Oʻzbekiston Respublikasining Jinoyat-ijroiya kodeksi va Oʻzbekiston Respublikasi Prezidentining 2013-yil 15-iyuldagi PQ-2003-sonli “Qonunlarning havolaki normalarini amalga oshirishga qaratilgan normativ-huquqiy va boshqa hujjatlarni ishlab chiqish rejalarini tasdiqlash toʻgʻrisida”gi qaroriga asosan buyuraman:

1. Mahkumlarni jazoni ijro etish muassasasiga joʻnatish hamda ularni bir muassasadan boshqasiga koʻchirish tartibi toʻgʻrisidagi nizom ilovaga muvofiq tasdiqlansin.

2. Oʻzbekiston Respublikasi ichki ishlar vazirining 2009-yil 20-iyuldagi 93-sonli “Ozodlikdan mahrum qilish jazosiga hukm etilgan shaxslarni jazoni ijro etish muassasasiga joʻnatish va mahkumni jazoni ijro etuvchi bir muassasadan boshqasiga oʻtkazish tartibi toʻgʻrisidagi yoʻriqnomani tasdiqlash haqida”gi buyrugʻi oʻz kuchini yoʻqotgan deb topilsin.

3. Mazkur buyruq rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasining Jinoyat-ijroiya kodeksi hamda Oʻzbekiston Respublikasi Prezidentining 2013-yil 15-iyuldagi PQ-2003-sonli “Qonunlarning havolaki normalarini amalga oshirishga qaratilgan normativ-huquqiy va boshqa hujjatlarni ishlab chiqish rejalarini tasdiqlash toʻgʻrisida”gi qaroriga muvofiq, mahkumlarni jazoni ijro etish muassasasiga joʻnatish hamda ularni bir muassasadan boshqasiga koʻchirish tartibini belgilaydi.

2. Ozodlikdan mahrum etishga hukm qilingan shaxslar jazo muddatini jazoni ijro etish muassasalarida oʻtaydilar.

Qasddan sodir etilgan ogʻir jinoyati uchun birinchi marta sakkiz yilgacha va sakkiz yil muddatga ozodlikdan mahrum etishga hukm qilingan shaxslar alohida hollarda, mahkumning yozma roziligi boʻlgan taqdirda, muassasa boshligʻining buyrugʻiga binoan xoʻjalik xizmatiga oid ishlarni bajarish uchun jazo muddatini tergov hibsxonasi yoki turmada oʻtashi mumkin.

3. Ozodlikdan mahrum etishga hukm qilingan chet el fuqarolari va fuqaroligi boʻlmagan shaxslarni jazo muddatini oʻtash uchun Oʻzbekiston Respublikasi hududidan boshqa davlatga joʻnatish, ozodlikdan mahrum etishga hukm qilingan Oʻzbekiston Respublikasi fuqarolarini esa, boshqa davlatlardan qabul qilish Oʻzbekiston Respublikasining xalqaro shartnomalariga muvofiq amalga oshiriladi.

4. Mahkumlar jazo muddatini oʻtash uchun muassasalarga sudning qonuniy kuchga kirgan hukmi yoki ajrimiga asosan joʻnatiladi.

5. Ozodlikdan mahrum etishga hukm qilingan shaxslar tergov hibsxonasining maʼmuriyati hukm qonuniy kuchga kirganligi toʻgʻrisida sud xabarnomasini olgan kundan boshlab oʻn kunlik muddat ichida jazoni oʻtash uchun joʻnatiladi.

6. Ozodlikdan mahrum etishga hukm qilingan shaxslar sud hukmi yoki ajrimida nazarda tutilgan tartibdagi jazoni ijro etish koloniyalariga joʻnatiladi.

7. Manzil koloniyalarda jazo muddatini oʻtashga hukm qilingan mahkumlardan tashqari, quyidagi toifadagi mahkumlar jazo muddatini oʻtash uchun ixtisoslashtirilgan jazoni ijro etish muassasalariga joʻnatiladi:

voyaga yetmaganlar;

ayollar;

chet el fuqarolari va fuqaroligi boʻlmagan shaxslar;

umrbod ozodlikdan mahrum etilganlar;

oʻta xavfli retsidivistlar;

sud hamda huquqni muhofaza qiluvchi idoralarning sobiq xodimlari;

turli yuqumli kasallikka chalinganlar;

sud tomonidan tibbiy yoʻsindagi majburlov choralarini qoʻllash belgilangan mahkumlar.

8. Ozodlikdan mahrum etishga hukm qilingan shaxs butun jazo muddatini, odatda, bitta muassasada oʻtaydi.

9. Mahkumlar quyidagi hollarda bir muassasadan boshqa shu turdagi muassasaga koʻchirilishi mumkin:

a) mahkumning shaxsiy xavfsizligini taʼminlash maqsadida, uning roziligini olgan holda;

b) mahkumning mazkur muassasada qolishiga toʻsqinlik qiluvchi quyidagi hollarda:

muassasaning qayta tashkil etilishi yoki tugatilishi munosabati bilan;

bir jinoyat ishi boʻyicha sudlanuvchi, guvoh yoki jabrlanuvchi boʻlgan mahkumlarni bir-biridan ajratish maqsadida;

muassasada belgilangan kun tartibini mustahkamlash va jinoyat sodir etilishining oldini olish maqsadida;

muassasada jazo muddatini oʻtayotgan mahkumlar oʻrtasida yuzaga kelgan nizoni hal etishning boshqa chorasi boʻlmaganda;

muassasada jazo muddatini oʻtayotganlar orasida uyushgan guruh tashkil etish yoki yetakchilik qilishga moyilligi mavjud boʻlgan mahkumlarning muassasada oʻrnatilgan tezkor vaziyat barqarorligiga salbiy taʼsirini oldini olish maqsadida;

mahkum yoki qarindoshlarining arizasiga asosan;

sudning hukm yoki ajrimda nazarda tutilgan jazoni ijro etish tartibini oʻzgartirish haqidagi qaroriga asosan;

v) mahkum kasal boʻlib qolgan taqdirda.

10. Mazkur Nizomning 9-bandi “a” va “b” kichik bandining ikkinchi — yettinchi xatboshilarida nazarda tutilgan holatlardan biri yuz bergan taqdirda, mahkumlarni koʻchirish uchun asos boʻlgan hujjatlar Oʻzbekiston Respublikasi Ichki ishlar vazirligi Jazoni ijro etish bosh boshqarmasi (bundan buyon matnda JIEBB deb yuritiladi) tomonidan koʻrib chiqiladi.

Mahkumlarni koʻchirish uchun asos boʻlgan hujjatlarni koʻrib chiqish natijalari boʻyicha JIEBBning tegishli xizmati tomonidan xulosa tuziladi. Mazkur xulosa JIEBB boshligʻi yoki uning oʻrinbosari tomonidan tasdiqlanadi.

11. Mahkumni bir muassasadan boshqa shu turdagi muassasaga koʻchirish JIEBB boshligʻi yoki uning oʻrinbosari tomonidan tasdiqlangan xulosaga yoxud sud qaroriga asosan JIEBBning Maxsus boʻlimi tayyorlagan naryadga muvofiq amalga oshiriladi.

12. Mahkumlarni davolash huquqi asosidagi koloniyalarga va mahkumlar uchun ixtisoslashgan kasalxonalarga oʻtkazish soqchi, zarurat boʻlganda, tibbiy xodimlar kuzatuvida amalga oshiriladi. Mahkum kasal boʻlib qolgan taqdirda, uni koloniyadan yoki turmadan davolash huquqi asosidagi koloniyaga yoki mahkumlar uchun ixtisoslashgan kasalxonaga oʻtkazishga tibbiy xulosa asosida yoʻl qoʻyiladi.

13. Mahkumning bir muassasadan boshqasiga koʻchirilganligi toʻgʻrisida jazoni ijro etish muassasasining maʼmuriyati mahkum yetib kelgan kundan boshlab uch kunlik muddat ichida hukm chiqargan sudni xabardor qilishi, shuningdek mahkumning oilasiga muassasa manzilini koʻrsatib hamda mahkumning yozishma olib borish, uchrashuv, posilka, yoʻqlov va banderollar olish, telefon orqali soʻzlashuv huquqlarini tushuntirib, xabarnoma yuborishi shart.

14. Davolash huquqi asosidagi koloniyada yoki mahkumlar uchun ixtisoslashgan kasalxonada davolash kurslari tugagan hamda davolanishni davom ettirishga muhtoj boʻlmagan mahkumlar tibbiy xulosa asosida ilgari jazo muddatini oʻtagan muassasalariga qaytariladi.

Davolanishni davom ettirishga muhtoj boʻlgan mahkumlar tibbiy xulosa asosida davolash muassasasi huquqiga ega boʻlgan tegishli muassasalarga yuboriladi.

15. Muassasalar tomonidan mahkumlarni koʻchirish Oʻzbekiston Respublikasi Ichki ishlar vazirligi ozodlikdan mahrum qilish turidagi jazoni ijro etish muassasalarining ichki tartib qoidalarida (roʻyxat raqami 2495, 2013-yil 29-iyul) belgilangan tartibda amalga oshiriladi.

16. Ozodlikdan mahrum etishga hukm qilingan va davolanish uchun tergov hibsxonalaridan toʻgʻridan-toʻgʻri davolash huquqi asosidagi koloniyalarga va mahkumlar uchun ixtisoslashgan kasalxonalarga yuborilgan mahkumlar davolash kursi tugagandan soʻng, mazkur Nizomning 2-bobida belgilangan tartibda tegishli muassasalarga joʻnatiladi.

17. Jazo muddatining muayyan qismini turmada oʻtashga hukm qilingan shaxslar mazkur muddat tugaganidan soʻng, sud hukmi yoki ajrimida nazarda tutilgan tartibdagi jazoni ijro etish koloniyasiga joʻnatiladi.

18. Qonunchilik hujjatlarida nazarda tutilgan asoslarga muvofiq mahkumni jazoni ijro etishning bir tartibli koloniyasidan boshqa tartibli koloniyasiga, turmadan koloniyaga va koloniyadan turmaga oʻtkazish jazoni ijro etish muassasasi maʼmuriyatining taqdimnomasiga binoan, shuningdek mahkumning yoki uning himoyachisining iltimosnomasiga koʻra sudya tomonidan amalga oshiriladi. Bunda mahkum bir muassasadan boshqasiga ushbu bobda belgilangan tartibda koʻchiriladi.