Viloyat hokimining 2013-yil 23-noyabrdagi 243-Q-sonli “Oʻzbekiston Respublikasi Vazirlar Mahkamasining 2013-yil 20-noyabrdagi 311-sonli “2014-yilda meva-sabzavot, kartoshka, poliz va uzum mahsulotlari ishlab chiqarish hamda ishlatish prognoz koʻrsatkichlari haqida”gi qarori toʻgʻrisida”gi qarori ijrosini bajarish, tumanda 2014-yilda yetishtiriladigan meva-sabzavot, kartoshka, poliz va uzum mahsulotlarini ishlab chiqarish xamda oʻz vaqtida qayta ishlashni taʼminlash uchun optimal sharoitlar yaratish maqsadida qaror qilaman:

1. Viloyat hokimining 2013-yil 23-noyabrdagi 243-Q sonli “Oʻzbekiston Respublikasi Vazirlar Mahkamasining 2013-yil 20-noyabrdagi 311-sonli “2014-yilda meva-sabzavot, kartoshka, poliz va uzum mahsulotlari ishlab chiqarish hamda ishlatish prognoz koʻrsatkichlari haqida”gi qarori toʻgʻrisida”gi qarori rahbarlik va ijro uchun qabul qilinsin.

2. Tuman hokimligi iqtisodiyot boʻlimi, tuman qishloq va suv xoʻjaligi boʻlimi hamda tegishli tashkilotlar bilan birgalikda ishlab chiqqan meva-sabzavot, kartoshka, poliz va uzum mahsulotlari ishlab chiqarish hamda ishlatilishining 2014-yilgi prognoz koʻrsatkichlari toʻgʻrisidagi takliflari 1 va 2-ilovalarga* muvofiq maʼqullansin.

3. Tuman hokimligi iqtisodiyot boʻlimi, tuman qishloq va suv xoʻjaligi boʻlimi hamda tegishli tashkilotlarga:

shaxsiy, yordamchi va dehqon xoʻjaliklarida meva-sabzavot, kartoshka, poliz va uzum yetishtirish uchun yer maydonlaridan samarali foydalanishini nazoratga olish;

meva-sabzavotchilik, kartoshka, poliz va uzumchilik maxsus fermer xoʻjaliklarida mahsulot yetishtirishning ustuvorligini hisobga olgan holda ishlab chiqarishning bashorat koʻrsatkichlariga muvofiq xoʻjaliklarda sabzavot va poliz ekinlari joylashtirilishiga alohida eʼtibor qaratilishini;

2014-yilning 1-martiga qadar fermer xoʻjaliklari va qayta ishlash korxonalari oʻrtasida meva-sabzavot va uzum mahsulotlari yetkazib berish boʻyicha hamda mahsulot yetishtiruvchilarni shartnomada belgilangan mahsulotlar qiymatining 40 foizidan kam boʻlmagan holda kontraktatsiya shartnomalari tuzilishini;

yoqilgʻi moylash materiallari, mineral oʻgʻitlar, oʻsimliklarni himoya qilish vositalari, urugʻlik materiallari va koʻchatlar sotishda samara beruvchi tomorqalarni tashkil qilishni taʼminlasinlar.

4. Tuman ichki bozorida meva-sabzavot, kartoshka, poliz va uzum mahsulotlaridan toʻliq foydalanish masalasini hal qilish hamda mahsulotlarni eksport qilishni samarali tashkil etish maqsadida 3-ilovaga* muvofiq ishchi guruhi tuzilsin.

Ishchi guruhning asosiy vazifasi etib:

2014-yil uchun tasdiqlangan meva-sabzavot, kartoshka, poliz va uzum mahsulotlari ishlab chiqarish hamda ishlatilishining asosiy bashorat koʻrsatkichlari bajarilishini sistemali tanqidiy koʻrib chiqish;

ichki isteʼmol bozorini meva-sabzavot, kartoshka, poliz va uzum mahsulotlarini turlari bilan zaruriy miqdorda, uzluksiz taʼminlash hamda ushbu mahsulotlar narxlari boʻyicha monitoring oʻrnatish;

meva-sabzavot, kartoshka, poliz va uzum mahsulotlari chetga eksport qilishda, tashish, vagonlar ajratilishi, bojxonada rasmiylashtirish va hisobotlar taqdim etilishi bilan bogʻliq boʻlgan masalalarni tezkorlik bilan koʻrib chiqishni tashkil etish belgilansin.

5. Tuman hokimligi iqtisodiyot boʻlimi (A. Mavlonov), tuman qishloq va suv xoʻjaligi boʻlimi (A. Abbayev) hamda tegishli tashkilotlarga Vazirlar Mahkamasining 2006-yil 6-fevraldagi 16-sonli “Belgilangan qiymat va moddiy balans koʻrsatkichlari bajarilishini samarali monitoringini taʼminlash chora-tadbirlari toʻgʻrisida”gi qaroriga binoan tumanda 2014-yilda meva-sabzavot, kartoshka, poliz va uzum mahsulotlari ishlab chiqarish va foydalanish balans koʻrsatkichlarining bajarilishini doimiy monitoringini taʼminlash vazifasi topshirilsin.

6. Aholini hamda qayta ishlash korxonalarini ishlab chiqarilgan meva-sabzavot, kartoshka, poliz va uzum mahsulotlari bilan yetarli taʼminlash monitoringi olib borilishi munosabati bilan:

tuman hokimligi iqtisodiyot boʻlimi tuman hokimligi bilan kelishib, har chorakda hisobot davridan keyingi oyning 5-sanasigacha viloyat iqtisodiyot bosh boshqarmasiga;

tuman hokimligi iqtisodiyot boʻlimi (A. Mavlonov) viloyat iqtisodiyot bosh boshqarmasiga har chorakda hisobot davridan keyingi oyning 6-sanasigacha meva-sabzavot, kartoshka, poliz va uzum mahsulotlari ishlab chiqarish va ishlatilishi haqidagi maʼlumotlarni 4-ilovadagi* shaklga muvofiq umumlashtirsin va iqtisodiyot bosh boshqarmasiga taqdim etsin.

7. Mazkur qarorning bajarilishini nazorat qilish tuman hokimining birinchi oʻrinbosari Z. Niyozov hamda tuman qishloq va suv xoʻjaligi boshligʻi A. Abbayevlar zimmasiga yuklansin.

8. Mazkur qaror rasmiy eʼlon qilingan kundan boshlab kuchga kiradi.