O‘zbekiston Respublikasining “O‘zbekiston Respublikasining Markaziy banki to‘g‘risida”gi, “Banklar va bank faoliyati to‘g‘risida”gi qonunlariga, O‘zbekiston Respublikasi Prezidentining 2008-yil 18-noyabrdagi PF-4053-son “Iqtisodiyot real sektori korxonalarining moliyaviy barqarorligini yanada oshirish chora-tadbirlari to‘g‘risida”gi, 2014-yil 14-fevraldagi PF-4602-son “O‘zbekiston Respublikasi Prezidentining ayrim hujjatlariga qo‘shimchalar kiritish to‘g‘risida”gi farmonlariga, va O‘zbekiston Respublikasi Vazirlar Mahkamasining 2014-yil 27-martdagi 71-son “Tijorat banklarining investitsiya faoliyatini rag‘batlantirishga va banklar tomonidan korxonalarni yangi investorlarga sotishni jadallashtirishga doir qo‘shimcha chora-tadbirlar to‘g‘risida”gi qaroriga muvofiq O‘zbekiston Respublikasi Markaziy banki Boshqaruvi, Moliya vazirligi, Iqtisodiyot vazirligi va O‘zbekiston Respublikasining Xususiylashtirish, monopoliyadan chiqarish va raqobatni rivojlantirish davlat qo‘mitasi qaror qiladi:

1. Tijorat banklari balansida turgan alohida obyektlarni sotish tartibi to‘g‘risidagi nizom ilovaga muvofiq tasdiqlansin.

2. Mazkur qaror rasmiy e’lon qilingan kundan e’tiboran kuchga kiradi.

Mazkur Nizom O‘zbekiston Respublikasi Vazirlar Mahkamasining 2014-yil 27-martdagi 71-son “Tijorat banklarining investitsiya faoliyatini rag‘batlantirishga va banklar tomonidan korxonalarni yangi investorlarga sotishni jadallashtirishga doir qo‘shimcha chora-tadbirlar to‘g‘risida”gi qarorining ilovasiga kiritilgan obyektlarni sotish tartibini belgilaydi.

1. Mazkur Nizomda quyidagi asosiy tushunchalar qo‘llaniladi:

auksion — musobaqalashish asosida xaridorni tanlash savdo shakli bo‘lib, bunda obyektni sotib olish uchun eng katta narxni taklif etgan ishtirokchi obyektni sotib olish to‘g‘risida oldi-sotdi shartnomasi tuzish huquqiga ega bo‘ladi;

sotib olish uchun to‘lov — xaridor tomonidan sotib olingan obyekt uchun to‘lanayotgan milliy va (yoki) chet el valyutasidagi pul mablag‘lari;

auksion va to‘g‘ridan to‘g‘ri muzokaralar o‘tkazish sanasi — auksion va (yoki) to‘g‘ridan to‘g‘ri muzokara o‘tkazilishi ko‘rsatilgan e’londagi auksion o‘tkaziladigan va to‘g‘ridan to‘g‘ri muzokara bo‘lib o‘tadigan kun;

obyekt — O‘zbekiston Respublikasi Vazirlar Mahkamasining 2014-yil 27-martdagi 71-son qarori ilovasiga kiritilgan korxona yoki uning ustav fondi (kapitali)dagi tijorat banklarining ulushi, shuningdek, qarzdorlarning majburiyatlari bo‘yicha bank tomonidan undirilgan mulk;

tashkilotchi — qonun hujjatlariga hamda sotuvchi bilan tuzilgan shartnomaga muvofiq, auksion va to‘g‘ridan to‘g‘ri muzokaralar o‘tkazishni tashkil etish hamda o‘tkazish xizmatlarini ko‘rsatadigan ixtisoslashtirilgan tashkilot;

xaridor — auksion yoki to‘g‘ridan to‘g‘ri muzokaralar natijalari bo‘yicha oldi-sotdi shartnomasi tuziladigan yuridik yoki jismoniy shaxs (O‘zbekiston Respublikasi rezidenti yoki norezidenti);

vakolatli vakil — ishonchnoma asosida auksion yoki to‘g‘ridan to‘g‘ri muzokaralar o‘tkazishda ishtirok etish uchun talabgor tomonidan vakil qilingan yuridik yoki jismoniy shaxs;

talabgor — taklif etilgan shartlar asosida auksion yoki to‘g‘ridan to‘g‘ri muzokaralar o‘tkazishda ishtirok etish xohishini bildirgan yuridik yoki jismoniy shaxs (O‘zbekiston Respublikasi rezidenti yoki norezidenti);

sotuvchi — auksion yoki to‘g‘ridan to‘g‘ri muzokaralar o‘tkazish yo‘li bilan obyekt sotuvini amalga oshiruvchi tijorat banki;

to‘g‘ridan to‘g‘ri muzokaralar o‘tkazish orqali sotish — sotuvchi va xaridor o‘rtasidagi olib borilgan to‘g‘ridan to‘g‘ri muzokaralar o‘tkazish natijasida tuziladigan oldi-sotdi shartnomasi orqali obyektni sotish;

boshlang‘ich qiymati — auksion va to‘g‘ridan to‘g‘ri muzokaraga qo‘yilgan obyektning narxi;

qatnashchi — auksion yoki to‘g‘ridan to‘g‘ri muzokarada qatnashish uchun qo‘yilgan talabgor yoki uning vakolatli vakili;

2. Obyektlarni sotish tashkilotchi tomonidan sotuvchi belgilagan shartlar va muddatlarda quyidagi ketma-ketlikda o‘tkaziladi:

a) auksionga quyish orqali;

b) auksion bo‘lib o‘tmagan deb e’lon qilingan taqdirda, to‘g‘ridan to‘g‘ri muzokaralar o‘tkazish orqali.

3. Obyektlarni auksion yoki to‘g‘ridan to‘g‘ri muzokaralar o‘tkazmasdan sotish faqatgina O‘zbekiston Respublikasi Prezidentining yoki O‘zbekiston Respublikasi Vazirlar Mahkamasining qarorlariga asosan amalga oshiriladi.

4. Obyektlar O‘zbekiston Respublikasi rezidentlari va norezidentlariga qonun hujjatlarida o‘rnatilgan tartibda ham O‘zbekiston Respublikasining milliy valyutasida, ham chet el valyutasida sotilishi mumkin.

5. Obyektning bozor qiymatini aniqlash uchun sotuvchi tomonidan baholovchi tashkilot jalb etiladi.

Agar baholash to‘g‘risidagi hisobot tuzilgan sanadan obyektning boshlang‘ich qiymati belgilanayotgan sanagacha 6 oydan ko‘p vaqt o‘tmagan bo‘lsa, baholovchi tashkilotning hisobotida ko‘rsatilgan obyektning bozor qiymati uni sotish uchun ishlatiladi.

Agar obyektlar baholash to‘g‘risidagi hisobot tuzilgan sanadan boshlab 6 oy davomida sotishga qo‘yilgan bo‘lsa, O‘zbekiston Respublikasi Vazirlar Mahkamasining 2014-yil 27-martdagi 71-sonli qarori qabul qilingunga qadar tuzilgan baholash hisobotlari obyektning boshlang‘ich qiymatini belgilash uchun ishlatiladi.

Mazkur Nizomga asosan sotuvga qo‘yilgan hamda obyektning boshlang‘ich qiymati baholash to‘g‘risidagi hisobot tuzilgan sanadan boshlab 6 oy mobaynida belgilangan bo‘lsa, obyektni baholash to‘g‘risidagi hisobot tuzilgan sanadan uch yilgacha bo‘lgan muddatda qaytadan baholash talab etilmaydi.

6. Auksion va to‘g‘ridan to‘g‘ri muzokaralar o‘tkazish uchun sotuvchi tashkilotchi bilan tegishli xizmatlar ko‘rsatish to‘g‘risida shartnoma tuzadi va obyektlarni sotish shartlari, shu jumladan, boshlang‘ich qiymatini taqdim qiladi.

7. Auksion va (yoki) to‘g‘ridan to‘g‘ri muzokaralarni o‘tkazishga tayyorgarlik ko‘rish va o‘tkazish tashkilotchi hisobidan amalga oshiriladi, agar sotuvchi va tashkilotchi o‘rtasida tuzilgan shartnomada boshqa shartlar belgilanmagan bo‘lsa.

8. Tashkilotchi obyektni sotish bo‘yicha sotuvchi tomonidan taqdim etilgan shartlarga asosan:

auksion o‘tkazish sanasini belgilaydi;

doimiy yoki vaqtincha faoliyat ko‘rsatuvchi auksion komissiyasini shakllantiradi;

auksionda ishtirok etish uchun buyurtmanoma berish muddatini belgilaydi;

auksion o‘tkazilishidan kamida 30 kun oldin hech bo‘lmaganda ikkita respublika davriy nashrlarida (2000 nusxadan ortiq tirajda) va o‘zining veb-saytida auksion o‘tkazilishi to‘g‘risida e’lon qiladi. E’lonlar belgilangan auksion shartlariga muvofiq bo‘lishi va mazkur obyekt bo‘yicha to‘rt marta, bir haftada 2-martadan ortiq o‘tkazilmaydigan auksion o‘tkazish sanalari to‘g‘risidagi ma’lumotga ega bo‘lishi lozim;

qonun hujjatlarida belgilangan tartibda sotiladigan obyektlar to‘g‘risida axborotni oshkor etadi;

auksionda ishtirok etish uchun ishtirokchilar buyurtmanomalarini ro‘yxatga oladi;

auksionda ishtirok etish istagini bildirgan shaxslarni taqdim etiladigan hujjatlar namunalari bilan ta’minlaydi, shuningdek ularni rasmiylashtirishda yordam beradi;

talabgorlar orasidan auksion ishtirokchilari ro‘yxatini shakllantiradi;

auksion ishtirokchilariga ishtirokchi raqami ko‘rsatilgan chipta va maxsus raqamli belgini beradi;

e’lon chop etilgan sanadan boshlab yuridik va jismoniy shaxslarga ularning so‘rovlari bo‘yicha obyekt to‘g‘risida qo‘shimcha ma’lumotlar taqdim etadi;

auksion o‘tkazilgan kundan boshlab 30 kun davomida auksion o‘tkazish to‘g‘risida e’lon berilgan respublika davriy nashrlari va veb-saytlarda auksion natijasi to‘g‘risida ma’lumotni chop etadi;

tuzilgan shartnomaga muvofiq boshqa vazifalarni bajaradi.

9. Auksion o‘tkazilishi to‘g‘risidagi e’londa quyidagi ma’lumotlar aks ettirilishi lozim:

tashkilotchining nomi va joylashgan yeri (pochta manzili), uning aloqa qilinadigan telefoni, telefaksi, elektron pochta manzili;

auksionga qo‘yilayotgan obyektning nomi va uning joylashgan joyi;

obyektning boshlang‘ich qiymati;

auksion o‘tkaziladigan sana, vaqt va joy;

oldi-sotdi shartnomasi tuzilishining cheklangan muddati;

zakalat qo‘yish miqdori, muddati va tartibi, uni qo‘yish uchun bank rekvizitlari;

buyurtmanomalarni qabul qilishning oxirgi muddati (kun va soat ko‘rsatilgan holda);

sotib olish uchun to‘lovning muddati;

qo‘shimcha ma’lumotlar olish mumkin bo‘lgan manzil va aloqa telefoni.

10. Auksionda sotilgan obyekt bo‘yicha sotib olish uchun to‘lovlar bir yo‘la yoki sotib olish summasining qoldig‘iga foizlar hisoblamasdan bo‘lib-bo‘lib, shuningdek, sotib olish uchun to‘lovlar to‘liq to‘langunga qadar obyektni o‘zgaga berish va uchinchi shaxslarga garovga (ipotekaga) qo‘yish huquqisiz (sotuvchi — tijorat banki bundan mustasno) to‘lanadi.

Sotib olish uchun to‘lovlarni bo‘lib-bo‘lib to‘lash muddati 7 yildan oshmasligi lozim, agar mazkur obyektni sotish muddati O‘zbekiston Respublikasi Prezidenti yoki Vazirlar Mahkamasining alohida qarorlarida ko‘zda tutilmagan bo‘lsa.

11. Auksion o‘tkazish jarayonini nazorat qilish, talablar yagonaligini va auksion natijalari bo‘yicha qaror qabul qilish xolisligini ta’minlash uchun tashkilotchi tomonidan doimiy yoki vaqtincha faoliyat ko‘rsatuvchi auksion komissiyasi tashkil etiladi.

12. Komissiya tarkibi kamida besh kishidan tashkil topishi lozim. Auksion komissiyasiga quyidagilar kiritiladi:

Sotuvchi — bankning investitsiya faoliyatini nazorat qiluvchi Boshqaruv raisi o‘rinbosari;

sotuvchi bankning investitsiya faoliyati bo‘yicha bo‘linmasi rahbari;

sotuvchi bankning investitsiya kompaniyalari rahbarlari (ular mavjud bo‘lgan taqdirda);

sotuvchi bankning boshqa bo‘linmalari xodimlari;

tashkilotchi rahbari.

13. Auksion komissiyasiga sotuvchi-bankning investitsiya faoliyatini nazorat qiluvchi Boshqaruv raisi o‘rinbosari rahbarlik qiladi.

14. Qarorlar oddiy ko‘pchilik ovozi bilan qabul qilinadi. Ovozlar teng bo‘lgan taqdirda, komissiya raisi ovozi hal qiluvchi hisoblanadi.

Auksion komissiyasi majlisida uning a’zolarining kamida 2/3 qismi ishtirok etsa, uning qarorlari qonuniy hisoblanadi. Bunda, auksion komissiyasining raisi va tashkilotchi rahbarining ishtirok etishi talab etiladi.

15. Auksionda ishtirok etish uchun talabgor majburiyatlar bajarilishining ta’minlanishi sifatida obyektning boshlang‘ich qiymatining 5 (besh) foizi miqdorida zakalat to‘lashi va auksionda ishtirok etish uchun buyurtmanoma berishi lozim.

16. Auksionda ishtirok etish uchun buyurtmanomalarni qabul qilish auksion o‘tkazish to‘g‘risidagi e’londa ko‘rsatilgan sanadan boshlanadi va auksion o‘tkazish boshlanishidan kamida uch soat oldin to‘xtatiladi.

17. Auksionda ishtirok etish uchun buyurtmanomalar talabgor yoki uning vakili tomonidan tashkilotchiga ikki nusxada (shaxsan yoki pochta orqali) quyidagi hujjatlar ilova qilingan tarzda taqdim etiladi:

yuridik shaxslar uchun — davlat ro‘yxatidan o‘tganligi to‘g‘risida guvohnoma nusxasi, shuningdek, auksionda ishtirok etish uchun vakolatli vakil nomiga, uning shaxsini tasdiqlovchi hujjat nusxasi ilova qilingan holda, qonun hujjatlarida belgilangan tartibda rasmiylashtirilgan ishonchnoma;

jismoniy shaxslar uchun — pasport (istiqomat guvohnomasi) nusxasi, auksionda vakolatli vakil qatnashgan taqdirda esa, uning shaxsini tasdiqlovchi hujjat nusxasi ilova qilingan holda, qonun hujjatlarida o‘rnatilgan tartibda rasmiylashtirilgan ishonchnoma;

auksion to‘g‘risida e’londa ko‘rsatilgan bank hisobraqamiga zakalat o‘tkazilganligini tasdiqlovchi to‘lov hujjati nusxasi.

18. Tashkilotchi taqdim etilgan hujjatlarning ikkinchi nusxasiga ularni qabul etganligi to‘g‘risida sana va qabul qilingan vaqtni ko‘rsatgan holda belgi qo‘yadi va uni talabgorga (yoki uning vakiliga) qaytarib beradi. Qabul qilingan buyurtmanomalar tashkilotchi tomonidan ro‘yxatdan o‘tkazilishi va hisobga olinishi lozim.

19. Auksion to‘g‘risida e’londa ko‘rsatilgan qabul muddati o‘tgandan so‘ng auksionda ishtirok etish uchun taqdim etilgan, shuningdek, mazkur Nizomning 17-bandida belgilangan talablarga javob bermaydigan buyurtmanomalar tashkilotchi tomonidan ko‘rib chiqish uchun qabul qilinmaydi.

Hujjatlar taqdim etilgan sana tashkilotchining ro‘yxatdan o‘tkazish to‘g‘risidagi yozuvi bo‘yicha aniqlanadi.

Boshqa asoslar bo‘yicha auksionda qatnashishga rad etilishiga yo‘l qo‘yilmaydi.

20. Ko‘rib chiqish uchun tashkilotchi tomonidan qabul qilinmagan auksionda ishtirok etish buyurtmanomalari shu kunning o‘zida talabgorga yoki uning vakolatli vakiliga tilxat ostida qaytarib beriladi, yoxud pochta orqali (buyurtma xat bilan), qabul qilishni rad etish sabablari ko‘rsatilgan holda jo‘natib yuboriladi. Bunda to‘langan zakalat summasi uch bank ish kuni mobaynida talabgorga qaytariladi.

21. Buyurtmanomalari va hujjatlari mazkur Nizomda belgilangan talablarga javob beradigan va tashkilotchi tomonidan qabul qilingan talabgor auksionda qatnashishga qo‘yiladi.

22. Auksion qatnashchilariga auksion o‘tkaziladigan kuni auksion qatnashchisi chiptasi beriladi, unda qatnashchining tartib raqami va obyekt nomi ko‘rsatiladi, shuningdek auksion davomida foydalaniladigan maxsus raqam belgilari beriladi.

23. Auksion ishtirokchisi auksion o‘tkazilishidan kamida uch soat oldin tashkilotchiga yozma bildirishnoma berish yo‘li bilan buyurtmanomani qaytarib olishi mumkin. Bunda to‘langan zakalat summasi buyurtmanomani qaytarib olish to‘g‘risida bildirishnoma kelib tushgan vaqtdan boshlab uch bank ish kunidan kechiktirilmagan muddatda qaytarilishi lozim.

24. Auksion obyektning boshlang‘ich qiymatini bosqichma-bosqich oshirgan holda o‘tkaziladi. Auksion bosqichi auksion komissiyasi tomonidan boshlang‘ich qiymatining bir foizidan kam bo‘lmagan miqdorda belgilanadi.

25. Auksionni tashkilotchi tomonidan tayinlanadigan auksionchi o‘tkazadi. Auksion auksionchi tomonidan obyektning nomi, qisqacha tasnifi va obyektning boshlang‘ich qiymati e’lon qilingan holda boshlanadi.

26. Auksionchi narxni e’lon qiladi, ishtirokchilar esa mazkur narxda obyektni sotib olishga tayyorligi to‘g‘risida ishtirokchi raqamini ko‘tarish orqali bildiradi.

27. Bir necha ishtirokchilar tomonidan qiziqish bildirilgan taqdirda auksionchi narxni auksion bosqichiga muvofiq oshirib navbatdagi narxni e’lon qiladi.

28. Agar navbatdagi narx 3-marta e’lon qilingandan keyin xaridorlarning hech biri raqamini ko‘tarmasa, auksion tugallanadi. Chipta raqami auksionchi tomonidan oxirgi marta e’lon qilingan xaridor auksion g‘olibi hisoblanadi. Shundan so‘ng, auksionchi auksionga qo‘yilgan obyekt sotilganligi to‘g‘risida, sotib olish uchun to‘lov miqdorini va auksion g‘olibining chipta raqamini e’lon qiladi.

29. Agar auksionda ishtirok etish uchun buyurtmanomalar ularni qabul qilish muddati tugashiga qadar taqdim etilmasa yoki faqat bitta buyurtmanoma taqdim etilsa, auksion bo‘lib o‘tmagan deb topiladi. Bunda tashkilotchi auksion komissiyasini, sotuvchini, shuningdek yagona buyurtmanomani taqdim etgan ishtirokchini bu to‘g‘risida xabardor qiladi.

Auksionda ishtirok etish uchun yagona buyurtmanoma taqdim etgan talabgor istagiga ko‘ra uning to‘langan zakalat summasi uch bank ish kuni mobaynida qaytarib berilishi yoki uning buyurtmanomasi navbatdagi auksionga (agar auksion o‘tkazilishi nazarda tutilgan bo‘lsa) o‘tkazilishi mumkin.

30. Auksion natijalarini rasmiylashtirish mazkur Nizomning 5-bobi talablariga muvofiq amalga oshiriladi.

31. Auksion to‘rt marta bo‘lib o‘tmagan deb topilgan taqdirda, obyekt to‘g‘ridan to‘g‘ri muzokaralar o‘tkazish orqali sotiladi.

32. Tashkilotchi tomonidan sotilmagan obyektning to‘g‘ridan to‘g‘ri muzokaralar o‘tkazish orqali, sotuvchi tomonidan o‘rnatilgan shartlarda va mazkur Nizomda belgilangan tartibda sotilishi to‘g‘risida e’lon chop etiladi.

33. E’lon to‘g‘ridan to‘g‘ri muzokaralarda ishtirok etish uchun buyurtmanomalarni qabul qilish muddati tugashi sanasidan kamida 30 kun oldin, hech bo‘lmaganda ikkita respublika davriy nashrlarida (2000 nusxadan ortiq tirajda) va o‘z veb-saytida chop etiladi.

E’lonlar o‘rnatilgan shartlarga muvofiq bo‘lishi va o‘z ichiga o‘tkaziladigan to‘g‘ridan to‘g‘ri muzokaralar sanasi hamda talabgor takliflarining amal qilish muddatlari to‘g‘risida ma’lumotni olishi lozim.

34. To‘g‘ridan-to‘g‘ri muzokaralar orqali sotish to‘g‘risidagi e’londa quyidagi ma’lumotlar bo‘lishi lozim:

tashkilotchining nomi va joylashgan yeri (pochta manzili), uning aloqa telefoni, telefaksi, elektron pochta manzili;

to‘g‘ridan to‘g‘ri muzokaralar orqali sotuvga qo‘yiladigan obyektning nomi va uning joylashgan joyi;

obyektning boshlang‘ich qiymati;

to‘g‘ridan to‘g‘ri muzokaralar orqali sotishni o‘tkazish sanasi, vaqti va joyi;

oldi-sotdi shartnomasi tuzilishining oxirgi muddati;

zakalat miqdori, kiritish muddati va tartibi, uni qo‘yish uchun bank rekvizitlari;

buyurtmanomalarni qabul qilishning oxirgi muddati (kun va soat ko‘rsatilgan holda);

sotib olish uchun to‘lov amalga oshiriladigan oxirgi muddat;

qo‘shimcha ma’lumotlar olish mumkin bo‘lgan manzil va aloqa telefoni.

35. To‘g‘ridan-to‘g‘ri muzokaralar orqali sotilgan obyekt bo‘yicha sotib olish uchun to‘lovlar bir yo‘la yoki sotib olish summasining qoldig‘iga foizlar hisoblanmasdan bo‘lib-bo‘lib to‘lanadi, shuningdek sotib olish uchun to‘lovlar to‘liq to‘langunga qadar obyektni o‘zgaga berish va uchinchi shaxslarga garovga (ipotekaga) qo‘yish huquqisiz (sotuvchi — tijorat banki bundan mustasno) amalga oshiriladi.

Sotib olish uchun to‘lovlarning muddati 7 yildan oshmasligi kerak, agarda ushbu obyekt bo‘yicha O‘zbekiston Respublikasi Prezidenti yoki O‘zbekiston Respublikasi Vazirlar Mahkamasining alohida qarorida boshqa muddat ko‘zda tutilmagan bo‘lsa.

36. To‘g‘ridan-to‘g‘ri muzokaralar o‘tkazish orqali sotishda ishtirok etish uchun talabgor majburiyatlar bajarilishining ta’minlanishi sifatida obyekt boshlang‘ich qiymatining 1 (bir) foizi miqdorida zakalat to‘lashi va to‘g‘ridan to‘g‘ri muzokaralarda ishtirok etish uchun buyurtmanoma berishi lozim.

37. To‘g‘ridan-to‘g‘ri muzokaralar o‘tkazish orqali sotishda ishtirok etish uchun buyurtmanomalar talabgor yoki uning vakili tomonidan (shaxsan yoki pochta orqali) ikki nusxada quyidagi hujjatlar ilova qilingan holda tashkilotchiga taqdim etiladi:

yuridik shaxslar uchun — davlat ro‘yxatidan o‘tganligi to‘g‘risida guvohnoma nusxasi, shuningdek to‘g‘ridan to‘g‘ri muzokaralarda ishtirok etish uchun vakolatli vakil nomiga, uning shaxsini tasdiqlovchi hujjat nusxasi ilova qilingan holda, qonun hujjatlarida belgilangan tartibda rasmiylashtirilgan ishonchnoma;

jismoniy shaxslar uchun — pasport (istiqomat guvohnomasi) nusxasi, to‘g‘ridan to‘g‘ri muzokaralarda vakolatli vakil qatnashgan taqdirda esa, uning shaxsini tasdiqlovchi hujjat nusxasi ilova qilingan holda, qonun hujjatlarida o‘rnatilgan tartibda rasmiylashtirilgan ishonchnoma;

to‘g‘ridan to‘g‘ri muzokaralar o‘tkazish to‘g‘risidagi e’londa ko‘rsatilgan bank hisobraqamiga zakalat o‘tkazilganligini tasdiqlovchi to‘lov hujjati nusxasi;

ikki nusxada, konvert ichida sotib olish summasi va to‘lovlarni to‘lash muddatlari to‘g‘risidagi takliflar. Bunda, taqdim etilgan hujjatlarning barcha varaqlari talabgor imzosi va muhri (muhr mavjud bo‘lgan taqdirda) bilan tasdiqlangan bo‘lishi lozim.

38. Tashkilotchi taqdim etilgan hujjatlarning ikkinchi nusxasiga ularni qabul qilinganligi to‘g‘risida sana va qabul qilingan vaqtni ko‘rsatgan holda belgi qo‘yadi va uni talabgorga (yoki uning vakiliga) qaytarib beradi. Qabul qilingan buyurtmanomalar tashkilotchi tomonidan ro‘yxatdan o‘tkazilishi va hisobga olinishi lozim.

39. To‘g‘ridan-to‘g‘ri muzokaralar o‘tkazish to‘g‘risidagi e’londa ko‘rsatilgan qabul muddati tugagandan so‘ng to‘g‘ridan to‘g‘ri muzokaralar orqali sotishda ishtirok etish uchun taqdim etilgan, shuningdek mazkur Nizomning 37-bandida belgilangan talablarga javob bermaydigan buyurtmanomalar tashkilotchi tomonidan ko‘rib chiqish uchun qabul qilinmaydi. Hujjatlar taqdim etilgan sana tashkilotchining ro‘yxatdan o‘tkazish to‘g‘risidagi yozuvi bo‘yicha aniqlanadi.

Boshqa asoslar bo‘yicha to‘g‘ridan to‘g‘ri muzokaralar orqali sotishda qatnashishga rad etilishiga yo‘l qo‘yilmaydi.

40. Tashkilotchi tomonidan to‘g‘ridan to‘g‘ri muzokaralar orqali sotishda ishtirok etishni ko‘rib chiqish uchun qabul qilinmagan buyurtmanomalar shu kunning o‘zida talabgorga yoki uning to‘liq vakolatli vakiliga tilxat ostida qaytarib beriladi, yoxud pochta orqali (buyurtma xat bilan) qabul qilishni rad etish sabablari ko‘rsatilgan holda, jo‘natib yuboriladi. Bunda to‘langan zakalat summasi uch bank ish kuni mobaynida talabgorga qaytarib beriladi.

41. Hujjatlari mazkur Nizomda belgilangan talablarga javob beradigan va tashkilotchi tomonidan qabul qilingan talabgorlar to‘g‘ridan to‘g‘ri muzokaralar orqali sotishda ishtirok etishga qo‘yiladi.

42. To‘g‘ridan-to‘g‘ri muzokaralar orqali sotishni o‘tkazish va talabgorlarning taqdim etilgan buyurtmanomalarini ko‘rib chiqish uchun tashkilotchi tomonidan to‘g‘ridan to‘g‘ri muzokaralar o‘tkazish komissiyasi tashkil etiladi.

43. To‘g‘ridan-to‘g‘ri muzokaralar o‘tkazish komissiyasi tarkibi besh kishidan kam bo‘lmasligi lozim. To‘g‘ridan-to‘g‘ri muzokaralar o‘tkazish komissiyasi tarkibiga quyidagilar kiritiladi:

sotuvchi bankning investitsiya faoliyatini nazorat qiluvchi Boshqaruv raisining o‘rinbosari;

sotuvchi bankning investitsiya faoliyati bo‘yicha bo‘linmasi rahbari;

sotuvchi bankning investitsiya kompaniyalari rahbarlari (ular mavjud bo‘lgan taqdirda);

sotuvchi bankning boshqa bo‘linmalari xodimlari.

44. To‘g‘ridan-to‘g‘ri muzokaralar o‘tkazish komissiyasiga sotuvchi bankning investitsiya faoliyatini nazorat qiluvchi Boshqaruv raisining o‘rinbosari rahbarlik qiladi.

45. To‘g‘ridan-to‘g‘ri muzokaralar o‘tkazish komissiyasi qarorlari oddiy ko‘pchilik ovozi bilan qabul qilinadi. Ovozlar teng bo‘lgan taqdirda, komissiya raisi ovozi hal qiluvchi hisoblanadi.

To‘g‘ridan-to‘g‘ri muzokaralar o‘tkazish komissiyasi majlisida uning a’zolarining kamida 2/3 qismi, shu jumladan komissiya raisi, ishtirok etsa, uning qarorlari qonuniy hisoblanadi.

To‘g‘ridan-to‘g‘ri muzokara o‘tkazish komissiyasi ishida, to‘g‘ridan to‘g‘ri muzokaralar o‘tkazilish jarayonini, talablar teng bo‘lishini va to‘g‘ridan to‘g‘ri muzokaralar natijasi bo‘yicha qabul qilinadigan qarorlar haqqoniyligining ta’minlanishini nazorat qiluvchi tashkilotchi rahbari majburiy tarzda ishtirok etadi.

46. Sotuv o‘tkaziladigan kunda to‘g‘ridan to‘g‘ri muzokaralar o‘tkazish komissiyasi tomonidan talabgorlar takliflari solingan konvertlarning birinchi nusxalari ochiladi. Konvertlarning ikkinchi nusxalari tashkilotchida saqlanadi va takliflar mazmuni bo‘yicha nizolar yuzaga kelgan taqdirda ochiladi.

Konvertdan olingan hujjatlar mazkur Nizomning 37-bandi beshinchi xatboshisida belgilangan talablarga muvofiq bo‘lmagan taqdirda, mazkur taklif to‘g‘ridan to‘g‘ri muzokaralar o‘tkazish komissiyasi tomonidan ko‘rilmaydi.

Talabgorlar yoki ularning vakolatli vakillari takliflar solingan konvertlar ochilishida ishtirok etadi. Talabgorlar bilan muzokara to‘g‘ridan to‘g‘ri muzokaralar o‘tkazish komissiyasi tomonidan takliflar solingan konvertlar ochilgandan so‘ng o‘tkaziladi.

47. Ikkita va undan ortiq talabgorlardan takliflar mavjud bo‘lganda, to‘g‘ridan to‘g‘ri muzokaralar natijasi bo‘yicha obyekt uchun eng ko‘p miqdorda sotib olish uchun to‘lovni taklif etgan talabgor, uning taklifi e’londa ko‘rsatilgan obyektni sotish bo‘yicha oldi-sotdi shartnomasi tuzish shartlariga mos kelishini hisobga olgan holda, g‘olib deb topiladi.

To‘g‘ridan-to‘g‘ri muzokaralar natijasi bo‘yicha obyekt uchun bir xil sotib olish uchun to‘lovlar summasini taklif qilgan ikkita talabgor mavjud bo‘lgan taqdirda, sotib olish uchun to‘lovlar amalga oshirilishining eng qisqa muddatini taklif etgan talabgor g‘olib deb topiladi.

48. Bitta talabgor mavjud bo‘lgan taqdirda, taqdim etilgan takliflar e’londa ko‘rsatilgan shartlarga muvofiq bo‘lsa, sotuvchi tomonidan oldi-sotdi shartnomasi tuziladi.

49. To‘g‘ridan-to‘g‘ri muzokaralar o‘tkazish orqali o‘tkazilgan sotuv natijalari mazkur Nizomning 5-bobi talablariga muvofiq rasmiylashtiriladi.

50. Auksion komissiyasi hamda to‘g‘ridan to‘g‘ri muzokaralar o‘tkazish komissiyasi quyidagi huquqlarga ega:

qonun hujjatlari, shu jumladan mazkur Nizom talablari buzilgan taqdirda, shuningdek kimoshdi yoki to‘g‘ridan to‘g‘ri muzokaralar orqali sotuv o‘tkazilishi jarayoniga to‘sqinlik qiluvchi boshqa vaziyatlar yuzaga kelgan taqdirda, kimoshdi yoki to‘g‘ridan to‘g‘ri muzokaralar orqali sotuv o‘tkazilishini to‘xtatish;

tegishli e’lonlar chop etilishini, shuningdek buyurtmanomalar taqdim etgan talabgorlarni (agar mavjud bo‘lsa) yozma ravishda xabardor qilinishini ta’minlash, auksion o‘tkazish sanasini bir oydan ko‘p bo‘lmagan muddatga va/yoki to‘g‘ridan to‘g‘ri muzokaralar orqali sotishni o‘tkazish sanasini ikki oydan ko‘p bo‘lmagan muddatga ko‘chirish;

Auksion komissiyasi hamda to‘g‘ridan to‘g‘ri muzokaralar o‘tkazish komissiyasi qonun hujjatlari, shu jumladan mazkur Nizomga muvofiq boshqa huquqlarga ham ega bo‘lishi mumkin.

51. Auksion komissiyasi mazkur Nizomda ko‘zda tutilgan holatlarda auksion bo‘lmagan deb topishi lozim.

To‘g‘ridan-to‘g‘ri muzokaralar o‘tkazish komissiyasi mazkur Nizomga muvofiq to‘g‘ridan to‘g‘ri muzokaralar orqali sotish o‘tkazilishini bo‘lmagan deb topishi, shuningdek ishtirokchilarning takliflari belgilangan shartlarga muvofiq kelmagan holatda, ularni xabardor qilgan va rad etish sabablarini ko‘rsatgan holda takliflarini rad etishi lozim.

Auksion komissiyasi hamda to‘g‘ridan to‘g‘ri muzokaralar o‘tkazish komissiyalari qonun hujjatlari, shu jumladan mazkur Nizomga muvofiq boshqa majburiyatlarni ham bajarishlari mumkin.

52. O‘tkazilgan auksion va/yoki to‘g‘ridan to‘g‘ri muzokaralar o‘tkazish orqali sotish natijalari, shu kunning o‘zida, auksion komissiyasi yoki to‘g‘ridan to‘g‘ri muzokaralar o‘tkazish komissiyasining bayonnomasi bilan ishtirokchilar, ularning takliflari va qabul qilingan qarorlari aks ettirilgan holda, auksion komissiyasi yoki to‘g‘ridan to‘g‘ri muzokaralar o‘tkazish komissiyasining a’zolari hamda g‘olib (u aniqlangan taqdirda) tomonidan imzolangan holda rasmiylashtiriladi.

O‘tkazilgan auksion yoki to‘g‘ridan to‘g‘ri muzokaralar natijalari bo‘yicha bayonnoma mazkur Nizomning ilovasiga muvofiq rasmiylashtiriladi.

53. Bayonnoma nusxalari sotuvchi va g‘olibga (u aniqlangan taqdirda) taqdim qilinadi va u obyektning oldi-sotdi shartnomasini tuzish uchun asos bo‘ladi.

54. Obyektning oldi-sotdi shartnomasi sotuvchi va g‘olib o‘rtasida bayonnoma tuzilgan kundan boshlab 20 kun muddat ichida tuziladi.

55. Qonunchilikda belgilangan hollarda obyekt bo‘yicha tuzilgan oldi-sotdi shartnomasi bekor qilingan taqdirda, auksion yoki to‘g‘ridan to‘g‘ri muzokaralar takroran o‘tkaziladi.

56. Auksion g‘olibi bayonnoma yoki oldi-sotdi shartnomasini imzolashdan bosh tortsa yoki imzolashni rad etsa, auksion komissiyasi bayonnomaga tegishli yozuv kiritadi va sotuvchi auksion g‘olibi taklifidan bir bosqich past narx taklif qilgan auksion ishtirokchisi bilan shartnoma tuzishni taklif qiladi.

Agar ushbu auksion ishtirokchisi ham oldi-sotdi shartnomasini imzolashni rad etsa, auksion natijasi bekor qilinadi va auksion komissiyasi tomonidan belgilangan muddatda takroriy auksion o‘tkaziladi.

57. To‘g‘ridan-to‘g‘ri muzokaralar g‘olibi bayonnoma yoki oldi-sotdi shartnomasini imzolashdan bosh tortsa yoki imzolashni rad etsa, to‘g‘ridan to‘g‘ri muzokaralar o‘tkazish komissiyasi bayonnomaga tegishli yozuv kiritadi va sotuvchi, taklifi e’londa ko‘rsatilgan shartlarga eng muvofiq bo‘lgan savdo ishtirokchisi (u bo‘lgan taqdirda) bilan shartnoma tuzishni taklif etadi.

Agar bunday ishtirokchi bo‘lmagan taqdirda yoki mazkur ishtirokchi ham oldi-sotdi shartnomasini imzolashni rad etsa, to‘g‘ridan to‘g‘ri muzokaralar orqali sotish natijalari bekor qilinadi va to‘g‘ridan to‘g‘ri muzokaralar o‘tkazish komissiyasi qarori bilan belgilangan muddatda takroriy to‘g‘ridan to‘g‘ri muzokaralar orqali sotish o‘tkaziladi.

58. Auksion yoki to‘g‘ridan to‘g‘ri muzokaralar orqali sotish g‘olibi bayonnoma yoki oldi-sotdi shartnomasini imzolashdan bosh tortsa yoki imzolashni rad etsa, (sotuvchi tomonidan mazkur Nizom talablari buzilishi oqibatida oldi-sotdi shartnomasini imzolanishi rad etilishi holatlari bundan mustasno) qo‘yilgan zakalat summasi qaytarib berilmaydi.

Sotuvchi auksion savdolari yoki to‘g‘ridan to‘g‘ri muzokaralar g‘olibi bilan bayonnoma yoki oldi-sotdi shartnomasini imzolashdan bosh tortsa yoki imzolashni rad etsa, sotuvchi auksion yoki to‘g‘ridan to‘g‘ri muzokaralar g‘olibiga qo‘yilgan zakalat summasini ikki barobari miqdorida jarima to‘lab beradi.

59. Obyekt auksion yoki to‘g‘ridan to‘g‘ri muzokaralarda dastlabki boshlang‘ich qiymatda sotilmagan taqdirda, sotuvchi mazkur Nizomning 60-bandiga muvofiq bosqichma-bosqich dastlabki boshlang‘ich qiymatini pasaytirish mexanizmini qo‘llaydi, biroq pasaytirish mexanizmi dastlabki boshlang‘ich qiymatining 50%dan ortiq bo‘lmagan miqdorda qo‘llaniladi.

60. Obyektni auksion yoki to‘g‘ridan to‘g‘ri muzokaralarda dastlabki boshlang‘ich qiymatidan pasaytirilgan narxda sotish quyidagi tartibda amalga oshiriladi:

a) birinchi bosqich:

obyektning dastlabki boshlang‘ich qiymatidan 10%gacha pasaytirilgan narxda auksionga chiqarish va auksionni tegishli e’lon chop etilgan sanadan boshlab kamida o‘n besh kundan keyin o‘tkazish;

auksion to‘rt marta bo‘lib o‘tmagan deb topilgan taqdirda, obyekt so‘nggi auksionda qo‘yilgan narxda to‘g‘ridan to‘g‘ri muzokaralar orqali sotishga chiqariladi. To‘g‘ridan-to‘g‘ri muzokaralar orqali sotish tegishli e’lon chop etilgan sanadan boshlab kamida o‘n besh kundan keyin o‘tkaziladi;

to‘g‘ridan to‘g‘ri muzokaralar orqali sotish bo‘lib o‘tmagan deb topilgan taqdirda, obyektni sotishning keyingi bosqichi qo‘llaniladi;

b) ikkinchi bosqich:

obyektning dastlabki boshlang‘ich qiymatidan 20%gacha pasaytirilgan narxda auksionga chiqarish va auksionni tegishli e’lon chop etilgan sanadan boshlab kamida o‘n besh kundan keyin o‘tkazish;

auksion to‘rt marta bo‘lib o‘tmagan deb topilgan taqdirda, obyekt so‘nggi auksionda qo‘yilgan narxda to‘g‘ridan to‘g‘ri muzokaralar orqali sotishga chiqariladi. To‘g‘ridan-to‘g‘ri muzokaralar orqali sotish tegishli e’lon chop etilgan sanadan boshlab kamida o‘n besh kundan keyin o‘tkaziladi;

to‘g‘ridan to‘g‘ri muzokaralar orqali sotish bo‘lib o‘tmagan deb topilgan taqdirda, obyektni sotishning keyingi bosqichi qo‘llaniladi;

v) uchinchi bosqich:

obyektning dastlabki boshlang‘ich qiymatidan 30 %gacha pasaytirilgan narxda auksionga chiqarish va auksionni tegishli e’lon chop etilgan sanadan boshlab kamida o‘n besh kundan keyin o‘tkazish;

auksion to‘rt marta bo‘lib o‘tmagan deb topilgan taqdirda, obyekt so‘nggi auksionda qo‘yilgan narxda to‘g‘ridan to‘g‘ri muzokaralar orqali sotishga chiqariladi. To‘g‘ridan-to‘g‘ri muzokaralar orqali sotish tegishli e’lon chop etilgan sanadan boshlab kamida o‘n besh kundan keyin o‘tkaziladi;

to‘g‘ridan to‘g‘ri muzokaralar orqali sotish bo‘lib o‘tmagan deb topilgan taqdirda, obyektni sotishning keyingi bosqichi qo‘llaniladi;

g) to‘rtinchi bosqich:

obyektning dastlabki boshlang‘ich qiymatidan 40%gacha pasaytirilgan narxda auksionga chiqarish va auksionni tegishli e’lon chop etilgan sanadan boshlab kamida o‘n besh kundan keyin o‘tkazish;

auksion to‘rt marta bo‘lib o‘tmagan deb topilgan taqdirda, obyekt so‘nggi auksionda qo‘yilgan narxda to‘g‘ridan to‘g‘ri muzokaralar orqali sotishga chiqariladi. To‘g‘ridan-to‘g‘ri muzokaralar orqali sotish tegishli e’lon chop etilgan sanadan boshlab kamida o‘n besh kundan keyin o‘tkaziladi;

to‘g‘ridan to‘g‘ri muzokaralar orqali sotish bo‘lib o‘tmagan deb topilgan taqdirda, obyektni sotishning keyingi bosqichi qo‘llaniladi;

d) beshinchi bosqich:

obyektning dastlabki boshlang‘ich qiymatidan 50%gacha pasaytirilgan narxda auksionga chiqarish va auksionni tegishli e’lon chop etilgan sanadan boshlab kamida o‘n besh kundan keyin o‘tkazish;

auksion to‘rt marta bo‘lib o‘tmagan deb topilgan taqdirda, obyekt so‘nggi auksionda qo‘yilgan narxda to‘g‘ridan to‘g‘ri muzokaralar orqali sotishga chiqariladi. To‘g‘ridan-to‘g‘ri muzokaralar orqali sotish tegishli e’lon chop etilgan sanadan boshlab kamida o‘n besh kundan keyin o‘tkaziladi.

61. Obyektning dastlabki boshlang‘ich qiymatidan pasaytirilgan narxda auksion o‘tkazish va to‘g‘ridan to‘g‘ri muzokaralar orqali sotish mazkur Nizomda nazarda tutilgan tartibda amalga oshiriladi.

62. Mazkur Nizomning 60-bandida nazarda tutilgan obyektning dastlabki boshlang‘ich qiymatini pasaytirish mexanizmi oldingi bosqichda ko‘zda tutilgan tadbirlar bajarilgandan so‘ng hamda har bir bosqich uchun sotuv shartlari sotuvchining aksiyadorlari umumiy yig‘ilishi yoki kengashi, yoxud uning vakolatli boshqaruv organi tomonidan tasdiqlangandan so‘ng qo‘llaniladi.

63. Obyektni dastlabki boshlang‘ich qiymatidan pasaytirilgan narxda sotish bo‘yicha o‘tkazilgan auksion yoki to‘g‘ridan to‘g‘ri muzokaralar orqali sotish natijalariga ko‘ra oldi-sotdi shartnomasi, sotuvchi va g‘olib o‘rtasida, auksion yoki to‘g‘ridan to‘g‘ri muzokaralar orqali sotish natijalari to‘g‘risidagi bayonnoma rasmiylashtirilgandan so‘ng yigirma kundan kech bo‘lmagan muddatda tuziladi.

64. Auksion yoki to‘g‘ridan to‘g‘ri muzokaralar orqali sotish natijalariga ko‘ra obyektlarni sotish bo‘yicha oldi-sotdi shartnomasi tuzilgandan keyin, sotib olish uchun to‘lovlar xaridor tomonidan tuzilgan shartnoma shartlariga muvofiq amalga oshiriladi. Bunda g‘olib tomonidan to‘langan zakalat puli shartnoma summasiga kiritiladi.

Auksion va to‘g‘ridan to‘g‘ri muzokaralarda qatnashgan qolgan ishtirokchilarning zakalat summasi, auksion va to‘g‘ridan to‘g‘ri muzokaralar orqali sotish o‘tkazilgandan so‘ng 3 (uch) bank ish kuni mobaynida qaytariladi.

Xaridor bo‘lib-bo‘lib to‘lash sharti bilan sotib olingan obyekt bo‘yicha sotib olish uchun to‘lovni muddatidan oldin amalga oshirish huquqiga ega.

65. Obyekt sotilishidan tushgan mablag‘lar taqsimoti, O‘zbekiston Respublikasi Vazirlar Mahkamasining 2003-yil 18-apreldagi 188-son “Amalga oshirilayotgan iqtisodiy nochor korxonalarni tarkibiy o‘zgartirish va moliyaviy sog‘lomlashtirish samaradorligini oshirish chora-tadbirlari to‘g‘risida”gi qarorining 4-bandiga muvofiq amalga oshiriladi.

66. Sotuvdan tushayotgan mablag‘lar yetarli bo‘lmagan taqdirda, sotuvchi kuzatuv kengashining taqdimotiga ko‘ra aksiyadorlarning umumiy yig‘ilishi yoki sotuvchi kengashi (kengash boshqaruvning oliy organi sifatida) obyektning balans qiymati (bankning buxgalteriya balansida aks ettirilgan obyekt qiymati) va uni sotib olish uchun to‘lovlar orasidagi salbiy tafovutni, tijorat banklari tomonidan ilgari berilgan kreditlar bo‘yicha qoplanmagan qarzdorliklarni va obyektga tegishli boshqa xarajatlarni (shu jumladan investitsiya kompaniyalarining xarajatlari) hisobdan chiqarish to‘g‘risida qaror qabul qilish huquqiga ega.

67. Tashkilotchi, ishtirokchilar tomonidan taqdim etilgan hujjatlarning saqlanishi va maxfiyligini ta’minlamaganligi uchun qonun hujjatlarida o‘rnatilgan tartibda javobgar bo‘ladi.

68. Sotuvchi:

sotiladigan obyektlarni yangi mulkdorga topshirgunga qadar but saqlanishining ta’minlanmaganligi, mulklarni qabul qilish-topshirish dalolatnomasini o‘z vaqtida rasmiylashtirilmaganligi;

mazkur Nizomga muvofiq taqdim etiladigan ma’lumotlar haqqoniy emasligi uchun javobgar bo‘ladi.

69. Ushbu Nizom talablari buzilishida aybdor bo‘lgan shaxslar qonun hujjatlarida belgilangan tartibda javobgarlikka tortiladilar.

70. Obyektlarni auksion yoki to‘g‘ridan to‘g‘ri muzokaralar orqali sotish jarayonida yuzaga keladigan nizolar qonunchilikda o‘rnatilgan tartibda ko‘rib chiqiladi.