O‘zbekiston Respublikasi Vazirlar Mahkamasining 2014-yil 5-maydagi 115-sonli “O‘zbekiston Respublikasi Xalq ta’limi vazirligi huzurida Respublika o‘quvchi-yoshlar markazini tashkil etish chora-tadbirlari to‘g‘risida”gi qaroriga muvofiq O‘zbekiston Respublikasi Xalq ta’limi vazirligi va Sog‘liqni saqlash vazirligi qaror qiladi:

1. O‘zbekiston Respublikasi Xalq ta’limi vazirligi huzuridagi Respublika o‘quvchi-yoshlar markaziga ta’tillar davrida o‘quvchilarni qabul qilish tartibi to‘g‘risidagi nizom ilovaga muvofiq tasdiqlansin.

2. Mazkur qaror rasmiy e’lon qilingan kundan e’tiboran kuchga kiradi.

Mazkur Nizom O‘zbekiston Respublikasi Vazirlar Mahkamasining 2014-yil 5-maydagi 115-sonli “O‘zbekiston Respublikasi Xalq ta’limi vazirligi huzurida Respublika o‘quvchi-yoshlar markazini tashkil etish chora-tadbirlari to‘g‘risida”gi qaroriga asosan, O‘zbekiston Respublikasi Xalq ta’limi vazirligi huzuridagi Respublika o‘quvchi-yoshlar markaziga (bundan buyon matnda Markaz deb yuritiladi) ta’tillar davrida o‘quvchilarni qabul qilish tartibini belgilaydi.

1. Markaz ta’tillar davrida bolalar sog‘lomlashtirish oromgohi sifatida faoliyat ko‘rsatadi.

2. Markazga ta’tillar davrida respublika umumta’lim maktablari o‘quvchilari, jumladan ijtimoiy himoyaga muhtoj oila farzandlari, ota-ona qaramog‘idan mahrum bo‘lgan bolalar qabul qilinadi.

3. Markazga kuzgi, qishki, bahorgi ta’tillar davrida va yozgi ta’til davrining har bir qabul mavsumida yaxshi natijalarga erishgan 270 nafardan o‘quvchi qabul qilinadi.

4. Markazga kuzgi, qishki, bahorgi ta’tillar davrida Andijon, Farg‘ona va Namangan viloyatlaridagi umumta’lim maktablarining 7 — 9-sinf o‘quvchilari qabul qilinadi. Bunda har bir viloyat bo‘yicha 7, 8 va 9-sinflarning har biridan 30 nafardan o‘quvchi tanlab olinadi.

5. Markazga yozgi ta’til davrining har bir qabul mavsumida Qoraqalpog‘iston Respublikasi, viloyatlar va Toshkent shahridagi umumta’lim maktablarining 7-8-sinf o‘quvchilari qabul qilinadi. Bunda har bir qabul mavsumida Qoraqalpog‘iston Respublikasi, viloyatlar va Toshkent shahri bo‘yicha ularning har biridan 7-sinflardan 9 nafar, 8-sinflardan 10 nafardan, Respublika bo‘ysunishidagi umumta’lim muassasalari 7-8-sinflarining har biridan 2 nafardan o‘quvchi tanlab olinadi.

6. Kuzgi, qishki va bahorgi ta’tillar davrida Markazga qabul qilingan o‘quvchilar yozgi ta’til davrida Markazga qabul qilinmaydi.

Yozgi ta’til davrining bir qabul mavsumida dam olgan o‘quvchilar yozgi ta’til davrining keyingi mavsumlariga takroran qabul qilinmaydi.

7. Kuzgi, qishki, bahorgi ta’tillar davrida hamda yozgi ta’tilning har bir qabul mavsumida o‘quvchilarning Markazda bo‘lish muddatlari O‘zbekiston Respublikasi Xalq ta’limi vazirligi tomonidan belgilanadi. Bunda o‘quvchilarning Markazda bo‘lish muddatlari yozgi ta’tilning har bir qabul mavsumida 10 kundan, kuzgi, qishki va bahorgi ta’tillar davrida 7 kundan kam bo‘lmasligi lozim.

8. Markazga ushbu Nizomning 2-bandida nazarda tutilgan o‘quvchilar quyidagi mezonlar asosida tanlab olinadi:

fan olimpiadalari Qoraqalpog‘iston Respublikasi, viloyatlar va Toshkent shahar bosqichlarining 1 — 5-o‘rin sovrindorlari;

umumta’lim maktablarida chet tili, informatika va boshqa fanlarni “a’lo” baholarga o‘zlashtirayotgan o‘quvchilar;

“Umid nihollari”, “Quvnoq startlar”, “Alpomish” va “Barchinoy” sport musobaqalarining umumta’lim maktablari, tuman (shahar) bosqichlari 1 — 3-o‘rin sovrindorlari;

umumta’lim maktablarining “Eng faol o‘quvchi” nominatsiyasi g‘oliblari;

“Konstitutsiya — erkinligimiz kafolati” respublika tanlovining tuman (shahar) bosqichi 1 — 3-o‘rin sovrindorlari;

“Faol kitobxon o‘quvchi” tanlovining respublika bosqichi 1, 2, 3-o‘rin sovrindorlari;

umumta’lim maktablarining iqtidorli va ijodkor (she’r yozadigan, rasm chizadigan va h.k.) o‘quvchilari;

xalq ta’limi organlari va “Barkamol avlod” bolalar maktablari tomonidan tashkil etiladigan turli tadbirlar g‘oliblari va faol ishtirokchilari;

musiqa va san’at sohasi bo‘yicha xalqaro va respublika tanlovlari g‘oliblari;

umumta’lim maktablari “Yoshlar ittifoqi” yoshlar ijtimoiy harakati boshlang‘ich tashkilotining faol a’zolari.

9. Mazkur Nizomning 8-bandida nazarda tutilgan mezonlardan kamida bittasiga mos kelgan o‘quvchi Markazga qabul qilish uchun tanlab olinadi. O‘quvchilar soni belgilangan o‘rinlar sonidan ko‘p bo‘lganda nisbatan ko‘proq mezonlarga muvofiq keladigan o‘quvchilar tanlab olinadi.

10. Markazga o‘quvchilarni qabul qilish uchun tanlab olish maqsadida har bir umumta’lim maktabi, tuman (shahar) xalq ta’limi bo‘limlari, Qoraqalpog‘iston Respublikasi Xalq ta’limi vazirligi, viloyatlar xalq ta’limi boshqarmalari va Toshkent shahar xalq ta’limi bosh boshqarmasi hamda O‘zbekiston Respublikasi Xalq ta’limi vazirligida Markazga o‘quvchilarni tanlab olish komissiyalari tashkil etiladi.

11. Umumta’lim maktabining Markazga o‘quvchilarni tanlab olish komissiyasi (bundan buyon matnda umumta’lim maktabi komissiyasi deb yuritiladi) umumta’lim maktabi direktorining buyrug‘i bilan quyidagi tarkibda tuziladi:

direktor;

direktorning ma’naviy-ma’rifiy ishlar bo‘yicha o‘rinbosari;

direktorning o‘quv ishlari bo‘yicha o‘rinbosari;

Yoshlar ittifoqining umumta’lim maktabidagi boshlang‘ich tashkiloti yetakchisi;

1 nafar tajribali o‘qituvchi.

12. Markazga o‘quvchilarni tanlab olish bo‘yicha tuman (shahar) komissiyasi (bundan buyon matnda tuman (shahar) komissiyasi deb yuritiladi) tuman (shahar) xalq ta’limi bo‘limi mudirining buyrug‘i bilan quyidagi tarkibda tuziladi:

mudir;

mudir o‘rinbosari;

ta’lim muassasalari faoliyatini tashkil etish shu’basi rahbari;

ma’naviy-axloqiy tarbiya va bolalarni ijtimoiy himoyalash shu’basi rahbari;

o‘quv-tarbiya jarayonini metodik ta’minlash shu’basi rahbari;

ta’lim sifati monitoringi bo‘limi rahbari.

13. Markazga o‘quvchilarni tanlab olish bo‘yicha Qoraqalpog‘iston Respublikasi, viloyatlar va Toshkent shahar komissiyalari (bundan buyon matnda hududiy komissiya deb yuritiladi) quyidagi tarkibda tuziladi:

Qoraqalpog‘iston Respublikasida — Qoraqalpog‘iston Respublikasi xalq ta’limi vaziri, vazir o‘rinbosari, umumiy o‘rta ta’lim muassasalari faoliyatini muvofiqlashtirish bo‘limi boshlig‘i, ma’naviy-axloqiy tarbiya va qo‘shimcha ta’lim bo‘limi boshlig‘i va 1 nafar tajribali xodim;

Viloyatlarda — viloyat xalq ta’limi boshqarmasi boshlig‘i, boshliq o‘rinbosari, umumiy o‘rta ta’lim muassasalari faoliyatini muvofiqlashtirish bo‘limi boshlig‘i, ma’naviy-axloqiy tarbiya va qo‘shimcha ta’lim bo‘limi bosh mutaxassisi va 1 nafar tajribali xodim;

Toshkent shahrida — Toshkent shahar xalq ta’limi bosh boshqarmasi boshlig‘i, boshliqning birinchi o‘rinbosari, boshliqning o‘rinbosari, umumiy o‘rta ta’lim muassasalari faoliyatini muvofiqlashtirish bo‘limi boshlig‘i, ma’naviy-axloqiy tarbiya va qo‘shimcha ta’lim bo‘limi boshlig‘i va 1 nafar tajribali xodim.

14. Markazga o‘quvchilarni qabul qilish uchun tanlab olish bo‘yicha respublika komissiyasi (bundan buyon matnda Respublika komissiyasi deb yuritiladi) O‘zbekiston Respublikasi xalq ta’limi vazirining buyrug‘i bilan 7 kishidan iborat tarkibda tuziladi.

15. Umumta’lim maktabi komissiyasi tomonidan kuzgi, qishki, bahorgi ta’tillar davri uchun 7 — 9-sinflarning har biridan 1 nafardan, yozgi ta’til davrining har bir qabul mavsumi uchun 7-8-sinflarning har biridan 1 nafardan o‘quvchilar mazkur Nizomning 8-bandida belgilangan mezonlar asosida tanlab olinadi va umumta’lim maktabi komissiyasining qarori bilan tasdiqlanadi.

16. Umumta’lim maktabi komissiyasi tomonidan tanlab olingan o‘quvchilar uchun quyidagi hujjatlar rasmiylashtiriladi:

yashash joyidagi fuqarolarning o‘zini o‘zi boshqarish organi tomonidan berilgan o‘quvchining ijtimoiy holati to‘g‘risida ma’lumotnoma;

o‘quvchi mazkur Nizomning 8-bandida ko‘rsatilgan mezonlarga mos kelishi haqida tegishli hujjatlar nusxalari ilova qilingan umumta’lim maktabi tomonidan berilgan tavsifnoma;

o‘quvchining ota-onasi yoki ularning o‘rnini bosuvchi shaxslarning rozilik xati.

17. Umumta’lim maktabi komissiyasi tomonidan tanlab olingan o‘quvchilarning hujjatlari va umumta’lim maktabi komissiyasining tegishli qarori kuzgi ta’til davri uchun 5-oktabrgacha, qishki ta’til davri uchun 2-dekabrgacha, bahorgi ta’til davri uchun 15-fevralgacha, yozgi ta’til davrining har bir qabul mavsumi uchun 10-aprelgacha tuman (shahar) komissiyasiga taqdim etiladi.

18. Respublika bo‘ysunishidagi umumta’lim muassasalarida yozgi ta’til davrining har bir qabul mavsumi uchun tanlab olingan o‘quvchilarning hujjatlari va umumta’lim maktabi komissiyasining tegishli qarori 21-aprelga qadar O‘zbekiston Respublikasi Xalq ta’limi vazirligiga taqdim etiladi.

19. Tuman (shahar) komissiyasi tomonidan kuzgi, qishki, bahorgi ta’tillar davri uchun 7 — 9-sinflarning har biridan 5 nafardan, yozgi ta’til davrining har bir qabul mavsumi uchun 7-8-sinflarning har biridan 2 nafardan o‘quvchilar mazkur Nizomning 8-bandida belgilangan mezonlar asosida tanlab olinadi va tuman (shahar) komissiyasining qarori bilan tasdiqlanadi.

20. Tuman (shahar) komissiyasi tomonidan tanlab olingan o‘quvchilarning hujjatlari va tuman (shahar) komissiyasining tegishli qarori kuzgi ta’til davri uchun 9-oktabrgacha, qishki ta’til davri uchun 6-dekabrgacha, bahorgi ta’til davri uchun 19-fevralgacha, yozgi ta’til davrining har bir qabul mavsumi uchun 17-aprelgacha hududiy komissiyaga taqdim etiladi.

21. Hududiy komissiya tomonidan kuzgi, qishki, bahorgi ta’tillar davri uchun 7 — 9-sinflarning har biridan 40 nafardan, yozgi ta’til davrining har bir qabul mavsumi uchun 7-sinflardan 12 nafar, 8-sinflardan 13 nafar o‘quvchilar mazkur Nizomning 8-bandida belgilangan mezonlar asosida tanlab olinadi va hududiy komissiyaning qarori bilan tasdiqlanadi.

22. Hududiy komissiya tomonidan tanlab olingan o‘quvchilarning hujjatlari va hududiy komissiyaning tegishli qarori kuzgi ta’til davri uchun 13-oktabrgacha, qishki ta’til davri uchun 10-dekabrgacha, bahorgi ta’til davri uchun 23-fevralgacha, yozgi ta’til davrining har bir qabul mavsumi uchun 21-aprelgacha Respublika komissiyasiga taqdim etiladi.

23. Respublika komissiyasi tomonidan kuzgi, qishki, bahorgi ta’tillar davri uchun 7 — 9-sinflarning har biridan 90 nafardan, yozgi ta’til davrining har bir qabul mavsumi uchun 7-sinflardan 128 nafar, 8-sinflardan 142 nafar o‘quvchilar mazkur Nizomning 8-bandida belgilangan mezonlar asosida tanlab olinadi va Respublika komissiyasining qarori bilan tasdiqlanadi.

24. Respublika komissiyasining qarori uch kun ichida Markazga va hududiy komissiyalarga yuboriladi.

25. Quyi turuvchi komissiya tomonidan taqdim etilgan hujjatlar mazkur Nizomda belgilangan talablarga muvofiq bo‘lmagan taqdirda, yuqori turuvchi komissiya tomonidan quyi turuvchi komissiyaga mazkur kamchiliklarni bartaraf etish haqida topshiriq berilishi zarur.

26. O‘quvchilarning Markazga kelish va ketishlarini tashkil qilish uchun tegishlicha Qoraqalpog‘iston Respublikasi xalq ta’limi vaziri, viloyat xalq ta’limi boshqarmasi boshlig‘i hamda Toshkent shahar xalq ta’limi bosh boshqarmasi boshlig‘ining buyrug‘i bilan 2 nafardan mas’ul xodimlar (kuzatuvchilar) tayinlanadi.

27. Respublika bo‘ysunishidagi umumta’lim muassasalaridan tanlab olingan o‘quvchilarning Markazga kelishlari va ketishlarini tashkil qilish Toshkent shahar xalq ta’limi bosh boshqarmasining mas’ul xodimlari (kuzatuvchilari) zimmasiga yuklatiladi.

28. Mas’ul xodimlar (kuzatuvchilar) oliy pedagogik ma’lumotga hamda birlamchi shoshilinch yordam ko‘rsatish ko‘nikmalariga ega bo‘lgan, yuzaga kelishi mumkin bo‘lgan muammolarni zudlik bilan hal qila oladigan xodimlar orasidan tanlab olinadi.

29. Mas’ul xodimlar (kuzatuvchilar) o‘quvchilarni Markazga quyidagi hujjatlar bilan birga olib borishi lozim:

tegishli hududdan Markazga qabul qilinadigan o‘quvchilar ro‘yxati;

har bir o‘quvchi uchun sog‘lomlashtirish oromgohiga ketayotgan o‘quvchining tibbiy ma’lumotnomasi (079/x shakl).

30. O‘quvchilarni Markazga qabul qilib olish va ularni kuzatishni tashkil qilish uchun Markaz direktori, direktor o‘rinbosari, tibbiyot xodimi va 2 nafar pedagog xodimlardan iborat tarkibda Markazning qabul va kuzatuv komissiyasi tuziladi.

31. Markazning qabul va kuzatuv komissiyasi o‘quvchilarni mazkur Nizomning 29-bandida ko‘rsatilgan hujjatlar asosida qabul qiladi. Bunda mas’ul xodimlar (kuzatuvchilar) tomonidan taqdim etilgan tegishli hududdan Markazga qabul qilinadigan o‘quvchilar ro‘yxati Respublika komissiyasining qaroriga muvofiqligi tekshiriladi.

32. Markazga qabul qilish vaqtida har bir o‘quvchi tibbiy tekshiruvdan o‘tkazilib, har bir o‘quvchi uchun bolaning tibbiy kartasi (026/x shakl) ochiladi va mavsum davomida yuritiladi.

33. Markazdan ketayotgan o‘quvchilarga Markazda yashagan davrida ularga ko‘rsatilgan tibbiy xizmatlar to‘g‘risida ma’lumotnoma beriladi.

34. Markazga o‘quvchilarni tanlab olish komissiyalari o‘quvchilarning mazkur Nizomda belgilangan tartibda tanlab olinishi hamda zarur hujjatlarning to‘g‘ri rasmiylashtirilishi uchun javobgardir.

35. Qoraqalpog‘iston Respublikasi sog‘liqni saqlash vaziri, viloyatlar sog‘liqni saqlash boshqarmalari boshliqlari va Toshkent shahar sog‘liqni saqlash bosh boshqarmasi boshlig‘i sog‘lomlashtirish oromgohiga ketayotgan o‘quvchining tibbiy ma’lumotnomasi (079/x shakl) to‘g‘ri rasmiylashtirilishini nazorat qiladi.