiy gaz uchun oʻz vaqtida haq toʻlash zarurligi toʻgʻrisida har xil ijtimoiy usullar bilan aniq maqsadni koʻzlab ish olib boradi.

14. Inspeksiya quyidagi huquqlarga egadir:

isteʼmol qilingan tabiiy gaz uchun qarzdor boʻlgan isteʼmolchilarga qonun hujjatlarida belgilanganiga muvofiq taʼsir choralarini qoʻllash;

muddati oʻtkazib yuborgan qarzlari boʻlgan tabiiy gaz isteʼmolchilarining barcha toifalariga, shu jumladan aholiga qarzni toʻlamaslikning oqibatlari, gaz tarmoqlariga ijozat berilmagan holda ulangani aniqlangan isteʼmolchilar toʻgʻrisida ogohlantirgan holda qarzlarni qaytarish zarurligi toʻgʻrisida koʻrsatmalar berish;

foydalanilgan tabiiy gaz uchun oʻz vaqtida haq toʻlamaslik holatlari boʻyicha huquqni muhofaza qilish va sud organlariga yuborish uchun materiallar tayyorlash.

15. Inspeksiya oʻz faoliyatida amaldagi qonun hujjatlari talablariga qatʼiy rioya qilishi shart.

16. Inspeksiyaning tarkibi yuridik, iqtisodiy va texnik maʼlumotga ega boʻlgan yuqori malakali mutaxassislar bilan toʻldiriladi.

17. Inspeksiyaga gaz taʼminoti korxonasi rahbarining buyrugʻi bilan lavozimga tayinlanadigan boshliq boshchilik qiladi.

18. Inspeksiya xodimlari lavozim bilan bogʻliq qonunni buzishlar uchun amaldagi qonun hujjatlarida belgilangan tartibda javob beradi.

19. Quyidagilar gaz taʼminoti korxonasi tuman va shahar filiallarining (keyingi oʻrinlarda matnda — filial deb yuritiladi) vazifalari hisoblanadi:

gaz sotishga tuzilgan shartnomalarga muvofiq isteʼmolchilarni tabiiy va suyultirilgan gaz bilan bevosita taʼminlash, “Oʻztransgaz” aksiyadorlik kompaniyasining magistral gaz quvurlariga toʻgʻridan-toʻgʻri ulangan isteʼmolchilar bundan mustasno, sotiladigan gaz hajmining qatʼiy hisobini yuritish;

gaz tarmoqlaridan xavfsiz foydalanish qoidalarining normativ talablariga ogʻishmay rioya qilish, respublika gaz xoʻjaligidan avariyasiz foydalanish boʻyicha shart-sharoitlar yaratish;

ishlab turgan tarmoqlarga ijozat berilmagan holda ulanishlarni aniqlash va ularga barham berish yuzasidan qonun hujjatlariga muvofiq qattiq chora-tadbirlar koʻrish;

gaz isteʼmolchilarining qattiq toʻlov intizomiga rioya qilishini taʼminlash, aholini gaz bilan taʼminlashga doir koʻrsatilgan xizmatlar hamda yetkazib berilgan tabiiy va suyultirilgan gaz uchun ulgurji isteʼmolchilardan mablagʻlar toʻliq tushishi chora-tadbirlarini koʻrish;

tasdiqlangan dasturlarga muvofiq isteʼmolchilarga gazni hisobga olish priborlari oʻrnatish, ulardan foydalanilishini hisobga olish va nazorat qilish;

gaz quvurlaridan gaz sirqib chiqib ketishini muntazam ravishda aniqlash, ularni bartaraf etish yuzasidan kechiktirib boʻlmaydigan chora-tadbirlar koʻrish;

gaz tarmoqlari va asbob-uskunalarini mukammal va joriy taʼmirlash.

20. Filial quyidagi funksiyalarni amalga oshiradi:

gaz taʼminoti korxonasi nomidan tabiiy va suyultirilgan gazni sotish uchun ulgurji isteʼmolchilar va aholi bilan shartnomalar tuzadi;

tabiiy va suyultirilgan gaz isteʼmolchilarga sotilishini hamda isteʼmol qilinayotgan gazning hisobi yuritilishini taʼminlaydi;

gaz taqsimlash stansiyalaridan isteʼmolchilarga tabiiy gaz berilishi ustidan, shuningdek tumanlar oʻrtasidagi gaz quvurlari chegarasida oʻrnatilgan hisobga olish priborlari boʻyicha hisob va nazoratni amalga oshiradi;

gaz isteʼmolchilari tomonidan oʻz vaqtida haq toʻlanishini nazorat qiladi va ular yuzasidan tegishli chora-tadbirlar koʻradi;

yonilgʻining asosiy turi sifatida tabiiy gazdan foydalanish huquqi yuzasidan korxonalarga berilgan ruxsatnomalarning (yonilgʻi rejimi), shuningdek isteʼmol qilingan gaz hajmi va amalga oshirilgan hisob-kitob boʻyicha har bir abonent — jismoniy shaxsning nomma-nom hisobini yuritadi;

gaz tarmoqlari va asbob-uskunalari profilaktikasi, joriy va mukammal taʼminlanishi yuzasidan korxonalar, tashkilotlar va aholiga pulli xizmatlar koʻrsatadi;

ilgʻor texnikani va energiyani tejovchi yuqori samarali texnologiyalarni joriy etish asosida tuman (shahar) gaz xoʻjaligi rivojlantirilishini taʼminlaydi;

moddiy, mehnat va moliyaviy resurslardan samarali va oqilona foydalanilishini taʼminlaydi;

gaz quvurlarini korroziyadan himoya qilish boʻyicha tashkiliy-texnik tadbirlarni bajaradi, gaz quvurlaridan gaz sirqib chiqib ketishini doimiy ravishda aniqlaydi, ularni bartaraf etish yuzasidan kechiktirib boʻlmaydigan choralar koʻradi;

yuridik va jismoniy shaxslar tomonidan gaz taʼminotining ishlab turgan tarmoqlaridan ijozat berilmagan holda foydalanish holatlarini aniqlaydi va ularning oldini olish chora-tadbirlarini koʻradi, ular boʻyicha tegishli materiallarni tayyorlaydi va huquqni muhofaza qilish organlariga beradi;

gaz isrof boʻlishi holatini va uning oʻsishi sabablarini oʻrganadi, unga yoʻl qoʻymaslik chora-tadbirlarini koʻradi;

isteʼmolchilarga gazni hisobga olish priborlari oʻrnatadi, hisoblagichlarning koʻrsatkichlarini buzuvchi shaxslarni, shu jumladan hisoblagichlar koʻrsatkichlari oʻz xodimlari tomoni buzilishini aniqlaydi, ularga nisbatan qonun hujjatlarida nazarda tutilgan javobgarlik choralarini koʻradi, shu jumladan materiallarni huquqni muhofaza qilish organlariga beradi;

aholini gaz bilan taʼminlash boʻyicha koʻrsatilgan xizmatlar uchun mablagʻlar toʻliq tushishini taʼminlaydi;

maʼnaviy eskirgan gazni hisobga olish priborlarini zamonaviy modellardagi priborlarga almashtirish boʻyicha ulgurji isteʼmolchilar bilan ish olib borishni tashkil etadi va amalga oshiradi;

ommaviy axborot vositalari orqali gaz isteʼmolchilari bilan gazdan oqilona va tejab foydalanish, gazdan foydalanuvchi asbob-uskunaning gaz tarmoqlariga oʻzboshimchalik bilan ulanishiga yoʻl qoʻymaslik toʻgʻrisida tushuntirish ishlari olib boradi.

21. Filial quyidagi huquqlarga egadir:

yetkazib berilgan gaz toʻlovi boʻyicha qarzdorlik mavjud boʻlgan taqdirda gaz yetkazib berishni qisman kamaytirish yoki butunlay toʻxtatib qoʻyish;

tabiiy gaz belgilangan limitlardan ortiqcha sarflanganligi uchun ulgurji isteʼmolchilarga oshirilgan toʻlov belgilash;

isteʼmolchilarning gaz priborlarini hamda gazni hisobga olish va undan foydalanish boʻyicha hujjatlarini tekshirish;

tuman (shahar) hokimligiga isteʼmolchilarni, ayniqsa aholini gaz bilan ishonchli taʼminlash, undan oqilona foydalanish, foydalanilgan gaz uchun isteʼmolchilarning oʻz vaqtida haq toʻlashi masalalari boʻyicha takliflar kiritish.

22. Filial:

ushbu Nizomda unga yuklangan vazifalar hamda gaz isteʼmoli uchun gaz taʼminoti korxonasi bilan tuzilgan shartnomalar boʻyicha majburiyatlar oʻz vaqtida va sifatli bajarilishi;

tegishli gaz taʼminoti stansiyasidan tuman (shahar) boʻlinishi chegarasida olingan gaz, uning ulgurji isteʼmolchilarga va aholiga sotilishi uchun;

tabiiy gaz isteʼmolchilaridan mablagʻ toʻliq yigʻilishini taʼminlash;

tarmoqlarda va gaz taqsimlash punktlarida tabiiy gaz belgilangan normalardan ortiqcha isrof boʻlishiga yoʻl qoʻyilmasligi;

korxonalar, tashkilotlar va aholining gaz asbob-uskunalari bilan profilaktika ishlari oʻz vaqtida oʻtkazilishi uchun javob beradi.

23. Filialga tuman (shahar) hokimining taqdimnomasi boʻyicha gaz taʼminoti korxonasi direktorining buyrugʻi bilan lavozimga tayinlanadigan va lavozimdan ozod qilinadigan direktor rahbarlik qiladi.

24. Filial direktorining faoliyati gaz taʼminoti korxonasi direktori bilan tuzilgan mehnat shartnomasi (kontrakt)ga muvofiq tartibga solinadi.

25. Filial direktori filial nomidan ish koʻradi, gaz taʼminoti korxonasi tomonidan berilgan ishonchnoma asosida tashkilotlar va muassasalarda uning manfaatlarini ifodalaydi.

26. Filialning boʻlimlari va xizmatlari boshliqlari filial direktori tomonidan lavozimga tayinlanadilar va lavozimdan ozod etiladilar hamda oʻzlariga topshirilgan ish uchastkasi uchun toʻliq javob beradilar.

27. Gaz taʼminoti korxonasini va filiallarni qayta tashkil etish va tugatish Oʻzbekiston Respublikasi qonun hujjatlarida belgilangan tartibda amalga oshiriladi.

1. Vazirlar Mahkamasining 1994-yil 9-martdagi 124-son qarori (Oʻzbekiston Respublikasi QT, 1994-y., 3-son, 15-modda) bilan tasdiqlangan “Yoqilgʻi-energetika resurslaridan foydalanish qoidalarini buzganlik uchun iqtisodiy jazolarni qoʻllash toʻgʻrisida Nizom” II boʻlimining 1.2-bandida:

“v” kichik bandidagi “viloyat (shahar) boʻyicha tegishli viloyat (shahar) gaz sotish tashkilotidan, shuningdek” soʻzlari chiqarib tashlansin;

“g” kichik bandi chiqarib tashlansin.

2. Oʻzbekiston Respublikasi Vazirlar Mahkamasining “Tabiiy gaz yetkazib berish va uning uchun hisob-kitob qilish tizimini takomillashtirish toʻgʻrisida” 1999-yil 21-sentabrdagi 439-son qarorida (Oʻzbekiston Respublikasi QT, 1999-y., 9-son, 57-modda):

1-bandning uchinchi xatboshidagi “Oʻzkommunxizmat” agentligining “Boshkommungaz” korxonasi 2002-yil 1-apreldan eʼtiboran” soʻzlari “Oʻzkommunxizmat” agentligining Hududiy gaz taʼminoti korxonalari” soʻzlari bilan almashtirilsin, “mavjud shartnomalarni bekor qilsin va yangi” soʻzlari chiqarib tashlansin;

2-bandning uchinchi xatboshidagi “Boshkommungaz” korxonasi shuʼba korxonalari bilan” soʻzlari “Oʻzkommunxizmat” agentligining Hududiy gaz taʼminoti korxonalari bilan” soʻzlari bilan almashtirilsin;

9-bandning birinchi va ikkinchi xatboshidagi “va “Boshkommungaz” korxonasiga” soʻzlari chiqarib tashlansin.

3. Oʻzbekiston Respublikasi Vazirlar Mahkamasining “Kommunal xizmat koʻrsatish tizimi faoliyatini tashkil etishni takomillashtirish toʻgʻrisida” 2000-yil 21-dekabrdagi 493-son qarorida:

1-bandning ikkinchi xatboshi hamda 1 va 2-ilovalar oʻz kuchini yoʻqotgan deb hisoblansin;

6-bandda:

uchinchi xatboshi quyidagi tahrirda bayon qilinsin:

“Mintaqalararo suv quvurlaridan foydalanish va ularni rivojlantirish bosh direksiyasi direktori maqomiga koʻra “Oʻzkommunxizmat” agentligi bosh direktorining oʻrinbosari hisoblanadi”;

toʻrtinchi xatboshidagi “Boshkommungaz” korxonasi bosh direktori” soʻzlari chiqarib tashlansin.

5. Oʻzbekiston Respublikasi Vazirlar Mahkamasining “Tabiiy gaz yetkazib berish va uning uchun hisob-kitob qilish tizimini yanada takomillashtirish toʻgʻrisida” 2002-yil 20-martdagi 90-son qarorida (Oʻzbekiston Respublikasi QT, 2002-y., 3-son, 16-modda):

2-bandda:

ikkinchi xatboshidagi “Boshkommungaz” korxonasining gaz sotuvchi tashkilotlari” soʻzlari “Hududiy gaz taʼminoti korxonalari” soʻzlari bilan almashtirilsin;

uchinchi xatboshidagi “Boshkommungaz” korxonasi” soʻzlari “Oʻzkommunxizmat” agentligi” soʻzlari bilan almashtirilsin;

6-banddagi “Oʻzkommunxizmat” agentligining “Boshkommungaz” korxonasi 2002-yil 1-apreldan boshlab” soʻzlari “Oʻzkommunxizmat” agentligining Hududiy gaz taʼminoti korxonalari” soʻzlari bilan almashtirilsin, “mavjud shartnomalarni bekor qilsin va” soʻzlari chiqarib tashlansin;

“Tabiiy gaz yetkazib berish va pul mablagʻlari oqimlarining harakati sxemasi” nomli 1-ilovada:

“Boshkommungaz” korxonasining gaz sotish tashkilotlari” soʻzlari “Hududiy gaz taʼminoti korxonalari” soʻzlari bilan almashtirilsin;

“Boshkommungaz” korxonasining gaz sotish tashkilotlari orqali” soʻzlari “Oʻzkommunxizmat” agentligining Hududiy gaz taʼminoti korxonalari orqali” soʻzlari bilan almashtirilsin.

6. Oʻzbekiston Respublikasi Vazirlar Mahkamasining “2002-2004-yillarda uy-joy fondini gazni hisobga olish priborlari bilan jihozlashga doir qoʻshimcha chora-tadbirlar toʻgʻrisida” 2002-yil 28-martdagi 99-son qarorida (Oʻzbekiston Respublikasi QT, 2002-y., 3-son, 18-modda):

a) 1-bandning oltinchi xatboshidagi “Oʻzkommunxizmat” agentligining “Boshkommungaz” korxonasi” soʻzlari “Oʻzkommunxizmat” agentligi” soʻzlari bilan almashtirilsin;

b) 2-bandda:

ikkinchi xatboshidagi “Oʻzkommunxizmat” agentligining “Boshkommungaz” korxonasi” soʻzlari “Oʻzkommunxizmat” agentligi” soʻzlari bilan almashtirilsin;

uchinchi xatboshidagi “Oʻzkommunxizmat” agentligining “Boshkommungaz” korxonasi” soʻzlari “Oʻzkommunxizmat” agentligi” soʻzlari bilan almashtirilsin;

v) 8-bandning uchinchi xatboshidagi “Oʻzkommunxizmat” agentligining “Boshkommungaz” korxonasiga” soʻzlari “Oʻzkommunxizmat” agentligiga” soʻzlari bilan almashtirilsin;

g) “Gazni hisobga olish priborlarini sotib olish, ularni kvartiralarda va yakka tartibdagi uylarda oʻrnatish va ulardan foydalanish tartibi toʻgʻrisida nizom” nomli 4-ilovada:

2-bandning uchinchi xatboshidagi “Oʻzkommunxizmat” agentligining “Boshkommungaz” korxonasi, uning shuʼba korxonalari” soʻzlari “Oʻzkommunxizmat” agentligining Hududiy gaz taʼminoti korxonalari” soʻzlari bilan almashtirilsin;

14-banddagi “Oʻzkommunxizmat” agentligining “Boshkommungaz” korxonasi” soʻzlari “Oʻzkommunxizmat” agentligi” soʻzlari bilan almashtirilsin;

16-bandda:

birinchi xatboshidagi “Oʻzkommunxizmat” agentligining “Boshkommungaz” korxonasi” soʻzlari “Oʻzkommunxizmat” agentligi” soʻzlari bilan almashtirilsin;

uchinchi xatboshidagi “Oʻzkommunxizmat” agentligi” soʻzlari chiqarib tashlansin;

toʻrtinchi xatboshidagi “Gaztaʼminot” shuʼba korxonalari” soʻzlari “Hududiy gaz taʼminoti korxonalari” soʻzlari bilan almashtirilsin;

17-bandda:

birinchi xatboshidagi “Boshkommungaz” korxonasining “Gaztaʼminot” shuʼba korxonalari” soʻzlari “Oʻzkommunxizmat” agentligining Hududiy gaz taʼminoti korxonalari” soʻzlari bilan almashtirilsin;

toʻqqizinchi xatboshi quyidagi tahrirda bayon qilinsin:

gazni hisobga olish priborlariga ega boʻlmagan isteʼmolchilarga 2005-yil 1-yanvardan boshlab gaz berishmaydi;

18-banddagi va 20-bandning beshinchi xatboshidagi “Gaztaʼminot” shuʼba korxonalari bilan” soʻzlari “Oʻzkommunxizmat” agentligining Hududiy gaz taʼminoti korxonalari bilan” soʻzlari bilan almashtirilsin;

21-banddagi “Boshkommungaz” korxonasiga” soʻzlari “Oʻzkommunxizmat” agentligiga” soʻzlari bilan almashtirilsin;

22-bandda:

birinchi xatboshidagi “Boshkommungaz korxonasi tomonidan” soʻzlari “Oʻzkommunxizmat” agentligi tomonidan” soʻzlari bilan almashtirilsin;

uchinchi xatboshidagi “Boshkommungaz korxonasiga” soʻzlari “Oʻzkommunxizmat” agentligiga” soʻzlari bilan almashtirilsin;

23-banddagi “Boshkommungaz korxonasi tomonidan” soʻzlari “Oʻzkommunxizmat” agentligi tomonidan” soʻzlari bilan almashtirilsin;

24-banddagi “Boshkommungaz” korxonasining “Gaztaʼminot” shuʼba korxonalari bilan” soʻzlari “Oʻzkommunxizmat” agentligining Hududiy gaz taʼminoti korxonalari bilan” soʻzlari bilan almashtirilsin;

25-banddagi “Boshkommungaz” korxonasining” soʻzlari “Oʻzkommunxizmat” agentligining” soʻzlari bilan almashtirilsin;

30-banddagi “Gaztaʼminot” shuʼba korxonasiga” soʻzlari “Oʻzkommunxizmat” agentligining Hududiy gaz taʼminoti korxonasiga” soʻzlari bilan almashtirilsin;

33-banddagi “Boshkommungaz” korxonasining “Gaztaʼminot” shuʼba korxonalari” soʻzlari “Oʻzkommunxizmat” agentligining Hududiy gaz taʼminoti korxonalari” soʻzlari bilan almashtirilsin;

35-banddagi “Boshkommungaz” korxonasi” soʻzlari “Oʻzkommunxizmat” agentligi” soʻzlari bilan almashtirilsin;

38-banddagi “Boshkommungaz” korxonasi boʻlinmalari” soʻzlari “Oʻzkommunxizmat” agentligining Hududiy gaz taʼminoti korxonalari” soʻzlari bilan almashtirilsin;

41-banddagi “Gaztaʼminot” shuʼba korxonalari tomonidan” soʻzlari “Oʻzkommunxizmat” agentligining Hududiy gaz taʼminoti korxonalari tomonidan” soʻzlari bilan almashtirilsin;

42-bandning birinchi xatboshidagi “Boshkommungaz” korxonasi boʻlinmalari” soʻzlari “Oʻzkommunxizmat” agentligining Hududiy gaz taʼminoti korxonalari” soʻzlari bilan almashtirilsin;

d) Gazni hisobga olish priborlarini sotib olish, ularni kvartiralarda va yakka tartibdagi uylarda oʻrnatish va ulardan foydalanish tartibi toʻgʻrisidagi nizomga “Gazni hisobga olish priborlarini mablagʻ bilan taʼminlash, sotib olish, oʻrnatish va ulardan foydalanish sxemasi” nomli ilovada:

“Oʻzkommunxizmat” agentligining “Boshkommungaz” korxonasi” soʻzlari “Oʻzkommunxizmat” agentligi” soʻzlari bilan almashtirilsin;

“Gaztaʼminot” shuʼba korxonalari” soʻzlari “Oʻzkommunxizmat” agentligining Hududiy gaz taʼminoti korxonalari” soʻzlari bilan almashtirilsin;

e) “Gazni hisobga olish priborlarini mablagʻ bilan taʼminlash, sotib olish, oʻrnatish va ulardan foydalanish sxemasi”ga izohlarda:

1-banddagi “Oʻzkommunxizmat” agentligining “Boshkommungaz” korxonasiga” soʻzlari “Oʻzkommunxizmat” agentligiga” soʻzlari bilan almashtirilsin;

8-banddagi “Gaztaʼminot” shuʼba korxonalari” soʻzlari “Oʻzkommunxizmat” agentligining Hududiy gaz taʼminoti korxonalari” soʻzlari bilan almashtirilsin;

14-banddagi “Boshkommungaz” korxonalari bilan” soʻzlari “Oʻzkommunxizmat” agentligi bilan” soʻzlari bilan almashtirilsin;

15-banddagi “Oʻzkommunxizmat” agentligining “Boshkommungaz” korxonasi tomonidan” soʻzlari “Oʻzkommunxizmat” agentligi tomonidan” soʻzlari bilan almashtirilsin;

j) “Gazni hisobga olish priborlari boʻlmaganda kommunal-maishiy ehtiyojlar uchun aholiga beriladigan tabiiy gaz sarfining oylik normalari” nomli 5-ilovaning 4-bandida:

“kalendar yil mobaynida teng miqdorlarda besh oylik isitish mavsumi hisobidan” soʻzlari “besh oylik isitish mavsumi mobaynida har oyda” soʻzlari bilan almashtirilsin;

“2,5” raqamlari “6” raqami bilan almashtirilsin;

“2,4” raqamlari “5,76” raqamlari bilan almashtirilsin.