LexUZ sharhi
Mazkur qaror O‘zbekiston Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
Umumta’lim maktablarining 9-sinflari bitiruvchilarini kasb-hunar kollejlari va akademik litseylarda o‘qitish bilan to‘liq qamrab olishni, respublika mintaqalari iqtisodiyoti tarmoqlari va sohalarida talab yuqori bo‘lgan kasblar va mutaxassisliklar bo‘yicha o‘rta maxsus, kasb-hunar ta’limi ma’lumotli kadrlarni maqsadli va sifatli tayyorlashni ta’minlash maqsadida Vazirlar Mahkamasi qaror qiladi:
1. O‘zbekiston Respublikasi Iqtisodiyot vazirligi, Oliy va o‘rta maxsus ta’lim vazirligi, O‘rta maxsus, kasb-hunar ta’limi markazi, Xalq ta’limi vazirligi, Mehnat va aholini ijtimoiy muhofaza qilish vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining iqtisodiyot tarmoqlari va sohalarida aniq kasblar bo‘yicha kasb-hunar kollejlari bitiruvchilariga amaldagi ehtiyojni tanqidiy tahlil qilish asosida tayyorlangan, 2014/2015 o‘quv yilidan boshlab respublika hududlarida 1-ilovaga* muvofiq 30 ta kasb-hunar kollejini qayta ixtisoslashtirishga doir takliflari qabul qilinsin.
2. Iqtisodiyot tarmoqlari va sohalarining o‘rta maxsus, kasb-hunar ta’limi ma’lumotli mutaxassislarga bo‘lgan real ehtiyojidan kelib chiqqan holda 2014/2015 o‘quv yilida umumta’lim maktablarining 9-sinflari bitiruvchilarini respublikaning kasb-hunar kollejlari va akademik litseylariga o‘qishga qabul qilishning umumiy parametrlari 2 va 2.1 — 2.13-ilovalarga* muvofiq tasdiqlansin.
3. O‘zbekiston Respublikasi ta’lim muassasalariga qabul qilish bo‘yicha Davlat komissiyasi (A.I. Ikramov) respublikaning kasb-hunar kollejlari va akademik litseylariga qabul qilishning belgilangan parametrlaridan kelib chiqqan holda bir hafta muddatda 2014/2015 o‘quv yilida viloyatlar, shaharlar va tumanlar bo‘yicha har bir kasb-hunar kolleji va akademik litseyga umumta’lim maktablarining 9-sinflari bitiruvchilarini o‘qishga qabul qilish parametrlarini tasdiqlasin.
O‘quvchilar va ular ota-onalarining tanlangan va iqtisodiyot tarmoqlarida ehtiyoj mavjud bo‘lgan mutaxassisliklar bo‘yicha o‘qishga talabini, ta’lim muassasalarida zarur moddiy-texnika baza mavjudligini hisobga olgan holda umumta’lim maktablarining 9-sinflari bitiruvchilari kasb-hunar kollejlari va akademik litseylarda o‘qitish bilan to‘liq qamrab olinishini ta’minlashga alohida e’tibor berilsin.
4. O‘zbekiston Respublikasi ta’lim muassasalariga qabul qilish bo‘yicha Davlat komissiyasiga, zarurat bo‘lganda, umumta’lim maktablarining 9-sinflari bitiruvchilari o‘rta maxsus, kasb-hunar ta’limi muassasalarida o‘qitish bilan to‘liq qamrab olinishini ta’minlash maqsadida kasb-hunar kollejlari va akademik litseylarga o‘qishga qabul qilish ko‘rsatkichlariga o‘zgartirishlar kiritish huquqi berilsin.
5. O‘zbekiston Respublikasi Oliy va o‘rta maxsus ta’lim vazirligining O‘rta maxsus, kasb-hunar ta’limi markazi o‘z tasarrufida o‘rta maxsus, kasb-hunar ta’limi muassasalari bo‘lgan vazirliklar va idoralar bilan birgalikda 2014/2015 o‘quv yilida umumta’lim maktablarining 9-sinflari bitiruvchilarini kasb-hunar kollejlari va akademik litseylarga o‘qishga qabul qilishning belgilangan umumiy parametrlari so‘zsiz bajarilishini ta’minlasin hamda shu yil 10-avgustgacha bo‘lgan muddatda o‘qishga qabul qilish natijalari bo‘yicha Vazirlar Mahkamasiga yakuniy axborotni taqdim etsin.
6. Qoraqalpog‘iston Respublikasi Vazirlar Kengashi Raisi, viloyatlar, tumanlar va shaharlar hokimlari, O‘zbekiston Respublikasi Xalq ta’limi vazirligi va uning hududiy organlari, Oliy va o‘rta maxsus ta’lim vazirligining O‘rta maxsus, kasb-hunar ta’limi markazi rahbarlari zimmasiga umumta’lim maktablarining 9-sinflari bitiruvchilarini kelgusida kasb-hunar kollejlari va akademik litseylarda o‘qitish bilan to‘liq qamrab olishni ta’minlash yuzasidan shaxsiy mas’uliyat yuklansin.
Umumta’lim maktablarining 9-sinflarini bitiruvchi qizlar kasb-hunar kollejlari va akademik litseylarda o‘qitish bilan qamrab olinishiga alohida e’tibor qaratilsin.
9-sinflar bitiruvchilarini o‘qitish bilan qamrab olishning yakuniy natijalari to‘g‘risida joriy yilning 15-avgustigacha bo‘lgan muddatda Vazirlar Mahkamasiga axborot berilsin.
7. O‘zbekiston Respublikasi Moliya vazirligi 2014/2015 o‘quv yili uchun o‘rta maxsus, kasb-hunar ta’limi muassasalariga o‘qishga qabul qilishning tasdiqlangan parametrlarini hisobga olgan holda kasb-hunar kollejlari va akademik litseylar ta’minoti uchun O‘zbekiston Respublikasi Davlat budjetidan belgilangan tartibda zarur mablag‘lar ajratilishini ta’minlasin.
8. O‘zbekiston Respublikasi Oliy va o‘rta maxsus ta’lim vazirligining O‘rta maxsus, kasb-hunar ta’limi markazi manfaatdor vazirliklar va idoralar, mahalliy davlat hokimiyati organlari bilan birgalikda qayta ixtisoslashtirilayotgan, shuningdek yangidan foydalanishga topshirilayotgan va rekonstruksiya qilinayotgan kasb-hunar kollejlari va filiallarda 2013/2014 o‘quv yili boshlangunga qadar sifatli o‘quv-tarbiya jarayonini tashkil etish, ularni yuqori malakali o‘qituvchi kadrlar bilan to‘ldirish, kadrlar tayyorlash yo‘nalishlariga muvofiq o‘quv-laboratoriya asbob-uskunalari, kompyuter texnikasi, zarur normativ-huquqiy hujjatlar, o‘quv va metodik adabiyotlar bilan ta’minlash chora-tadbirlarini ko‘rsinlar.
9. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov va O‘zbekiston Respublikasi Bosh vazirining o‘rinbosari A.I. Ikramov zimmasiga yuklansin.