Oʻzbekiston Respublikasi va Gruziya Respublikasi, bundan keyin Oliy Ahdlashuvchi Tomonlar deb ataluvchilar,

oʻz xalqlari oʻrtasida oʻrnatilgan aloqalar, doʻstona munosabatlar anʼanalariga suyanib,

oʻzaro foydali hamkorlikni rivojlantirish va mustahkamlash ikkala davlat milliy manfaatlariga mos keladi va ularning iqtisodiy va ijtimoiy ravnaqiga yordamlashadi, deb hisoblab,

Birlashgan Millatlar Tashkiloti Nizomi, Yevropa Xavfsizlik va Hamkorlik Kengashining Xelsinki Yakunlovchi Akti, Yangi Yevropa uchun Parij Xartiyasi va boshqa hujjatlari maqsad va qatʼiyatlariga sodiq ekanliklarini bildirib,

jahonda va mintaqalarda tinchlik, xavfsizlik, va barqarorlikni mustahkamlash maqsadida xalqaro maydonda oʻzaro kelishib harakat qilishning maqsadga muvofiqligi va zaruratidan kelib chiqib,

quyidagilar toʻgʻrisida ahdlashdilar:

Oliy Ahdlashuvchi Tomonlar oʻzaro doʻst davlatlar sifatida munosabat oʻrnatadilar. Ular izchil ravishda davlat suvereniteti, hududiy butunligi va chegaralarni buzmaslik, teng huquqlilik, bir-birlarining ichki ishlariga aralashmaslik, kuch ishlatmaslik va kuch ishlatish bilan dagʻdagʻa qilmaslik, bahslarni tinch yoʻl bilan bartaraf etish, inson huquqlari va asosiy ozodligini hurmatlash, hamkorlik va xalqaro majburiyatlarni vijdonan bajarish, shuningdek, xalqaro huquqning boshqa koʻpchilik tarafidan tan olingan meʼyorlariga amal qilishni boʻyinga oladilar.

Oliy Ahdlashuvchi Tomonlar global va mintaqaviy maydonlarda tinchlikni mustahkamlash, barqarorlik va xavfsizlikni mustahkamlash maqsadida oʻzaro hamkorlik qiladilar. Ular jamoaviy xavfsizlik tizimini oʻrnatish, Birlashgan Millatlar Tashkiloti va Yevropada Xavfsizlik va Hamkorlik Kengashining tinchliksevarlik mavqeyi, mintaqaviy xavfsizlik tuzilmalari samarali faoliyatini va ziddiyatlarni qurolli barqarorlashtirish tuzilmasini taʼminlashga yordamlashadilar.

Oliy Ahdlashuvchi Tomonlardan har biri ikkinchi Oliy Ahdlashuvchi Tomonga qarshi qaratilgan ittifoq yoki bloklarga, biron-bir harakat va tadbirga qoʻshilmaydi.

Oliy Ahdlashuvchi Tomonlardan har biri istiqomat mamlakati qonunchiligida oʻrnatilgan cheklashlarni hisobga olgan holda oʻz hududida yashab turgan ikkinchi Tomon fuqarolariga oʻz fuqarolariga beriladigan asoslarda va aynan oʻsha darajadagi huquq va asosiy ozodliklarni beradi.

Oliy Ahdlashuvchi Tomonlardan har biri davlat suvereniteti qatʼiyatini hisobga olgan holda ikkinchi Tomon huquqini tan oladi va ushbu Shartnomaga muvofiq ravishda ikkinchi Tomon hududida yashayotgan oʻz fuqarolari huquqlarini himoya qilishga kirishadi.

Oliy Ahdlashuvchi Tomonlar teng huquqli va oʻzaro foydali bir-birlariga imkon qadar qulay imkoniyatlar yaratib, iqtisodiy sohada teng huquqli va oʻzaro foydali hamkorliklarini rivojlantiradilar.Ular xalqaro iqtisodiy, moliyaviy va boshqa tashkilotlar, bitimlar va konvensiyalarda ular samaradorligini oshirish uchun ishtirok etadilar.

Oliy Ahdlashuvchi Tomonlar Qora dengiz va Kaspiy iqtisodiy hamkorligi umumiy bozorini shakllantirish, oʻz hududlarida oʻzbek va gruzin sarmoyasi ishtirokida erkin iqtisodiy maydonlar, barpo etish gʻoyasini qoʻllab-quvvatlaydilar.

Oliy Ahdlashuvchi Tomonlar naqliyot(temir yoʻl, avtomobil, havo yoʻllari) maxsus tizimlarini boshqarish, energetika, informatika va aloqa, shu jumladan, yoʻldosh aloqa va telekommunikatsiya, ishlab chiqarish infratuzilmasi va milliy trans ruhidagi boshqa sohalarda qoʻshma dasturlar yaratishda hamkorlikni rivojlantirishga alohida ahamiyat beradilar.

Oliy Ahdlashuvchi Tomonlar transportirovka umumiy tizimini yaratish, neft, tabiiy gaz va boshqa energiya vositalarini qayta ishlash va ulardan foydalanish, qishloq xoʻjaligini rivojlantirish, aholini oziq-ovqat va boshqa kundalik ehtiyoj mollari bilan taʼminlash borasida hamkorlik qiladilar.

Oliy Ahdlashuvchi Tomonlar huquqiy va jismoniy shaxslarning iqtisodiy, moliyaviy va huquqiy tadbirkorlik va boshqa xoʻjalik faoliyati uchun kulay iqtisodiy, moliyaviy va huquqiy sharoitlar yaratadilar, ular yotqizgan sarmoyalarni omillashtiradilar va oʻzaro himoya qiladilar.

Oliy Ahdlashuvchi Tomonlar ikkala davlat kooperatsiyalari va fuqarolari, korxonalari, firmalari hamda iqtisodiy hamkorlikning boshqa subyektlari oʻrtasidagi toʻgʻridan toʻgʻri aloqalarning turli shakllarini ragʻbatlantiradilar.

Ular ikki taraflama soliqdan qutulish toʻgʻrisida alohida bitim tuzadilar.

Oliy Ahdlashuvchi Tomonlar ekologik xavfsizlik va oʻzaro hamkorlikning barcha jihatlarini qamrab oluvchi umumlashtiruvchi xalqaro tizimni barpo etishga intilib, ekologik xavfsizlik, atrof muhitni muhofaza qilish va tabiat resurslaridan oqilona foydalanish sohasidagi hamkorliklarga alohida ahamiyat beradilar.

Oliy Ahdlashuvchi Tomonlar taʼlim, fan va texnika sohalarida hamkorlikni rivojlantiradilar, oʻquv yurtlari, ilmiy tadqiqot va loyiha-konstruktorlik muassasalari oʻrtasidagi toʻgʻridan toʻgʻri aloqalarni ragʻbatlantiradilar, kadrlar tayyorlash, olimlar, mutaxassislar, aspirantlar va talabalar ayirboshlash ishiga yordamlashadilar.

Oliy Ahdlashuvchi Tomonlar oliy oʻquv yurtlarini tugatganligi hamda ilmiy daraja va unvonlar berilganligi toʻgʻrisidagi diplomlar va boshqa hujjatlarning oʻzaro tan olinishiga asos boʻladigan tadbirlarni ishlab chiqadilar.

Oliy Ahdlashuvchi Tomonlar ilgʻor texnologiya va boshqa eʼtiborli yoʻnalishlar boʻyicha qoʻshma dasturlar va ishlanmalarni amalga oshirish borasida hamkorlik qiladilar.

Oliy Ahdlashuvchi Tomonlar madaniyat, sanʼat, sayohat va sport sohalarida hamkorlik va aloqalar, erkin maʼlumot ayirboshlashga yordamlashadilar.

Oliy Ahdlashuvchi Tomonlar bu sohalardagi hukumat va nohukumat tashkilotlari va muassasalari, xususiy tashkilotlar va shaxslar oʻrtasidagi qoʻshma loyihalarni hayotga tatbiq etish, madaniy, ilmiy va boshqa jamgʻarma va assotsiatsiyalar faoliyat koʻrsatishi borasida hamkorlik qiladilar. Bir-birlarining hududlarida ikkala mamlakat madaniy markazlarini ochish toʻgʻrisida bitim tuziladi.

Oliy Ahdlashuvchi Tomonlar huquqiy aktlarni ishlab chiqish, qabul qilish va qoʻllash toʻgʻrisida muntazam ravishda maʼlumot ayirboshlashni amalga oshiradilar va xalqaro huquqiy hujjatlar tayyorlashda hamkorlik qiladilar.

Oliy Ahdlashuvchi Tomonlar, xalqaro huquq va ichki qonunchilik meʼyorlariga muvofiq ravishda, uyushgan, shu jumladan, xalqaro jinoyatchilik va terrorizmga, shu qatorda fuqaro aviatsiyasi va naqliyotning boshqa turlari xavfsizligiga, garovga olish, kontrabanda, giyohvand vositalar va psixotrop moddalarni qonunsiz ravishda qoʻllash, madaniy boyliklarni qonunsiz ravishda olib ketishga qarshi kurash boʻyicha tadbirlarda hamkorlik qiladilar.

Oliy Ahdlashuvchi Tomonlar oʻzaro manfaatli shu va shu kabi masalalar boʻyicha hamkorlik toʻgʻrisida alohida bitim tuzadilar.

Oliy Ahdlashuvchi Tomonlar ikkala davlat parlamentlari va parlamentariylari oʻrtasida aloqa va hamkorlikni rivojlantiradilar.

Oliy Ahdlashuvchi Tomonlar ushbu Shartnoma qoidalarini amalga oshirish uchun talab qilinadigan boshqa shartnoma va bitimlar tuzadilar.

Ushbu Shartnoma Oliy Ahdlashuvchi Tomonlarning oʻzlari aʼzo boʻlgan boshqa xalqaro shartnomalardan kelib chiqadigan huquq va majburiyatlariga daxl qilmaydi.

Ushbu Shartnomani bajarish maqsadida Oliy Ahdlashuvchi Tomonlar muntazam suratda yiliga bir martadan koʻp boʻlmagan tartibda turli darajadagi mashvaratlar oʻtkazadilar va zarurat tugʻilgan mahalda tegishli komissiyalar tuzadilar.

Ushbu Shartnoma tasdiqlanishi kerak va u tasdiqlanish yorliqlari ayirboshlangan kundan eʼtiboran kuchga kiradi.

BMT Nizomining 102-moddasiga binoan ushbu Shartnoma BMT Kotibiyatida roʻyxatga olinishi lozim.

Ushbu Shartnoma besh yil muddatga tuziladi.

Agar Oliy Ahdlashuvchi Tomonlardan biri uning amal qilish muddatini toʻxtatish istagi borligi haqida ushbu shartnoma muddati yoki keyingi besh yillik muddat tugashidan olti oy oldin yozma ravishda maʼlum qilmasa, oʻz-oʻzidan bu muddat keyingi besh yillikka choʻziladi.

Toshkent shahrida 1995-yil 4-sentabrda har biri oʻzbek, gruzin za rus tillarida boʻlgan ikki nusxada tuzildi, barcha matnlar bir xil kuchga ega. Ushbu Shartnoma mazmunini talqin qilishda rus tilidagi matn qoʻllanadi.