Nazorat-kassa mashinalarining texnik holati va ularning toʻgʻri qoʻllanilishi uchun javobgarlikni oshirish, aholi bilan pulli hisob-kitoblarni amalga oshirishda ulardan noqonuniy foydalanish hollarining oldini olish maqsadida Vazirlar Mahkamasi qaror qiladi:

1. Belgilansinki, nazorat-kassa mashinalarini mamlakatimizda ishlab chiqaruvchilar, ularni yetkazib beruvchilar va ulardan foydalanuvchilar, shuningdek ularga texnik xizmat koʻrsatish va ularni taʼmirlash korxonalari foydalanilayotgan nazorat-kassa mashinalarining belgilangan texnik talablarga muvofiqligi, mashinaning daromad yashirilishiga koʻmaklashuvchi fiskal xotirasiga xizmat koʻrsatuvchi dasturning noqonuniy oʻzgartirilganligi uchun amaldagi qonun hujjatlariga muvofiq jinoiy javobgarlikkacha boʻlgan tartibda javob beradilar.

2. Belgilab qoʻyilsinki, aholi bilan pulli hisob-kitoblarni amalga oshiruvchi yuridik shaxslar va yakka tartibdagi tadbirkorlar fiskal xotiraga xizmat koʻrsatish dasturi buzilgan holda texnik talablarga muvofiq boʻlmagan nazorat-kassa mashinalaridan foydalangan taqdirda ulardan soliq organlari tomonidan eng kam oylik ish haqining 200 baravari miqdorida, qoida buzish takrorlanganda esa — eng kam oylik ish haqining 500 baravari miqdorida jarima undiriladi.

Mazkur qarorga muvofiq soliq organlari tomonidan solingan jarima qoida buzuvchi tomonidan toʻlanmagan taqdirda, sud ijrochilari undiruvni qonun hujjatlarida belgilangan tartibda aybdor shaxsning mol-mulkiga qaratishga haqlidir.

3. Nazorat-kassa mashinalariga texnik xizmat koʻrsatishni va ularni taʼmirlashni amalga oshiruvchi korxonalar va yakka tartibdagi tadbirkorlar ularni taʼmirlash hamda plombalash boʻyicha talablarga qatʼiy rioya etilishi uchun javob beradilar, fiskal xotiraga xizmat koʻrsatish dasturlarining noqonuniy oʻzgartirilishi hollari toʻgʻrisida soliq organlariga darhol xabar qilishlari shart.

4. Oʻzbekiston Respublikasi Davlat soliq qoʻmitasi manfaatdor vazirliklar va idoralar bilan birgalikda ikki hafta muddatda Aholi bilan pulli hisob-kitoblarni amalga oshirishda nazorat-kassa mashinalarini qoʻllash tartibi toʻgʻrisidagi yangi nizomni ushbu qarorga muvofiq ishlab chiqsin va belgilangan tartibda tasdiqlasin.

5. Davlat soliq qoʻmitasi, Oʻzbekiston Respublikasi Bosh prokuraturasi huzuridagi Soliq va valyutaga oid jinoyatlarga qarshi kurashish departamenti nazorat-kassa mashinalarini qoʻllash va ulardan foydalanishning belgilangan tartibiga rioya etilishi ustidan nazoratni kuchaytirsinlar.

6. Oʻzbekiston Respublikasi Adliya vazirligi Moliya vazirligi va Davlat soliq qoʻmitasi bilan birgalikda bir oy muddatda Vazirlar Mahkamasiga qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida takliflar kiritsin.

7. Mazkur qarorning bajarilishini nazorat qilish Oʻzbekiston Respublikasi Prezidentining Davlat maslahatchisi A.A. Azizov va Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.