Samarqand viloyat hokimining 2013-yil 23-noyabrdagi 243-Q-sonli Oʻzbekiston Respublikasi Vazirlar Mahkamasining 2013-yil 20-noyabrdagi 311-sonli “2014-yilda meva-sabzavot, kartoshka, poliz va uzum mahsulotlari ishlab chiqarish hamda ishlatish prognoz koʻrsatkichlari haqida”gi qarori ijrosini bajarish, tumanda 2014-yilda yetishtiriladigan meva-sabzavot, kartoshka, poliz va uzum mahsulotlari ishlab chiqarish hamda oʻz vaqtida qayta ishlashni taʼminlash uchun optimal sharoitlar yaratish maqsadida qaror qilaman:

1. Samarqand viloyat hokimining 2013-yil 23-noyabrdagi 243-Q-sonli Oʻzbekiston Respublikasi Vazirlar Mahkamasining 2013-yil 20-noyabrdagi 311-sonli “2014-yilda meva-sabzavot, kartoshka, poliz va uzum mahsulotlari ishlab chiqarish hamda ishlatish prognoz koʻrsatkichlari haqida”gi qarori rahbarlik va ijro uchun qabul qilinsin.

2. Tumanning meva-sabzavot, kartoshka, poliz va uzum mahsulotlari ishlab chiqarish hamda ishlatishning 2014 prognoz koʻrsatkichlari 1-ilovaga* muvofiq tasdiqlansin.

3. Tuman hokimining oʻrinbosari Gʻ. Quliyev, tuman qishloq va suv xoʻjaligi boʻlimi (H. Narziqulov) tegishli tuman tashkilotlari bilan birgalikda:

shaxsiy, yordamchi va dehqon xoʻjaliklarida meva-sabzavot, kartoshka, poliz va uzum yetishtirish uchun yer maydonlaridan samarali foydalanilishini nazoratga olish;

meva-sabzavotchilik, kartoshka, poliz va uzumchilik maxsus fermer xoʻjaliklarida mahsulot yetishtirishning ustuvorligini hisobga olgan holda ishlab chiqarishning bashorat koʻrsatkichlariga muvofiq xoʻjaliklarda sabzavot va poliz ekinlari joylashtirilishiga alohida eʼtibor qaratilishini;

2014-yilning 1-martiga qadar fermer xoʻjaliklari va qayta ishlash korxonalari oʻrtasida meva-sabzavot va uzum mahsulotlari yetkazib berish boʻyicha hamda mahsulot yetishtiruvchilarni shartnomada belgilangan mahsulotlar qiymatining 40 foizidan kam boʻlmagan miqdorda boʻnak mablagʻlari bilan taʼminlashni koʻzda tutgan holda kontraktatsiya shartnomalari tuzilishni;

yoqilgʻi moylash materiallari, mineral oʻgʻitlar, oʻsimliklarni himoya qilish vositalari, urugʻlik materiallari va koʻchatlar sotishda samara beruvchi tomorqalarni tashkil qilishni taʼminlasinlar.

4. Tuman ichki bozorida meva-sabzavot, kartoshka, poliz va uzum mahsulotlaridan toʻliq foydalanish masalasini hal qilish hamda mahsulotlarni eksport qilishni samarali tashkil etish maqsadida 2-ilovaga* muvofiq ishchi guruhi tuzilsin.

Ishchi guruhining asosiy vazifasi etib:

2014-yil uchun tasdiqlangan meva-sabzavot, kartoshka, poliz va uzum mahsulotlari ishlab chiqarish hamda ishlatishning asosiy bashorat koʻrsatkichlari bajarilishini tanqidiy koʻrib chiqish;

ichki isteʼmol bozorini meva-sabzavot, kartoshka, poliz va uzum mahsulotlarini turlari bilan zaruriy miqdorda, uzluksiz taʼminlash hamda ushbu mahsulotlar narxlari boʻyicha monitoring oʻrnatish;

meva-sabzavot, kartoshka, poliz va uzum mahsulotlari chetga eksport qilishda tashish, vagonlar ajratilishi, bojxonada rasmiylashtirish va hisobotlar taqdim etishi bilan bogʻliq boʻlgan masalalarni tezkorlik bilan koʻrib chiqishni tashkil etish belgilansin.

5. Tuman hokimining oʻrinbosari Gʻ. Quliyev, tuman qishloq va suv xoʻjaligi boʻlimi (H. Narziqulov), tuman iqtisodiyot boʻlimi (A. Maʼrupov) tegishli tuman tashkilotlari bilan birgalikda Vazirlar Mahkamasining 2006-yil 6-fevraldagi 16-sonli “Belgilangan qiymat va moddiy balans koʻrsatkichlari bajarilishini samarali monitoringini taʼminlash chora-tadbirlari toʻgʻrisida”gi qaroriga binoan tumanda 2014-yilda meva-sabzavot, kartoshka, poliz va uzum mahsulotlari ishlab chiqarish va foydalanish balans koʻrsatkichlarining bajarilishini doimiy monitoringini taʼminlash vazifasi topshirilsin.

6. Aholini hamda qayta ishlash korxonalarini ishlab chiqarilgan meva-sabzavot, kartoshka, poliz va uzum mahsulotlari bilan yetarli taʼminlash monitoringi olib borilishi munosabati bilan:

tuman hokimligi iqtisodiyot boʻlimi maʼlumotlarni tuman hokimligi bilan kelishib, har chorakda hisobot davridan keyingi oyning 5-sanasigacha viloyat iqtisodiyot boshqarmasiga taqdim etsin.

7. Mazkur qaror qabul qilinishi munosabati bilan tuman hokimining 2012-yil 13-dekabrdagi 615-Q-sonli qarori oʻz kuchini yoʻqotgan deb hisoblansin.

8. Mazkur qaror ijrosini nazorat qilish tuman hokimining iqtisodiyot va ijtimoiy rivojlantirish masalalari boʻyicha oʻrinbosari Gʻ. Quliyev va tuman qishloq va suv xoʻjaligi boʻlimi boshligʻi H. Narziqulov zimmasiga yuklansin.

9. Mazkur qaror rasmiy eʼlon qilingandan soʻng kuchga kiradi.