Oʻzbekiston Respublikasi Hukumati va Gruziya Respublikasi Hukumati, keyingi oʻrinlarda Tomonlar deb ataladi,

ilmiy-texnik hamkorlik ikki tomonlama munosabatlar butun majmuining muhim tarkibiy elementi ekanligiga ishonch hosil qilib va ilmiy tadqiqotlar hamda ishlanmalarning baynalmilallashuvi sharoitlarida oʻzaro aloqaning zararligini tan olib,

Oʻzbekiston va Gruziya oʻrtasida tarixiy shakllangan ilmiy-texnik aloqalarni hisobga olib,

bunday oʻzaro aloqalar ikkala mamlakat va xalqlar oʻrtasidagi hamkorlikni mustahkamlashga yordam berishini, shuningdek oʻzaro foydali savdo-iqtisodiy aloqalarni rivojlantirishga zamin yaratishini nazarda tutib,

bu hamkorlikni rivojlantirish uchun uzoq muddatli asos yaratishni zarur deb hisoblab,

quyidagilar toʻgʻrisida ahdlashib oldilar:

Tomonlar ilmiy-texnik hamkorlikni teng huquqlilik va oʻzaro foydalilik prinsiplari asosida rivojlantiradilar.

Ikkala davlat ilmiy-texnik siyosatidagi ustuvorliklarni eʼtiborga olib, Tomonlar hamkorlikni quyidagi yoʻnalishlarda rivojlantiradilar:

tabiiy fanlar sohasidagi fundamental tadqiqotlar;

milliy fanlar akademiyalari oʻrtasidagi hamkorlik;

texnik fanlar va texnologiyalarni rivojlantirish sohasidagi tadqiqotlar;

mutaxassislar tayyorlash va malakasini oshirish;

standartlash, metrologiya va sertifikatsiya;

intellektual mulkni muhofaza qilish;

ilmiy-texnika axboroti.

2-moddada nazarda tutilgan hamkorlik ikkala davlat vazirliklari, idoralari, milliy akademiyalari, ilmiy-tadqiqot muassasalari, oliy oʻquv yurtlari, firmalari, ilmiy tashkilotlari, jamiyatlari, alohida olim va mutaxassislari tomonidan oʻzlariga berilgan vakolat doirasida milliy qonunchilikka muvofiq bevosita bitimlar tuzish asosida amalga oshiriladi. Hamkorlikka umumiy rahbarlikni va uni muvofiqlashtirishni Oʻzbekiston Respublikasi Fan va texnika davlat qoʻmitasi va Gruziya Respublikasi Fan va texnologiyalar davlat qoʻmitasi amalga oshiradi. Bevosita bitimlar hamkorlik dasturlarini amalga oshirish masalalarini, uning iqtisodiy va tashkiliy shart-sharoitlarini, yaʼni:

hamkorlik maqsadi va mazmunini, qoʻshma dasturlar vazifasi va kutilayotgan natijalarini, ularni amalga oshirish muddati va shartlarini;

davlatlardan har birida hamkorlik doirasida bajarilayotgan ishlarni mablagʻ bilan taʼminlash manbalarini, oʻzaro moliyaviy majburiyatlarni;

ilmiy-texnika obyektlaridan birgalikda foydalanish, qoʻshma tadqiqotlar natijalaridan foydalanish va intellektual hamda sanoat mulki masalalarini hal qilish tartibini:

bahsli masalalarni hal qilish va hamkorlikni amalga oshirishda ishtirok etgan shaxslar tomonidan hamkorlik doirasidagi oʻz majburiyatlarini bevosita bajarishlari vaqtida sheriklariga yetkazishlari mumkin boʻlgan zararlarni qoplash tartibini;

hamkorlikda uchinchi davlatlar shaxslari yoki xalqaro tashkilotlarning ishtirok etishi, bunday ishtirokni mablagʻ bilan taʼminlash, bu shaxslar yoki tashkilotlar tomonidan hamkorlik natijalaridan foydalanish tartibini;

hamkorlik jarayonida bir-biriga beriladigan axborotning toʻgʻriligi va materiallar hamda asbob-uskunalar sifati uchun javobgarlikni belgilab berishi kerak.

Mazkur Bitim doirasidagi hamkorlik quyidagi shakllarda amalga oshirilishi mumkin:

koʻp bilim talab qiladigan texnologiyalarni yaratish va oʻzlashtirish boʻyicha qoʻshma ilmiy-tadqiqot dasturlari va loyihalarini amalga oshirish;

yangi texnologiyalarni oʻzlashtirishni taʼminlaydigan qoʻshma ilmiy-tadqiqot jamoalari, laboratoriyalar, shuningdek innovatsiya firma va tashkilotlarini tashkil qilish;

boshqa Tomon ilmiy-tadqiqot muassasalari, oliy oʻquv yurtlari, texnoparklari, arxivlari, kutubxonalari va muzeylarida, birgalikdagi dala tadqiqotlari va ekspeditsiyalarda ham ilmiy ishlar olib borish;

ilmiy-texnika axborotlari, hujjatlar, adabiyot va bibliografiya nashrlarini ayirboshlash;

birgalikda seminarlar, ilmiy konferensiyalar va ish yuzasidan uchrashuvlar oʻtkazish;

olimlar va mutaxassislar almashish;

olimlar va mutaxassislar malakasini oshirish, malaka oshirishni tashkil etish;

shuningdek, oʻzaro kelishinilgan boshqa shakllarda.

Mazkur Bitimni amalga oshirish maqsadlarida Tomonlar Fan va texnologiya sohasidagi hamkorlik masalalari boʻyicha ikki tomonlama komissiya tuzadilar. Komissiya oʻz faoliyatini tashkil etish uchun Ish tartibini ishlab chiqadi va tasdiqlaydi.

Tomonlar oʻzlari va ularning vakillari tomonidan ushbu Bitim asosida olingan ilmiy-texnik axborotni hamda hujjatlarni Tomonlar oʻrtasidagi rasmiy kelishuvsiz hech qanday uchinchi mamlakatga bermaslik majburiyatini oladilar.

Tomonlar hamkorlik vaqtida olingan ilmiy va ilmiy-texnik axboroti, bundan intellektual va sanoat mulki hisoblanadigan yoki tijorat va ishlab chiqarish sabablariga koʻra oshkor qilinishi mumkin boʻlmaganlar mustasno qilinadi, oʻzaro kelishuvga koʻra uni jahon ilmiy jamoatchiligiga yetkazishning umumqabul qilingan usullaridan foydalanish yoʻli bilan hamda Tomonlarning amaldagi qonunchiliklariga koʻra ochiq boʻlishiga kelishib oldilar.

Tomonlar hamkorlik natijasida yaratilishi mumkin boʻlgan intellektual va sanoat mulkini himoya qilish masalalarini har ikkala davlat qonunchiligi va xalqaro huquq normalarini hisobga olib hal qiladilar. Intellektual va sanoat mulki hamda undan foydalanish huquqiga daxldor, bu munosabatda yuzaga kelishi mumkin boʻlgan moliyaviy majburiyatlar muammolarini hal qilishning aniq masalalari 3-moddada nazarda tutilgan bitimlarda aytib oʻtiladi.

Tomonlar qoʻshma loyihalarda ishtirok etayotgan ekspertlar, olimlar va boshqa mutaxassislarni almashish xarajatlarini qoplash masalalarini quyidagi tartibda hal qiladilar;

mutaxassislarni yoʻllayotgan tashkilot ikkala davlat oʻrtasida belgilangan joyga borish yoʻl xarajatlarini toʻlaydi;

mutaxassislarni qabul qilayotgan tashkilot oʻz davlati hududida ularning yashashlari, ovqatlanishlari, joydan-joyga borishlari boʻyicha xarajatlarni va boshqa xarajatlarni qabul qilayotgan tashkilotda shu darajadagi mutaxassislar uchun belgilangan xarajatlar normasidan kelib chiqib toʻlaydi;

mazkur tartib, agar hamkorlik qilayotgan tashkilotlar oʻzaro kelishuv boʻyicha boshqacha tartib belgilamagan boʻlsalar, amalda boʻladi.

Qoʻshma loyihalarda ishtirok etayotgan hamda bunda boshqa davlat hududida boʻlgan bir davlat shaxslariga tibbiy xizmat koʻrsatish masalalari (ogʻir dard yoki baxtsiz hodisalarda) qabul qilayotgan tashkilot hisobiga, qabul qilayotgan tashkilot xodimlari uchun belgilangan shart-sharoitlarda hal qilinadi.

Mazkur Bitim Tomonlarning oʻzlari tuzgan boshqa xalqaro shartnomalar va bitimlardan kelib chiqadigan huquqlari hamda majburiyatlariga daxl qilmaydi.

Mazkur Bitim imzolangan kundan boshlab kuchga kiradi va oʻn yil mobaynida amalda boʻladi. Agar Tomonlardan biri Bitimning amalda boʻlish muddati tugashidan olti oy oldin Bitimni amalda boʻlishini toʻxtatish toʻgʻrisida boshqa Tomonni yozma shaklda xabardor qilmasa oʻzidan-oʻzi keyingi oʻn yillik davrga choʻziladi.

Mazkur Bitim ikkala Tomonning yozma shakldagi roziligi boʻlganda oʻzgartirilishi yoki toʻldirilishi mumkin.

1995-yil 4-sentabrda, Toshkent shahrida, har biri oʻzbek, gruzin va rus tillarida, ikki nusxada tuzildi. Bunda barcha matnlar bir xil kuchga ega. Mazkur Bitim qoidalarini sharhlash maqsadida rus tilidagi matndan foydalaniladi.