Yoshlarni Vatanga muhabbat, mustaqillik gʻoyalariga sadoqat va fidoyilik ruhida tarbiyalash, yurt ravnaqiga daxldorlik tuygʻusini mustahkamlash, ularning keng qamrovli bunyodkorlik va yaratuvchilik jarayonidagi ishtirokini kengaytirishda madaniyat va sanʼatning oʻrnini har tomonlama oshirish, shuningdek boy madaniy musiqiy merosimiz, zamonaviy milliy estrada va jahon sanʼati durdonalari asosida ularda yuksak badiiy dunyoqarashni shakllantirish hamda yosh iqtidorlarni ragʻbatlantirish tizimini yanada kengaytirish maqsadida Vazirlar Mahkamasi qaror qiladi:

1. Oʻzbekiston Respublikasi Madaniyat va sport ishlari vazirligi, “Oʻzbeknavo” estrada birlashmasi, Oʻzbekiston “Kamolot” yoshlar ijtimoiy harakati, Oʻzbekiston Respublikasi Xalq taʼlimi vazirligi, Oliy va oʻrta maxsus taʼlim vazirligi, Oʻrta maxsus, kasb-hunar taʼlimi markazi, “Mahalla” xayriya jamoat fondining Yoshlar madaniyat va sanʼat markazini (keyingi oʻrinlarda Markaz deb ataladi) tashkil etish toʻgʻrisidagi takliflari maʼqullansin.

2. Quyidagilar Markazning asosiy vazifalari etib belgilansin:

oʻsib kelayotgan yosh avlodni vatanparvarlik, milliy qadriyatlarimiz ruhida tarbiyalash, madaniyat va sanʼat borasida yoshlarning intilishlarini qoʻllab-quvvatlash maqsadida konsert va festivallar, koʻrik-tanlovlar, turli madaniy shou-tomosha tadbirlarini oʻtkazish;

jahon xalqlari milliy musiqa va qoʻshiqchilik sanʼatining noyob namunalarini yoshlar orasida keng targʻib qilish, Oʻzbekiston Respublikasiga tashrif buyuradigan hamda yurtimizdan xorijga chiquvchi yosh xonanda, sozanda va badiiy jamoalarning gastrol safarlarini milliy xususiyatlarimizga muvofiq yuqori badiiy saviyada uyushtirish;

yosh ijodkorlarning, ayniqsa chekka qishloq va mahallalardagi iqtidorli yoshlarning noyob isteʼdodini roʻyobga chiqarish va ular faoliyatini tizimli ravishda keng targʻib etish, turli teleloyiha, teletanlov, koʻrsatuv va eshittirishlar tashkil etish;

yoshlarning ijodiy birlashmalari, jamoalari va yakkaxon ijrochilarning faoliyati, repertuari, ssenariylari, dasturlarining yuqori gʻoyaviy-badiiy saviyasini taʼminlashga amaliy yordam berish, ushbu jarayonni muvofiqlashtirish va tahlil qilib borish;

turli maʼnaviy tahdidlar, mafkuraviy xurujlar, “ommaviy madaniyat”ning yoshlarga zararli taʼsirini oʻrganish hamda yoshlar oʻrtasida samarali ijodiy hamkorlik muhitini yaratish;

yoshlar uchun tajriba almashish, ilmiy-ijodiy simpoziumlar, konferensiyalar, mahorat darslari tashkil etish;

teatr, konsert va tomosha sahnalari, madaniyat, sanʼat markazlari, madaniyat va istirohat bogʻlari, amfiteatrlar va boshqa madaniy-tomosha muassasalaridan samarali foydalanish hamda joylarda yosh iqtidor egalari va isteʼdod sohiblarini qoʻllab-quvvatlash, ularga amaliy yordam koʻrsatish.

3. “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 9-moddasiga muvofiq Markazga quyidagi faoliyat turlarini tegishli litsenziya olmasdan amalga oshirishga ruxsat berilsin:

Oʻzbekiston Respublikasida va undan tashqarida konsert-tomosha faoliyatini amalga oshirish;

noshirlik va taʼlim faoliyati, audiovizual asarlarni tayyorlash, dublyaj qilish va ekranda namoyish etish, audiovizual asarlarni, fonogrammalar va EHM uchun yaratilgan dasturlarni takrorlash, sotish, prokatga berish, fonogrammalarni tayyorlash hamda turizm faoliyati bilan shugʻullanish.

4. Belgilab qoʻyilsinki, Markaz yuridik shaxs hisoblanib, Madaniyat vazirligi muassisligida davlat unitar korxonasi shaklida tashkil etiladi.

5. Oʻzbekiston Respublikasi Madaniyat va sport ishlari vazirligi bir oy muddatda:

Markazning tuzilmasi va Ustavini tasdiqlasin hamda oʻrnatilgan tartibda davlat roʻyxatidan oʻtkazsin;

Oʻzbekiston Respublikasi Moliya vazirligi hamda Mehnat va aholini ijtimoiy muhofaza qilish vazirligi bilan birgalikda Markazning shtatlar jadvalini ishlab chiqsin va belgilangan tartibda tasdiqlasin.

6. Oʻzbekiston Respublikasi Xususiylashtirish, monopoliyadan chiqarish va raqobatni rivojlantirish davlat qoʻmitasi, Madaniyat va sport ishlari vazirligi, Toshkent shahar hokimligi va Oʻzbekiston “Kamolot” yoshlar ijtimoiy harakatining:

Toshkent shahar, Yunusobod tumani, Mustaqillik shoh koʻchasi, 2-uy manzilida joylashgan Yoshlar ijod saroyi binosini, undagi mebel va jihozlar hamda moddiy-texnik vositalar bilan birgalikda Oʻzbekiston “Kamolot” yoshlar ijtimoiy harakati Markaziy Kengashiga tasarruf etish huquqisiz bepul berish;

Yoshlar ijod saroyi binosida Markazni ijara toʻlovisiz joylashtirish, shuningdek saroyning konsert va koʻrgazma zallari, xonalari, mebel va jihozlari hamda moddiy-texnik vositalaridan bepul foydalanishi toʻgʻrisidagi takliflariga rozilik berilsin.

7. Toshkent shahar hokimligi bir oy muddatda ushbu qarorning 4-bandida koʻrsatilgan binoni, undagi mebel va jihozlar hamda moddiy-texnik vositalar bilan birgalikda belgilangan tartibda topshirsin, Oʻzbekiston “Kamolot” yoshlar ijtimoiy harakati Markaziy Kengashi oʻz balansiga qabul qilsin va undan maqsadli foydalanilishini taʼminlasin.

8. Quyidagilar Markazning faoliyatini moliyalashtirish manbalari etib belgilansin:

markazning tadbirkorlik faoliyatidan olingan daromadlar;

muassisning budjetdan tashqari mablagʻlari;

yuridik va jismoniy shaxslarning homiylik xayriyalari;

qonunchilik bilan taqiqlanmagan boshqa manbalar.

9. Oʻzbekiston Respublikasi Madaniyat vazirligi “Oʻzbekkonsert” davlat muassasasi bilan birgalikda Oʻzbekiston Respublikasi Madaniyat vazirligi huzuridagi budjetdan tashqari Madaniyat va sanʼatni rivojlantirish jamgʻarmasi hamda jalb etiladigan homiylik mablagʻlari hisobidan Markaz faoliyati tashkil etilishini, shuningdek uning moddiy-texnika bazasi shakllantirilishini taʼminlasin.

Oʻzbekiston Respublikasi Moliya vazirligi Oʻzbekiston Respublikasi Davlat budjetining 2014-yilgi parametrlariga ushbu qarordan kelib chiqadigan oʻzgartirishlar toʻgʻrisida Vazirlar Mahkamasiga takliflar kiritsin.

10. Oʻzbekiston Respublikasi Aloqa, axborotlashtirish va telekommunikatsiya texnologiyalari davlat qoʻmitasi Markazning belgilangan tartibda zamonaviy aloqa vositalari, shu jumladan Internet tarmogʻi va boshqa aloqa turlari bilan taʼminlash choralarini koʻrsin hamda uning zamonaviy talablarga javob beradigan veb-saytini yaratishga koʻmaklashsin.

11. Toshkent shahar hokimligi tomonidan taʼsis etilgan “YOSNLAR IJOD SAROYINI SAQLASN VA EKSPLUATASIYA QILISN DIREKTSIYASI” davlat unitar korxonasi (keyingi oʻrinlarda direksiya deb ataladi) qonunchilikda belgilangan tartibda tugatilishi maʼlumot uchun qabul qilinsin.

Toshkent shahar hokimligi:

Oʻzbekiston Respublikasi Xususiylashtirish, monopoliyadan chiqarish va raqobatni rivojlantirish davlat qoʻmitasi bilan birgalikda direksiya belgilangan tartibda tugatilishini;

Oʻzbekiston Respublikasi Mehnat va aholini ijtimoiy muhofaza qilish vazirligi hamda Oʻzbekiston “Kamolot” yoshlar ijtimoiy harakati Markaziy Kengashi bilan birgalikda tugatilayotgan direksiya xodimlarining ishga joylashtirilishini taʼminlasin.

12. Quyidagilar oʻz kuchini yoʻqotgan deb hisoblansin:

Vazirlar Mahkamasining 2008-yil 23-avgustdagi 442-f-son farmoyishining 3 va 4-bandlari;

Vazirlar Mahkamasining 2011-yil 26-maydagi 312-f-son farmoyishi.

13. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

14. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.