Oʻzbekiston Respublikasi Hukumati va Xitoy Xalq Respublikasi Hukumati (keyingi oʻrinlarda “Tomonlar” deb ataluvchilar),

ikki davlat oʻrtasida turizm sohasidagi hamkorlikni yanada rivojlantirish va mustahkamlashga boʻlgan intilishlaridan kelib chiqib,

Tomonlar davlatlarining iqtisodiy, ijtimoiy va madaniy rivojlanishida turizmning muhim ahamiyatini eʼtiborga olib,

Tomonlar davlatlarining fuqarolari oʻrtasida doʻstona munosabatlarni mustahkamlashda turizm sohasidagi hamkorlikni rivojlantirish muhimligini inobatga olib,

quyidagilar toʻgʻrisida kelishib oldilar:

Tomonlar davlatlarining fuqarolari oʻrtasida ikki davlat iqtisodiyoti, madaniyati, tabiiy diqqatga sazovor joylari va tarixiy yodgorliklarini muhofaza qilish hamda milliy anʼanalarini asrash borasida oʻzaro anglashuvni ragʻbatlantirish maqsadida Tomonlar turizm sohasidagi hamkorlikni rivojlantirishga koʻmaklashadilar.

Sayyohlar almashinuvini koʻpaytirish maqsadida Tomonlar oʻz davlatlarining turistik idora va tashkilotlari oʻrtasidagi doʻstona munosabatlar va hamkorlikni ragʻbatlantiradilar.

Tomonlar turizmni rivojlantirish sohasida teng huquqlilik va oʻzaro manfaatdorlik asosida hamda har bir Tomon davlatining milliy qonunchiligi doirasida hamkorlik qiladilar.

Turizm sohasida hamkorlikni rivojlantirish maqsadida Tomonlar quyidagi yoʻnalishlarda hamjihatlikda harakat qiladilar:

(a) turizm sohasida mutaxassislar tayyorlash va almashish, turistik majmualar xodimlarini oʻqitish masalalarida hamkorlikni ragʻbatlantirish;

(b) mehmonxona hamda boshqa turistik obyektlarni qurish va ulardan foydalanish sohasida hamkorlikni rivojlantirish;

(v) Tomonlar davlatlarining manfaatdor tashkilotlariga qoʻshma korxonalar tuzishda va boshqa investitsiyaviy loyihalarni amalga oshirishda yordam koʻrsatish;

(g) Tomonlar davlatlarining turistik agentliklariga hamkorlikning yangi yoʻnalishlarini rivojlantirishda yordam koʻrsatish;

(d) xalqaro turistik tashkilotlar doirasidagi hamkorlikni kuchaytirish.

Tomonlar quyidagilar orqali turizm sohasida hamkorlikni amalga oshiradilar:

(a) har bir Tomon davlati hududida turizm sohasida tegishli tadbirlar oʻtkazishga koʻmaklashish hisobiga Tomonlar davlatlarining turistik salohiyatlarini targʻib qilish va namoyish etishni kuchaytirish;

(b) sayyohlik va madaniy festivallarni tashkil qilish, folklor va havaskor guruhlar gastrollarini oʻtkazish;

(v) har bir Tomon davlati hududida oʻtkaziladigan yarmarka va koʻrgazmalarda oʻz davlatining turistik idora va tashkilotlari ishtirokini qoʻllab-quvvatlash;

(g) tegishli milliy turistik marshrut va mahsulotlarni oʻrganish uchun boshqa Tomon davlati turoperatorlari va ommaviy axborot vositalari vakillarini oʻzaro taklif qilish;

(d) turizm sohasida, shu jumladan ikki davlat turistik zaxiralari, turistik bozorning holati, turizm sohasini tartibga soluvchi qonunchilik va turizm masalalarini yorituvchi bosma nashrlar toʻgʻrisida tajriba va maʼlumot almashish;

(e) oʻzaro kelishilgan boshqa shakllar.

Turizm sohasida hamkorlikni rivojlantirish maqsadida, Tomonlar ikki davlat hududida har bir Tomon davlatining milliy qonunchiligiga muvofiq Tomonlar davlatlari vakolatli organlarining rasmiy vakolatxonalarini ochish imkoniyatini koʻrib chiqadilar.

Ushbu vakolatxonalar faoliyati Tomonlar oʻrtasidagi alohida bitim bilan tartibga solinadi.

Ushbu Bitimni bajarish boʻyicha faoliyatni muvofiqlashtirish Oʻzbek-xitoy hukumatlararo qoʻmitasi va uning tegishli kichik qoʻmitalari tomonidan amalga oshiriladi.

Ikki tomonlama hamkorlikni rivojlantirish dasturlarini ishlab chiqish maqsadida, Tomonlar oʻzlarining teng sonli vakillaridan tashkil topgan ishchi guruhlar tuzishlari mumkin.

Ishchi guruhlar majlislarini oʻtkazish vaqti va joyi Tomonlar oʻrtasida kelishiladi.

Basharti har bir alohida holatda boshqacha tartib kelishib olinmasa, Tomonlar mazkur Bitimni bajarish davomida yuzaga keladigan xarajatlarni mustaqil ravishda koʻtaradilar.

Tomonlar mazkur Bitimni bajarish uchun quyidagi vakolatli organlarni masʼul etib tayinlaydilar:

Oʻzbekiston tomonidan:

Oʻzbekiston Respublikasi Tashqi iqtisodiy aloqalar, investitsiyalar va savdo vazirligi,

“Oʻzbekturizm” milliy kompaniyasi;

Xitoy tomonidan:

Xitoy Xalq Respublikasi Turizm ishlari boʻyicha davlat boshqarmasi.

Mazkur Bitimga Tomonlarning oʻzaro kelishuviga muvofiq uning ajralmas qismi hisoblanadigan hamda mazkur Bitimning 11-moddasida belgilangan tartibda kuchga kiruvchi alohida protokollar bilan rasmiylashtiriladigan oʻzgartish va qoʻshimchalar kiritilishi mumkin.

Mazkur Bitim qoidalarini qoʻllash va talqin qilish borasidagi barcha nizo va kelishmovchiliklar Tomonlar oʻrtasida maslahatlashuv va muzokaralar yoʻli bilan hal qilinadi.

Mazkur Bitim imzolangan kundan boshlab kuchga kiradi va besh (5) yil davomida amal qiladi. Agar Tomonlardan biri mazkur Bitim amal qilishining tegishli muddati tugashidan kamida olti (6) oy oldin uning amal qilishini tugatish niyati toʻgʻrisida boshqa Tomonni diplomatik kanallar orqali yozma ravishda xabardor qilmasa, uning amal qilishi oʻz-oʻzidan keyingi besh yillik muddatlarga uzayaveradi.

Toshkent shahrida 2013-yil 29-noyabrda ikki asl nusxada, har biri oʻzbek, xitoy va rus tillarida tuzildi, bunda barcha matnlar bir xil kuchga ega. Mazkur Bitim qoidalarini talqin qilishda kelishmovchiliklar yuzaga kelganda, Tomonlar rus tilidagi matnga amal qiladilar.