Oʻzbekiston Respublikasi “Davlat bojxona xizmati toʻgʻrisida”gi Qonunining 6-moddasi, Oʻzbekiston Respublikasi Vazirlar Mahkamasining 2012-yil 29-dekabrdagi 370-son “Tovarlarni bojxonada elektron shaklda rasmiylashtirish tartibi toʻgʻrisida”gi va 2013-yil 4-oktabrdagi 271-son “Oʻzbekiston havo yoʻllari” milliy aviakompaniyasini aviatsiya kerosini bilan uzluksiz taʼminlash chora-tadbirlari haqida”gi qarorlariga asosan Oʻzbekiston Respublikasi Davlat bojxona qoʻmitasi qaror qiladi:

1. Oʻzbekiston Respublikasi Davlat bojxona qoʻmitasining 2013-yil 5-noyabrdagi 01-02/12-29-son qarori (roʻyxat raqami 2525, 2013-yil 18-noyabr) (Oʻzbekiston Respublikasi qonun hujjatlari toʻplami, 2013-y., 47-son, 619-modda) bilan tasdiqlangan Xorijiy aviakompaniyalarning havo kemalari uchun moʻljallangan aviakerosin mahsulotini bojxona rasmiylashtiruvidan oʻtkazish qoidalariga ilovaga muvofiq oʻzgartirish va qoʻshimchalar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

1. 1-bandda:

a) oltinchi xatboshi quyidagi tahrirda bayon etilsin:

“xizmat koʻrsatuvchi — “Oʻzbekiston havo yoʻllari” milliy aviakompaniyasining aeroportlari;”;

b) quyidagi mazmundagi xatboshi bilan toʻldirilsin:

“hududiy bojxona organlari — Oʻzbekiston Respublikasi Davlat bojxona qoʻmitasining Qoraqalpogʻiston Respublikasi, viloyatlar boʻyicha boshqarmalari va “Toshkent — AERO” ixtisoslashtirilgan bojxona kompleksi.”.

2. 3-banddagi “Toshkent — AERO” ixtisoslashtirilgan bojxona kompleksining (bundan buyon matnda “Toshkent — AERO” IBK deb yuritiladi)” degan soʻzlar “hududiy bojxona organlarining” degan soʻzlar bilan almashtirilsin.

3. 12-bandda “Toshkent — AERO” IBKning” degan soʻzlar “hududiy bojxona organlarining” degan soʻzlar bilan almashtirilsin.

4. 16-bandning birinchi xatboshisidagi “uch kundan” degan soʻzlar “uch ish kunidan” degan soʻzlar bilan almashtirilsin.

5. Quyidagi mazmundagi 16¹-band bilan toʻldirilsin:

“16¹. Deklarant oʻz xohishiga koʻra aviakerosin mahsulotini “reeksport” bojxona rejimiga rasmiylashtirishni elektron shaklda amalga oshirish huquqiga ega.

Bunday hollarda bojxona rasmiylashtiruvi amalga oshiriladigan bojxona postiga bojxona yuk deklaratsiyasi mazkur Qoidalarning 16-bandida qayd etilgan hujjatlar deklarantning elektron raqamli imzosi bilan tasdiqlangan holda “Tovarlarni elektron deklaratsiyalash” avtomatlashtirilgan axborot tizimi orqali taqdim etiladi.”.

6. 18-banddagi “44” raqami “07” raqami bilan almashtirilsin.

7. Mazkur oʻzgartirish va qoʻshimchalar “Oʻzbekiston havo yoʻllari” milliy aviakompaniyasi bilan kelishilgan.