Oʻzbekiston SSJ Prezidentining 1991-yil 4-iyundagi Farmoniga muvofiq hamda qora, rangli metallar parchalarini va chiqindilarini tayyorlash, qayta ishlash va yetkazib berishni yaxshilash, bozor munosabatlariga oʻtish sharoitlarida jumhuriyatlararo va tashqi iqtisodiy aloqalarni rivojlantirish maqsadida Vazirlar Mahkamasi qaror qiladi:

1. Qora, rangli metallar parchalarini va chiqindilarini tayyorlash, qayta ishlash va yetkazib berish boʻyicha jumhuriyat kooperativ birlashmasi (“Uzkoopvtormet” JKB) ilovaga muvofiq tuzilish boʻlinmalari tarkibida tashkil etilsin.

2. Qora, rangli metallar parchalarini va chiqindilarini tayyorlash, qayta ishlash va yetkazib berish boʻyicha jumhuriyat kooperativ birlashmasiga:

qora, rangli metallar parchalarini va chiqindilarini tayyorlash va yigʻish hamda ularni temir-tersak topshiruvchilardan qabul qilib olish;

tayyorlov sexlari va uchastkalarida qora, rangli metallar parchalarini va chiqindilarini birlamchi qayta ishlash;

temir-tersakni isteʼmolchilarga yetkazib berish;

ikkilamchi rangli metallar va qotishmalar hamda ulardan mahsulotlar ishlab chiqarish;

xalq isteʼmoli mollari ishlab chiqarish va birlashmaning firma magazinlari orqali sotish;

ishlab chiqarish chiqindilarini sotish vazifalari yuklansin.

3. Belgilansinki, “Uzkoopvtormet” faoliyatida davlat, kooperativ, qoʻshma, ijara, xususiy va jamoat tashkilotlarining, korxonalarning, shuningdek tadbirkorlik faoliyati bilan shugʻullanuvchi shaxslarning ixtiyoriy qatnashuvi nazarda tutiladi.

“Uzkoopvtormet” JKB:

oʻzining xoʻjalik va huquqiy maqomini saqlagan holda shartnoma asoslarida ittifoq va jumhuriyat davlat, kooperativ va aralash birlashmalar va uyushmalarga ixtiyoriy ravishda kirishi mumkin;

moliya-iqtisodiy, xoʻjalik va ijtimoiy faoliyat bilan bogʻliq barcha masalalarni mustaqil hal qiladi, yetkazib beruvchilar, isteʼmolchilar, pudratchilar, budjet bilan hisob-kitob qilish uchun bank muassasalarida pul va xorijiy valyuta mablagʻlari schyotlarini ochadi, uzoq muddatli va qisqa muddatli kreditlardan foydalanadi;

Oʻzbekiston davlat metallurgiya sanoati konserniga va SSJI Metallurgiya vazirligiga hisob beradi.

4. Belgilansinki, “Uzkoopvtormet”ning tayyorlov tashkilotlari va temir-tersak topshiruvchilar oʻrtasidagi oʻzaro munosabatlarni boshqaruvchi asosiy hujjat shartnoma hisoblanadi, unda qora, rangli metallar parchalarini va chiqindilarini yigʻish, tayyorlash va qayta ishlash hajmlarini koʻpaytirishdan tomonlarning moddiy manfaatdorligini taʼminlovchi oʻzaro majburiyatlar aniq belgilanadi.

Shu maqsadda:

shartnoma bevosita belgilangan topshiriqlarga muvofiq korxonalar va tashkilotlar bilan, shuningdek boshqa temir-tersak topshiruvchilar bilan tuziladi;

shartnomada tomonlarning oʻzaro majburiyatlari, temir-tersak yetkazib berish hajmlari, assortimenti, sifati va muddatlari boʻyicha topshiruvchining, oʻz vaqtida haq toʻlash boʻyicha tayyorlovchining majburiyatlari aniq aks etishi kerak.

5. OʻzSSJ Iqtisodiyot qoʻmitasi “Uzkoopvtormet”ning temir-tersak topshiruvchilar bilan shartnomalar tuzishini 1-yanvargacha tugallashi uchun har yili 1-oktabrgacha jumhuriyat vazirliklari va idoralari boʻyicha qora, rangli metallar parchalarini va chiqindilarini tayyorlash yuzasidan davlat buyurtmasi loyihalarini tayyorlasin.

6. “Uzkoopvtormet”ga tayyorlanadigan qora, rangli metallar parchalari va chiqindilari, sotiladigan mahsulot, shuningdek ishlab chiqarish chiqindilari uchun shartnomaviy narxlarni belgilash huquqi berilsin.

7. OʻzSSJ Iqtisodiyot qoʻmitasi, OʻzSSJ Moddiy-texnika taʼminoti davlat-kooperativ qoʻmitasi, OʻzSSJ Neft mahsulotlari bilan taʼminlash davlat qoʻmitasi, Qoraqalpogʻiston MSSJ Vazirlar Kengashi, viloyat ijroiya qoʻmitalari va Toshkent shahar ijroiya qoʻmitasi temir-tersak topshiruvchilarni maqsadli ragʻbatlantirish uchun “Uzkoopvtormet”ga belgilangan nomenklaturadagi moddiy-texnika resurslarini, shu jumladan, ehtiyoj katta boʻlgan tovarlarni belgilangan tartibga muvofiq ajratishni nazarda tutsinlar.

8. “Uzkoopvtormet” oʻziga yuklatilgan vazifalarni hisobga olib va birlashmaning ustaviga muvofiq boshqaruv apparati tuzilishini va ish haqi toʻlash fondini mustaqil ravishda belgilasin, ularni taʼminlash oʻziga qarashli boʻlinmalarning ajratmalari hisobidan amalga oshiriladi. Xodimlarning eng koʻp soni 135 kishidan iborat qilib belgilansin.

“Uzkoopvtormet”ga birlashma raisining toʻrt nafar oʻrinbosari, shu jumladan, bir nafar birinchi oʻrinbosari boʻlishi tavsiya etilsin.

9. “Uzkoopvtormet”ga bir oy muddat ichida Oʻzbekiston davlat metallurgiya sanoati konserni bilan kelishilgan, mazkur qaror, amaldagi normativlar hamda Oʻzbekiston SSJ qonunlari hisobga olingan holda birlashma Ustavini ishlab chiqish va tasdiqlash tavsiya etilsin.

10. “Uzkoopvtormet”ga mahsulotni eksportga va ishlab chiqarishni rivojlantirish uchun, belgilangan tartibga muvofiq, asbob-uskunalar, materiallar, tovarlar sotib olish boʻyicha tashqi iqtisodiy faoliyatni amalga oshirishga ruxsat etilsin.