Respublikaning markazlashtirilgan suv taʼminoti bilan taʼminlanmagan aholi punktlarini, shu jumladan borish qiyin boʻlgan va aholisi kam boʻlgan qishloq aholi punktlarini sifatli ichimlik suvi bilan taʼminlash darajasini yanada oshirish maqsadida Vazirlar Mahkamasi qaror qiladi:

1. Quyidagilar:

2014-yilda ichimlik suvini tashish uchun mamlakatimizda ishlab chiqarilgan maxsus texnikani (keyingi oʻrinlarda maxsus texnika deb ataladi) suv taʼminoti tashkilotlariga respublika hududlari boʻyicha va miqdorda yetkazib berish jadvali 1-ilovaga* muvofiq;

maxsus texnika sotib olishni moliyalashtirish manbalari 2-ilovaga* muvofiq tasdiqlansin.

2. Belgilansinki:

“Asaka” DATB maxsus texnikani suv taʼminoti tashkilotlariga lizing asosida, 7 yil muddatga, yillik 7 foiz stavkada taqdim etadi;

maxsus texnika sotib olish uchun ajratiladigan Oʻzbekiston Respublikasi Davlat budjeti mablagʻlari suv taʼminoti tashkilotlarining xizmat koʻrsatuvchi banklarda ochiladigan maxsus hisob raqamlariga oʻtkaziladi va ulardan qatʼiy maqsadli foydalanilishi, keyinchalik ularning ustav fondini (ustav fondidagi davlat ulushini) koʻpaytirishga yoʻnaltirilishi kerak;

maxsus texnika suv taʼminoti tashkilotlari tomonidan “Avtosanoat Agrotexservis MTP” MCHJning hududiy boʻlinmalariga qoʻshimcha toʻlovlarsiz sublizingga beriladi;

sublizing toʻlovlari suv taʼminoti tashkilotlarining maxsus hisob raqamlariga tushadi va faqat “Asaka” DATB lizingini qoplashga maqsadli tartibda yoʻnaltiriladi;

lizing toʻlovlari toʻliq toʻlangandan keyin lizing obyekti boʻyicha mulk huquqi suv taʼminoti tashkilotlariga oʻtadi.

3. “Oʻzavtosanoat” aksiyadorlik kompaniyasi, “SamAvto” masʼuliyati cheklangan jamiyati, “TTZ” ochiq aksiyadorlik jamiyati va “Oʻzbekiston temir yoʻllari” davlat-aksiyadorlik kompaniyasi maxsus texnika qatʼiy ravishda 1-ilovada* nazarda tutilgan muddatlarda yetkazib berilishini taʼminlasinlar.

4. Qoraqalpogʻiston Respublikasi Vazirlar Kengashi va viloyatlar hokimliklarining 3-ilovaga* muvofiq roʻyxat boʻyicha 200 ta ichimlik suvini tashish uchun moʻljallangan maxsus texnikani tuman obodonlashtirish boshqarmalari balansidan, keyinchalik ularning ustav fondini (ustav fondidagi davlat ulushini) koʻpaytirgan holda, suv taʼminoti tashkilotlari balansiga oʻtkazish toʻgʻrisidagi taklifiga rozilik berilsin.

5. “SamAvto” MCHJ tomonidan suv taʼminoti tashkilotlariga yetkazib beriladigan maxsus texnika Oʻzbekiston Respublikasi Ichki ishlar vazirligi organlarida roʻyxatdan oʻtkazilganda, istisno tariqasida, Oʻzbekiston Respublikasi Moliya vazirligi huzuridagi Respublika yoʻl jamgʻarmasiga yigʻimlardan ozod qilinsin.

6. Oʻzbekiston Respublikasi Iqtisodiyot vazirligi Qoraqalpogʻiston Respublikasi Vazirlar Kengashi va viloyatlar hokimliklarining asoslangan hisob-kitoblari boʻyicha aholiga sifatli ichimlik suvini yetkazib berishni tashkil etish doirasida maxsus texnika uchun dizel yoqilgʻisining zarur limitini ajratsin.

7. Qoraqalpogʻiston Respublikasi Vazirlar Kengashi Raisi, viloyatlar hokimlari, suv taʼminoti tashkilotlari va “Avtosanoat Agrotexservis MTP” MCHJ hududiy boʻlinmalari rahbarlari zimmasiga quyidagilarni taʼminlash boʻyicha shaxsiy masʼuliyat yuklansin:

maxsus texnikadan maqsadli va samarali foydalanish, shu jumladan uni “GPS” masofadan turib nazorat qilish tizimi bilan jihozlash;

aholi punktlarining joylashuvidan kelib chiqib, ichimlik suvini maqbul yoʻnalishlar boʻyicha maxsus texnika bilan yetkazib berish jadvallarini oʻz vaqtida ishlab chiqish va tasdiqlash;

markazlashtirilgan suv taʼminoti bilan taʼminlanmagan aholi punktlarida aholiga ichimlik suvini maxsus texnika bilan yetkazib berish boʻyicha xizmatlarning toʻliq qamrab olinishi, sotilgan ichimlik suvi uchun daromadlarning toʻliq tushishi va lizing toʻlovlarining oʻz vaqtida toʻlanishi ustidan doimiy asosda monitoring olib borish va qatʼiy nazorat qilish.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari U.U. Rozuqulov va B.I. Zakirov zimmasiga yuklansin.