Oʻzbekiston Respublikasi Vazirlar Mahkamasining 1998-yil 31-dekabrdagi 548-son va 1999-yil 13-yanvardagi 16-son qarorlarini bajarish yuzasidan hamda xorijiy investitsiyalarni jalb etgan holda respublika avtomobil sanoati ishlab chiqarish bazasini shakllantirish va rivojlantirish maqsadida Vazirlar Mahkamasi qaror qiladi:

1. “Oʻzavtosanoat” uyushmasining “Andijonkabel” aksiyadorlik jamiyatining ishlab chiqarish maydonlarida Janubiy Koreyaning “Kodji Indastri Ko. Ltd” kompaniyasi texnologiyasi boʻyicha “OʻzDEUavto” aksiyadorlik jamiyati avtomobillari uchun sim oʻrovlari ishlab chiqaradigan, yiliga 160 ming toʻplam avtomobil oʻrovlari ishlab chiqarish quvvatiga ega boʻlgan “OʻzKodji” Oʻzbekiston — Koreya qoʻshma korxonasi tashkil etish toʻgʻrisidagi taklifiga rozilik berilsin.

“OʻzKodji” qoʻshma korxonasi ustav jamgʻarmasi tuzilmasi va ishlab chiqarish dasturi 1-ilovaga* muvofiq maʼqullansin.

2. Quyidagilar maʼlumot uchun qabul qilinsin:

Janubiy Koreyaning “Kodji Indastri Ko. Ltd” kompaniyasi qoʻshma korxonaning ishlab chiqarish quvvatlarini rekonstruksiya qilish uchun import texnologik asbob-uskunalar hamda materiallar bir qismi qiymatining 85 foizini toʻlash uchun “OʻzKodji” qoʻshma korxonasiga 870,3 ming AQSH dollari miqdorida kredit beradi;

xorijiy kredit va uning boʻyicha foizlar 2-ilovaga* muvofiq “OʻzKodji” qoʻshma korxonasining oʻz mablagʻlari hisobiga toʻlanadi;

import asbob-uskunalar va materiallar qiymatining 15 foiziga teng boʻlgan 153,6 ming AQSH dollari miqdoridagi avans toʻlov “OʻzKodji” qoʻshma korxonasining ustav jamgʻarmasi mablagʻlari hisobiga amalga oshiriladi;

ishga tushirishgacha qilinadigan xarajatlarni mablagʻ bilan taʼminlash, aylanma mablagʻlarni shakllantirish va ishlab chiqarish quvvatlarini rekonstruksiya qilish xarajatlari “OʻzKodji” qoʻshma korxonasi ustav sarmoyasi hamda tijorat banklari kreditlari hisobiga amalga oshiriladi.

4. Kreditlar va ular boʻyicha foizlarni toʻlash davrida “OʻzKodji” qoʻshma korxonasi import qilinadigan asbob-uskuna, xom ashyo, materiallar va mazkur loyiha boʻyicha zarur boʻlgan butlovchi buyumlar uchun bojxona toʻlovlaridan ozod qilinsin, bojxona rasmiylashtirishi uchun yigʻimlar bundan mustasno.

5. Oʻzbekiston Respublikasi Moliya vaziri mazkur loyihani amalga oshirish uchun jalb etiladigan kreditlar, shu jumladan xom ashyo, materiallar va butlovchi buyumlar xarid qilish yuzasidan kontraktlar boʻyicha “OʻzKodji” qoʻshma korxonasining muddati uzaytirilgan toʻlovlari boʻyicha Oʻzbekiston Respublikasi Hukumati nomidan belgilangan tartibda kafolatlar berishga vakil qilinsin.

6. “OʻzKodji” qoʻshma korxonasiga, loyiha hujjatlarini 2000-yil 1-noyabrgacha tasdiqlagan holda, ishchi chizmalar boʻyicha korxonani loyihalash va qurish ishlarini bir paytda olib borishga, istisno tariqasida, ruxsat etilsin.

7. Oʻzbekiston Respublikasi Ichki ishlar vazirligi “OʻzKodji” qoʻshma korxonasi buyurtmanomalariga binoan xorijiy mutaxassislarga koʻp martalik vizalar berishni va ularning muddatini uzaytirishni, shuningdek, ularni davlat bojlari toʻlashdan ozod qilgan holda, yashash joyida vaqtinchalik roʻyxatdan oʻtkazishni va uning muddatini uzaytirishni taʼminlasin.

8. “OʻzKodji” qoʻshma korxonasi masalalari boʻyicha ishlarni bajarish uchun kelayotgan xorijiy mutaxassislarga respublika hududida yashash va transportning barcha turlarida yurish uchun milliy valyutada va Oʻzbekiston Respublikasi fuqarolari uchun belgilangan tarif stavkalari boʻyicha haq toʻlash huquqi berilsin.

9. Tashkil etilayotgan “OʻzKodji” qoʻshma korxonasiga “OʻzDEUavto” aksiyadorlik jamiyati avtomobillari uchun butlovchi buyumlar ishlab chiqaruvchi sifatida Oʻzbekiston Respublikasi Vazirlar Mahkamasining 1992-yil 5-noyabrdagi 509-son qarorining 8-bandi joriy qilinishi maʼlumot uchun qabul qilinsin.

10. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ. T. Sultonov zimmasiga yuklansin.